#حنين_حاتم
#انقذني_ايها_الغريب.....#بارت27
(#غير_محلل_نشر_القصة_بدون_ذكر_اسمي)
تعال ماما نطيني ايدك لتضيع
فاطمة لتمشين علسريع امشي ويانة
لاحت كبالي قبب امير المؤمنين
اووووف شكد مشتاقة لهاذ لمكان
امشي كل سرعتي اريد بس اوصل تعبانة من لطريق حيييل
يا ليلى لومخليتنة رايحين للفندق نرتاح ونسبح وننام ولعصر نرد
لا خالة مااكدر اصبر للعصر بية شوك لهلمكان بس الله يدري بي
وصلت للضريح ولجهال بعد مادريت عنهم شي دموعي هلن وكلبي دكاتة تسارعت
اوووووف ياهلمكان شذكر منك وشنسة
طبيت وكلبي ودموعي يحجن قبل لساني ركضت علضريح
لحركة الي طوال سنة و3 اشهر ادمنتهة
شمرت روحي علضريح وكعدت ابجي اوووف مشتاقتلك مولاي مشتاقة لريحتك يابوتراب
تتذكر من جنت ابجي هنا يمك لحد مااخوة واكلك فرجهة علية
ماقصرت وياي بس من يومهة واني ابجي علة فراكك يابو لحسن صعب علية فراكك مولاي هنا جنت انام يم قبرك ودمعتي بعيني
شميت ريحة لجنة وردتلي روحي الي فاركتني وضلت هنا
كملت زيارتي وكمت اريد اشوف لجهال وينهم لان من دخلت للقبر فترقت عن ام حسين وبعد مادريت عنهم وين
طلعت من يم لقبر وطبيت للصحن الداخلي صار كبالي المكان الجنت انام بي ركضت بوجهي علي كعدت بي وفرفحت اشم بريحة لأمام واحس عبالك طابة للجنة اوووف ياهلريحة عشت ليالي ابجي علة عبق هلمكان وريحة المسك الي جنت اشتمهة بي
سمعت صوت عبد الله يصيح ماما
نداريت لكيت ام حسين وراي هية ولجهال وحسين
ها خالة زرتو
اي بنيتي زرنة خلينة نرد للفندق تعبانين كلش
اي خالة
شلت عبودي الي عمرة 4 سنوات بس عندة لين عضام وميكدر يمشي وحسين لزم فاطمة وام حسين لزمت فهد
مشينة طلعنة من لضريح اخذنة احذيتنة ودانلبس بيهن
لزمت عبد الله البسة بحذائة رفعت راسي جان اشوف
2015 شهر 7 يوم 7
راحت المرية وعافت احفادهة يمي الجهال ضاجو وكلسا واحد يبجي
نص ساعة ورجعت وياهة رجال يطلع عمرة بلأربعين لابس دشداشة وشماغ وعكال شكلة حلو ووقور رغم كبر سنة بس يبين ابن خير ولفلوس تلعب دور بشكل لأنسان
تقربو علية كعدت المرية بصفي وهوة كعد كبالنة
اول ماكعدت جيتو عليهة احفادهة عبالك الهم سنين مفاركيهة
تدنت علية جان تكلي
شايلة جواز هوية
اي خالة كل مستمسكاتي عندي ليش
انة حجيت قصتج لوليدي وهوة قرر يساعدج وكال ناخذهة ويانة تشتغل عاملة بلبيت وتداري لعيال وباجرج
خالة اني اشكرج بس مااكدر اروح وياكم ماجذب عليج اني مااكدر اثق باحد من بعد الي شفتة
وانة مستحيل اعوفج هني
كامت من يمي راحت يم ابنهة كعدت بصفة وضلت تحجي ويا ويتناقشون واني عيني عليهة واحاول افسر اشاراتهم وحركت حلوكهم
تقريب نص ساعة ورجعتلي تضحك
جان تكولي
انة ماتحرك من هني الة ورجلج علة رجلي
انتي حالج حال احفادي وصدكيني هناك تعيشين معانة بجنة ويوم ماتحبين تردين لحياتج وتردين عند خالتج انة بيدي راح اجيبج لهم
باجر اخر يوم النة بلعراق واحتمال بعد لا اشوفج ولا تشوفيني راح اخليج تغكرين وانة رايحة ازو لامام ومن اخلص زيارة ارد عندج واريد منج لجواب
صفنت بيني وبين روحي ماباقي عندي غير 50 الف دينار اذا خلصن وين انطي وجهي ماادري اجدي مادري شسوي
ولمرية شكلهة جدا مريح وكلامهة اطمانيتلة حييل ومن شفت حنيتهة علة احفادهة تمنيت الله رازقني بجدة مثلهة جان ماصارلي الي صار
كمت صليت صلاة استخارة ورحت يم الأمام وطلبت منة يساعدني لا خر مرة
رجعت للمكان الي جنت كاعدة بي عقلي مشوش كلش كدامي مصير مجهول ماادري اذا اروح وياخة شنو الي مككن الكة هناك
فكرت هوااي وقررت
خلاص اروح وياهة بس قبل كلشي لازم ائمن روحي
تانيتهة تجي وكلتلهة اروح وياج بس بشرط كلتلي شنوة
اخذتهة من ايدهة ورحت كلش يم لقبر
كلتلهة هاذة الكدامج ابوي وهوة سندي بهلدنية وضهري اني رايحة وياج لمكان ومصير مجهول احتمال تطلعون عصابة وتبوكون اعضائي احتمال تستغلوني وتسوون بية اكثر من الصارلي يم اهلي
بس اني امنت بيج وتوكلت علة الله وراح اروح وياج اذا بيوم اذيتيني انتي أو غيرج محد راح يوكفلي غير هاذ
ائشرلهة علة امير المؤمنين والدموع يجرن
هاذ خصيمج هوة ابو لأيتام واني موبس يتيمة اني ضايعة وتايهة ومالي بهلدنية احد
وكفت كبالي وكلتلي وحق هاذ السبع انتي بأمانتي والله ياخذ عمري اذا بيوم افكر ائذيج وحالج حال احفادي وانشاء الله احطج بعيوني واعوضج عن كلشي شغتي بحياتج
طلعت وياهة اخذوني للفندق دخلتني بغرفتهة هية وواحفادهة بس موغرفة عبالك قصر كلشي بيهة سبحت لاول مرة اسبح براحتي وشامبو وبانيو سبحت سبحت العمر طلعت رأسن مددت ونمت كعدت بليل اول مافتحت عيني اشرتلي بورقة بيدهة
هاذي الفيزة مالتج
شنو يعني
يعني كملنة كلشي وباجر انتي رايحة معانة للكويت
مادري شنو الي حسيتة وكتهة دموعي نزلن خايفة ومتوترة ومادري شراح الكة هناك وشلون راح اعيش وشلون اكمل عمري يمهم
طلبت منهة اروح اودع لامام واخذتني طبيت للضريح وكعدت بلكاع يمة فرفحت بجي
كتلة مولاي شلون راح افاركك شلون افتح عيني بدون مااشم ريحة الجنة الي اشمهة يمك شلون انام ليلي اذا مااكعد يمك واشكيلك
اذا صارلي شي بعد المن اشكي
مولاي توكلت عليك وراح اروح وياههم لاتخيبني عليك بدمعة ريدقية
عليك بسبي زينب وسترهة اريد ارتاح وانتةاماني وسندي لاتتركني من دعائك وانتة ماتردني اعرف دموعي عزيزات يمك ويذكرنك بدمعة رقية
بوست لشباك وودعت الأمام بدمعة وحزن كلش جبير
رجعنة للفندق اليل كلة مانمت خوف علة رهبة علة ارتباك مشاعر مضطربة ولخوف سيد الموقف
كعدت لفجر علة صوت الحجية الرقيق وايدهة الناعمة تتلمس وجهي برقة حتة لاتخرعني ماتدري بية متعلمة افز علضرب ولرفس
كمت صبحت عليهة وصليت وبدلت ساعدتهة بلريوم وبدلت للجهال وهية متعجبة بشكلي وشعري وكلسا تبوسني
تكلي لحجاب حييل ضالمج جمالج رايح بي
تريكنة وتوجهنة للمطار وصلنة
و هنا بلتحديد تملكني شعور جدا عريب يصعب علية اوصفة
حنيت لسيف بشكل موطبيعي شي بداخلي يصرخ بأسمة مشاعري تحركت ناحيتة مثل اول مرة شفتة بيهة
ردتة كلش بذيج الحضة
يمكن لو شايفتة وكتهة جان ركضت علي حضنتة ونسيت كلشي بس بعد فات الأوان
خلاص بعد ماشوف سيف مدى الحياة
بكد ماوكتهة شتاقيتلة حتة شميت عطرة وريحتة اجت بخشمي دمعتي بطرف عيني وكوة لازمتهة ولعبرة خانكتني واحس شي نايم علة صدري كوة اجر لنفس
صعدت لطيارة لأول مرة بحياتي هنا هلن دموعي مطر
ابجي علة بلدي الي اول مرة افاركة ابجي علة حب عمري الي ماتهنيت بي ابجي وعفتة واني عروس
ابجي علة طعنة سيف وخيانتة الي اجتني مثل الصعقة
ابجي علة. ماضيي علة سنين عمري الي ضاعن يم فاطمة ومافهمت منهن كلشي ابجي علة مولاي و شريك همي والوحيد الي يسمعني شكد مااشكي ومايمل مني
ابجي علة نفسي ومصيري المجهول الي رايحتلة
لحجية حاولت تهدئني بس اني كأنه بركان ونفجر صعب اترك تاريخي كلة واروح لدولة ثانية واحتمال ماارجع ابد لاوجمالة وية عالم غربة حتة مااعرفهم شنو
مرت الدقايق سريعة كلش ماحسين بلوقت نزلت واني لدمعة مافاركت عيني ولخنكة الي بصدري عبالك جبال ونايمة علي
اول مانزلنة طبكت يمنة سيارة عالية وجبيرة نزل منهة ولد لابس قاط فتحلنة لباب وصعدت لحجية وابنهة واني صافنة عبالك بمسلسل مومصدكة
صعدت وياهم اقل لنص ساعة وصلنة لبيت كلش ضخم مساحتة تتعدة الألف نزلنة لبيت مليان خدم تلكو الحجية يبوسون ايدهة وراسهة وهية تحاجيهم عبالك بناتهة موخدم شوية طمئنيت من شفت تعاملهة وياهم
مر اول يوم يعاملوني علة اني ضيفة معززة مكرمة بس بعدة لخوف مافاركني ابد
نطوني غرفة تجنن اصلا لبيت مليان غرف وكلهن مأثثات مر سبوع علة تواجدي يمهم مرتاحة كلش لأكل يوصل لغرفتي وملابسي ينغسلن وينكون واكعد لصبح الكاهن بلكنتور بعدين لحجية بدت توضحلي انو تريدني اهتم بلجهال لأن متأمن للخدامات لان موعربيان كلهن فلبينيات
بديت اتقرب منهم واتوددلهم عبد الله بسرعة كدرت اكسبة لان زغير كمت اشيلة والعبة واوكلة وفاطمة هم اسبحهة واشسور شعرهة وابدللهة والعب وياهة بلعاب مالتهة كدرت اكسبهم بس فهد كلش جان عنيد ويكرهني وحتة ضرب يضربني ويدفعني ويشمر لاكل علية
بتعدت عنة وخليتة علة راحتة لان البية مكفيني وروحي بزعانة
حسين الي هوة ابوهم
يشتغل استاذ جامعي حياتة كلهة دراسة وكتب وابد ميتواجد بلبيت وحتة اطفالة موهلكد علاقتة بيهم ونادرا مااشوفة والتقي بي بلبيت وامة تحجيلي عنة دائما تكول زوجتة من ماتت وهوة نكلب كيانة لليوم عايش علة ذكراهة لان متزوجهة عن حب جانت استاذة ويا وحياتهم جانت حلوة ومثالية ولمن ماتت كدام عينة قرر يترك كلشي بلدنية ويكرس حياتة بلدراسة ولشغل حتة يأمن مستقبل اطفالة
الخادمات صارن صديقاتي ويحجنلي عن اهلهن وحياتهن الي عايفاتهة هناك
كلش احن للعراق واحن لبغداد ولخالتي وحتة سيف
لمن اشوفهن ياخذن التلفون من الحجية ويخابرن اهلهن ويحجن وياهم افرفح من لبجي
وبدي احاجيهم بس اكول لاء خلاص هذيج حياتي نهيتهة واني نولدت من جديد وفتحت صفحة جديدة
صفحة مابيهة حرمان وجوع مابيهة ضلم مابيهة ضعف وفقدان للسند
يكفي الشفتة من حياتي يم فاطمة وسيف جان لختام وحياتي لقديمة صفحة وطويتهة
هنا عشت فعلا بجنة يمهم
حياة مثالية بكل معنى الكلمة
بس لغربة شعور قاتل كلش صعب وخصوصا غربتي اني
واكثر شي جنت اشتاقلة ايامي الي قضيتهن يم الأمير
اقاربهم جانو ابد ميحبوني وبلعيد والمناسبات ميسلمون علية ولايخلون بناتهم يحتكن بية ويحجون علية من وراي ولخادمات يوصللي والسبب هوة حرب الكويت وية العراق وكرههم لصدام حسين والي سوا بيهم خلاهم يكرهون كل لعراقين وياخذون عليهم نضرة وبلذات همة عدهم عمهم مستشهد بحرب لكويت ولهاذ لسبب عدهم حقد علة اهل لعراق
بس لحجية جانت مطيتني حجم كلش جبير كدامهم وابد متقبل شخص يمسني ولو بحجاية واكثر من مرة تخرب وية اقاربهة علمودي
لكيت بيهة ام حنونة عوضتني عن حرماني من كلشي حلو بلحياة جانتلي نعم الأم الطيبة والي تفهمني من نضرة عيوني تاخذني وياهة وين متروح وخلت لجهال يصيحوني ماما ومن اسألهة ليش تكلي لان فاقد الشيء يعطيه ويعطيه بكثرة همات
وانتي فاقدة الام وحنيتهة واكثر شخص ممكن ينطيهم حنية الام هوة انتي
واني فعلا جنت انطيهم كل حنان زرعة الله بداخلي ابد ماقصرت وياهم بشي اسبح وابدل وادرس حسيتهم صدك اطفالي لكيت بيهم الشي الي ممكن يلهيني وينسيني كل الصار بية وكل الي شفتة
2018 شهر 1 يوم 5
اخذنة احذيتنة من لكيشوانية
لزمت عبودي البسة حذائة رفعت راسي جان اشوف كبالي
سيف : جاي اسولف وية ليلى وروحي لايبة عليهة وعلة جمالهة كلسا بدي اشيلهة واشرد بيهة ليفوك وكوة اصبر بروحي واكول ماضل شي لباجر
دك تلفوني رقم غريب
عفت ليلى ورحت رديت علي طلعلي رجال كلي غرفتك شابة بيهة نار ومحتركة اركضلهة
انتة منو شجاي تخربط
بعدني احجي طبكة بوجهي
عاينت علغرفة من فوك كلشي مابيهة بس مامطمأن كلت خل اصعد اتأكد ماخسران شي ترخصت من ليلى الي جانت مثل الاميرة كاعدة علة عرش ووجهة عبالك كمر ولحجاب زينهة اكثر بيومهة جنت كلش عطشان الهة وكلسا افهي علة جمالهة وابلع ريكي
المهم طبيت للبيت لكيت ام تقى بلمطبخ تشرب ماي كتلهة خالة هم سمعتي صوت من فوك كلتلي لا ماكو شي
صعدت للغرفة وصلت فتحت لباب جان .....#يتبع
#حنين_حاتم
اعتذر كلش عن لتاخير والله عندي ضرف وكوة كتبتهة للقصة اريد تفاعل حلو ماوصيكم 😘 وتصبحون علة الف خير
