اهات الم من وجع ادم

Part 12

#اهات_الم_من_وجع_ادم

،،،،،،،،،،،بقلم الكاتبه زينب ماجد،،،،،،،،،،،

البارت_12

يحيى.. ما حسيت الا رجليه اخذتني الها ..كعدت يمها واخذتها لحضني..

هيه شافتني لزمت بقميصي حيل وخلت راسها بصدري وكامت تبجي بحركه.. خليت راسي على راسها و بقت دموعي تجري وياها

مسحت على كتفها وكتلها كافي اسف والله اسف ما اعوفج بعد وعد بس لتبجين.. كعدت على طابوك وهيه بقت مخليه راسها على رجليه وتبجي

واني امسح على راسها.. كتلها كافي كومي يله خل نروح.. عاونتها تكوم اخذت ايدها وجاي امشي

جان عمها يكولي وووين كتله اريد اخذها.. ابن عمها اجه كال بعد ما الك يمنه مره اخذ سيارتك وروح منا

باوعت ملتمين كلهم كتله وخر حباب قبور وناس واكفه ما اريد ابتلي بيك..  اني الوحيد المسؤل على براء ..وخر غاد

لزمني يكولي والله انهي عليها وما اخليها تصير الك هاي بنت عمي  مرجعها ومرجعها..

ضحكت بنص المقبره بصوت عالي ههههههههههه خب شنووووو شنوو… ههههي دولي بابا ولي خليني امشي

كال والله بنت عمي و نهيت عليها وبعد متصيرلك مره ونسوي الدم للركب لو اخذتها..

تقربت يمه وباوعلتله بستهزاء لك بابا لتخليني تخرب وجهك هذي مرتي على سنة الله ورسوله وبيناتنا عقد شرعي

لو تضرب راسك بألف حايط متصير الك.. كال اطلكها غصبا عليك.. كتله اي مو امشي بكيفك ..

لزمني من ياختي جاي الزمه جروه الزلم كالوله غير عاقد عليها شنو انته كالهم اريدها..

براء اجت وراي لزمت ايدي وهمست براسي كالت ما اريده كذاب ميردني يريد البيت مالتنا.. كتلها عرفت

اخذت ايدها وكتلها يله يمه خل نمشي.. كالت يمه انته اخذ مريتك وارجع لبغداد اني رايحه ويه النسوان للامير نزور

كتلها براحتج.. براء كالت اني هم اريد ازور كتلها مو هسه.. انتي تعبانه ..غير يوم واجيبج..

اخذتها.. ورحت للسياره صعدتها.. بقت تباوع على كبر امها وتبجي وتكلي ليش يحيى هيج سويت بيه

بسبيك ماتت ماما ليش.. كتلها قابل متعمد وكتلتها.. تعرفيني احبج.. بس الصار بيكم مو سهل وما كدرت..

بس بعد ما اكدر اعوفج.. كالتلي كسرت خاطرك.. كتلها لا مو لان كسرتي خاطري لان احبج ومن شفتج عرفت شكد اني مشتاقلج

كالت لو بس ما متقربلي جان هسه ماما عايشه.. دا تحجي وخليت ايدي على حلكها كتلها كافي

الصار صار لو حجينا وتعاتبا لباجر محيتغير شي غير ينزرع الحقد من جديد اقلبي صفحه وياي وخل نبدي حياة جديده ما اريد اسمع اي كلمه من هذا الحجي