خرجت سمر للحديقة وهي تنحني قليلا للامام لان العمر يمضي ومضى بها لسنوات كثيرة ولكنها ما زالت كما كانت قويه وعنيدة ولم ترضى على ما حدث سابقا ولكنها مجبرة على التعايش معه ،
ازل : بيبي حبيبتي محتاجة شي
سمر : ياريت لو مااسوف خلقتج كل يوم من الصبح
ازل شعرت بالحزن وخرجت من المنزل بسرعة ، وعادت سمر تشرب قهوتها ولكن فجاءة زادت الضوضاء وبدأ صوت قوي يرطم البيت
سمر : شويه شويه راح يوكع البيت على راسنا
كارلا : ووكعتهم بلكت تكوتين ونخلص منج ، كون الثريا اطب بنص راسج
سمر ؛ ما عندج اخلاق شجاوبج مثلا
كارلا : اي والله ماعندي اخلاق مادري شربيتي مني وعلمتيني
سمر : رعنة وطايحة حظ وحرامات ضيعت سنيني وتعبت عليج
كارلا : اي مدشوفين وين سنينج ضاعت 🤣 عليج الله باوعيلي زين ، ركزي عليه
سمر : قردة بهيئة انسان
كارلا : الله يرحمة امي لو عايشة ع الاقل تربيني واطلع عاقلة ومحترمة مثل اختي مو خبلة ولساني طويل على جديتي
سمر : والله حرامان التعب بيج
كارلا اخذت تفاحة من الصحن وقضمت القليل منها واعادتها للصحن : ادري بيج خربتي اخلاقي علمود تنتقمين من امي بس ارتاحي لا عشتي ولا راح تعيشين وتشوفين هذا اليوم وكلها تدري اني تربيتج مع الافس الافس الشديد القوي كلش 🤣
سمر : مع الاسف
كارلا : جاااااو بيبي
حملت حقيبتها على ضهرها وبدأت تركض على الرصيف وشاهدت ازل تجلس على احد المصاطب ، جلست بجانبها واخرجت قنينة الماء ورمت الحقيبة جانبآ وبدأت تسرب الماء
ازل : نشاط اليوم
كارلا : لا والله اتأخرت على المدرسة وكلت اركض علمود الحك
ازل : ههههههه
كارلا : اكلج تعالي نطلع سوة ونعوف المدرسة والجامعة اليوم
ازل : حبيبتي بعديني عن دياحاتج لان ما ناقصني
كارلا : هو انتي ليش هيج بومة ومعقدة
ازل : مالي خلك الج ترا من الصبح بيبي غثتني
كارلا : وانا اختج عبالج فوتتها الها ، وداعت ماما بقبرها سميتها وغثيتها يلا طلعت
ارل امسكت يد كارلا : حبيبتي تعلمي لتعاملين الناس مثل ما يعاملوج لان انتي اخلاقج غير عنهم ولتصيرين تشبهيهم وبعدين هاي جدتنا ومسؤولة علينا ومالنا غيرها
كارلا : بالله دروحي محد طيح حظنا غيرج والله بس اعبر عمر ال ١٨ اطالب بحقي وثروتي منها وانتي ضلي بهاي مبادئج وسوالفج التعبانه . تركتها واكملت ركضها نحو المدرسة اما ازل فصعدت للحافلة واتجهت لجامعتها وهي منزعجة من تفكير كارلا وسخطها ، كانت طوال المحاضرة شاردة لذالك كانت اقرب فريسة للأستاذ ليحرجها امام طلابه فشعرت بحزن كبير فوق حزنها المتراكم ، اكملت محاضراتها وذهب الى منزل صغير جدآ ، طرقت الباب وبعدها دخلت وجلست بجانب المدفئة ، رتلت يد مليئة بالتجاعيد على كتفها وقالت : ليش ضايجة
ازل : مرات احس اني انسان غير مرغوب بيه ومحد يحبني
_ بس اني احبج
ازل ؛ اني هم احبج
_ تتوقعين الاحباط ممكن يفيدنا بشي !
ازل : لا بس حالة لازم نمر بيها
_ احلى شي كسر القوانين
ازل : كسرتي القوانين مرة وحدة وساعدتي ماما وشوفي حالتج وين صارت ، لازم نجاري القدر ونخليه يتنفذ بكل حذافيرة
_ مرات احس انتي ندمانه اكثر مني لان ساعدت امج علمود ترجع لابوج
ازل : الاقدار مكتوبه وكان الواضح انه قدرهم ميريد يجمعهم ، حبهم القوي كان مكتوب عليه بالفراق بجميع الحالات حتى مساعدتج لماما راحت بدون فايدة ونجمعوا لبرهة من الزمن وهم افترقوا بعدها ، ليش نخالف قدرنا اذا كان مكتوب من البدايه ونعرف بيه
_ اني مامهتمة لان تعاقبت من الملائكة وتم تحويلي من ملاك الى مجرد بشريه لا قوى ولا فايدة الها غير بس تعيش بسلام لان ساعدت بشرين وجمعتهم لان يحبون بعض ، بالعكس فرحانة وسعيدة لحد هذي اللحظة ، ساعدتهم علمود ينجمعون ، حبهم القوي هو الي دلاني عليهم وسخرني الهم ، حبهم هو الي نادى عليه وطلب اساعدهم واجمعهم واسعدهم ولو لفترة قصيرة
ازل : بنضري اكبر غلط ارتكبتيه ، ما لازم اتخالفين قوانين عالمج علمود بشر
_ واني بنضري سويت شي يستاهل وفخورة بنفسي وميهمني النتائج الي وصلت الها .
ازل : اني واختي هي نتائج تغير قدر امي وابويه ، امي تخلت عن ابويه وسافرت بس انتي رجعتيها بعد الرويا مالتج ، خليتيها ترجع وتساعد بابا لحد ما وجع طبيعي ويمشي على رجليه ويتحرك مثل اول
_ تمنيت اكدر اشوفج سعادت امج يوم ما كانت تراقب ابوج وهو يخطوا بخطواته ويحاول يمشي ، كانت مثل الام من تنضر بفرحة لمولودها وهو ببدايه تعلمة للمشي ، مع الاسف هوايه تفاصيل مااكدر اعيدها عليج ، تمنيت لو اني امتلك قوتي القديمة جان شوفتج كل لحظة جمعت بيها امج وابوج ومدى سعادتهم ، لتتخيلين النهايات التعيسة ممكن تمحي السعادة الي سبقتها ، صح احنا نتذكر بس الاشياء الي وجعتنا بس من انحب وبصدق نتذكر بس الاشياء الي سعدتنا منهم حتى وان تركولنا وجع وخذلان ، لتتوقعين انوا ثنين كانوا يحبون بعض وبعدين يفترقون ويبدون يكرهون بعضهم ، الحب راح يبقى مستمر وياهم وراح يرجع قلبهم ينبض مع لقاء عابر غير مخطط له ، الي يحب مستحيل ينسى ، مستحيل يكتفي بالبديل .
ازل : حب حب حب ومادري ليش دائما تحجيلي عن الحب وتدرين بيه ما اامن بيه وهو مجرد شعور فاشل بين ثنين يدورن اهتمام بدل وقت فراغهم
_ انتي تحبيني صح !
ازل : اكيد
_ ليش تحبيني ؟
ازل : لهوايه اسباب
_ بسبب المواقف الي مرت بينا ، او لكيتي شي عندي ما لكيتيه يم احد غيري
ازل : مادري خلينا نطرق لغير موضوع واريد روايه جديدة ترا قديمة روايه البلد الجميل ما ناويه تجيبين غيرها لان ملل اريد اقرا شي
_ ماعندي غيرها وهي مكانها هنا وما لازم يتغير
ازل : اروح لعد اني
_تصبحين علة خير .
عادت للمنزل وهي غاضبة منزعجة ، لا يمكن ان تعاني اكثر اليوم فيكفيها ما حدث معها ، القت التحية على جدتها سمر الذي كانت تتناول عشائها بهدوء ، اشارت لها لتأتي وتتناول طعامها معها ، فرحت ازل كثيرا لان واخيرا جدتها تعاملها جيدآ ، جلست بكل هدوء تأكل بعد ان وضعت لها الخادمة الطعام ، بعد ان انهت طعامها حملت صحنها بيدها ووقفت
سمر : مو بيدج جينات جديتج الخدامة مستمرة بيج ، اطلعي من هذا العالم الي انتي عايشة بيه ترا صرت استحي حتى اعرف الناس عليج واكول حفيدتي ، حاولي تتغيرين
ازل : وبتوقعج اذا تغيرت راح تحبيني !
سمر ؛ اني ماعندي مشكلة وياج غير انج نسخة من امج واني اكره امج ، فهمتيني
ازل : تصبحين على خير بيبي
سمر لم تجيبها واما ازل صعدت لغرفتها وبدأت بالبكاء ، اصبحت معاناتها لا حد لها ، لا تعلم لماذا تشعر ان هناك غيمة سوداء تحيط بها فوق رئسها ، وكأنها منحوسة هذه الفترة ، بعد قليل دقت كارلا الباب وتمنيت لأختها ليله سعيدة وغادرت غرفتها لتنام .
