#قصه_رحمه#
(الجزء1)
للكاتبه فردوس عبد اللطيف
بسم الله الرحمن الرحيم
هذه القصه حقيقيه من ملفات الشرطه
انا كميله عمرى 12 سنه نشات فى اسرة فقيرة تعتاش على تربيه الدجاج وصيد الاسماك كون سكننا فى منطقه الاهوار مابين البصرة وبغداد مجموعه عواءل تعيش على صيد الاسماك وبيعها وبعض العواءل تملك الجاموس وتربيته لبيع حليبه وصنع القيمر وبيعه...لكن عاءلتى بسيطه ونعيش مكتفين بابسط المعيشه
جيرانه حسين كلما اطلع من البيت واجمع الحطب يلاحقنى ويسمعنى كلام حلو واشعار بس انى اسوى روحى اضوج ..بس بينى وبينكم كنت متونسه وفرحانه واتحجج اطلع حتى اشوفه واسمع سوالفه الحلوة...اهلى ما دخلونى مدرسه لا اعرف اقرى ولا اكتب بس حسين دخل وصل للخامس ابتداءى وبطل احسن منى يقرا ويكتب الا انا كلشي ماكو..
طلعت من البيت وهم لحكنى
كلى كميله عندى حجايه وياج يمه كلبي كام يدك وارجف لا يشوفنه احد ويكل لابوى وتصير مصيبه
ركضت وعفته..
رجعت للبيت كلت شبي جان وكفت وحاجيته انى هم خبله ...يوم الثانى طلعت شفته واكف ينتظر...مشيت هم اجانى اشبيج كميله انطينى مجال احجى
اخاف احد يشوفنه ويكل لابوى تعالى هناك يم الكصب
خوش تمشيت وصرت يم الكصب اجانى
كميله اشلونج
يا صايحنى منا لهنا حتى يكلى اشلونج...زينه انت اشلونك
انه زين كميله انه اريدج بالحلال اريد اخطبج
يمه كلبي دك اى
بس بعدنى ما مجمع المهر مالتج واخاف لاياخذج غيري تعرفين امى تبيع السمجات بالطريق وعلى كد اللكمه
اى اعرف
وانه راح اروح اشتغل عماله حتى اجمع مهرج
بكيفك
شنو بكيفى خاف اروح واجى الكاج معرسه
لا لاتخاف احاول اتحجج من يجينى نصيب
راح حسين بقى سنتين يشتغل يجمع المهر ويجى بالعطل وانه كلما يجينى نصيب اظل ابجى واكله بويه متعاجز من لكمتى...
لحد ما اجه حسين وامه يخطبونى...اهلى يعرفونهم الولد يتيم الاب وامه تبيع سمك على طريق بغداد
تزوجت حسين وعشنا بيت اهله.
صار عمرة 18 سنه لازم يلتحق بالخدمه الالزاميه
بقت امه لوحدهه تعبت كلتلى كميله من باجر تطلعين وياي بالشغل
صار عمه
نطلع نشترى السمك من الصيادين ونروح نبيعه على طريق بغداد لحد المغرب ونرجع مكتفين على كد اللكمه والهدمه وحسين يجيلنه كل شهر اجازة اسبوع وبالاجازة يطلع يصيد سمج يوم يحصل ويوم ماكو
شفنا اشكال والوان بطريق بغداد ناس صاعده سيارات فخمه وتعامل على الفلس ميتين عبالك راح تنقص فلوسهم وناس لا ما تعامل تشترى وما تدوخ نفسهه وسمعنه قصص هواى
فد يوم اجو 2 صاعدين سيارة كشخه نزلو
ها حجيه صباح الخير
هلى بوجه الخير
بيش السمجات كلهم
بكيفك يمه
كولى حجيه كولى بيش
يمه 50 وبالعافيه
اشو هذا طلع ال 50 بله نقاش واخذ السمجات
حجيه انت يوميه هنا
اى يمه كل يوم الله يرزقك
مودع بالله
رجعنا فرحانين بعن السمجات بسرعه وحصلنه بيهم بله دوخه
للحكايه بقيه
