Remlalhruaii

#REMLALHRUAII
- Muankima Khawlhring

A hmel en mai chuan Aizawl milian fanu ni awm tak hi a ni a. A mitmeng fiah kek kawk leh nui sen sen reng mai, dang awk lek lek, la țawngfiah mang lo, țawngkam puitling felthlap maia a țawng țhin chuan a tiduhawm leh zual emaw tih tur hi a ni reuh a.. Mahse Remlalhruaii hringnun zingkawng hi a lan dan ang maia tluangtlam chu a ni mawlh lo.. A pianni leh kum hriat a ni lova, mahse a rualpui te zingah pawh a te fal bikin a chak lo bik ngei ang tih chu a rin theih a. A nu leh pa hriat a ni lova, engvanga fahrah chan lo chang ta mai nge a nih a hriat hek loh..
****************************************

Remtei i chu hlau tih hriat ngawih ngawih hian a hnuai lam bihin a insut faih faih a, chik taka entu tan phei chuan a khur ru der der tih a hmuh theih hial ang.. A hma a nutling ding, amah rum taka melh chunga lo vin țhat țhattu chu 'ânu' ti chuan a ko ngei a. Mahse an inmelh dan mai ațang mai pawh chuan an inkar boruak țhat tawk loh turzia chu chiang nghal mai.. Chutia an in ânkhum chiam chhan pawh a bul berah chuan Remtei chetsual vang ni tho mahse dem ngawt chi pawh a ni bik chiah lo.. Thleng sil tur atan chuan a la naupang lulai em a tin ni.. Thleng man to tak mai tlak keh tir kha a tum a ni bik lova, a duhdan a ni bik hek lo.. Thleng a lo nal nen, a kut sahbawn phuanin a tinal bawk nen a in rin hman hmain a thleng tleuh tur chu thleng silna ah a thlauh keh palh a ni ve mai a.. Chutianga hauh hrepna tur thil a awmin a lang lem lo..
****************************************

Lo hau mawlh mawlhtu chu Pu Vanmawia nupui Pi Remsiami a ni a. An nupa hi kum 20 vel zeta an inthlauh vangin a nupui chu nula naupang te emaw tih mai tur hi a la ni a. Pu Vanmawia hian Remtei hi fa angin thla 6 liam ta khan a la a, a lak dawn lai vel pawh hian an nupa hi an inhauh phah hrep a.. Chu a chhapah thla hmasa mai khan sumdawnna thila Pu Vanmawia zinchhuak chu an motor chesualah a boral hlauh mai a.. An nufa mai hian an khawsa ta a ni..

Remtei i hi kum 5 vel liam ta ah khan veng pakhat luikawrah nausen pianghlim mai a nih laiin chhar a ni a. Tu kalsan nge a nih a, duhthu renga paih nge tihpalh thil tih pawh hriat a ni hek lo.. Naute țap thawm hriain pitar leh putar zing chhuak vakin an chhar a. Anni hian enkawl thei an nih lohzia inhria in an țhenawm a nupa naupang tak te hnenah an dah phawt a. A nu leh pa an zawn ngial hnuah pawh hriat theih an nih tak loh avangin hnuchham enkawlna inah dah luh a ni ta a ni..

A hma kum Krismas khan Ramtei te awmna Home ah Pu Vanmawia hian thilpek a va pe a. Chumi țuma naupang ho chanchin a zawh kualna lamah chuan Ramtei hrisel loh bikzia leh chanchin lungchhiatthlak tak chu va hriain fa anga lak dan tur a buaipui nghal char char a. A thei dawn lo emaw tih hnuah, a beidawn rum rum hnu leh an nu nena vawi tam ah inhauh phah hnu ah May thla tawp lam khan thuneitu lam ațangin phalna hmuin fa angin an in la ta nge nge a ni..

Pu Vanmawia hian fa an neih theih loh vangin fa tak duat takin Remtei hi a duatin a hmangaih em em mai a. An khua ah pawh a khawsak nuamsa pawl tak an nih vangin Remtein a duh leh mamawh apiang chu hlui vek a tum țhin.. Chuvang chuan Remtei nu lo ni ta Pi Remsiami nen pawh mut hmunah an inhauh phah fo a. Mahse an nu hian a pasal a hlauh vangin Remtei lakah erawh engmah a tilang ngam ngai lo.

Chutianga nu leh pa ang taka Remtein a pawm hnu, chhungkaw nun hlimna rei lo te a tem hnu, nunphung pangngai a hman țan ve mek lai chuan a pa, Krismas bungraw zawrh tur lama zinchhuak, amah duat em emtu Pu Vanmawia chuan an rawn haw kawngah an motor che sualah a boral san zui leh ta si.. Chhungkaw nun hi lo la tem lo law law se, nu leh pa angchhung hi lo la bel lo law law se, home ah khan lo la awm hle hle se atan chuan tawrh a sam zawk mah awm a sin..

A pa boral hnuah inleng an țiak țan ta maw tihah a nu ze dik tak a rawn lang țan a.. Mipa inleng naupang tak a nei ta zeuh zeuh a.. Remtei koah pawh a la tih ngai reng reng loh mawhphurhna a rawn tla ve țan ta malh malh bawk a. An awmpuinu chu a kamtam palh hlaua a nu'n a chawlh tir hnu pei chuan inchhung sekrek hrang hrang chu a mawh a ni zui titih ta mai bawk a.. Mahse hetiang taka an nufa kar rualrem lo hi mi hmuhah a langchhuak lem lo a. Mi hmuhah chuan nufa inngai leh inhmangaih tak anga an lan miau avang chuan an veng ho ngei ngei pawn Remtei vanneih thu hi an la sawi fo nia! An chhungril nun dan hi hria se vannei an ti meuh ang em!?
****************************************

Chutianga a nu'n a hauh hrep hnu, an chetsualna vel a tih fel vek hnu chuan dan ngaitein Remtei chu ngawi rengin inchung lama a room ah a chho hnak hnak a. A room kawngkhar kharin a khumah thawm chhuah hlau taka lukhama a hmai phumin a țap ta zawih zawih a.. Rei tawk fang a țah hlawp hlawp hnu chuan tho chhuakin a intuai faia, a khum bulah chuan țhingțhiin a țawngțai ta mawlh mawlh a.. Naupang kamchhuak a mawi lo khawp hialin, a malsawmna dawn zawng zawngah lawmthu a sawi kual fe hnuah țap zawih zawihin Pathian hnenah Krismas thilpek pakhat chiah inthlahrung takin a dil ta reuh a.. A țawngțai dan lah chu Pathian chu a titi hian a titipui a ni ber a.. Krismas thilpek atana engdang mah a beisei lohzia leh a pa (Pu Vanmawia) a pek kir leh chuan lawm taka a hringnun a hman char char tawh tur thu leh thildang engmah a dil tawh loh tur thu a chham lai phei chuan lo țahpui loh theih hi a ni lo.. A nu (Pi Remsiami) ngei pawn he hmeichhe naupang țawngțai hla hi hre fuh nise a en dan a dang deuh ngei ang le..

An hmalamah engnge lo thleng zel dawn!? Hetiang taka Amah rinchhantu naupang hi Krismas neitupa hian engtin nge a chhan dawn? Chung zawng zawng chhanna chu hun lo kal zel turah chauh hriat a la ni dawn si...

#PS: Malsawmna dawng loin i inhria a ni thei e, mahse tu emaw ber hnenah chuan chuan malsawmna a dawnzia i hriattir thei a sin.. He Krismas lo awm tur hi Krismas chhinchhiah tlaka siam turin a dawngtu ni lovin a petu nih tum tlat ang u.. Kan thilpeka chu eng pawh nise, kan pek duhna thinlung lai tak hi a hlu lai zawk chu a ni si a...