#أختي_الحبيبه💔
الكاتبه العاشقه ...
***
رحلتي دون وداع .. وما كنت أظن بأنك راحلة قبلي .. حزنت كثيراً وأحسست بأني
فقدت أكثر مما كنت أظنك ....
كنت أعوّل عليكِ كثيراً ، فكنتي انتِ التي أراها بجانبي
ولكن أين أنتِ مني الأن؟
كل من أراهم سند لي في هذه الدنيا إبتعدوا بأرادتهم .. إلا انتِ إبتعدتى عنى مرغمة
كم أخاف وانا أرى المستقبل ولستِ فيه.
أحبكِ .. ،
ولكني لطالما آمنت بأني سأكون مسؤوليتك كما كنتِ مسؤوليتي .. فبوجودك بهذه الدنيا
لا أخشى الوحدة ...
مرت سنوات على رحيلك .. جفت فيها دموع عيني ولم يبق لي منكِ إلا الذكرى
احس بفراغ كبير في صدري لا يملئله الا حضني لكِ
وكأن داخلي اصبح فجوة كبيرة عميقة فارغة تتردد فيها أصوات ألامي ولا يسمعها غيري
فلم أجد ....
نفس الأحساس الذي رحلتي واخذتيه معك.
منذ غادرتني لم أعرف طعم الراحة .....
في بيتنا الكبير لطالما أغمضت عيني وراودتني أحلام اليقظة وانتي تعيشين معي وضحكاتك تملئ المكان
والبسمة الرائعة التي لم تملكها غيركِ تزين حياتي
أرانا نعيش معاً .. نكبر معاً اعطيكِ كل الحب .. وكل الرعاية .. نتحدث ونتشاور فقد كان عقلك اكبر من سنك
وكل ما تقولين تظهر لي الأيام بأنه صحيح.
ألقي بالقلم بعيداً .. ويتملكني الحزن لأنكِ لن تقرأي ما كتبت
ولن تصلك رسائلي ..
ولكني آمل .. واحلم .. ان تكوني على علم بمقدار حبي .. وشوقي لكِ
وأصحبت غير طامع بأكثر من زيارة تزينين بها أحلامي
التي لن تنساكِ
****
مرت سنوات على رحيل اختي الغاليه اللي انظلمت وانقتلت غدر وبدون رحمه ..
اسمي عذراء متزوجه من ضابط بالجيش العراقي والحمد لله مرتاحه مع زوجي وعائلته واولادي وبناتي
عندي اخوات اثنين شيماء ورغد لمن كننا صغار نعيش ببيت جدي وجانت مشاكل تصير بين أبويه وامي وجدي وعماتي بكل يوم وعلى أتفه الاسباب
وعّينه على هالحال المزعج اللي دمر نفسيتنه لحد ما كبرنه وتزوجنه وبقى ببالنه
لحد ما بيوم وصلت المشكله الى حد كلش جبيرة بالعائله وأمي فقدت السيطرة على نفسها وبقت تتصرف بهستريا وبيوم كدام الكل ركضت للنفط وغطت بي وحركت نفسها وبقينه نصرخ واخذت اخواتي الاصغر مني لغير مكان حتى لايشوفون المنظر البشع وبقت الصرخات ببالنه كلنا لحد ما نقلوها للمستشفى وماتت
اعظم حادثه ممكن تمر بيها البنت بطفولتها وحتى اصعب من المتصور
بقت ذكراها كلش مؤلمه للأبد ..
تركتنه واحنا صغار وبقينه تحت رحمة بيت جدي وعماتي وخالاتي اني تزوجت بس شيماء ورغد بقن يلوذن تحت رحمة الأقارب ورغد جانت الصغيرة خذتها خالتي ربتها ويه بناتها واستقرت عدها
اما شيماء .. آآآه ياشيماء ... هي الضحيه اللي تعذبت وماحصلت الرعايه الكافيه وبقت تلوذ من بيت لبيت ومن قاسي لاقسى ..
شيماء بقت ببيت جدي وبيبي بحياتها اهتمت بيها ودخلتها للمدرسة بس بعد وفاتها لبيبي بقت يم عماتي مرة يشدن ومرة يرخن وياهها ويحملن عليها شغل البيت لحد ماتزوجن وطلعن من بيت جدي بقى ابويه وحده واضطر يتزوج واني جنت ازورهم بين فترة وفترة واطمن عليها لشيماء تمنيت لو اخذها يمي بس مكدرت بسبب عيالي ومسؤؤلية عندي جانت بوكتها بس ماعفتها جنت دائما اهتم بيها واداريها واشتريلها ملابس واشياء خاصه الها كبرت شيماء وبدت تحلى وتصير العين عليها ومرت ابويه طلعت وجهها السافل وجانت تأذيها وتفرق بينها وبين جهالها وبناتها اللي صاروا عدها بمرور السنين وابويه للاسف ماينطي لاحق ولاباطل ولايهتم بيها يشتريلهم احدث الملابس وشيماء محرومه من كلشي
بطلتها من المدرسه بالابتدائيه وكامت يوميه تسوي مشكله وتزعل وتروح لأهلها بسبب شيماء وتغار منها ومن ترجع للبيت بعد الزعل تنتقم منها وتبقى تهين بيها وتضربها وتمنعها من كلشي جانت تشكيلي منها ومابيدي شي ولا اكدر اساعدها اصبرها واوصي ابويه وخالاتي عليها لحد ماصار عمرها 12 سنه الله هدى وحده من خالاتي تعقد عليها شيخ لابنها رغم ما اكبر منها وتاخذها ببيتها على الاقل تخلص من ظلم مرت ابويه اللي ماعدها ذرة رحمه
ببيت خالتي جانت شيماء ببدايه بلوغها مثل الورده المفتحه وزوجها ابن خالتي جان يحبها بس بعدين بدى ياذيها ويضربها ويعاملها بقسوة وامه واخته يضايقوها ويعاملوها بقسوة ويسوون مشاكل ويه زوجها لحد ماحبلت وجابت ولد وبعدهم يأذون بيها ومارحموها أبد وهيه طفله وجاهله ومتعرف كلشي
جانت حماتها بت خالتنه مسوي علاقه ويه واحد بالسر ومن كشفتها شيماء بدت تهدد بيها وتحرض باخوها وشدت وياهه لحد ماضيقوا عليها كلش وخبلوها وشردت من البيت اخذت ابنها وشردت الفجر ومحد يدري بيها وبقت تفتر بالشارع متعرف وين تروح خابرت على ابن خالتي الثانيه اجاهه بسيارته واخذها لبيته وحاول يعتدي عليها بالسياره ومن رفضت وصدته فضحها كدام أهله وتالي خالتي الي هيه امه خذتها لابوها وكلتله بتك تريد ابني وملزكتله وبقى ابوها محتار بيها ومرته متحبها ولاتريدها وزادت المشاكل بسبب ابنها وحملها اللي تفاجؤا بي ونكرة زوجها بعد ما عرف كللها مو مني وزادت المصايب على راس شيماء اللي احتارت من بيت لبيت لحد ماطلكها ابن خالتها وبقت عد عمها كم شهر و جابت بنيه وصار عدها ولد وبنيه وبت عمتها جانت زعلانه عدهم شدت وياهه وبقت تلاغي اهلها ويوميه مشكله وتتحجج بابنها وكح ويأذي
عمها ومرته مرات يشدون وياهه ومرات يرخون وبالبدايه جان ببالهم شيماء زعلانه من عيالها بس من افتهموا بالسالفه وشارده من زوجها بده عمها يضربها وبقسي عليها ورجعها لأهلها
ابوها شرط عليها تبقى وحدها وابنها وبتها تخليهم عد أبوهم ميريدهم
وبعد معاناة وعذاب انجبرت شيماء تتخلى عنهم في سبيل تخلص من المشاكل واتحملت اذيه مرت ابوها من جديد اللي دمرت حياتها وبدت تسوي المستحيل حتى تزوجها وتخلص منها
..
من جانت ببيت عمها وحده من بنات عمتها سوتلها فيس وبقت تشتغل بي بالسكته بدون محد يدري لحد ما تعرفت على شاب اسمه عادل جان بالبداية تعارف وحجتله كلشي عنها وتعلقت بي وهو هم حبها وبقه وياها شهور لحد مالتقت بي وصارت بينهم علاقه حلوة يمكن شيماء شافت بي الحب والعطف والاهتمام اللي ماشافته بحياتها ولا حست بي من قبل لذلك صار كلشي بحياتها ووعدها يساعدها ويعوضها
استمرت العلاقه ولقاءاتهم السريه لحد ما مرت ابوها شافتلها عريس وزوجتها غصب انجبرت توافق حتى تخلص منها ومن حكمها القاسي وجان جبير بكد ابوها ومتزوج أكثر من مرة
تزوجت شيماء وعاشت حياة اسؤ من اللي جانت عايشتها وبقت مشاكل تصير ومن تعترض تنضرب بقسوة ووحشية من زوجها هذا لحد ما بدت تتخبل تبجي وتملخ بنفسها وتلف المخاديد وتحن على ابنها وبنتها وهم شردت منه
جزع منها ورة اربع شهور من زواجهم وطلكها ورجعت لبيت ابوها وللمذله ومرات ببيت عمها ومرات يم عمتها وبقت تتنقل لحد مانكشفت علاقتها بهذا الولد عادل لان رجعت تتواصل وياه بالانترنت وتخابره
ابوها واحنا كلنا اتفقنه نخابرة ونكله يجي يخطبها ويتحمل مسؤؤليتها حتى نسلم من كلام الناس وفعلا وعدها يجي بقينه منتظري بيومها تأخر وتالي إجه بعد الساعه بالعشرة بليل وتفاجأ الكل بشكله كلش طويل وجميل الشكل وجان ملهوف وفرحان بس ابونه بقى يتعزز وعاند ورغم هذا مايأس عادل خطبها اكثر من مرة لحد ماتزوجوا وعاشوا شهور من اجمل اللحظات والكل يحسدهم على الانسجام والحب اللي بينهم بعدها بدت مشاكل تصير ويه أهله وشيماء حبلت وظلت محتارة بين حملها وعيالها وزوجها اللي تغير وبده يشك بيها ويسمع كلام امه ويهينها ويضربها وتغير وياهه تندم لأن تزوجها
بده يبلع حبوب مخدرات ويشرب ويضربها ويقسي عليها ويطردها اكثر من مرة من البيت وحاول يتخلص منها ويشوه سمعتها بان اللي بطنها مو منه
وراح لعمامها وابوها كلهم بتكم خاينه واتفقت ويه واحد تقتلني وتشرد
بت عمتها اجت كلتلها راح يقتلوج ظلت ترجف وخافت وشردت منه وكل يوم تبات بحسينيات وجوامع لو بخرابه لو بمكان مهجور لو سيارة لوري محركه موجوده جانت وتلبد بيها تخاف منه ونفسيتها تعبت كلش وتبهذلت
وباعت ملابسها وذهبها حتى تشتري اكل واشتغلت بصالون لمده ايام وحجت قصتها لصاحبة الصالون اللي ساعدتها وخذتها لشيخ عشيرتهم وحجتله كلشي وبقت بحمايته وماقبل احد ياذيها ودز على زوجها عادل وصالحهم واتفق وياهم يعزلون ببيت يأجرون ومحد يأذيها وفعلا رجعت يومين اجرلها بيت وحدهم وراهم رجع يبلع حبوب ويفقد الوعي ويضربها ويشك بيها تخونه وضرب بوحشيه يضربها بدون رحمه
ومحد خلصها منه اصلا محد اهتم بيها من البداية
وبيوم اتفق ويه صاحبه يربطها ويعذبها بقت يومين مربوطه بكرسي وجان بدون وعي وفقد السيطرة وطلع مسدسه وقتلها طلقه براسها ووحده بيدها وسحلها وشمرها بالشارع على اساس ميدري وينكر بس الله بالمرصاد سمعوا الجيران وشهدوا ضده بالمحكمة وانحكم مؤبد وفصل 25 مليون لجهالها
وابوها لشيماء تمرض ومات وكل اللي تسببوا باذيتها ماارتاحوا وعاشوا حياة عذاب وندم وراحت اختي الغاليه بعمر الورد وانتهت قصتها الحزينه
...
إهداء الى روحكي الغاليه ..*
كالنسمة الرقيقة عاشت . ..وكالومضة السريعة انطفئت .. ملئت حياتنا بالحب .. بالعطاء ..
انطفئت من الحياة .. وبقيت شمعتها مضيئة في قلوبنا وستبقى ذكراها لابد ماحيييت 💔
النهايه ..
قصة حقيقية مؤلمه من مجتمع عراقي متزمت تحكمه العادات والتقاليد الباليه مع تغيير بعض الأحداث والأسماء ..
الكاتبه@
#العاشقه
..
