بدلت وارتاحيت شويه ورحت لاهلي ومفاجئه كانت صادمه الي گالو رشيد كطع مهر اني انثاريت وگلت شبسرعه وشعرفتوا عل البنيه هيج بساع تكطعون مهر
گالت امي ترى الناس خوش ناس والبنيه صغيره وحلوه
شنو عشيرتها
والكل سكت
شبيكم متعرفون شنو اصلها
اجه رشيد وسلم عليه هنيته عل خطوبه
جان فرحان كلش
رجعت ورحت عل اختي مكلتي البنيه من يا محافظه
كلهم ساكتين
رد رشيد وكال خطيبتي من دهوك واهنا اني انثاريت ولكم يعني نسرين لخ بحياتنه
واهله شكد رادوا منكم ذهب بيوم نسرين كسرتوا ظهري بالذهب مالتها وتالي لعبت بيكم طوبه احجوا كيلو ذهب طلبوا منكم وبعدين شبساع انطوكم شنو ميردوها
واهنا گام رشيد الي اني كبرته وسويته رجال
هسه احنا شحصلنا من مدام مالتك بنت اصول ال استاذة جامعيه
متحملت وردت اضربه امي وكفت بيناتنا وگالت اهل البنيه مارادوا شي بس حلقه ومحبس يمه ترى مو كل اصابيعك سوه البنيه يتيمه لاتعارض
خليت وطلعت من بيت اهلي وكرهت جنان كره مو طبيعي من وراها الكل تنتقدني ورجعت للبيت وخليت راسي ونمت وصادف بعد كم يوم عيد اضحى وامي دزت الي اخوي تريد كم فلس تشتري هدوم للعروس حتى تطلع ويه رشيد لان احنه جنه اذا وحده ناخذه نلبسه ربطه وجبه منقبل غير شي ودزيت فلوس الهم حتي يشترون. محبيت اروح لااهلي الإ للعيد احسن ما اسمع حجي واضوج وانغث وبهاي الفتره جنان ولدت وهم قيصيريه وجابت بنت ثانيه الي سميته رقيه
وصار العيد واحنه بالعيد كلنا ننجمع يم امي ونتغده ورحت اني ومها لبيت اهلي لبسته حلو وسويت الها شعرها وانجمعنا والكل زوجاتهم يمهم بس اني وحدي گاعد يم امي سالت عل رشيد گالو راح يجيب خطيبته شويه ضجت بس محجيت شي ظليت ساكت واكول اذا طلعت مثل نسرين شراح اسوي اني وبااخص هسه اني معايش وياهم واجه رشيد كان رشيد اشقر وطويل بس مبهذل ومخربط ومدلل لهذا مضيع شخصيته بالخربطه مالته. ودخل رشيد وسلم علينه وهيه كانت وراه واگفه بسده صوتها ناصي ابد مينسع كانت كلش جذابه عمره يمكن 16سنه ضعيفه وطولها زين عيونه كبار وناعسات بشرتها بيضه عل وردي عبالك لعابه طبعا لان لابسه ربطه مشفت شعرها
يعني لو اني مزوح منوگت كان بنتي بگبرها گلت بگلبي هسه فقيره وبعدين نشوف شنو تاليتج بس اني الج بالمرصاد اني نسرين هججتها عاد انت الي بگد بنتي ظليت ساكت ومحجيت شي بعدين بدو يحطون اكل واكلنا وللعصر كلت اروح للبيت لان تعبت ثم جنان هسه ميته جوع خلي اخذ الها منا اكل احسن ماارجع واسوي اله وصيت مرة اخويه تحط الي شويه اكل بسفر طاس بديت ادور عل مها ماكو ويه جهال طلعت للحديقه واشوف مها يم خطيبة اخويه تسوي شعرها وتعدل بهدومها صحت عل مها اجت ركض واخذت اكل وطلعت من وصلت للبيت كان اكو ناس بالفرع جديدين كاعدين وبعدهم يحولون بغراضهم مبين كلش بسطاء من غراضهم سلمت عل رجال ودخلت جوه واهنالك تملكني فضول اسال مها عل خطيبة اخوي وسالته گالت كلش حبابه وحلوه وهيه سالته وين امج مها مجاوبته بالبيت عدها نونو حطيت اكل لجنان ورحت نمت
وره العيد بفترة اتزوج رشيد وصدك اهل البنيه ابد مطلبوا شي عبالك ميردوها كان ابوها وامه متوفين وعده سته اخوه وبس هيه بنيه
وطبعا منذر جيب وجيب حسيت اهلي يعرفوني بس بالفلوس عبالك گدامهم بنك كلما يردون فلوس يجون ياخذون
صح همه اهلي بس هسه كلهم صاروا زلم لازم يعتمدون عل نفسهم كبرتهم وحتى احسن كليات دخلتهم وحتى اخواتي من ازوجوا اني جهزتهم احسن جهاز (احنه مصالوه عدنه البنيه تكون جاهزه من كلشي حتى لو اهل الولد يجهزون لازم نجهزها بكل شي) ومرت ايام وبيوم دا اغسل كراج اندك الباب وفتحته كانت امراه يطلع عمرها بدايه الثلاثين حنطاويه وطويله وعيون سود ولابسه عبايه مال راس وياه ابنها
شونك اخويه
اهلا
اني ام علي جيرانكم الناس الجدد
تفضلي
عيني اني ارمله بلكي تكدر تشوف احد يريد اساعده بنتظيف البيوت اني مااعرف احد بلكي تساعدني
ظليت صافن عليه حلوه حرامات هيج تضيع بالخدمه
صار اختي صار الله كريم اشوف الج وارد الجواب الج
وخلت وراحت
واني ظليت صافن شكد تقهر خطيه
أنت تقرأ
حب بعد سن الاربعين
Romanceمنذر مواليد 55 حنطي. انسان عصامي هو من لموصل لكن والده من عمره 15 عاش ببغداد. عنده 10 اخوه و5 بنات
