# في بلاد الغربه

الحلقه الخامسه

~الحلقه الخامسه~-
~
~
~
~
طلعت لقيت حازم برا يدخن

بحت فيا حازم بحتت فيه وقتله>> عظم الله اجرك ربي يصبرك

حازم عزق الدخان من يده >> اجرنا واجرك علي الله

طبست راسي وهيه برمت تبي تعدي

حازم>> حرقه في قلبي مستحيل تطفي عمري ما نسامح روحي ، نحس في روحي قصرت معاه ياريتني انا مكانه

انا برمت ورديت مكاني >> هيه هيه نفس النار ونفس الحرقه انت كنت حاتموت وهلك حايتعذبو وهوا كان حا يكون مكانك وحايحكيلي نفس الكلام

حازم ضحك ضحكه صفرا >> مش عارف بس نحس في روحي نادم حاس انه كنت نقدر ندير حاجه وما درتهش خويا الصغير هضا ماعنديش غيره

انا >> ماكانش في يدك شي قضاء الله وقدره هضا حد عمره توا مش حايفيد شي الا انك تعدي تصلي وتدعي ربي يرحمه ويخفف عليك

قطع كلامنا رنة تلفون محمد مسك التلفون بيده اليسار وحطه علي وذنه اليمين و طلع دخان

سيبته يرد علي مكالمته وخشيت للمستشفي
~
~
~
~
في بنغازي عند هلي

نسيم >> من امس واصله يارا وماكلمتش

ماما >> باتك قال محمد كلم عمك وقال تمام كويسين

نسيم >> باهي تمام

خشت نسيم لدارها وكان تلفونها يرن

نسيم >> الو جهاد

جهاد >> ما تقدريش تنزلي ؟

نسيم >> ننزل وين ؟
جهاد >> تعالي من الباب لي لاورا متاع المطبخ

نسيم >> باهي راجي شويه بس

صكرت وخشت للمطبخ لقت نوسه >> قتلك
نوسه>~ نعم ؟

نسيم >> بننزل نشوف جهاد شويه ونجي

نوسه>> فكيني يا نسيم باتك قريب يجي

نسيم>> خمس دقايق بس والله مضايق

نوسه>> بشرط تركبي وتحكيلي من امتي تحكي معاه وليش مش حاكيتلنا لعند كبستك انا ؟

نسيم >> باهي باهي ننزل ونجي لاهي ماما

طلعت نوسه تهدرز مع امها ونزلت نسيم الجهاد

نسيم>> شغلتني كنك

جهاد >> مضايق شويه
نسيم >> عشان محمد ؟
جهاد >> مش عارف متلخبط ياريتني مشيت معاه نحس في يارا بروحها مش قد المسؤوليه هذي

نسيم >~ بالنسبه اليارا اطمن بمية راجل وماوافقتش الا وهيه عارفه انها قدها

جهاد >> بس عقلي مش مريحني

نسيم >> جهاد انت راجل وهلك توا محتاجينلك بكل ما تضعفش

مسك يدها >> مافيش حد مصبرني وحاس بيا كيفك ! نحبك ونوعدك يروح محمد بالسلامه و نحكي الباتي علي طول مادام عطو يارا المحمد معناها حايسير من موضوعنا

نسيم >> ان شاء الله يارب خلاص خليني نركب نوسه تهدد فيا

جهاد >> خلاص تمام عدي

نسيم >> باي

طلعت نسيم وركبت فوق وسكرت الباب بشويه

وخشت للمطبخ خشت وراها نوسه >> تي طولتي

نسيم >> لا والله سريع

نوسه >> تعالي فهميني

نسيم >> امممم لنا تقريبا ست شهور بس بنعرف كيف زرقتي علينا

نوسه >> حسيت من نظراتكم ولما قعدنا معش ننزلو الحوش جدي قعدتي اتحوحزي و تديري في اي سبله عشان تنزلي اكيد طبعا مش حايكون محمد ف جهاد هوا المقصود احساس بس لكن تأكدت لما كبستك امس

نسيم >> ههههههههه يوم اللي روح بيا انا واخته من المدرسه وهكي عطاني رقمه

نوسه>> قصدك هاجر تعرف ؟

نسيم>> لالا مانبوش حد يعرف بكل ماحد يعرف غير انا وياك وهوا بسسسس و يارا قريب كبستني الفتره لي فاتت

نوسه>> بس انتي مازلتي صغيره؟

نسيم >> خلاص شهر ونخش ال ١٨ بعدين انا مانبيش نجوز توا وحتي هوا مازال صغير

نوسه>> اممممم ردي بالك فكيني من كثرة المواعيد والطروح را تزرق عليكم خويره تفضحكم

نسيم>> معش عندها ماتحكي من بعد ما محمد خذا يارا وهيه منطمره و مش موريتنا وجهاا

~
~
~
~
~
ثاني يوم محمد دار تحاليله وبكرا حاياخذ اول جرعه

انا >> بنمشي لحوش بنجيب كم حاجه
محمد>> باهي تو نقول الفرج

انا>> لالا تو نمشي بروحي

محمد >> استني بس ومسك تلفونه ورن علي فرج

فرج>> اهو قاعد قدام غرفتك

صكر فرج وخش للغرفه

محمد >> قتلك يا فروجه نبي حاجات للحوش تشيلها معاك؟

فرج>> مايهمك شي طالع توا انا بنشوف حازم مسافر بكرا

محمد>> تمام معناها عدي معاه

انا هزيت براسي

طلعت من الدار انا وفرج واستغربت انه محمد كيف يخليني نمشي مع حد غريب

قطع تفكيري كلام فرج>> محمد صاحبي من لما كنا في الابتدائ

انا >> اهاااا بس مش سامعه بيك

فرج >> كملت ثانوي وسافرت علي طول قريت جامعه وتوا نحضر ماجستير

انا >> ربي يوفقك

خذينا تاكسي

فرج >> انتي اخت محمد ؟

انا سكتت شويا >> لا بنت عمه

ما بتش تطلع معايا كلمة مراته؟ اللي طلع معايا كلمة بنت عمه

فرج>> اهااااا

وسكتنا وصلنا للعماره لقيت باب الحوش لي مقابلنا مفتوح

فرج>> انا هنا بعد تكملي دقي عليا

انا>> تمام

خشيت للحوش توضيت وصليت و طلعت شنطه صغيره حطيت فيها دبش ليا والمحمد و خذيت فلوس و اوراق مهمات خفتهن يريحن و طلعت الدبش من الشنطه غسلته علي يدي وكملت وطلعت من الحوش

جيت للشقه لي مقابله لقيت الباب مفتوح دقيت رد عليا صوت حازم

طلعلي >> خير كيف حالك
انا >> بخير وانت شن داير؟
حازم>> الحمد لله علي كل حال

كان شكله باين عليه الحزن لحيته مهمله و الدخان معبي الشقه و عيونه مرهقات باين مش راقد

حازم>> فرج زرق علي الدكان تو يجي

انا >> تمام نساعدك في حاجه

التفت حازم علي الشقه كانت مكركبه >> قاعد نلم في دبشي

انا >> تمام

وخر حازم وخشيت انا مش عارفه ليش كنت واثقه فيه مع انه شخص غريب عليا بس حاستهم هوا وفرج كأنهم نعرفهم من زمان

خشيت للشقه >> خش دير حمام وانا حا نلم الدنيا

سكت شويه >> بس حا نأخزك

انا >> حانلم لعند ما يجي فرج

حازم>> تمام خذا دبشه وخش يدوش

لقيت الصاكو مفتوح قعدت نلم في الدبش ونحط فيه وخذيت شكاره حطيت فيها الدبش لي يبي غسل وحطيته في الشنطه كان دبشهم واجد بكل

مع خشت فرج تفاجأ

انا >> لقيته حايس قلت نساعده

ضحك >> باهي تمام جبت شوية حاجات لكي والمحمد كافيتيريا المستشفي مش كل شي فيها

انا >> شكرا .. قتلك خليك مع حازم انا نعرف طريق المستشفي لميتله دبشه كله بس ناقص الكنادر مالقيتلهنش مكان

فرج>> اهو شنطه تو نطلعها

انا >> تمام

مع طلعت حازم شعره مبلول

انا >> لميتلك الدبش كله واهو فرج حايلملك الكنادر

حازم>> شكرا

صبيت من مكاني وجيت قدامه >> توصل بالسلامه وان شاء الله اخر الاحزان

حازم مد يده >> وان شاء الله تروحو مجبورين الخاطر وشكرا

انا مديت يدي سلمت وكانت يده باارده>> العفو

وجيت بنطلع >> اه استني طلع تلفونه هضا رقمي في ليبيا عطيه المحمد لو تبو اي حاجه رني عليا انا قعدت هنا فتره طويله وتعاملت مع دكاتره واجد

انا طلعت تلفوني وعطيته له كتب الرقم خذيته وخزنته

طلعت ونزلت خذيت تاكسي مشيت شور المستشفي

حازم>> ليش ما مشيتش معاها ؟

فرج>> قالت لي خليك مع حازم نعرف طريق المستشفي

حازم>> تمام بكرا وصلني للمطار و عديلهم شكلها ما تعرفش شي

فرج >> تمام

حازم تنهد وبحت في الشناطي >> ربي يصبرني يارب

فرج خبطه علي كتفه>> تو ربك يفرجها يا صاحبي

حازم>> غصه في كبدي لعند نموت مستحيل ننساها ولا ناره تطفي مش عارف كيف بكرا بنواجه هلي ....

فرج >> تو ربك يحلها من عنده خليك قوي

~
~
~
~
~

مر شهر كامل.

محمد بدا في العلاج و كانت حالته مره تسوء ومره اتحسن انا كنت معاه وما سيبتش اغلب وقتنا في المستشفس شعره طاح و رموشه قعد رقييييق بكل

وفرج كان معانا ديما ما سيبنش

اما حازم روح البنغازي واول ما شاف هله انهار و قعدت ثلاث ايام بدون لا يرقد لا ياكل لا يشرب بس توا بدة الحياة تمشي

وانا معش تواصلت معاه بكل ولا حكيت معاه من اول ما روح

نسيم مازالت مع جهاد ، ياسمين اختي حامل ، و نوسه مازالت طايشه في الشهر تعرفت علي ثلاثه

~
~
~
~
محمد >> امتي بنطلع ؟؟؟؟

انا >> خلاص هانت مر اصعب شهر

خش فرج جايب فطور

محمد >> تعبناك معانا يا فروجه

فرج>~ خوت نحن

طلعت انا برا رنيت علي نسيم

انا >> كيف حالكم

نسيم>> بخير عقلنا عندكم

انا >~نحن بخير ومحمد حالته مستقره
نسيم >> مش معروف امتي تروحو ؟

انا >> مش اقل من ثلاث شهور زياده

نسيم >> واجد

انا >> الله غالب شن جو قرايتك؟

نسيم>> ماشيه نعطيك ماما؟

انا >> لااالا فكيني ... معنديش جهد نكلم حد تعبانه بكككككككل مش ناقصه ماما تقعد تبكي وتلوم فيا

نسيم >> خلاص براحتك

صكرت من نسيم وحقيت فرج طالع خشيت جوا وقربت من حذا الدار نسمع في محمد يكلم

محمد >> انا قتلك ما اتعلقيش بيا قتلك انا معش نبيك ..... خلاص معش ترني مانبيش نديرلك حظر عشان العشره ....... انا مريض افهمي مريض ما نصلحش بيك في يوم ولا اثنين حانموت عليش تعذبي في روححك

خليته لعند يكمل كلامه وخشيت عليه
كان متنرفز باين عليه ما بيتش نسأله خليته براحته

انا >> اامممممممم ازعمك في فيلم سمح نتفرجو عليه كسدت

محمد>> شوفي ام بي سي تو

انا >> اهي شكله سمح

محمد >>حطي عليه وتعالي قعمزي

حطيت عالقناه وقعمزة عالكنبه لي حذا محمد وقعدنا نتفرجو شويه وبحتت لقيت محمد ناعس راقد

وطيت الصوت وطلعت بحت لقيتها الساعه سبعه مغرب قعدت نبرم في ممر المستشفي انخنقت بكل بروحي .... كملنا وقتنا في المستشفي محمد يدوبك يطلع يوم ويرد علي طول للمستشفي قعدت تجيه حراره و يتعب فا قلت للدكتور يقعد في المستشفي لعند وضعه يستقر

كنت نبرم بروحي جا فرج جايب عشا>> عليش اتعب في روحك لكي شهر انت لي تجيبلنا في وكال

فرج>>انا عارف انه اللي يخش في دوامة المرض هضا ينسى روحه لا ياكل لا يشرب وينسي روحه

انا تنهدت >> فعلا محمد راقد توا

فرج>> معناها خلينا ناكلو هنا

انا >> تمام

حطيت لشكاره عالكرسي وطلعت سندوتش>> كيف حال صاحبك

فرج>> حازم؟

انا >> اها
فرج>> كويس ماشي حاله مش صابر راد بعد فتره

انا >> جاي هنا ؟

فرج >> اها روح متفلوج ومنفجع عليه ديون هنا وقصص ويبي يسكر حسابه في المستشفي

انا >> باهي ربي يريح باله

كملنا وكال و صبي فرج طلع وانا خشيت علي محمد لقيته مازال راقد انشغلت عليه طلعت للممرضه قالت لي عادي عشان عطوه منوم مع الدوا

خشيت للدار قعدت عالنت شويه ورقدت

~
~
~
~
~
~
عند حازم

حازم>> مسافر انا الاسبوع الجاي

باته >>راد المانيا؟

حازم>> اه

باته>> ما طولش الله يربحك معش عندنا غيرك

طبس راسه >> حاضر

طلع باته وخش حازم الداره داره اللي ما خشلهش من توفاية علاء ،داره اللي كانت بالنص بينه وبين علاء قعد يبحت في كل حاجه في الدار السرير الدولاب الدبش كل شي كان مرتبط بيه خذا باكو الدخان وطلع

حازم>> الو ايوا حميدا وين قاعد

حمد >> في الحوش والله شن فيه

حازم>~ تعال نلفو شويه بالسياره ماعنديش خلوق نقعد فالحوش

حمد >> تعالي فالحوش نكسدو بالصوني

حازم>> تم جايك

~
~
~
~
في حوش هل يارا

نسيم و نوسه راقدات في سرايرهن يهدرزن

نوسه>>

#يتبع