Ganat Alomr
عباس : بقيت انتضر واحس الوقت وكف مسافه كلش قليله ليش تأخرو عليه هلكد ..بقيت حاضن درر وكابس ع الجرح حيل ردت اوكف النزيف
خلال دقايق سمعت صوت سيارات وشفت اضويه ..كمت ركضت عليهم السياره بعدها مواكفه واني فتحت الباب ونزلت ابن عمي كان هو يسوق .. الكل تسالني شصار ومن ضربك احجي ... ولكم شحجى اني بحال الي ضربني هسه اكولهم درر مصوبه ركضت شلتها وحطيتها بالسيارة قبل مااصعد سمعت ابن عمي صاح شيخنا هاي منعديها ترة اليوم نهجم قريه الشيخ ضاري على روسهم ......
صحت بعلو صوتي وك شتهجم وك بنتهم ويايه ومصوبه مستحيل يهجمون عليه واني طالع من بيتهم وبنتهم ويايه ارجعو للبيو ويصير خير انشاالله ....
لا شيخنا مكملين الطريق امشي واحنا وراك ..
طلعت بالسيارة كل سرعتي واني عين ع الطريق وعين ع درر وكل لحظه احس كَلبي يريد بمجرد يتباطي نفسها .. بقيت حاط ايدي ع الجرح وامشي ... وصلت بيها للمستشفى شلتها ونزلت اركض احس اقدامي بعد متساعدني امشي الخطوة ليكدام احسها ترجع ليوه تلكونا الكادر الطبي حظرو السديه بسرعه ... اخذنا دخلوها عمليات واني بقيت انتضر على احر من الجمر ولد عمي يمي ميه الف سؤال سألو انته وين جنت ومنو صوب عليك وشلون .. واني سارح افكر بكلماتها الاخيرة من كالت والله احبك ..تمنيت تعرف اني اموت عليها قبل متفقد وعيها ... بعد شويه جوي عليه الممرضين كَوة اخذوني لغرفه التضميد لان مجرح بوجهي وايدي ضمدو جروحي وطلعت رجعت انتضر يم صاله العلميات شويه وشفت الطبيب طلع من الصاله ركضت عليه ... بشرني دكتور .
الدكتور : سلامات انشاالله مداخله الطلقه بعمق طلعناها وبعد شويه انشاالله تصحى وتكدرون تشوفوها ... بس لازم تقدم بلاغ عن الحاله لان دخلناها على مسؤؤليه المستشفى لان احنا نعرف
عباس : الله كريم هسه بس خل اشوفه اصلا مااعرف منو رمى علينا
بقيت انتضر هلكت من التعب واخيرا سمحولي ادخل اشوفها دخلت يمها نايمه ع السرير وجهها اصفر ولونها شاحب حيل بقيت اباوع عليها ودموعي تجرني لزمت ايدها كون بيه ولابيج اني كل الي صارلج من ورايه حسيت ايدها ضغطه على ايدي رفعت راسي كانت فاتحه عينها .. قربت ايدها من وجهي ومسحت دمعتي
درر : دموعك غاليه عليه مااريدها تنزل ...
عباس : الحمد لله ع السلامه ياعيوني سامحنى على الي سويته بيج والله مااقصد
درر : ماكو داعي تتاسف واني كل لحظه احبك ازيد واعشق نضره الغيرة الي بعيونك ... عباس اني
عباس : كولي عبيسان ياروح عبيسان وكَلبه
درر : عبيسان اني احبك لان انته تستاهل تنحب .. اني اعرف بحبك اليه بيوم الي كنت ويا بابا بالمستشفى وسمعتك .. تسال روحك هم يجي يوم وتكولين عبيسان احبك .. وهاي اني حبيتك وهم سمعتك من كلت اموت عليج من اول لحظه شفتج بيها .. بس بلحظتها حسيت راح اموت لهذا السبب غمضت عيني لان مااريد اسمع غير هاي الكلمه
عباس : ولج انتي لو باقيه مفتحه جان سمعتج كلام احلى بعد وج شعبالج جا انه معدل واعجبك .. بس انتي الخسرتي
درر : ههههه احجي هسه اسمعك
عباس : لا عيني لا بعد مااحجي استحي 😉😉😂😂😂
اكول بزونتي انتي مجوعانه
درر : اكول عبيسان شو انته كل همك الاكل اسمك تسألني جوعانه لو لا
عباس : مو اني جوعان ... مااكلت زين يم اهلج . . خفت لا انتي طابخه وانوب اسمم 😂
درر : لا والله ع اساس طاح بأيدك تاكل من ايدي .. عباس ترة تعبت وبطني توجعني حيل
عباس : ياعيوني ارتاحي لاتحجين .. والجرح لازم يوجع تحملي شويه وحاولي تنامين
درر : عباس اريد بابا .. خل يجي
عباس : محبيت انطيهم خبر بهل الليل وانتي تعرفين ابوج مريض ماكو داعي .. انشاالله باجر ننطيهم خبر .. زين عمري يله نامي شويه .. نامت درر واني بقيت كاعد انتضر طلع ضوه الفجر رحت طلعت للحديقه وبقيت افكر ياترى منو الي سوى هيج بيه احنا ماعدنا مشاكل ويااحد. . ومشاكلنا وي عشيرة الشيخ ضاري وفضت .. صفنت معقوله هذا ادهم .. لا لا ميسويها مستحيل بقيت بهل التفكير والقلق ياكل بيه .. درر صحت و ودت عليه الممرضه
.. دخلت للغرفه صباح الخير ياعيوني
درر : صباح النور .. عباس تعال هنا اريد احجي وياك ..
عباس : احجي اسمعج
درر : تعال تقرب عليه ... لزمت ايده عباس الكلام ثكَيل بصدري ومااعرف شلون اكَوله لو انته راح تتقبله او لا
عباس : درر احجي لاتخوفيني اني ممكن اتقبل منج كل شي
درر : ضغطه على ايده حيل انطيني وعد لو الي كلته صدك ..متتصرف اي تصرف بتهور
عباس : وغلاتك عندي مااسوي شي .. من ضغطه على ايدي باوعت عليها حسيت الخوف مالي عينها وحسيت الموضوع الي رح تكوله يخص الي صار ويانه
درر : اني شاكه ادهم هو الي هجم عليك
عباس : وليش هذا الاحساس منين جاج يعني . . ادهم شلون يهجم عليه وانتي ويايه
درر : ادهم حاول يمنعني اجي وياك ... اني تفاجئت من رده فعله بس اني كنت مستعجله سمعته يكوله لاايهم لاتخليها تروح وياه .. ايهم رد عليه هو زوجها ليش حتى متروح وياه
عباس : وغلاتج عندي اذا تأكدادهم الي مسوي هاي الشغله وغلاتك ماافوت هاي طيحتج
درر : انته وعدتني متتهور وبعدين حتى لو هو هم يبقى اخويه ..عباس لخاطري اذا اذيته يعني راح تأذي ابويه وبالتالي تذبحني اليه
عباس : جا هو مافكر بأخته الي ويايه وخاف عليها لااصيبها طلقه وانتي ترديني افكر
درر : اريدك تفكر بيه .. قبل لاتفكر بغيري
عباس : الله كريم هسه اطلعي من المستشغى ويصير خير تقصدت اتصلت على اهل درر واني مكنت ناوي اتصل الاتتحسن حالتها بس ردت اتاكد هو ادهم الي مسويها ولا لا .. وبعد اتصالي جوي الولد وعمي الشيخ .. وهم نفس الاسئله ليش وشلون ماعدا ادهم الوحيد الي ساكت ومسال وطلب يشوف درر اشرتله ع الغرفه ودخل شافها
درر : دخل ادهم اول واحد عليه للغرفه تفاجئت عباس كالي مااكوللهم هسه نزل عليه باسني والحمد لله ع السلامه شلون صرتي ..
درر : ادهم اني انطيت فصليه واني بال 17 من عمري كله حتى يوكف بحر الدم الي بينكم .. وانته مُصر تبقى على تفكيرك واسلوبك وهل المرة اني بالنص انته شلون سخيت بيه ولك اني اختك الصغيرة
ادهم : مسخيت بيج اني .. انتي اختى الصغيرة الي اريد ارجعها لبيت ابوها وهي لسه ب 17 من عمرها
درر : بديت اصيح عليه ليش نطيتوني لعد من انته هيج حريص عليه .... يله ارتاح هاي اني الي اصوبت وهم لو مصوب عباس رجلي ... وركز على رجلي مجان سامحك .. ادهم من هل اليوم ورايح لاانته اخويه ولااعرفك اخ الي يسخى بيه مااريده ولااريد اشوفه
ادهم : درر انتي صدك تحجين واني الي ردت ارجعج لبيت ابوج
درر : ترجعني لبيت ابويه ارمله؟؟؟؟
ادهم : ماكو غير حل
درر : ادهم اطلع برة ومااريد اشوفك ولااعرف عنك شي دخلو بابا ايهم وعباس محبيت ابين شي .. بس كل شي كان واضح بالنسبه لعباس .. طلع ادهم عباس طلع يركض وراه اشرت لاايهم حتى يلحكهم .. وسويت نفسي اريد بس بابا يبقى يمي .. حضني بابا ونام بصفي حسيت بالاطمأنان بوجوده <br>
عباس : ادهم اوكف دقيقه ..
ادهم : خير .. مستعجل اريد اروح وعندي شغل شفت درر ورايح
عباس : وين تروح قبل منحجي .. ادهم اني جان شاك انته الي سويت هاي السوايه وهسه تاكدت .. بس الي شفعلك درر حلفتني اذا تأكدت انته مسويها مااسويلك شي .... اووووف لو متاكد قبل متاخذ عليه وعد
ايهم : سمعت كلام عباس تخبلت لزمت ادهم لك معقوله انته هيج اسوي احجي الي يكوله عباس صحيح
ادهم : وخر ايدك ممسوي شي اني دفعت ايهم وعفتهم وطلعت
ايهم : بقيت صافن شريد احجي هذا مو اخ ومو كلب الي شايله حجر ولك اختك مافكرت يصيرلها شي .. بقيت محرج من الولد مااعرف شكوله سالته درر عدها علم
عباس : درر هي الي كالتلي اني جنت شاك بس كلت مستحيل بس هي اكدتلي الموضوع.... انسى خويه انسى منا وهيج احنا من درب وهو من درب تعال خل نشوف درر
وبعد كم يوم طلعت بزونتي من المستشفى وهي حالتها الحمد لله كلش زينه .. طلبت منها تروح ويااهلها للبيت بس هي بالبدايه مقبلت ورفضت بشده كالت مااريد اشوف ادهم بس اني اصريت عليها كتلها العصر اجي اخذج والله
درر : عباس ليش تضغط عليه مااريد اروح اريد ارجع وياك
عباس : بزونتي ليش تعاندين ... العصر اني اجي اخذج والله
درر : ماشي رح اروح ويا بابا .. بس تاخذني العصر واذا مجيت بعد لاتجي عليه زين
عباس : ههههههه لا والله اجي شلون مااجي
طبعا اني كنت متفق وياايهم ومحظر حفله عرس وزفه تخبل وكل شي جاهز وفستان العرس بالبيت واتفقت ويا حتى يجهز البيت ويحظرة والعرس نروح نجيب العروسه من اهلها .. اني وصلتهم للبيت بدون ماادخل مااريد احرك المفاجئه ورجعت لااهلي حتى اكمل تحضيرات العرس
درر : دخلت للبيت كانت اجواء البيت غريبه ..اول مدخلت امي نجمه تهلهل واطش جكليت عليه اني توقعت حك سلامتي صعدوني لغرفتي شفت فستان ابيض وايهم واكف بالغرفه وومكياجات وشغلات كلش حلوة ... عرفت ايهم متفق ويا عبيسان على هاي التحضيرات رحت ركضت على ايهم حضنته .. واني اكول وين مختفي صار يومين وممريت عليه ثاري مشغول بهاي التحضيرات .. شكرا يااحلى اخ بالدنيا
ايهم : على كيفج على كيف يروحي جرحج لسه رطب وبعدين اشكري عباس هو صاحب الفكرة وهو حضر لكل شي اني شويه مساعده وجبت الفستان لان هو جان مكابل حضرتج وميكدر يعوفج
درر : فرحت حيل كان اليوم كلش حلو واكثر شي فرحت بالفستان الابيض حلم كل بنيه..... بس قبل كل شي طلبت من بابا ان تنكص الشجرة الي كان يكتب عليها علي قبل ميصير العصر.. وفعلا خلال اقل من ساعه راحت هاي الشجرة وراح كل شي وياها.....َ لبست الفستان وسويت شعري حطيت مكياج ناعم وخفيف وطبعا عبيسان جايبلي شي شلون التاج وبي شغلات شلون الاذانات ..خليته على شعري طلعت صدك بزونه 😉😉مبقى شي للعصر والتحضيرات مستمرة ابيتنا والنشرات بكل مكان وبابا طاير من الفرحه ..سمعت صوت اغاني وموسيقى وامي نجمه كالت جا عباس جان جاي ويا اهله وهوايه سيارات دخل عليه هو والموسيقى كان طالع يجنن لازم قاط لونه نيلي وهو ابيض ولحيته شكرة طالع يخبل ..كعد يمي وهو يكَول يربي شطالعه بزونتي تخبل وج طالعه كمر يروحلج فدوة البنات يااحلى البنات انتي ... وبعدها طلعنا من بيت اهلي بزفه وعرس وكان احلى يوم بحياتي رحنا لبيت الشيخ عباس ومن اول مادخلنا صرت مرة الشخ عباس رسمياً ... ومر اربع سنين على زواجي بعباس علاقتي بأدهم مقطوعه نهائيا بعد الي صار ..ومااروح لبيت اهلي نهائيا وعلاقتي بنمارق كذالك كلش سطحيه بابا دائما يجي عليه لبيتنا وكل خميس نروح نزور ماما .. اما اديهم فبعد الاحداث الي صارت رجع لبغداد واستقر هناك ووصارو بعد عنده اطفال اثنين واحنا دائما نروح لبغداد نزورة ... اما اني وعبيسان عايشين احلى حياة وصار عندي ولد سمينا وعد ..وهسه حامل وعبيسان لسه مُصر يصيحلي بزونتي ودائما يسالني نفس السؤال بزونتي مجوعانه ... ها ونسيت اكوللكم عبيسان يغار من اكثر متتصورون ودائما يكولي انتي تحبي اكثر مني .....
خلصت قصتي وياكم اتمنى نالت اعجابكم واحب اسمع ارائكم بيها .... حبيت انوه ان القصه من وحي الخيال وطبعا اعتذر عن الاخطاء الاملائيه وكذالك اعتذر اذا مااجدت باستخدام المفردات في بعض المواضع لان اني كلش بعيده عن اهل الجنوب الرائعين ولغتهم الراقيه جداً ...
انتضرو بقصص جديد واحداث مشوقه ... مع تحياتي الكاتبه
Ganat Alomr
