😍حاسب روحو #فيدال _خاطيه_ الكوكتال 😂
اليوم نضت على 7 تاع صباح كي لعادة مشعطة 😂😂 عيانة بالمختصر التبكار😆 . نضت غسلت وجهي غسلت فمي لبست قشي (قمجا بيضة افلوغ.سروال سليم نواغ.و غارديغون ف نواغ و سبردينا أديداس بيضة 3 بونت و درت خيماري ف نواغ او سي 😊)
منبعديها درت شويا فوندتا و ايليناغ؛غيسيل؛و في الشفاه درت غوز كلاغ
قبل ما ننسا انا ميرال عمري 20 سنة نقرا ف لافاك و انا هي الصغيرة في خوتي عند 2 خواتي واحد متزوج و واحد داخلها غير تخرويد يعني غير تاع نسا😂😂😂و انا كامل خباره عندي يعني أسرار الدولة راني حاكمتها 😆
الوغ رحت نقرا ف لافاك جوزت 2 سواعي تاع قرايا مباعديها كي جات 10:00 خرجت انا و صحبتي اللي هي كل شي عندي و انا وياها كتر من لخوت "نخرجوا مع بعض؛نتبهلوا على أتفه الأشياء لو كان أيتها حاجة؛نقرو كيف كيف و نجيبوا لينوت كيف كيف سبحان الله "
رحنا انا و ياها لبلاد (نعمل شوية تسوق )
رانا نتمشاو👣د خلنا حانوت تاع كوسميتك
ريحان:ميرالوت(دلعني بسميتي😂)مول لحانوت كامل ما بنش
انا :وي السلام عليكم كاش واحد راه هنا يجي يسقدنا (ysagadna ) حتى يدخل واحد يا ماميييي و كيداير بزين 😍بقلاوة
عينين خوضر و جاي بيض شعره مطوله و رطب ما شاء الله عليه 😍😍ااه قلبي❤الصغير لا يتحمل .
قالنا وي تفضلوا شخصكم ؟
ريحان تلفتلها الهدرا و بقات عليه اع؛ اع؛ أعطيني هاد (parfin )يلا عندك سميتها(indicensse ) أيا قالها واش من كولوغ راكي حابتها قاتله عطيني ف الغوز أيا المهم شرينا و خرجنا . كامل الطريق و حنا غير نهدرو عليه قتلها و الله يا ريحان غير زله هاد الإنسان منعرف من واش كوكب جا اه ربي ربي.
ف لحشيا رجعت لدار لقيت جداتي عدنا
جداتي :واش راكي بنتي توحشتك هذي غيبة ما تقولي نشوف جداتي ما والو
انا :و الله يا حبيبة يلا نبغيك و نموت عليك واك تعرفي بنت ولدك كيدايرا.
جداتي :واه واه نيشاااان
حتى قاتلي ماما نوضي وجدي القهوة راه قرب العصر يؤذن
المهم وجدت القهوة☕ و ريحنا و شخنا أيا حتى قاتلي جدتي:ميرال كاش ما راكي موجدة لعرس بنت عمتك؛
رديت عليها :أودي كامل انا و من وجدش ههه كلشي وجدته حتى المكياج و ستيل تاع شعري اللي غادي نديره
جدتي :أيا مليح اصلن بقاله غير7 ايام
انا:واه ا ميما نشاالله نفوتوها عالاما
و بعد فترة عيطت لريحان حكيت معاها ف تيريفون قريب ساعة غير باش تعطيني أفكار شابة على ستيل اللي غادي نديره (زعما الأناقة و الحطة 😂😂😂مداك انا عندي كلشي و لا القش و الموضة كيما تخرج نخرج معاها😅)
بالحاضر الآن؛ رانا نتعشاو أيا جات تورتي تاع غسيل ماعن اويلي ويلي😂😂😂
بصح في الحقيقة انا قافزة في شغل الدار
غسلت ماعن و خملت كلشي ف الليل باش مع الصباح نصبح راقدة حتى واحد ما ينوضني لان انا أكبر شكارة ف الرقاد😄
رقدت غدوا ليه نضت مع 12 لاخاطرش ماقريتش ههه ايا كي صلى بابا صلاة الجمعة و خرج حتى تعيطلوا عمتي و تقوله قولهم يجوا يقعدوا معايا و يعاونوني ف شغل ديال العرس
انا كي سمعت فرحت و درت مخططات باش ما نروحش لافاك و عيطت لصحبتي قتلها هاد سمانة غير روحي وحدك لافاك انا راني معرسة😂
ريحان :ا جدك سعداتك و الله لوكان ماما رآها هنا و الله نعرس معاك و نفوتو سهرة شابة
أيا قتلها والله غير نتي ما بغيتيش تجي مع انا والفتك ديما معايا
ريحان:ايوا معليش ميرالوت ان شاء الله تفوتيها فووور😍
لحق لحشيا وجدت كامل صوالحي ديال العرس و رحنا عند عمتي
بالدخلة بالزغاريد ❤❤و انا هذاك شانبغي و تلقت غرزيا ههه كيما شاب خالد😂😂
المهم العرس بالاحد ايا مع ليل قصرنا حنا و لعروسة و العزبات كامل و لعبنا😂😂😂و زعقنا (يعني حفلة لتوديع العزوبية )
بقات كل وحدة تحكيلنا حكاية على روحا يعني كيفاش حتى لقاو حب حياتهم و كاين تاني كيفاش عاناو معا الفراق تع حب حياتهم
كي جات ف تورتي قتلهم انا ما تع تمعشيق نعرف غير اللعب و التمهبيل عليها معنديش شعور من ناحية الحب و مام نخاف نرتبط و لي نكون معاه انا نبكيه ماشي هو😁😁
بقاو يقولولي دوك دجيك الدالة و تحسي غايا و تعرفي هاد الشعور
بقيت نضحك و نقول إنشاء الله يلا كتب ربي
صبح لحال درنا ميناج لدار وجدنا سوالح لعروسة و جاو صحاب لعريس يخرجوا لفراش و الحالة مقلبة بالزغاريد مبعديها انا كنت مخطة باش نشري ليلونتي ف بلو بقيت غير على ماما
فالأول قاتلي :رتبي صايي جنابك بداو ياكلوك😂😂
أيا بديت نطبق أسلوب البنت الحنونة من شكل الدلع و البوس و المزاح😂😂😂😂
(يعني سر المهنة باش ندير واش نحب😍)
حتى قاتلي و عندكي الدراهم باش تشري ؟
قتلها :وي عندي غير ما تخميش باش نقولك مديلي😎
ايا قاتلي روحي مي على ساعة نلقاك قدامي و متروحيش الروحك الدي معاك كاش وحدة ملبنات قتلها وي حاجة باينة هذي.
ديت معايا ندى اللي هي من لا فامي ديال لعروسة و لعريس في نفس الوقت وأنا وياها نعرفوا بعضانا غايا
كانت هي تاني حابة تشري (la puce) مي كانت خاصتها لا كارت (بطاقة التعريف )و ديرها بالتخبية قتلها اوكي كي نخرجوا نشوفوا كي نديروا
المهم انا كي خرجت لبست (سروال بلو نوي ا شوفي و تريكو بيض و بلازيغ بلو نوي و خيمار بيض) و اكيد مع شوية مكياج 😍
ايا رانا نتمشوا نقارعوا تاكسي ايا قاتلي لازم نعيت لولد عمتي يجييلي لا كارت تاعي مديتلها تلفون ديالي و عيتت فلول محبش يرفد عاود مرة زاوجة رفد و قال ألو وي شكون معايا قاتله وليد انا ندى بنت خالك حمبوك جيبلي لاكارت راني حابة نشري لابيس
قالها انا راني عند لكوافور بلاك نتول عليك و موحال نجي
قاتله اوكي
وصلنا لبلاد دخلت عند الحانوت الأول و شريت (les lentys) ف بلو كولوغ شابة
ايا خرجنا قلتلها ندى نروحو كاش ما نشوفو قش و ندخلوا بيدزيريا ناكلو عادا نروحو لدار.
قاتلي اوكي بعدا نفوتوها شابة
قتلها اوي باينة هدي
ايا دخلنا واحد الحانوت حتى نشوف تليفوني يصوني قتلها ندى وليد عمتك راهوا يعيتلك. ايا مديتلها رفدت عليه قالها قوليلي وين راكي قاتله راني فلحانوت ديال مصطفى قالها و معامن قاتلوا راني مع حبيبتي نشروا
قالها المهم راني جاي قارعيني تما اوكي
ندى :اوكي
مبعديها حسيتو طول قتلها انا نروح نشري واحد لحوايج قارعيه نتي بيلا جيت
المهم رحت نشري حتى واحد الراجل شفتو يلحق فيا و قالي عمري نشريلك واش تحبي و لواحي معايا و انا ماشي ملفنيانين و ندربه برجلي للمنطقة السفلية و نقلع نجري نجري نجري 😂😂حتى الناس بقاو يضحكو عليا مين حبست قالي واحد الطفل انو هداك السيد مهبول مديريش عليه
قتلو الله غالب انا ماشي منا باش نعرف .انا برانية😂😂
مبعديها رجعت لحانوت و لقيت وليد عمة ندى مزال موصل حتى قتلها
ندى ياخي ولد عمتك طول بزاااف انا منجمتش حتى نسمعه يقول و الله غير سمحولي تولت عليكم و ندور و نشوف 😱😱ااااا ربي واش هاد الزين أنه الشاب اللي لقيتو انا و ريحان و قتلنا زينوا 😂😂 انا نخلعت بقا عليا السلام عليكم اختي و انا بقيت غير نشوف حتى رديت عليه :"و عليكم السلام و رحمة الله و بركاته"و انا قول في قلبي كامل هاد الزين و منردش عليه السلام، جامي تسرا هادي
المهم زعما انا حشامة اياخليت ندى تمشي معاه و انانتمشى قبلهم و غير نكحل فيه ااا ربي على هديك لاتاي و داك الشعر عاود قلت باينه هذا عنده حبيبته وين غادي نباله انا
مبعديها درت الكيتمان و بقيت نسمع لغنا و نتمشا كي شغل معلباليش و ندى بقات تهدر بتليفون دياله مع حبيبها😂😂😂ههه مهبولة هي و معلابلهاش حتى شتهم دخلو لحانوت سبيسيال تيليفونات و دخلت موراهم حب يشري (pochat )لتيليفون دياله.
فن هداك الوقت حتى نشوف ماما تعيطلي ف تيليفون ديالي رفدت عليها و قاتلي وين راكي قتلها راني جايا و رانا نقارعوا تاكسي
قاتلي اوكي خفي و متوليش ما عليا غير خرجت و بقيت نمشي و نجري ف نفس الوقت حتى قالي حمبوكي ختي غير بلبسيايس قتلوا: الله غالب ماما تقلقت عليا خوصني دروك نروح
وليد:مي ما خلصت عليكم حتى حاجة لا فطور لا والو.
قتلوا :شكرا ربي حفظك كي قتلي هكدا كلي خلصت عليا
حتى شافلنا تاكسي و خلص علينا و وصلنا لدار انا و ندى
انا دخلت حتى نشوف تيليفون يصوني مديت لندى تحكي معاه ايا بقاو غير يحكيو و منبعديها انا رحت نفطر كنت ميتة بجوع 😂😂😂حتى لغاتلي ندى (ميرال؛ ميرال؛ميراااال )قتلها واااااه رانيي جاية كي رحت عندها قاتلي "وليد قالي باش نخرجوا حشيا و ندوروا مداك صباح مدرناش كامل"
انا فرحت قتلها وي مدابيا مي كينديرو باش نخرجوا.بقيت نخمم. نخمم.نخمم.حتى تفكرت بلي لازم نشري لماء نتاع ليلونتي ولابوات نتاعهم .👌
ايا مشيت نجري عند ماما قتلها لازم نشري هاد الصوالح قاتلي اوكيي غير روحي
ايا نقزت عليها بالفرحة
مبعديها قتلت ياه كيفاش ماما حبت تطلقني نشري بلا ما تعيط عليا 😱
المهم عاودت روحي غايا و خرجنا انا و ندى حتى نشوف وليد يعيط مديت لندى تحكي معاه "قالها وين راكو راني نقارع فيكم
قاتلو رانا ف تاكسي قريب نوصلوا "
نزلنا حتى نشوفه و دجي عيني في عينه وبقيت نقول في قلبي (و كيراه شباب بقلاوتي راها يهبل )كان لابس سروال دجين كوبي و شميز بلو نوي و سبردينا بيضا 😍
كي شافنا جا لعدنا و دارلنا سلام ايا رانا نتمشاو ندى قاتله وليد مدلي تيليفون ديالك حبا نحكي مع حبيبي مدهولها و كان يتمشى حداها و هي ف الوسط و انا فالطرف قاتله لواح حداها باش متزعجونيش
انا منقدش نقعد ساكتة خوصني نهدر حتى ننطقوا في زوج (قلنا مع بعض ايوا عرفني(عرفيني )بروحك😂😂)
قتلوا انا ميرال عمري 20 سنة و نقرا ف لا فاك حياتي داخلتها غير لعب و ضحك و زعاقة و في وقت الصح لقراية😂😂.
قالي :بون انا وليد في عمري 24 سنة و نخدم عندي حانوت و كيفك داخلها غير لعب و تمسخير . 😆 قتلو :ههههه ايوا رانا كيف كيف
و حنا نتمشوا بقا يقولي فواحد النكت زعما على الحديقة و الحيوانات .و خطر على خطرة يقولي انا و يبدا يشكر في روحه ايا رديت عليه قتله عندك الصح مي اعوذ بالله من كلمة انا😂😂(القصف جبتهله اون ديراكت )
و حنا نتمشو دخلنا دار الثقافة ضربنا طلة على واحد امي تاوعه شيرات سلمنا عليهم و مشينا المكتبة تاني و منبعديها خرجنا حبينا ندخلو لبيتزيريا لقينها مغلقة😂😂 زهرنا معوج حتى نسمعه يقول لندى ولد عمتي رآه يقارع فيا .انا حسابلي غادي يروح ايا حتى شفته قالي ركبي. انا نخلعت قتله وين نركب
قالي ركبي قتله:هههه راك منيتك انا منركبش معا واحد منعرفوش مام ندى ياله نروحو و سمحولي خوتي.
وليد:لا ماتقوليش كامل هاد الهدرا كنفيونس و الله
و بقات ندى تقولي و الله كونك هانيا ميرال هادو من عائلة ديالي واك تعرفيني
ايا طمانتني شويا و ركبت
وليد دار لغنا و بقا يقولي احوجيانا خفتي باش تركبي انا بقيت نضحك و نقوله لا لا ماشي خفت مي إنسان منعرفوش منركبش معاه 😕
عاود انا سكت و بقيت ننقز في ندى و نقولها قولي لولد عمتك يحبس الطوموبيل هنا
قاتله ميرال راها تقولك خلاص رجعنا وين كونا حتى قالي خلاص وصلنا.وانا بقيت نقول الحمد الله يا ربي لو كان ماوصلناش لوكان ضربته ضربا نجيبه فصبيطار😂😂
المهم دخلنا بيدزيريا و طلبنا 2 بيتزا و ليموناد🍕🍕🍷و حنا شايخين و نضحكو.كي بديت ناكل كليت 2 ديال مورصوات من بيتزا حتى يقولي وليد خلاص ماتكليش راني شفت حشرة من نوع (grilou) وانا هاد الحشرة نعيفها منحبهاش و قتلوا حرام عليك و مكملتش ماكلتي من غير ليموناد ولان من عادتي ديما ناكل بزاف أكبر مرهوجة فالعالم هي انا 😂😂😂و عندي كرشي قبل كلشي مي اليوم مكليتش من سبت هاد الحشرة😂😂
بقاو غير يضحكو عليا مين كملنا رحنا حبوا يوصلونا لدار مي انا محبيتش قتلهم ليوم ماما ترميني برا قالي وليد :لا جامي تسرا هادي
المهم حشيا مين نعيتلك في التيلفون رفدي نتيا ماشي تمدي لندى تحكي معايا
قتلوا ههه يلا كنت قاعدة
رجعنا انا و ندى لدار و دخلنا نورمال ما قالونا والو كي جات لحشيا عيطلي وليد و ندى كانت راحت لدارهم باش يديرو الحنة لعريس .انا رفدت عليه و قتلو سمحلي ندى ما راهاش هنا باش تحكي معاها قالي نورمال انا راني حاب نحكي معاك انتي ماشي هيا بقينا شايخين و نهدروا نورمال و قعدنا 2 سوايع و حنا غير نحكوا .
المهم فاتت لليلة ديال السبت هايلة بالتقصار و الضحك و اللعب
اليوم الأحد نضت مع الضهر دوشت و رحت عند الحلاقة دارتلي (les boukle)لشعري جاوني هبال و ماكياج فورر سبيسيال لعزبات و ندى و بنت عمتي داروا ستيل كيما تاعي لأن تفاهمنا باش نلبسو كيف كيف و كملنا حتى مع المغرب كي ولينا لبسنا قشنا و انا لبست (غوب سليم و نواغ و قصيرة فوق الركبة و تالون ف ماغون بنواغ و ساك ماغون )و درت ليلونتي جيت هبال 😍😍😍
و لعروسة تبرزت بالشدة و وجدناها و قبل ما يجي لعريس يديها درنا لغنا و انا بردت جنوني برقيص (خموس عليا نعرف نرقص😂)
كي عييت حبست حتى نشوف تيليفون ديالي فيه واحد 5 ديال ابال من عند وليد حتى عيطلي قالي ف الكورتاج رح تركبي معايا اوكي
قتلو اوكي مكانش موشكل .
قالي خلاص هانا و صلنا
حتى نسمعوا الطبل و التزمار و الحالة مقلبة بالزغاريد طلع لعريس بالبرنوس و لعروسة بالشدة المهم مين شتهم يتصوروا شبعت معاهم تصاوير(انا عاشقة الصور كامل نهار وانا نتصور).نزلت لقيت وليد ينتظر فيا مشيت عندو عملتلو السلام و قتلو ندى و بنت عمتي رح يركبو معانا قالي اوكي و طوموبيل لي جابها( 208) سبحان الله حس بيا واش نحب فطوموبيل
ركبنا مين جا رح يقلع حتى يلقف طوموبيل اللي قبله انا نخلعت و خفت 😂😂 حتى تفاهمو و فراوها و ركبنا و درنا حالا بلعياط و رقيص و الضحك فوتنا كورتاج هايل.دخلنا لاصال و تبرزت لعروسة فالاول و من بعديها مزدتش شفت وليد مين جا لعشا رحنا تعشينا و جمعنا غير حنا العزبات و يجي لينا واحد السيرفور و كي شباب تبارك الله عليه(انا اللي نشوفه نعشق فيه😆) ايا مين كلينا وكملتنا ليموناد عيتلوا و قتلوا انا نحب ليموناد لازمني نشربها و انا ناكل ما دبيك جيبلنا وحدة
بقا يضحك و قالي كامل هاد الزين و منجيبلهاش ليموناد مشي خسارة فيك كامل
انا ضحكتله ضحكة و قتلوا ايا خففف جيبلنااا
مبعديها قلت ندى شا تقولي لوكان نجيب نيميرو ديالو و هو يمدهلي قاتلي روحححي وين دجيبيه غير ما تكحليش
قتلها اوكي دوك نشوفو حتى فالتالي مدهلي و ربحت الرهان كي خلاص لعشا عيطلي وليد قالي وين راكي قتلو راني ناكل قالي ايا هودي حبيت نشوفك توحشتك قتلوا خلاص كملت راني هاود كي جيت ف الدروج طفاو الضوء و داروا غنيا هبال كان واقف اونفاس ليا
حتى بدأ يرقص و بقيت نضحك و نصفق و نرقص معاه غير منبعيد عاود ريحت و لعروسة خرجت و تبرزت بقشها و منبعديها داروا غنا شباب كان يرقص بعيد عليا حتى قرب و رقص معايا ديراكت ههه و جات لكاميرا
