احببت نذلا

البارت 1-2-3

السلام عليكم تحيه طيبه لقرائي الأعزاء أشكر تفاعلكم ع قصص البيج و متابعتكم الحلوه النه و اشكر تفاعلكم ويه قصتي أحببته فأذلني و أحب أنوه ع كم شغله ..قصة أحببته فأذلني هي قصه حقيقيه من واقعنا المرير و مجان بيهه اي حدث مفتعل او تمت اضافته كول ما قرأتو حصل فعلا و اعرف انو النهايه مجانت مرضيه لحضراتكم ولكن هذا بسبب انو اني مثلكم منتظره النهايه بالواقع حتى اكدر انقلهه الكم بقصه و اوعدكم انو اكو جزء ثاني للقصه .
أما قصتنا اليوم فهي ايضا واقعيه و قصه حقيقيه و ضاهره قد تكون كثرت في الاونه الاخيره و صاحبة القصه حتكون موجوده و تقرأ تعليقاتكم أتمنى قراءه طيبه و ممتعه لحضرتكم .

أحببت نذلا

Saja_Abd

بارت 1

كثير من العلاقات تمر بحياتنا و كثير نتعرف ع ناس و نفارق ناس علاقاتنا تتقسم  بين علاقات معارف و اقارب علاقات صداقه و علاقات جوره و عشره و علاقات حب و بالاونه الاخيره ضهر  نوع جديد من العلاقات و هي علاقة النت بين الشباب و البنات الي تبلش بتعارف بعدين صداقه بعدين حب بعدين خيانه من احد الطرفين بعدين انفصال 
قصتنا اليوم حتكون من النوع الاخير .
بطلتنا اسمهه شمس مواليدهه 1996 شمس صاحبة جسم و طول حلو عيونهه كبار و سود و بشرتهه بيضه و شعرهه طويله و اسود . شمس اتربت داخل بيئه سليمه جدا تربت ع اخلاق و عادات و تقاليد سليمه و صحيحه عائلتهه جانت تتكون من 3 بنات و ولد واحد هي الاخت الجبيره و وراهه يجي اخوهه الي اصغر منهه و اسمه مرتضى و وراه زينب و وراهه سرى والدهه جانت رتبه جبيره بالجيش و جانت شخصيته حاده و مخيفه و والدتهه جانت مدرسه . شمس جانت بنت حالمه عدهه كثير احلام و طموحات و جانت مخليه اهلهه و تربيتهم كدام عينهه و.مجانت تحب تسوي شي يمس سمعة اهلهه و كرامتهم . شمس جانت عدهه صديقه كولش مقربه الهه اسمهه سالي وياهه بالمدرسه و بنفس الصف بالبدايه علاقتهن مجانت قويه بس من نجحن من الخامس علمي للسادس اقتربا من بعض حيل و صارن اكثر من صديقات و الدروس الخصوصيه قربتهن من بعض اكثر . شمس جان عدهه حلم انو تصير مهندسه برمجبات جانت تعشق هالمجال
سالي : لج شمس وووويع شنو هالاختصاص الي تردين اتدرسي لج اموت من كولشي بي برمجه و حاسبات .
شمس : لج سالي اعشق هالشي حلم حياتي اكمل بهذا الاختصاص .
حلو تكون عدنه احلام نعيش حتى نحققهه و الاحلى من هيج انو يجي يوم و نشوفهه تتحقق كدام عينه .
الدروس الخصوصيه جانت عند بيت صديقتهه سالي و جانن يتجمعن البنات بيوم الدرس و يكعدن يسولفن و يضحكن قبل الدرس و بعد الدرس بهذا الوقت سالي صارت روح شمس و شمس صارت روح سالي جانن يحجن ع التليفون الارضي لساعات لدرجة انو اهلهن انزعجو من هالشي . شمس حجت لسالي عن كولشي بحياتهه من اسرار و كولشي مضمت عليهه و كذلك سالي حجتلهه كولشي صارن بير لأسرار بعض جانن يحبن حيل يشربن حليب بككو و مصاص الكول جان يضحك عليهن و يكول عليهن زعطوطات بس مجانن يهتمن وره كول درس جانن يطلعن لمحل قريب ع بيت سالي يشترون منه حلويات و حليب بككو و يرجعن الولد الي جان يبيع بالمحل اسمه علاء جان شاب حيل مرتب عمره 26 سنه شكله حلو ابيض و طويل و شعره اسود و عيونه كبار علاء جان حاط عينه ع شمس و جان من يشوفهن هي و سالي يجن يشترن يموت من الفرحه و يصير كلبه يدك بسرعه جان معجب بيهه بس يخاف يحجي و اكتفه طول الفتره الي يشوفهه بيهه يبقى ساكت و يحتفظ باعجابه لنفسه . شمس و سالي جانن حاسات باعجاب علاء بشمس بس مجانن يهتمن بس  يروحن يشترن منه و ميغيرن المحل جان اعجاب علاء المؤدب عاجب شمس و جانت تتمنى يصارحهه مثل مجان هو يتمنى بس هو جان خايف ليخسر شوفتهه الي ينتظرهه من فتره لفتره . شمس و سالي جانن متناقضات بكثير شغلات و متفقات بكثير شغلات بس الشي الوحيد الي جانن متفقات عليه بدون نقاش انو الي تسوي بيهن شي ان جان صح او غلط الثانيه راح توكف وياهه و متعوفهه مهما جان قرارهه جانن يخافن ع بعض اكثر ميخافن ع روحن . بالوقت الي جانت شمس و سالي بالسادس جان عدهن تليفونات بس جان ممنوع يسون اي برنامج يخص النت يعني التليفون جان للاتصال و بس لا فيس و لا انستكرام و لا ويجات مو مثل هالوقت تلكيهه سادس ابتدائي و تكولك نطيني صفحتك بالفيس اضيفك هههههههههه .
هذا البارت الاول وانتم تقررون انزل الثاني حسب تفاعلكم