#حنين_حاتم_الفتﻻوي
#انقذني_ايها_الغريب ....#بارت1
ماما سويلي كرون حبابة ماريد كصايب
اي حتة ترجعينلي شعرج صاير صوفة طلي موو
ﻻماما ماكفشة والله
ليلى سدي حلكج وكومي خل اريكج بسرعة ماضل وكت هسة بدة ﻻصطفاف
اي
سويلج لفة وحطيهة بجنطتج
شبعت ماما ماريد
لبسي لحذاء عدل ولج موتك وتك
اي ماما ليش تضربيني
لتجاوبين ولج لبسي وامشي بساع
مرحبا اسمي ليلى صف رابع بتدائي عمري عشر سنين ناعمة وكل ليشوفني ميصدك اني صف رابع شعري اصفر ماما تكلي شعرج بلون الذهب وعيوني خضر بس لونهن فاتح ابوية يكول اشبه بيبيتي بس اني ماشايفتهة وحيدة امي وابوية
عايشين ببعداد بمنطقة لكرادة بس بيتنة مومثل بيوت المنطقة زغير وبنائة قديم
بابا يطلع لصبح يجي للبيت بليل مﻻبسة مبهذلة ومدري شنو يحجي وميكدر يمشي
يضل يغني ويفشر ماما تركض تسد بحلكة وتكلة اسكت منا لجوارين ﻻيسموعنة هوة يضرب امي ويطردهة ﻻهلهة مرات
ومن نروح جدو قبل ميموت جان يكللهة تطلكي ونطي بتة بس هية ماتقبل تكلة ماكدر اعوف بنيتي
من اسألهة بابا شبي تكولي مريض
بيت جدي اهل بابا ابد مايجونة وﻻنروحلهم
امي عدهة اخت وحدة وامهة ميتة اني ماشايفتهة بس جدو شايفتة قبل مايموت
نطيني ايدج
هاي ايدي
جاي نعبر لشارع وماما دفعتني حييل تكومت بلكاع علة وجهي
كمت اريد اكللهة ليش دفعتيني هيج
لكيتهة واكعة بلكاع وملفلفة بعباتهة ويمهة دم كووومة
تذكرت دجاجتي من ذبحهة بابا وضليت ابجي عليهة
اجيت يمهة لزمت رجلهة
ماما ﻻتموتين مثل دجاجتي حبابة
لتمو عالم
اكوبيهم جوارينة واكو ماعرفهم
شافني ابو صديقتي
ها ليلى تعاي عمو خل اوديج لبيتكم
وامي
امج بعدين تجي ورانة
مشيت ويا نداريت شفتهم شالو امي بسيارة
جريت ايدي من ابو صديقتي وركضت عليهة
قبل مااوصل مشت لسيارة
اخذني لرجال كلي خل ارجعج للبيت امج بعد شوية تجي ابوج بلبيت
ﻻيطلع
وصلني للبيت وكلي
يلله طبي للبيت ﻻتطلعين برة هسة تجي امج
طبيت للبيت بحدي خايفة
رحت لغرفة امي ضلمة كهرباء طافية كرفصت بيهة وكعدت
صار لضهر وماما مااجت واني جوعانة حييل
اجت لكهرباء ركضت علتلفزيون علكتة ودرتة علة ام بي سي3
كعدت اباوع لجاسوسات
خلص طلع مغامرات مارتن
بعدين طلع فتيات لقوة
نعست
حطيت راسي علكاع ونمت
كعدت علة صوت صياح وناس تحجي وناس تتعارك
باوعت يمي 4 جهال ماعرفهم نايمين
طلعت من لغرفة لمطبخ كبالي بي نسوان يطبخن ويغسلن مواعين
بس عبالك ميشوفني
رحت للصالة لكيت نسوان يبجن ويصرخن
خفت منهن طلعت بلحديقة لكيت بنية ﻻزمة لعابتي وتلعب بيهة جريتهة منهة وكتلهة ليش تبوكين لعابتي كامت تبجي وطبت جوة
ورة شوية اجت وحدة ضربتني واخذت لعابتي مني نطتهة للبنية
ضليت ابجي علة لعابتي وابجي ﻻن جوعانة
باب لشارع مفتوحة طب واحد صاح علنسوان طلعتلة وحدة كللهة هاذ لخايس رجلهة وينة شوكت يجي من ندفنهة
وخلة وطلع
طبت خالتي ركضت عليهة شالتني وكامت تبجي
كتلهة خالة ذيج البنية باكت لعابتي
تباوع علية وتبجي نزلتني بلكاع نطتني فلوس وكلتلي روحي شتري
كيفت بيهن عمري كلة ماﻻزمة فلوس بيدي وﻻرايحة للمحل من اروح للمدرسة اخذ لفة وياي لوخيارة ومن اكل ﻻمي نطيني فلوس
تكلي هية امج ماعدهة فلوس انتي تردين فلوس
رحت شتريت جبس ومشيت اريد اروح للبيت صاح علية ابو لمحل كلي تعاي اخذي لباقي رجعت نطاني 3 ورقات فلوس
اخذتهن وركضت للبيت
طبيت للغرفة اريد اباوع تلفزيون لكيت لغرفة مليانة نسوان ومطفين لضوة ونايمات
طلعت لﻻستقبال لكيت صابين اكل سفرة طويلة كعدت اكل خاشوكة ماكو اكلت بيدي
اجت وحدة كومتني من مكاني وكعدت بمكاني حجية جبيرة كعدت ورة لحجية اكللهة تدني بيبي تدني ماتسمعني
بعدين مديت ايدي من ورة لحجية علسفرة واخذت تمن
اكلتة ورجعت مديت ايدي اريد اخذ لحمة
ضربتني علة ايدي حييل وكلتلي ولي منا ملطلطة
كمت ابجي ورحت للغرفة شافتني خالتي صاحتني كلتلي شبيج حجيتلهة راحت حطتلي تمن وخاشوكة وكلتلي كعدي علدرج اكلي ردت اكللهة اريد لحمة بس ستحيت اكلت ورجعت الماعون بلمطبخ
حسيت بنعاس رحت للغرفة اني انام من وكت
لكيت مكان زغير يم لباب
نمت بي رأسن غفيت
كعدت لفجر علة صوت لنسوان
طلعت لكيت زلم بلحديقة ملتمين علة ابوي يضربون بي
ووياهم عمي خليل جريتة من هدومة كتلة ليش تضربون بابا شالني باسني وكلي طبي نامي
طبيت للغرفة بس مانمت خايفة ﻻيكتلوني مثلة
ضليت ابجي واصيح اريد امي جيبولي امي
طلع لصبح واني ابجي ومحد بحالي
بعدين كمت اصرخ اريد امييي
اجت مرية شايفتهة بس ماعرف اسمهة
طلعتني برة لكيت عمو خليل شالني اخذني للمحل شترالي واني مستمرة ابجي حاول يسكتني ماكو
رجعني لببيت طبيت لغرفة امي وكعدت ابجي
اكو مرية تنوم بأبنهة كلتلي سكتي
اني خايفة كلش من لوضع واريد امي
كامت جرتني من اذني كلتلي ماريد اسمع صوتج
اني كمت ابجي خنكة بدون صوت
ورة شوية سمعت صوت خالتي زهرة
طلعت لكيتهة هستوهي جاية وجاي تسلم علنسوان
ركضت عليهة جريت عباتهة وكتلهة خالة اريد اروح وياج
شبيج خاﻻتي منو وياج
اشرتلهة علمرة كتلهة هاي كتلتني
راحت عليهة كامن يتصايحن بعدين تمالخن من لشعر ووحدة صارت فوك لثانية ولتمن عليهن لنسوان وصارت هوسة اني خفت كلش طلعت برة بلشارع
ورة شوية طب عمي خليل وطلع ويا خالتي
خوية الله يخليج اختج وماتت بعد ﻻتوصلين لهنا
الله اكبر عليكم حتة فاتحتهة ماتخلوني احضرهة
خوية انتي صاحبة مشاكل واحنة مالنة خلك
اني صاحبة مشاكل لو هاي مرتك الماتخاف الله ﻻزمة لطفلة ليتيمة وكاتلتهة ﻻن تبجي علة امهة
تعاي ليلى تعاي امشي وياي
وين ماخذتهة هاذ بيت ابوهة وعمامهة وجدهة موجودين توكلي علة الله خوية وبعد ﻻتوصلين لهنا
دنكت علية خالتي باستني وكلتلي ﻻتخافين خالة اني ماخليج هنا اخذج يمي بس موهسة
راحت خالتي ضليت اباوع عليهة وابجي اخاف اطب جوة خاف انكتل وبعد ماكو احد يحميني
ضليت بلشارع العب وية لولد لحد ماصار اليل صبو اكل للزلم بلشارع وكفت وية لجهال اكل شافني عمي خليل اجة علية كلي ولج شتسوين هنا وشنو هاي مﻻبسج كلهة طين جرني من شعري طببني للبيت واني اسحول بروحي ماريد اطب اخاف من هاي المرية لكتلتي وعاركت خالتي
ضليت بلحديقة العب بلطين لحد مابدو لزلم يطبون من شغتهم ركضت للغرفة اول ماطبيت صاحت علية هاي لمرة لسمينة لكتلتني
هاي شنو رجليج كلهة طين وين جنتي بيا زبالة امشي غسلي بسرعة
ركضت للحمام اريد اغسل دفعت لباب طلعت اكو مرية جاي تسبح رأسن جرتني من شعري وضربتني راشدي ودفعتني وسدت لباب
ضليت ابجي وين ماروح يكتلوني
اريد امي اخاف لوحدي
صعدت بسطح ﻻن ماكو مكان اختل بي ورجلية كلهة طين اخاف من هاي لسمينة تشوفني
ضليت كاعدة بلسطح بس بردانة كلش نعست ومابية حيل انزل جوة تمددت ونمت بلكاع بلسطح
فزيت علة صوت مرية تكعد بية
فتحت عيني لكيت وحدة تشر هدوم ووحدة تكعد بية
كلتلي كومي نامي جوة شتسوين هنا بهلبرد
نزلت جوة عالم جاي يصلون وهوسة
طبيت لحمام نزعت مﻻبسي وسبحت كملت ردت اصيح علة امي تجيبلي هدومي تذكرت امي ماتت مثل دجاجتي اصيحمن هسة ماعرف احد
لفيت لخاولي علة روحي وطلعت
شافتني هاي لسمينة .......يتبع
#حنين حاتم الفتﻻوي
حبايب كل يوم راح انزل بارت هيج وكت واذا اشوف تفاعل حلو انزللكم بارت اضافي
