مساء الياس 🌹
زهرة
ج 5
سوزان المندلاوي
ذكرت كل كلمه كالها الي فارس،وكل حرف
امي بقت جافله كدامي متعرف ترد ..
بس تاشر باديها شنو يعني ..
يعني تحرشوا بيه ونفسهم الي كتلو اختي جنان ..
شنو تحرشو زهرة ..
اغتصبوني ..ارتاحي يووم
وكومه ماكوم منا ..
ولج زهرة
عله صوتي اييي ..اذونا ..
تقربت عليه فركت حلكي حييل ..
انخرسي وانجبي ..
وكعدت بلكاع يعني شنو ..
وكامت حييل تضرب ع رجلها يعني شنو ..
شصار بيجن ..احد يفهمني ..
ولج يامصخمه منهو هذا تدنى الج وطيح شرفنا
وجرتني من شعري حييل منو احجي يامعزايه ..
منووووو
منير ..
اسكتي لا احد يسمعج ../اسكتي ..
هدت شعري
كعدت كبالي ..
يعني شصار بينكم .
يمه يمه ..وتضرب وجهها ..
مكدرت احجي بعد نعكد الساني ..بقت تكوم وتكعد ..
وتفتر بلغرفه ..
شلون شسوي هسة ..
وترجع ..عليه ..
ولج زهرة بنت الزمايل منو لاعب بيج ..
هذول بيت المختار مو ..
لا لا يمه ..والله منير
وجنان..
جان جدي ..
ندكت الباب علينا ..
دفعتني وكالت نامي ..
وعدلت روحها وفتحت الباب ..
اسمع اخويه الجبير يكولها يلا يمه حضرو العشا تعاي،اكلو
كلتله روح اختك مصخنه ..
مانريد احنا ..
بقت تحجي ويا ..
وسدت الباب ..
واجت عليه ..
شالت الغطا ..
احجيلي يما لا تلوعين روحي اكثر مماهي لاعيه ..
كعدت وحجيت الها من يوم شفت جدي
لليوم الفاتحه ..والي صاربيه ..
جانت من احجي الها تملخ بروحها ..
وتكول ماجاي اصدك
اكولها صدكي هذا الصار بينا..
وجنان بقت تبجي لحد ماماتت
ليش يمه لاهيه عنا ليش..
ماحافظتي علينا ..
سكتت بعدىما ذبيت حملي كله
وعافتني ..
جرت صراحيه ماي ..
اعاين عليها شربت .
ودارت الباقي ع راسها ..
وتبجي بحسرة ماشفتها قبل
بعدها لفت شال وطلعت ..
كمت وراها ..
اريد افتح الباب ماتنفتح ربطتتها بحبل
جنه اندك بسمار ونربط الباب بحبل ..
رجعت كعدت ..
مادري شكد وطبت ..
جايبه خواتي ال2 سعاد ونورس..
وطبت ..وشدت الباب من جوة ..
وكالت نامو ..
محجيت شي بعد .
فرشت ..ونومت خواتي ..
جتي يمي ..جرت الغطا مني
كومي ..ويايه
وين يمه ..
داكولج كومي افحصج اشوف شجره شصخم الله وجهج
كله من وراج انتي ..ماتكعدين وتلعبين وي الولد
ادبسز ..
الا اخلي ابوج وخوانج يذبحوج ..
دفعتها ..
وكمت ابجي بصوت هستيري .
مو ادبسز ..
بس انتي ماعرفتي تربين بس تخلفين وتوكلين
لا اعرف حلال ولا اعرف حرام
ولا اعرف شي
مو من حقج تحاسبيني ع ذنب مالي بي ايد
كعدت وحطت اديها ع راسها وتولول وتحرك بجسمها
وتضرب راسها ..باديها
هو اخو جدج هذا دربه بس جدج طلع هم نفس الشي
وتضرب راسها
صح انا بنت هوايش
بس دنيتنا عدله
مو كبرنا ليش بس بزري ليش
عمت عينج صبريه شحجي
للعالم
شحجي شكول لروحج يما جنه شكالت ..روحج ..جنه
شحجي وشكول لخوانح وابوج ..
عمت عينج صبرررريه ..
جتي يمي ..
نامي يمه نامي ..
اني مو خوش ام نامي ..
صح حجايتج ماربيت ولا اعرف اربي
وماعرف شي امداني ..
امداني ..اي والله ..بس ماعرف هيج يجرة الكم
ليش ماكلتي الي ..
ليش زهرة
تبنجت مشاعري ..
خليت راسي.ع المخدة ...
ودرت راسي..
شويه واجتي وخواتج هم نفس الشي
رفعت راسي مادري ..
نامي نامي واطبطب ع جتفي ..
مكدرت انام ولا هي نامت ..
احس مدري ساعه بيش ..غفت عيوني كوة
طبه ..وحدة ورة الخ..
وخرت الغطا رفعت راسي ..
شوف امي..جايبه تخته ..عاليه
وتصعج وترد تهبد روحها ..منها ..
وترجع وتدبج منها ..
كمت يمه شجايه سوين ..
اعاين عليها خيال مال لاله يعكس وجهها احمر وعركان
كمت عليها شجاي تسوين
دفعتني ..
اخر هبدة الها ..ووكعت من طولها
ركضت يمها يمه يمه
جاوبيني احجي يومه ..
ماكو بس نفس بيها ..
فتحت الباب وكمت اصرخ لحكوني
وارجع الها
ولج يمه كومي ..
طلعو خواتي وكامن يصرخن ..
التموا علينا ..اهلنا ..خواني ونسوان عمي والكل ..
شبيها ..
هوسه بهوسه ..
لبسوها عباتها وشالها اخوي الجبير
وطلع يركض ..
اني هم ..لبست عباة ..
وركضت وراهم حافيه ..
وصلت للمجاز ..والباب ..
اجي وياكم ..
ماعوفها ..
لا رجعي ..كالولي
يم خواتج ..رجعي
انداريت ..منير واكف يم الدرج ومنتجي
بطني لوتني.من شفته ..وخفت
لا اجي وياكم ..مابقى ..هنا
محد بعد اهتم الي ..ولا سمعني
حايرين بامي
بعد ماخوي جاسب جاب ابن جيرانه
عندة سيارة بيكب ..
وخلاها براس الدرب ..
طلعو وطلعت وياهم ..
جانت دنيا مدلهمه وغيم .
واخوي شايلها وراسها يودي يمنا ويسرى ..
وضوى السيارة من بعيد اشوفه ..
قبل لا نوصل
وكفت اني.بنص الدرب ..وهمه راحو ..
اعاين صعدوها ..وياهم عمي ومرته
وشغلت السيارة وراحو
محد حس بيه وكفت ولا احد حس بيه طلعت ..
محد حاير بينا ..
ان ماتت امي منو النا احنا ..
ليش بس احنا ..محد بحالنا ..ليش ..
مشيت ..
جنت حافيه ..واحس ببرودة الكاع ..والحصو والحجار هم
حتى عظمي برد ..
وصلت لراس الدرب ..
وكفت يم ركن الحايط ..
لزمته ..
وحسيت معدتي تكلب ..
دنجت وذبيت من راسي ..
وكمت اتفس سريع ..شنو ابالح زهرة
شنو وين ترحين ..
رفعت راسي ..مسحت وجهي بعباتي ..
وطلعت بوجهي يصير مشروع المي كبالي
وبصوبه الثاني بساتين وصوبنه بيوت ودكاكين ..
كمت امشي سريع سريع ..
وكفت ..حسيت الدنيا فرت بيه فرة قويه
وشفت وكفه منير ع الدرج كدامي
بيوم الي كلي الدجاجه جابت كتكوت ذهب
واعاين سعاد ونورس خواتي شلون يبجن بركن الغرفه
واتخيل ..منير وجمال يمهم .
بقيت حايرة ..
وواكفه ارجع لو انهزم واخلص
ارجع اذا ماتت امي شسوي اني موتته
واذا عاشت تكول لابويه ويذبحوني
رفعت راسي لسما
كتله ربي ..صار سنين ماعرف انت بسما وشوفنا
بس بيوم الي اخذوني للبيتونه شفتني وسكتت
عني
ماريدك تسكت ع خواتي واذيتهن ..بعد ..
ربي ساعدني ..
وحسيت هوى بارد كفخني وحرك عباتي ..
حسيت بهدوء داخل روحي ...
