💫⭐حكاوينا السودانية ⭐💫
مناسك اسحاق
#كيان3
هه الدنيا دي غريبه جدا بتبدل حياه الانسان في كسر من الثانيه منو البتخيل اني بين ليله وضحاها هاكون مطلقه الحمدلله ي رب الحمد لله
مر اسبؤع علي طلاقي وانا حالتي كل يؤم بتتازم اكتر من الاؤل علي الرغم من حالات المواساه البتجيني من اقرب الاقربين بس انا وصلته لمرحله كبيره من الياس بقيت بلجا بس لصلاتي وللقران سبحان الله زمان المصحف ده ما بمسكوا خالص ولو مسكتو الا كل شهر وبهبش فيه هسا في اسبؤع بس ختمت المصحف سبحان الله كنت كل ما اصلي بحس براحه كده غريبه بحس باني كل نشاط اللهم اغفر لي ما سبق عدا الشهر الاول من الطلاق واليؤم سمايه اختي الكبيره مني ما شاء الله جابت توام وبقيت مشغوله بيه عسي ولعل اعوض الفراغ الامومي الجواي 💔 الضيوف بقوا يجوا ونظرات الشماته ظاهره في وشوشهم هه بس صراحه انا ما شغاله بيهم كنت بشتغل جيت ماره بقروب من الحريم واحده فيهم قالت صحيح عينهاقويه تطرد نسيبتها وتعيش زي الما حصل شي بس عجبني ليها طلقوها اساسا كانت شايفه نفسها واحده تانيه قالت ليها ما شايفها نايره كيف تقول ما طلقوهاا 💔 لمن شافوني سكتو نفسي اعرف لمن الناس تغتاب الزوول وتقطع فيه بتحس بشنو شايفه انها كده عملت انجاز عظيم ناسيه انو الدنيا دي اخذ وعطاء ناسين انو نحن ضيوف موقتين فيها ليه الحقد والكراهيه تجاه بعض ربنا يهدا النفوس ابتسمت ليهم وجيت ماره بجنبهم زي الما حصل شي بس صراحه قلبي كان بتقطع مع كل حرف كانوا بقولوهو لي السمايه خلصت ولحدي اخر ضيوف مشوا نظرات الشماته كانت ظاهره فيهم ضايرته البيت مع صحبتي لدن لدن دي بت جيرنا واختي الما جابتها لي امي انتهينا من المضايره وعملنا لينا قهوه وقعدنا في الحؤش واخوي علاء جاء قعد معانا ونظراتو ما نزلها من لدن 💔 اساسا انا زي الحاسه انو بينهم شي بس مع الزمن بعرف قعدنا نتونس او بالاحري هم يتونسوا واجباري لدن كانت بدخلني في ونستهم بس انا بالي بعيد بفكر في عبدو كيف ضميرو سمح ليه انو يظلمني بالطريقه دي كيف بس معقوله هو ما عارف انا طينتي شنو هه معقوبه عشره سته سنوات تضيع بسبب قوايل وافتراءت هه الحمد لله بس استاذنت منهم ودخلت غرفتي ونمت
الايام عدت عادي جدا وممله خالص بالنسبه لي بس بقت شغلتي الجديده اولاد مني اختي احمد ومحمد عوضوني بشده عن الفراغ الكان محتويني ربنا ما يحرم اي امراه واي بيت من نعمه الاطفال بالجد هم نعمه كبيره اليوم تميت تلاته شهور بالتمام والكمال والمفروض عبدو يجي يسلمني القسيمه بس للاسف رسل اخوه ادا القسيمه لابؤي ومعاها قروش النفقه بتاعت التلاته شهور رفضت رفض قاطع اني استلم المبلغ ااي حقي الشرعي واي حاجه بس انا من يوم طلعته من بيتو بقيت ما طايقه اي حاجه منو حتي الدهب بتاعي الجابو لي وقت الشيله والاشتراهو لي في اسعد مناسبتنا خليتو ليه ابؤي اصر اني استلم المبلغ قلت لابؤي وديها المسجد الجنبنا واتبرع بيها عسي ولعل تكون صدقه تكفير لتفصيري تجاه ربي بعد اسبوع من الكلام ده امل اخت عبدو اتصلت لي وقالت لي الليله عقد عبدو يا عاقر 💔 وقفلت الخط ما تتخيلوا صدمتي كانت كبيره كيف يعني هو ما متاثر هه هيتاثر قال كده فوقي يا اسراء فوقي شويه قال يتاثر قال ما عارفه لي دموعي جات جاريه مع اني مقتنعه اني مشاعري تجاهو انتهت او بالاحري كنت قايلهاا انتهت 💔 بدون ما اشعر لقيت نفسي بتوضا ووقفته في المصلايه وصلت كاني اول مره اصلي دموعي ما ناويه تقيف ابدا وبدون ما اشعر بقيت ادعي عليهم حسبي الله ونعم الوكيل عليهم حسبي الله ونعم الوكيل عليهم
يتبع🐸
