واول ماوصلو قدام المكتب وعرفت انو ريا قامت بالدور المطلوب منها تمام وده من منظر معتز البعاين لي ريا وعينو ح تطلع عليها.وح ياكلا بي نظراتو القذرة .. طلعت تلفونا بسرعة وفتحتو وعملت جرس لي هشام عشان هو كمان يقوم بي دورو...وحاولت بعدها تلهي فاطمة بي الكلام شوية لحدي ما هشام يتحرك عليهم..وبدت تحمش في النيران
* شايفة..شايفة المنظر ..ما قلتا ليك ناوي يبيعك
* يبيع منو ..انا فاطمة حسان هو مابعرفني ولا شنو
* كويس انك اتأكدتي وشفتي بي نفسك..المهم اتصرفي معاهم وإلا. ح يتفقو عليك و يضيعوك
فاطمة اتحمقت شديد وبقت مابتفكر في حاجة إلا انها تخش عليهم المكتب وتقلبو علي راسم وخلت جيهان واقفة ودخلت بسرعة علي معتز وريا وهي مولعة زي النار
اول ماهشام شاف رقم جيهان وقف بسرعة وقال لي اصحابو
* الحقوني سريع وبدون ما تسألوني عن حاجة..بعدين بحكي ليكم
وسألو ايهاب بي قلق
* في شنو ياهشام
* مافي زمن احكي ليكم المهم يلا معاي ولا الحقوني بسرعة
واتحرك سريع عشان يلحق ريا وجيهان..ووراهو اصحابو الكانو محتارين في هشام مالو اتنفض فجأة كده وقام من مكانو وطلب منهم يلحقوهو
دخلت فاطمة حسان المكتب وهي هايجة ومعتز لما شافا نطط عيونو وماعرف دي جاتو من وين في الساعة دي
* الجابك شنو اسه
* الجابني شنو..جيت عشان اكشف الملعوب البتلعبو علي انت وصديقتك الجديدة
وردا عليها معتز بي زهج ونفاذ صبر لانو ضيعت عليهو فرصة ما بتتعوض وجات في زمن اصلو مامناسب
* وطي صوتك ده وشوفي انتي بتتكلمي مع منو
وهنا ريا زادت النار زيادة
* دي جات ناطة من وين اسه...خلاص امشي انا واخليك معاها ونكمل كلامنا بعدين
وقال ليها معتز بي لهفة
* ماشة وين خليك شوية
* لا ماينفع بعد تشوف الاخت دي دايرة شنو برجع ليك تاني ..يلا اخليكم تحلو مشاكلكم براكم وطلعوني انا منها
في اللحظة دي بره المكتب وصل هشام واصحابو واتسحبت ريا بسرعة من المكتب الكان الجو فيهو مكهرب بين معتز وفاطمة البقت ماشايفة قداما وكل الفي راسا انو معتز باعا وريا قدرت تغريهو عشان يبيعا ويميل ناحيتا ويخرب علي فاطمة كل خططا
هشام اول ما شاف ريا طالعة وهي مبتسمة إطمئنا انها قامت بي دورا علي اكمل وجه والباقي علي فاطمة حسان هي الح تكمل السيناريو الباقي حسب ماهم متوقعين...ريا طوالي جرت علي هشام
