قفة فرح

#قفة_فرح
[الحلقة 1 ]

عشتار
ال رب ياخد عشتار ويحلني منكم ،، نحن الجابنا من كندا شنو ولا وين السودان ،،
قالتها ب إستياء وقلبة وش عجيبة ..

مدخل تعريفي ؛

عشتار مولودة ومتربية بره السودان جات كبيرة بعد امها هربت من ابوها السوداني لانها ملت العيشة معاه،، جات السودان وامتحنت تالت والجامعة حاليا وخليكم مع الاحداث ...

بإتقان للهجة السودانية .. اها يااا حبوبة عزبتيني كل شوية ،، عشتار جيبي بصل ، عشتار جيبي الحلة ،، عشتار جيبي السكين ،، يا حبوبة ما ممكن تقوليهم لي كلهم كدا مرة واحدة ،،
حبوبة خلت نقتي الكتيرة دي كلها ومسكت لي في حاجة واحدة ،،
انتي ناكشة شعرك دا زي الشيطان وممكيجة كمية المكياج دي كلها ماشة وين ،،
في شنو يا حبوبة طالعة الجامعة صاحباتي منتظريني،،
الصحبة التقتس حجرك ادخلي لي جوه عايزة تعملي لي كفوة يقولو ما عرفنا نربيك..
لو سمحتي يا حبوبة انا ما بسمح ليك تتكلمي معاي بالطريقة دي انا لحدي اللان محترماك لانك مامت بابا ،، وزهجت منك وانا ساكتة ليك الوقت دا كلو ..
بقيت بتشاكل مع حبوبة لانها بالجد باقية لي في حلقي وما مدياني حريتي نهائي ..
بابا جا داخل..
مالكم صوتكم جايب اخر الشارع في شنو

مدخل تعريفي:
حاتم شاب سوداني في بداية الاربعينات ،، سافر بعد خلص الجامعة ب منحة ل كندا وفجاة اخبارو انقطعت من اهلو ،، جاهم حاليا بعد هروب زوجتو الكندية ،، وتابعو الاحداث تعرفو الباقي...

يا بابا العيشة في البيت دا بقت مستحيلة نحن لازم نرحل انا بقيت ما ماخدة راحتي فيه ..
يابت الهاملة ..
امي
انت اسكت
امي ما صاح قدام البت تنبزي امها..
قلت ليك اسكت انت كان راجل وفيك رجا ما كان خليت البت تقوم منحلة كدا..
اووووف ياخ انا طالعة يا بابا زهجت من المشاكل كل يوم ،، ما عايزة اسمع من يور مامتك اني سنق زيادة ،،
(معليش يا جماعة البت بتتحبه صراحة حاولت الغي الانجليزي البدخل في نص لغتها السودانية حصل ليها لخبطة 😂😂)..
شلت شنطتي وباااي بابي اشوفك ،، بوستو علي شفتيه وحضنتو وطلعت ..
شووووفو البت استغفر الله العظيم ،، دي اخر تربيتك ليها يا حاتم قلة الادب دي شنو الخليتا تقوم بيها ،، ياتو يوم نحن بناتنا بعملو مع ابواتهم كدا ،، اسمعني هنا انا بتك دي عملت لي الضغط والسكري يا اما تعرف تربيها عديل ولا تخليها بربيها انا ،، البيت مليان بنات واولاد اخوانك ،، بي طريقتا دي بتبوظهم كلهم ..
امي بتي وانا بعرف اربيها كويس خليها تعيش حياتا ما عاجبك انا بسوقا ونرجع كندا ويا دار ما دخلك شر ..
طبعا دي الورقة الضاغطة الكان بستخدمها حاتم عشان يلوي بيها يدين اهلو،، عارفهم ما صدقو جا ولمو فيه وما عايزين يطش تاني ،، وكمان بقي عندو بت ،،
معليش يا ولدي اخر الزمن البتهدد امك وقعدت تبكي ،،
ياالله ياامي هسي في شنو بتبكي،، صحي كلام عشتار العيشة في البيت دا بقت لا تطاق وطلع ..
الله يهديك يا حاتم ..
هااااي قايز ،،واتس اب ..
عشتار تعالي تعالي ارح الحمام ،،
في شنو يا ريان اصبري لي اسلم علي الشلة طيب ..
ياخ بنجيهم هسي يلا..
جينا داخلين الحمام ،، وريان طلعت سجارتها عشان تشربا كالعادة ..
اوووه نسيت ،، انتو السودانيين غريبين فيها شنو يعني لو البت شربت سجارة ،، نحن عندنا عادي في كندا ،،
يا بت انتي قلتي كندا كندا يعني الحرية وكل زول في حالو ،، والله هنا يشوفوك ماشة ساي مع اخوك يطلعو فيك ستين بلوة يوصلوها ل ابوك ولا اخوك ،، ويلا تعالي شوفي تاني البحصل بعد يدقوك بقلعو تلفونك ويحموك الطلعة والدخلة ،، ويوصلوك ويجيبوك ،، ياخ انتي الجابك السودان شنو..

اوووو ماي قاد اي كانت بليف ذات ريان ،، السودانيين صعبيين انا شفت حبوبتي معزباني صباح ومسا لكن ابوي ما كدا دا المصبرني ،، انا منتظرة اخلص جامعة وارجع ..
يا حليلك يا عشتار حا تفرقي علينا بالجد ،، عندك زول منتظرك هناك ولا شنو ؟
نو نو ههههههه
وقعدنا نضحك
جينا طالعين ،، ومن اجي انا ما عارفة بتشاغل كتير وبعاينو لي كتير يعني عشان ما بلبس طرحة ولا عشان بشرتي المختلفة عنهم ولا شعري الاشقر ،، بس انا سودانية ولغتي افصح من السودانيين زاتهم ،،
ههههههه طبعا ناس كتار مستغربين فيني اني بتكلم سوداني عادي ،، بابا هو العلمني ليه وكنا في البيت بنتكلم سوداني علي طول ،، بنغني وبشغل لي فيديوهات سودانية بشوفها ،،
دخلنا المحاضرة وبعد طلعنا ،، ديل مشو يصلو وبقيت منتظراهم ،،
هاي
هاي
انا سامر ممكن اتونس معاك؟
شور انا عشتار،،
علي فكرة انتي حلوة ومكسرة الدفعة كلها قعد يضحك ولا الجامعة كلها ..
[عشتار شخصية مغرورة وواثقة من نفسها]
اي نو وحابة الحاجة دي اني انا كمان مميزة.. تشرفت بمعرفتك سامر وقمت منو ..
انا النوع الكدا ما فارقة معاي ولد يزعل او يطق ،، بتبسط وهم بكونو جاريين وراي كل يوم هدية ،، بس ما عجبني ولد لسه دي كل القصة ..
عشتار
ياه
طب ممكن اخد رقم تلفونك انا حابي ابقي صديقك ..
عشان شنو؟
كدا انا ارتحت ليك بس وحابي اتقرب منك ممكن..
طيب اديني رقم تلفونك وانا بتصل عليك ،،
عشتار ،، ر يان والشلة نادوني من بعيد ،، شلت رقمو وجيت عليهم..
انتي عارفة دا اكتر ولد كسار في الجامعة وابوه وزير كمان ،،
ويعني هو الجاني ما انا ..
حظك ياخ عرفينا بيه ،، دا ما بعاين لي بت نص البنات جاريات وراه ...
خلاص شنو كان كرستيانو يعني ،، انا وريان اتخلعنا من ردت فعل وسام [صاحبنا في الشلة]..
ريان جرتني بالجمبة انتي عارفة وسام دا بحبك والله باين عليه ..
قعدت اضحك وسام؟ وسام شنو دا ما استايلي نهائي ،، ولا بينا كيميا ،، ولا تناسق ،، انسي انسي ،،
يلا نطلع انا ماشة الكنيسة ،،
صحي انتي لي هسي ما كلمتي حبوبتك انك ما مسلمة ..
اسكتي قفلي الموضوع دا ،، كل يوم في البيت عاملة لي موال ما بتصلي ما بتصلي ،، ما امك كافرة منتظرة منها شنو ،، اووووف ياخ ارح مشي مشي ...
بعد خلصت من الكنيسة ،، اتصلت بي وسام ..
وسام بكرا عيد ميلاد ريان يا مان تعال لي في البيت المسا ننسق موضوع الحفلة ،، انا بكلم الباقيين..
زي سبعة كدا وسام جاني طلعت ليه وكنت لابسة جيب شورت وتشيرت ،، بابا تعال اعرفك بي البست فرند بتاعي حا تحبو وكمان شارك معانا ،،
قعدنا مع بعض ورتبنا المواضيع ،،
بعد مشي حبوبتي واعمامي قومو الدنيا وقعدوها عشان ولد جاني في البيت وانا قعدت معاه وطلعت ليه كدا ..
خالي الكبير ..
شوف هنا يا حاتم في حاجات خط احمر عندنا زي الحصل الليلة دا كيف بتك تجيب ولد البيت ولبسها زي الزفت تطلع وتقعد معاه،،
انكل وين المشكلة دا صاحبي وجا يزورني ..
استغفر الله العظيم ،،انت وقت ما قادر تفهم بتك اللي هسي بقت بالغة وعاقلة يعني ابسط شي الصاح توريها امور دينا انها ما تطلع متكشفة لي راجل كدا وكمان حكاية انها ما تلبس طرحة دي وتطلع فاكة شعرها زادت عن الحد ،،
بابا قال لي انا بتي وماف حد يدخل فيها غيري ..
صحي زي ما قالت امي انت ما فيك رجا ما خلاص قلبك مات واتطبعت بي طباعهم ،،
بابا رفع اصبعو لي عمي وبقي معصب شديد ،، احترم نفسك يا مجدي ،، دا الصاح مش احسن ما تعمل حاجة بالدس ومن وراي زي ...
وسكت
قصدك شنو انت يا حاتم ؟ وجرا بابا من قميصو
انا اتخلعته وخفته ومن دون احس قلت ليه ..
اسأل بتك العاملة ليك روحها ملتزمة ....

يتبع🌷
فاطمة قسم الله✏