😛 ثَرثِر~ معَ ~ جَـانـا 😂

اللهجة العراقية 😜

السلام عليكم 😁

عندي نقاش مع ابناء بلدي العراقيين

يجماعة حراام عليكم حراام

انتم قاعد تسمعون لهجتنه العظيمة ... ليش متتكلمون لعد

اريد اناقش اخواني العراقيين بخصوص بعض الكلمات العراقية العريقة 😂😂

(اليوم اناقشكم عن ثلاث مصائب )

صحيح المصايب هواي بلهجتنا بس اختاريت تلاثة بس

انتم منتبهين لكلامنا لو بس اني
اللغة العربية بطريق واحنا بطريق
مو( بطريق ) لا طريق
اعرفكم محششين
المهم

اذا انته مو عراقي وداخل وسط النقاش الوطني ابقى ساكت ولا تضحك علي وراعي مشاعري شوي 😭

مرة سئلت جدو ( ليش منتكلم فصحى واحنا عربيين )

جاوبني الغالي وهوه يضحك ( ليش ما تسكتين )

المهم نرجع لموضوعنا

المصيبة الاولى : 《 خاشوكة 》

يعني ملعقة .. شفت .. ملعقة وين وخاشوكة وين

الفرق

خاشوكة | ملعقة
خ ا ش و ك ة | م ل ع ق ة

يعني شيصير اذا قلنا ملعقة ... اني مجاي اسخر من لهجتي طبعا بس ابدي رايي واستفسر
خاشوكة شنو .. منو طلع هالكلمة

تخيل من تريد تصير برستيج
وجالس بمطعم عربي خارج العراق
تقول : انطيني خاشوكة من يمك

غير الجوه والبره يموتون ضحك

اتمنى 2030 يلقون كلمة غيرها .. حتى لو ملعگة مقبول المهم تنتمي للغة العربية مو خاشوكة

المصيبة الثانية : 《 هسة 》

يعني الان .. ليش هسة يصير هيج

شوف الفرق

هسة | الان
ه س ه | ا ل ا ن

هااا شفتو حتى حرف ميشبه الثاني

شلون رهمتوها

تخيل نقول : هسة شتريد ، هسة اكل ، هسة انام
هسة اضربك ، هسة اطلع ، هسة اكفخك بالنعال

يعني ال هسة لازكة بكل كلامنا ...

متشوفون دول الخليج يقولون ( الحين ) يعني اكو ارتباط باللغة العربية مو هسة ...

المصيبة الثالثة : 《 بنكة 》

يعني مروحة

ليش هالقهر ليش

الفرق يخوان

بنكة | مروحة
ب ن ك ة | م ر و ح ة

ما اعرف الدول العربية شتسمي المروحة بس كلمة بنكة ما مقبولة ابد
ما مقبولة ... يعني اذا قلت مروحة يضحكون علي واذا قلت بنكة احس مسوية جريمة بحق اللغة العربية

تكلمت عن ثلاث كلمات بس .. لو اقعد افكر اجيب المئات منهن ..

على كل حال محد خرب اللغة العربية غير :

- العراق 😒
- مصر 😲
- السعودية 😘
- فلسطين 😔
- البحرين ☺
- الكويت 😉
- الامارات العربية 😅
- قطر 😜
- عمان 😞
- سوريا 😍
- لبنان 😶
- الاردن 😛
- المغرب 😌
- تونس 😋
- الجزائر 😏
- السودان 😄
- ليبيا 😚

يعني بختصار الكل مشارك بالجريمة👊

بس نبقى نفتخر بلهجاتنا المتعددة خاصة واللغة العربية عامة ... ومستحيل احد يستهين بلهجته لان هي اصل حضارته والي يجمعنا اقوى من اللهجة
احنا يجمعنا رب واحد ونبي واحد وقبلة واحدة وقران واحد 💝

مع السلامة

صديقتكم المُحبةَ

جانا - جِيمس ツ