اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
1)...في الحياة تجارب مرة و قاسية بزاف تعلمك كيفاه تمشي صح و كيفاه تفكر صح توريلك الطريق الصحيح و تمنحك السلام النفسي و الثقة بعد الانكسار ...انا سوسن نحكيلكم اليوم تجربة جازت عليا و ممكن جازت على بزاف بنات انا متأكدة انو واحدة من خمس بنات عاشت واش راح نحكي ..عنوان حكايتي يدل عليها من جوف الانكسار ..ايه من جوف الانكسار يولد امل يولد حب و نور يضوي ظلمة الدنيا و يحلي مرارتها ...اصعب شيء في الوجود انك تكون فاقد والديك ..يعني فاقد سندك و كتافك ..فاقد عزك و دلالك و حنان الدنيا كامل مايعوضكش ..انا الصغيرة بين اخواتي الثلاثة عشت حياة صعيبة و ذلك بعد وفاة والدي ..راني في 13سنة فاقدة الحنان ..فاقدة الامان ..بابا كان شخص غالي عليا بزاف كان من النوع الحنون الي يدفيني تحت برنوسو من البرد و يخبيني تحت جناحو من الظلم و يمسحلي دمعت عيني قبل ماتنزل ..معيشنا في عز و دلال و حاجة ماتنقصنا بالرغم انو قدنا قد حالنا ينحيها من فمو و يعطيهالنا ..بعد ما خطفاتو الموت منا كامل خاوتي صبرو غير انا هبلت عليه نضريت بزاف بفراقو حسيت بلي يتيمة عريانة من القوة و السند ..نبكي ليل نهار وواحد ما قدر يصبرني ...من حقي لانو بابا و حاجة ما ترجعولي ... "ماتت بعدك أبي إبتهالاتي وأستسلمت لرياح اليأس راياتي من لي غيرك ابي سندا و ينير ظلام السماوات " 2)...مع مرور الايام كنت نحوس على شخص يمنحني هذ الحنان يعوضني على الي ضاع ..كنت غايسة بزاف في قرايتي حتى يجي هذاك اليوم ..دخل الاستاذ تاعنا و قالنا رحبو بزميلكم الجديد أكرم *** من **** شفت معاه بعينين نعسانين مليانين بالدموع الي عمرهم ما جفو مقهورين من الدنيا و انا في عز المراهقة جات عينو في عيني دخلت شرارة منو لمخي ضربت في قلبي ..يا ربي اعجبت به من اول نظرة ..شحال كان شباب ..حطيت يدي على قلبي نتحسس في نبضو ..كان يضرب بزاف ههه ضحكت على روحي شبيا انا ..نلقاه جا بحذايا و قالي معليش نقعد معاك ..انا ماسمعتش واش قال و صوت قلبي طغى على وذنيا لانو كان راح يخرج من صدري ..نلقاه حرك الكرسي و قعد معايا ..كانت كامل الكلاصة تشوف و كامل الكراسة محجوزين انا الحزينة الوحيدة الي نقعد وحدي ... مشات ليام و هو كان نجيب و مجتهد و انا غايسة كيف العادة حياتي تمشي في الفراغ طول نشوفو يشوف معايا ..بلاك حاير فيا حاير في وحدة طول عينيها حومر و مهمومة ...حبيت نحكيلو و نشكيلو كان يعجبني هدوءو و التزامو و شكلو مع ليام بديت نتخيل روحي واقفة معاه نحكيلو همي و هو يسمعلي و يحنن عليا و يواسيني مكنتش نعرف عليه والو ..لانو جامي حكيت معاه...كل مانروح للدار نغلق بيتي و نبدا نحكي معاه في خيالي و هكا حتى نسيت همي و تنحاتلي الضيقة على قلبي ..كان معايا وين نروح اكتشفت اني نحبو .. "ما حرم الله حباً في شريعته بل بارك الله أحلامي البريئات" 3)...نغير عليه بزاف ..لانو لبنات كانو كامل طايحين فيه الوافد الجديد مخلوعين ..انا حبيتو حب طاهر هو اول واحد حبيتو هو اول واحد دخل قلبي بنيت معاه حياتي ..رجعت فرحانة و نحكي و نشايخ نسيت الي كنت فيه الدنيا زهاتلي و تفتحولي بيبان الحب ....دام حبي ليه سنين و اكيد من طرف واحد برك كل يوم نقول نروح نحكي معاه نحكيلو كيفاه راه ساكن في مخي و قلبي حسيتو يفهمني كون نحكيلو و يواسيني كيما راهو واقف معايا في خيالي تغلب عليا الوهم عدت نشوف نضراتو مسلطة عليا و اهتماماتو بيا حسيت انو يبادلني الشعور و انو حاب يقولي و تمنعو حوايج برك ..دوامة الحب صعيبة ..الحب من طرف واحد كيف السم بصح كنت نحب نشرب السم هذا.. كل يوم نزيد نصدق الوهم هذاك .. "إني بغير الهوى أخشاب يابسةٍ إني بغير هواه أشباه أمواتـي" أخيرا قعدت مع روحي و قررت اني نصارحو بلي نحبو و يا ريتني ما صارحتوش .. وجدت روحي كنت فرحانة بزاااف دخلت لكلاصة نشيطة بزاف قلبي يخبط كل مانشوف معاه هو تبسملي حسيت هذيك الابتسامة تشجع فيا خرجنا من الكلاصة ..مشيت ليه كل خطوة يزيد حبي ليه ..حابة نطوقو بين يديا و ندخلو في روحي ..وقفت قدامو بقيت نشوف في عينيه نتأمل في كل شي فيه ..كانت اول وقفة معاه و اول كلام معاه "إني هويت سريعا ًمن معاناتي ديني الغرام ودار العشق مملكتي عبلة أنا وكتاب العشق توراتي" ..قتلو أكرم ..كي نطقت اسمو الورد خرج من فمي شحال كنت نحبو ..هو يسمع و انا قتلو ..تقدر تتخيل انو كاين واحد يحبك من اول نظرة من زمان طويل ..هو ضحك ..قتلو ايه كاين ..قالي شكون ..قتلو بحشمة و عينيا تعمرو بالعشق .."أنا“ ...ضحك ..قالي ..انت واش اسمك ..انا جاتني صدمة سنين و احنا نقراو مع بعض ما يعرفش اسمي حتى ..فما بالك بالحب "فراشة جئت القي كحل أجنحتي لديك فأحترقت ظلما ًجناحات" 4)...تبسمت انا ببلاهة و قتلو سوسن ..قالي شوفي سوسن ..انا مانحبك ما نقدر نكون معاك ..اسمحيلي ..انا طفا النور في عينيا ما بقيت نشوف في والو ..كل احلامي تكسرت فوق راسي ..حسيت كرامتي طاحت في الارض ..ما قدرتش نزيد كلمة ..قتلو ..صحا ..بعدت عليه شوي و جاتني الدوخة العالم الي كنت بانياتو ظهر وهم مش صح ..طحت في الارض و حكمتني نوبة هستيريا من البكا ..يا ربي انا حرقت قلبي سنين .. "أنا الذي ضاع لي عامان من عمري وباركت وهمي وصدقت إفتراضاتي عامان ما رف لي لحن على وتـر ولا أستفاقت على نور سماوات" انا دمرت حياتي و لعبت بقلبي على وهم ..ڨاع مكانش منها ..بكيت حتى تجرحو عينيا ..دخلت في حالة اكتئاب من اول و جديد ..علاه خليتو تسلل في حياتي في لحظة ضعف و سكن مخي حتى لعب بقلبي ..العالم في جيهة و انا في جيهة ..هو جاتو عادي انو يرفض وحدة كيفي تعود انو يسمع بلي يحبوه و يرفضهم ما علابالوش بلي دمر كل خلايا قلبي ..كل مخي تعطل نشوف فيه نهاية العالم ..ماعلابالوش بلي كنت عايشة بيه وهو حط على رقبتي حبل المشنقة ..جاتو عادي كي قال لا ..مادارش في حسابو بلي قتلني خلاني بلا اكسجين و انا كنت نتنفسو .. "أضعت في عرض الصحراء قافلتي فمضيت أبحث في عينيك عن ذاتي وجئت أحضانك الخضراء منتشية كالطفل أحمل أحلامي البريئات غرست كفك تجتث أوردتي وتسحق بلا رفق ..بلا رفق مسرات" 5)...شحال غاضتني روحي ..بعد ايام مارحتش نقرا ..قعدت مع روحي اكبر غلطة في حياتي درتها حبيت واحد في لحظة ضعف ..الحب هذا يخلي المخ يتعطل و القلب يتحكم ... الحبّ كالحرب، من السّهل أن تشعلها، ولكن من الصّعب أن تخمدها....توضيت و صليت و دعيت ربي باه ننساه ..الأولى انو صبرت لربي في محنة بابا و بكيتلو و شكيتلو ليه مش سلمت قلبي ليوسف الي عمرو شاف معايا حتى اسمي ما يعرفوش ..قلت حسبي الله و نعم الوكيل .. رجعت نقرا ..كنت نبقى وحدي نذكر في ربي و نستغفر ..هذا هو مفتاح النسيان كثرة الاستغفار ..بعد عام من هذي الحادثة كنت نسيت أكرم تماما ..كان ايماني بربي يقوى و يزيد ..تبدلت عقليتي ..الحمد لله..حتى تجمعت مع صحاباتي و بدينا نحكيو فتحو دفاتر الماضي حطيت يدي على قلبي نتحسس في جرح الماضي لقيتو طاب و برا كملنا نحكيو حتى قالت سهى ..أكرم الي كان يقرا معانا حكموه لابوليس ..دق قلبي ..قتلها علاه ..خير ..قاتلي ..لقاوه مع جماعة تاع مخدرات ..انا حمدت ربي عرفت انو عسى ان تحبو شيئا و هو شر لكم ..فحمدت ربي انو قدر لي خيرا مرو ايام و انا نقرا عادي حتى جا خويا قالي كاين واحد حاب يخطبك ..انا بطبيعة الحال استفسرت عليه و عرفت انو ناس ملاح صليت استخارة و قلبي ارتاحلو في اول لقاء و تمت خطوبتنا و الحمد لله يا ربي ..عاد يحبني هبال حاجة ما تغلا عليا ..يحبني صح كيف ما نحبو انا ..و قريب نتزوجو و ربي راضي علينا ان شاء الله يارب .... و العبرة لكل من يقرأ حكايتي ان يضع الله في قلبه و لا تحطم قلبك لاجل شخص لا يقدر ثمن حبك له „“
