== بنتين قرايبي توأم ،، اتجوزوا من حوالي 10 سنين،، واحدة فيهم بحس أنها بتصغر،، والتانيه بحس أنها أكبر من امها،، بسال امهم مرة،، بقولها سبحان الله الاتنين توأم بس واحدة فيهم باين أنها عجوزة والثانيه كأنها طفلة وبتصغر،، قالتلي السحر في الكلمة،، الحلوة جوزها حلو كلامه حلو ابتسامته حلوة ،، مبتسم حتى لو غلطت ،، عمره ما احرجها قدام حد،، والتانية جوزها عصبي،، ديما موترها وكاسفها قدام الناس،، البني آدم مننا شبه الزرعة،، لو رويتها وراعيتها بكلام حلو وتقدير هتحلو وترعرع ،، إنما لو هينتها وبهدلتها في الرايحة والجاية هتدبل وتموت،، السحر في الكلمة
== في أحد التجارب النفسية ل 100 شخص أعمارهم تتراوح بين 10 سنين إلى 40 سنة،، كل واحد فيهم كان عنده مشكلة في الكلام أو مشكلة في التفكير أو في طريقة الأكل ،، تم قسمهم إلى نصين،، ال50 الاولانين تم مدحهم في غلطاتهم يعني انتوا غلطتوا بس برافو هتبقوا احسن شدوا حيلكم بابتسامة عتاب ،، وال 50 التانين كان بيتم توبيخهم على أي غلطة بيعملوها قدام الكل،، الأشخاص اللي بيتمدحوا اتحسنوا واتغيروا للاحسن،، لكن التانين أخطائهم زادت ودخلوا في حالات اكتئاب وبدأ معدل أخطائهم يزيد (كانت من التجارب النفسية الممنوعة)
== الكلمة الطيبة صدقة،، الكلمة الحلوة بتحلي،، مش عايزين افورة ولا محن،، كلنا بنغلط،، قولي غلطت في ايه بس بابتسامة عتاب،، مش لازم نهين بعض لما نغلط،، محدش مستحمل حد
==السحر كله موجود في الكلمة الحلوة ،، قول كلام حلو لامك ابوك اخوك اختك صاحبك صاحبتك تلامذتك زوجك زوجتك ابنك بنتك حتى لو هتقولها لحد ما تعرفوش،، ما تعرفش ممكن يكون مستني الابتسامة أو الكلمة الحلوة دي وتغير يومه أو حياته كلها
قولوا كلام حلو،، عشان محتاجين نحلو، ابتسموا في وشنا،، محتاجين نرعرع ،، عاتبونا لو غلطنا بس بابتسامة عتاب مش بإهانة،،
#COPIED
