# في بلاد الغربه

البارت 1^_^

~الحلقه الاولي~
~
~
~
في يوم من الايام وفي حوش عائلي هادي ومريح ، كانت تعيش .... يارا بنت طموحه هاديه حالتهم متوسطه عايشه مع خواتها الثلاثه تحب قرايتها و قاعده في حالها ما لهش في حد

يارا >> نوسه نوضي
نوسه >> خطيني الساعه كم ؟
يارا >> تي صبي الساعه ١ الظهر باتك قريب يجي من صلاة الجمعه هيا
نوسه >> اووووف امك نزلت ؟
يارا>> اها خذت نسيم ونزلت
نوسه >> الحمام فاضي
يارا>> قاعده فيه ياسمين تدير في حمام
نوسه >> بعد تطلع نوضيني
يارا >> نعنك ما نضتي نازله انا نساعدهم لوطا تو يطلقو لساناتهم
نوسه>> نعن مرض والله ماني رافعه كشيك طيبه انتي
يارا>> بلا مشاكل

نزلت يارا لوطا وطلعت ياسمين من الحمام

نوسه >> باهي لي طلعتي تقول عروس سنه في الحمام
ياسمين >> عارفتيني نطول .. كنك صوتك عالي انتي و يارا ؟
نوسه >> اختك هذي مرخيه وطيبه وعافسين علي رقبتها عيت عمك نازله تبي تندك مع عيت حنه في المطبخ
ياسمين >> ما تبيش مشاكل عارفه لسانتهن و عارفه عماتك ومرات عمك اللفعه
نوسه >> ماتخطريهش عليا بنصبي نخش لحمام
ياسمين>> سقدي بيش ننزلو مع بعضنا
~
~
~
~
لوطا في حوش العيله

يارا >> صباح الخير
خويره "مرات عمها الكبير" >> عنجد صباح الخير حتي اللي رقد عالفجر امس ناض وانتي جايه الساعه واحد تقولي صباح الخير

سكتت يارا

نسيم >> امس يارا ما رقدتش كويس كان عندها قرايه تحل فيها وبعدين سلم لي قاعدات في المطبخ جت عليها

خويره>> ريتي بنتك يا سعاد دايره لسان
نسيم >> انا اللي حكيت مش ماما احكيلي انا
يارا كرت نسيم >> خلاص اسكتي وشوشتلها عشان خاطر ماما

طلعت نسيم وسعاد هزت اليارا راسها تعدي تلحقها

انا يارا عمري 22 سنه وبنخش سنه ثالثه صيدله خشيت للطب غصبا عني مش رغبتي كان حلمي نخش لغات نحب الانجليزي بكل بس بابا كان يبيني طب وما قدرتش نقول لا بس بشكل عام نحب قرايتي ... انا وسطية خواتي عندي اخت اكبر مني

وانا الثانيه ... واللي بعدي نسرين عمرها 20 نقولولها نوسه شخصيتها قويه وما تسكتش علي حقها تقرا سنه ثانيه تخصص ادب انقليزي خشتله عشاني وحياتها كلها اكشن ومشاكل و انا متبهدله وراها عشان علي روس بعضنا

طبعا نحن اربع بنات وما عندنش خوت وبابا علي الحمدلله انسان يخاف ربي و ديما يقول عندي اربع بنات احسن حتي من مية عيل ويحب ماما ومتفاهمين مع بعضهم

ماما طيبه بكلللل اسمها سعاد ماتعرفش تدافع علي روحها ولا حتي تاخذ حقها سندها الوحيد هما نحن بناتها وتخاف علينا من الريح

طبعا نحن ساكنين في حوش عائلي اول دور عيت جدي هل بابا .... فيه جديده كبيره في السن ومريضه ومعاها عمتي خديجه مش متجوزه وكل يوم يجن عماتي لثنين لمتجوزات بعيالهن
الدور الثاني شقتنا نحن ومقابلتها شقة عيت عمي سعد اصغر واحد في عمامي وفروخه صغار عنده ثلاث عيال علي روس بعضهم وبنت قالبين العماره وخصوصا بعد يتلاقو مع عيال عماتي العماره تشيل

الدور لي فوقنا عيت عمي صالح عمي الكبير هوا ومراته و عنده بنت كبر اختي نسيم وشابين ... مش مهم تعرفوهم بس اهم شي محمد ولده عمره 26 سنه و عشان نحن ما عندنش خوت متحكم فينا بدرجه كبيرة ومتحكم في طلعتنا وخشتنا ووين نمشو ووين نجو وما نطلعوش الا لما نستأذنو منه
~
~
~
طبعا نحن كل جمعه نلتمو لوطا وينزلو عمامي وصباياهم ويجن عماتي ورجالتهن

بعد الغدا

مقعمزين برا في الڤرندا انا وخواتي وبنت عمي

ياسمين >> نبي نكلم خالد من امس ما رنيتش عليه
يارا>> فكينا الله يربحك محمد قاعد تو يحقك يدير قصه
نوسه>> تي خطيبها راه مش صاحبها وهيه مصاحبها ما هناها وهو ديما كابسها توا حتي مخطوبه ما تريح
ياسمين >> فوتيها خوافه هذي انا بنخش في المخزن كان جا ديرن لقطه

نسيم >> ما تشعفش
نوسه<< اس انتي
يارا >> ماما وين ؟
نوسه>> مقعمزه جوا
يارا >> اكيد يعزقن في الكلام افطني الياسمين نعدي نشوفها

صبيت مشيت شور الدار لقيتهم يهدرزو قعدت مقعمزه حذا ماما

عمتي نعمه>> شباب توا يارا مازالت قاعده
سعاد>> لا والله كان نلقا ما نعطيها بنيتي هي الوحيده لي فيهن شايله همي انا وبوها تغسل و اطيب و تضم وتقرا مشاء الله عليها
نعمه >> ان شاء الله ربي يقوي سعدها
سعاد >> سلمك

وهما يهدرزو وخويره مش عاجبها الجو تبحت فيا انا وماما من فوق اللوطا برمت وجي بحتت في الباب لقيت محمد طالع شور الفرندا اذكرت ياسمين صبيت نجري فطنتلي خويره

انا>> محمد محمد

محمد برم >> تي ها كنك تعيطي؟ وشن قايلك انا علي القعده هكي بدون حجاب

انا >> نسيته اااااا تعال كذا بنسألك علي حاجه في تلفوني خارب ونعلي في صوتي نبي نوسه تسمع واطلع ياسمين من الفرندا

محمد >> مش وقته شن فيه وكان معطي الباب بظهره وانا مقابلته نحق في نوسه تفنص وتقولي لاهيه

كريته من يده وجاب الله تلفوني في المطبخ كاين
محمد >> يارا يدي كنك شن فيه
يارا >> تعال بس تو تطلع

مسك التلفون وقعد مصبي مطبس راسه عليه وانا قدامه رافعه راسي نبحت وراه في الباب نراجي فيهن يخشن

محمد مطبس>> كنه التلفون وبعدين عليش حاطه صورتك وبدون حجاب افرضي فجامعه ترفعي تلفونك يشوفها حد وراك حولي امها

يارا >> باه تو نحولها ونبحت في الباب ااااا تلفوني ما يمسكش في شحن نحط فيه في الشحن يقعد ميه نفكه ينزل للنص

وانا نحكي وهوا يبربش فتلفون تخش علينا خويره

#يتبع

عجبتكم الروايه  ياااااريت تعلقولي وتصوتولي