#قصه_حقيقيه (حبايب قصة كلش حلوة ياربي تعجبكم )
#زواج_تقليدي
كامله
احب احجيلكم قصتي
اسمي تماره عمري 24 سنه مواصفاتي كصيره رشيقه وعيوني كبار وبني شعري اسود مي طويل للافخاذ بشرتي بيضه يعني بين قوسين جميله وصاااكه خخخخ
تحصيلي الدراسي العام تخرجت من كليه العلوم وكعدت بالبيت ماكو تعيين واني ما احب اداوم بالمؤوسسات الاهليه اريد تعيين حكومي
مرات اصير لسان ووكحه ومرات اصير خبابه وفقيره وما اعرف شحجي 😇
احجيلكم على عائلتي عندي بابا لواء بالجيش وماما جانت موظفه وتركت الوضيفه يعني طلعت روحها تقاعد
عندي اخوه ولد اثنين واحد الجبير بعده ديدرس طب مرحله اخيره والصغير بعده طالب بالسادس اعدادي ويريد يروح كلية ضباط
اهلي عائله معروفه كلش والها مقامها بين الناس من جدي لحد بابا
بابا جان كلش يخاف عليه ومداريني مثل المي الي بالصينيه وحرس يجيبوني ويودوني للسوك او للدوام حتى مرات يطبون ويايه للكليه اضوج منهم اكوله لبابا ما اريدهم يكولي لا بابا انتي شرفي الدنيا متتأمن اخاف يخطفوج واني هم جنت اسمع حجي توصل لبابا رسائل تهديد من ناس ميردون بابا يكشفهم للدوله على حقيقتهم ومستمرين يهددونه بينه
المهم نرجع اليه جانو يجوني خطابه هوايه يعني ميمر شهر اذا ميجوني خطابه بس اني ما اقبل لان ولا واحد يعجبني اريد قسمه زينه جانو يكلولي شايله خشمج
عماتي كلهن عدهن ولد ويتوسلون ابابا حتى يقبل ينطيني لواحد منهم بس اني جنت اموت منهم كلهم ماعدهم شخصيه ولا مأسسين حياتهم وفوكاها مو حلوين
بيوم من الايام اجوني خطابه بس هالمره زلم مو نسوان
صديق بابا هم رتبه عاليه بالجيش خطبني لاخوه
كال بابا اني اعرفه كلش زين لابو احمد هذا عشرة عمر وياه انسان ماكو مثله خلي اسأل على اخوه واشوفه
طلع اخوه اسمه زيد عمره 32 سنه متخرج من كليه الهندسه المعماري وعنده مكتب وعنده بيت طابقين ومأثث وسياره موديل حديث وكلها تمدح بي وباخلاقه ما ظل واحد ما سأله عليه عائلتهم هم معروفه وخوش ناس عنده 4 اخوان و3 اخوات وامه مره جبيره عايشه ويه ابنها ابو احمد صديق بابا وزيد اصغر واحد بيهم وبس هو الي ما متزوج
اني كلت خووش مواصفات بقه بس اشوف شكله كلت اذا طلع مو حلو والله ارفض وبابا يضحك عليه 😂😂😂
دزلهم خبر كاللهم البنيه تريد تشوف الولد وهم هم كالو راح يجي هو وامه واخواتهه البنات وخلي يكعدون تشوفه ويشوفها واتفقو على الجمعه
اني رحت اشتريت فستان مال حجاب طويل ومخصر لونه اخضر زيت وني طوووخ وبي وشاح من الاكتاف للكاع وحزام ذهبي ع الخصر وشاله وياه لماع واشتريت حذاء عالي ذهبي وطوك مال حجاب ذهبي
من لبستهم كلهم سوه دا اقيسهم طلعت مثل الاميره مثل هذولي البنات العارضات الي نشوفهن بالصور والاعلانات اني بست روحي بالمرايه واكول لروحي فدديتج تمووش من يوم يومج انيقه وتخبلين
اجه يوم الجمعه ورتبنه الصاله وحظرنه الضيافه وصعدت فوك اني اجهز نفسي وره شويه جان تجيني بت خالي كالت ولج تماره اجوي حظري روحج حتى تنزلين تقدمين الضيافه
اني مسيطره ع الوضع لا خايفه ولا ابد شوو عندي عادي الشغله يروح هذا يجي 100 واحد بمكانه فجنت مخليه احتمالين ابالي لو تصير لو متصير
طبعا خليت الضيافه بعربانه الظيافه ودخلت الهم سلمت ع امه واخواته وضيفتهم واني بعدني ما مباوعه عليه وصلت يمه باوعت عليه ردت افقد الوعي شنوو من جمال وشخصيه شايل عززززه لو بيدي اكوله بنفس اللحظه لك اي قابله بيك
جماله بعد مااعرف اسلم واقدمله كام كلبي يدك والفرحه مبينه ع وجهي طبعا احجيلكم مواصفات زيد ( طويل وعضلات وجسم رياضي عيونه اوووف عيونه خضر تخبلللل لابس قاط ومتأنق ع 24 قيراط ) صار كلشي مثل ما اريد واهله تقدمو بشكل رسمي وامي انطت موافقه مبدئيه وبعدين وره 5 ايام رجعنالهم موافقه نهائيه واجوي اهله وحددو موعد الخطبه والعقد والعرس كلها خلال شهر كالو احنه كلشي مخلصين وماعدنه شي ماكو داعي نتأخر
وبابا واهلي هم قبلو واني هم جنت كلش فرحانه ومن اراوي صورته لاحد يكلولي هنيااالج يخبل
عماتي طبعا زعلن وصارت مشكله وياهم بس بابا ما اهتم وكلي مالج علاقه باحد اختاري الي يعجبج انتي وهو يدري بيه اكرهم ولد عماتي
صار العقد وسويت حفله يقاعه ملكيه ولبست فستان قصير ومكياج وتسريحه بسيطه طلعت كمر وهو اني اصلا حلوه وكلشي صار مثل الاحلام والمدعوين اقاربه كلهم يكولوله وين لكيتها هاي البنيه
هو ماادري حسيته مو كلش فرحان مدري مستحي لان نسوان هوايه يعني هو طبيعي ويضحك ويحاجيني بس مو من كل كلبه احسه حتى نظراته اليه عادي وحتى حسيت اني ما عجبته بس ما ردت افكر زايد وجانت فرحتي جبيره
عدت الخطبه وكل ما اخابره حتى نحظر نرتب ترتيبات الزواج والجهاز جان يحجي ويايه بس بالتفاصيل الضروريه ويكولي اخذي الي تردينه والي يعجبج اني اريده كله ع ذوقج
بس ميتغزل ويحجي حجي مخطوبين ويخلص مكالمه بسرعه ويكولي مشغول اجوني ناس لو تعبان كلش اليوم اريد انام وهكذا بس ما بين اليه هو يكرهني او ميريدني
لا بين مشغول وميلحك اني عديت هالسالفه
رحت اني للبيت وجهزت ملابس وملحقاتها كله جهاز توب اني وماما وخطيه ماما فرحانه بيه كلش ورتبناه بالغرفه
الغرفه اختاريت تركيه ودزيتله الموديل ثاني يوم رحت لكيتها منصوبه بالغرفه والبيت يخبلل وميحتاج اي شي صدك جنت فرحانه وكلت هايه القسمه الي اريدها
اني بت دلال ومولوده وبحلكي خاشوكة ذهب مثل ميكولون ما اريد زوجي يكول اقل من هالشي حتى اعيش بنفس المستوى
خلصنه كلشي من اصغر شي لاكبر شي وحجزنه صالون وقاعه
و صار موعد العرس خابرته حتى نتفق نروح للمصور ناخذ صور وهيجي شي لكيته صوته مخنوك كلش
كلتله زيد شبيك كلي مابيه شي اني طولت وياه بالحجي وكلتله لا بيك كلي لتلحين مابيه شي وصار عصبي وكام يصيح بالتلفون
واني هم جادلته وعليت صوتي كلتله ما ادري ليش احس انت ما مهتملي ومتريدني اصلا لا سألت ع جهاز ولا عرس ولا طلعنه مره اني وياك ولا سمعت منك حجايه حلوه كله رسمي الحجي لبالك اني مغصوبه عليك
كالي اييييي صحيح انتي عليه كوه بالغصب اني ما اريدج ولا احبج واني احب وحده صارلي 6 سنين اريدها ومحد يقبل يخطبها اليه وامي مريضه بيها هذاك المرض وتريد تزوجتي وتفرح بيه وخلي يكون بعلمج الزواج والحفله باجر اتم ع احسن ما يكون وكأنما ما سمعتي من عندي شي بس اني وياج وحدنه لا يمكن نكون متزوجين احنه اخوان لا اكثر
واذا طلعت حجايه وحده من الكلام الي سمعتي متلومين اله نفسج راح اطعن بشرفج واسويلج فضيحه كدام كل الناس بالزفه وانتي شوفي شلون راح تتشوه سمعتج وسمعة ابوج واهلج وراح تصيرين عار عليهم وبعد محد يكلبج
اما اذا صبرتي وما حجيتي شي وخلص العرس ع خير راح اعوضج بالي تردينه
اني شتريدون مني شسوي وكأنما وكعت من السمه للكاع على راسي وظليت صافنه صدك لو جذب هذا الحجي
اني بكابوس لو بيقضه ماادري ظليت مصدومه مثل الواحد الي متجمد ما بجيت ابد ولا دمعت عيني
اريد احد يجي يضربني راشدي يفهمني
باااجر عررسي يا ناس
زين احجي واكول وصورة بابا كدام العالم وفشلته شيكول وشيحجي هالهيبه والاسم الي الهم تجي وحده زعطوطه مثل تخرب كل هذا هو هددني اذا حجيت راح يكول اني مو شريفه والله اعلم بعد شيكول حتى يخلص روحه والنلس تسوي من الحبايه كبايه زززين وشماتة عماتي بيه
ردت ابجي ردت اصيح اطلع الي بداخلي ما كدرت ابد ظليت جماد متمدد طبعا ما نمت للصبح من الصدمه
صار الصبح واجتي امي معدتني وتشبك وتبوس بيه وتبجي شلون راح تفاركني واني بلا حركه
اجوي صديقاتي وبنات خالي اثنين من عمري كالو ياله طبي اغسلي حتى نروح للصالون
طببوني للحمام وطبن ويايه وضحكهن وسوالفهن وشقاهن واني ولااا يمهم اصلاا هنه عبالهن اني للن اليوم عرسي ضايجه ع بيت اهلي
رحت للصالون وسويت تسريحه ومكياج رووووعه وجابولي البدله البيضه الي اشتريتها والمسكه وملحقاتها اباوع ع روحي هو هذا اليوم الي جنت احلم بي وكلها تنتظرني وتريد تشوفني شلون راح اطلع 😞
رجعنه للبيت واهلي ياخذون صور ويايه وماما تبجي وتهلهل وبابا يبوس بيه وعيونه مدمعه
كل شويه اريد احجي واكول بس من اشوف هالفرح راح ينكلب مصيبه ابطل واسكت واكول على الله هو يدري بيه اني ما سويت شي وماعندي ذنب
حسبي الله ونعم الوكيل
اجتي الزفه واجه اخذني ويمثل الفرحه والابتسامه تارسه وجهه واني لسه ع صدمتي طلعت من بيت اهلي واني اباوع ع البيت وبابي مو يم شي غير بس اسأل روحي شراح ينتظرني هناك يمه معقوله يموتني حتى يخلص مني ويكول انتحرت ؟ !!!!!
شراح يسوي بيه
اخذوني للقاعه وصديقاتي واهلي واهله والأقارب ادك وتركص واني كلشي ما اشوف كدامي غير دوامه سوده دتفتر خلصت الحفله واجه اخذني للبيت والناس راحت وظلينه بالبيت بس اني وياه
كعدت بالهول هو عافني وطب لغير غرفه
اني من شفته عافني وراح تأكدت هالشي حقيقي هالموقف مثل الكفخه القويه الي اجتني صحتني
اني شهكت وبجيت بجيت بجيت ع كد ما اكدر هو يسمع صوتي لان بس صوت البجي يرن بالبيت وره 5 ساعات من البجي المتواصل سكتت لحظات بعد ما تعبت
اجه وجاب وصله بيضه ملطخه بالدم مقسومه بالنص كلي هذا النيشان نص راح يروح لاهلج ونص راح يروح لاهلي وبهذا الشي راح ينرفع راسج كدام الكل ولا اني ولا غيري بعد يكدر يطعن بشرفج
باجر سفرتنا لتركيا مثل ما هي
ما تغير شي نروح نسافر 10 ايام ترتاح اعصابنه وانتي هم تخلصين من سؤال النسوان وتخلصين من الخطار هالفتره
ما اني نطقت بحرف ظليت ساكته
هو كلي غرفتج الج مثل ما رتبتيها تكدرين تاخذين راحتج بيها اني راح اروح بغير غرفه
كمت طبيت للغرفه مالتي طبيت غسلت واني ابجي واريد انتحر واخلص اريد املخ روحي رحت طلعت من الكنتور بجامه لبستها وما ردت انام ع الجربايه مال العرس لعبت روحي منها جان اكو اريكه بالغرفه حطيت مخدتي وكوه تكعورت عليها واني ابجي واصرخ واعض بايدي لحد ما غفيت من التعب
صار الصبح وصحيت ع صوت زيد يكعدني كلي تماره كومي امج واخوج هناا جابو ريوك
فتح باب الكنتور وطلع الوصله كلي هذا شرفج الي راح يتباهون بي اهلج كومي ودي لامج وارفعي راسج وخلي روحج طبيعيه هي مراح تكدر تحجي وياج اكثر من هيجي شي اني اقتنعت بحجيه وكمت بدلت بسرعه وطلعت سلمت عليهم سألتني امي ع السريع كالت شخباركم كلتلهاىماما كلشي تمام فرحت وبوستني وكالت بنيتي كبرت وتزوجت الك الحمد ربي
وطلعت هي واخويه
