#اريد_ان_اعيش
الجزء الاول ....
الحب ...
تلومني الدنيا اذا احببته
كأني انا خلقت الحب واخترعته .......
كعدت الصبح تعبانه كلش احس مملخه .. مشبعانه نوم جسمي مكسر .. ابني يسر عمره هسه 6اشهر وبنتي حلا سنتين ونص ..
يسر شالع قلبي بالليل مينام هالفتره ماادري شبي امي تگول يريد يطلع اله اسنان .. حلا لسه زغيره وهم تحتاج مداراة هم زين بنت اخويه حازم الله يرحمه يمي الجبيره عمرها 14سنه والزغار اخذتهم امهم
تداوم بالمدرسه .. صف ثاني متوسط اسمها رقيه اليوم دوامها ضهري .. حلا تگعد من الصبح تروح يمها
يسر بقه نايم الافندي لان بالليل مينام كعدت اني ساعه 7يلا اللحك على الشغل .. وامي كلما الها تتعب والكبر بين عليها وكلنا يجي يوم نكبر اذا الله طول عمرنا ..
طبعا اني نور .. عمري حاليا 23سنه خريجة كلية الاداب قسم ادب انكليزي .. متزوجه من علاء عمره26سنه موضف بشركة النفط بالعماره وهم متزوج قبلي امل وعندهم ولد .. طبعا تزوجنا بعد قصة حب وافترقنا وتزوج هو وبعدها اللتقينا ورجع الحب وتزوجنا .. انه بالبصره و هو وزوجته بالعماره
لان شغله هناك .. يجي كل اسبوع 3ايام خميس وجمعه وسبت يروح .. طبعا صعبه عليه وخاصة بالفتره الاخيره .. ظل كل اسبوعين يجي مره او كل شهر مره .. اشتاقله هواي واعاتبه يتحجج بالضروف والطريق طويل .. ومصاريف السياره تتعب من طول المسافه .. اني اسكت شسوي .. مااريد اكون حمل فوگ حمله وايضا احبه بجنون كل ليله هو بعيد عني تعذبني .. واحسها طويله گوه تمر .. ويطلع الصبح والتهي ويا الجهال وامي والشغل
حالتي اليوم مخربطه لعبان نفس والشهريه متأخره كلش.. وخايفه لا حامل وابني زغير لسه بس شسوي حبوب منع الحمل تعبتني كلش .. والدكتوره منعتني منها ونوب اخذها على خالي بلاش لان ماعرف شوكت بالضبط يجي علاء ..
طلعت من الغرفه .. غسلت وجهي ورحت طليت على رقيه دتكتب وحلا يمها دتشخبط ولازمه القلم بيدها بالطول بدون متغرسه بأصابعها ابتسمت شكلها حلو ممده على الارض والورق كبالها وتشخبط محست عليه من طليت عليهم .. رحت بوجهي للمطبخ شفت امي صبحت عليها
نور .. صباح الخير يمه شونج اليوم
ام نور .. هلا يمه صبحج الله بالخير والله يمه شگلج دايخه اليوم كلش
نور.. خيرج يمه شبيج خاف مكثره بالاكل وصاعد السكر
ام نور .. ماادري والله هذا اكلي الي تحطينه كدامي
نور.. ياامي احنه اثنينه يرادلنه نروح للطبيب لان انه هم دايخه فد شويه يجي ناظم اخويه يجيب المسواك
واگله بلكي يودينه ..
ام نور .. علواه والله
نور ... سويت الريوك وكملته وبين ماخلصنه شغل اجه ناظم وگتله .. كال جهزوا نفسكم العصر اجي اخذكم ..
العصر بدلت للجهال حلا ويسر ورقيه هم ووديتهم يم زوجة اخويه روى... بس يسر اخذته لان يبجي وهي هم عدها اطفال متكدر عليهم كلهم ومنكدر نخلي رقيه وحدها بالبيت ..
