✍️ بقلم ✍️
(( اساور العزاوي ))
خلي أعرفكم على نفسي 😊
اني اسمي .. ( شهم ) .. عمري ٢٨ سنة
طويل القامة جسمي مليان .. طبعي عصبي جداً
بس بنفس الوقت گلبي طيب
اهواي عندي مُعجبات بس ما أحب اسوي علاقة ابأي بنت
لان قبل ٨ سنوات حبّيت وحدة وياية بالدوام ..... واتفقنة
على الزواج بس انكمل امورنة .. بس بعد شهر اجتي وكالت :
اني انخطبت وراح اتزوج .. رغم چنت اني كلّش أحبها !!
عافتني وراحت چان عمري عشرينا صغير بس انقهرت
من تركتني بس چنت طايش يعني بفترة قصيرة نسيتها ..
ما أحب الإنسان الّي يبيعني .. طلعت من عيني وراحت
الله يسعدها .. وحالياً اني مُعلم أداوم ابمدرسة إبتدائية للبنات .. إحنة عائلة تتكون من ٣ أولاد وبنيّة وحدة ..
الكل متزوّج وطالعين ، فقط اني أعزب .. وأقرب شي إليَّ
من العائلة .. حمودي حبيب خاله
ابن اختي عمرة ٤ سنوات هذا فد واحد أبو لسان وكلّش حلو
بس مصلحچي 😂
من يجي ويا اُمة يمنه يقشمرني ويخليني أصرف كل فلوسي
عليه .. اُمي تشوف تعلقي بكل الأطفال !
وتكوم اتلح علية أتزوج ..
اُمي چانت اتلح عليه اتزوج وما أتزوج .. أريد افرح بيك
خابصتني يومية أسمع هل اسطوانة من الصبح .. بس اني
ماشفت الإنسانة الّي تعجبني و أكمل وياهة حياتي !
يوميّة جايبتلي صورة وحدة
و أكلها .. لا ، ما عجبتني ❌ .. واُمي تريد تاكلني ..
اُم شهم : " ابني اشطلعت وياك احتارينة وياك جبنالك الطويلة
والگصيرّة والضعيفة والسمينة .. مدگلي إلمن اتريد ؟؟
والله متلگة أحسن من مُنى بنت أخوية سمير ..
شهم : " يمّة ترة هي أذواق ! وبعدين هاي عِشرَة عُمر ..
