#شفاه ذابلة
همس ليل
البارت الاول
اتمشى بالبستان...مثل كل مرة من اضوج او احتصر...
صح دنيا ليل...
والبستان مايتأمن ...كلشي ممكن يطلعلك...
بس مسدسي بصفحتي ...واني انيشن عدل...
سمعت صوت حركة مال واحد يركض...
سحبت مسدسي ...كلت خاف واوي لو خنزير..
طشت بالفترة الاخيرة خبر اكو خنزير بالبستان
وهذا يكون وحشي يهجم على البشر ...
تقدمت صوب الصوت...شوية سمعت طبة
مال واحد وكع وياهة عيطة...
ركضت...دنيا ليل وضلمة بس على ضوة الكمر الكامل...
لمحت من بعيد شي مدد بالكاع...
خففت من سرعتي...لازم اكون حذر شعرفني
شنو هذا...
من بديت اقترب اسمع صوت بجي وونة...
صرت مسافة عن الجسم المدد...
_منو انتة وشعدنك بالبستان بهالليل...
جنت رافع مسدسي عليه...
فز الجسم وعدل نفسه...
صار كعدته كبالي...وجهه لي وممدد رجليه...
وبدة يسحب بنفسه ليورة...
وبنفس الوقت علة صوت البجي...
جريت تلفوني من جيبي وشغلت اللايت...
بس مسدسي بعده مصوب عليه...
صوت البجي مو مال رجال...
وجهت الضوة عليه...راسا رفع ذراعه وخله كبال عيونه ووجهه...
من ركزت...لا ياعلي هذا مو زلمة...هاي مرة
_شعندج هنا بهالليل
_الله يخليك لا تأذيني...مامسوية شي
جانت تحجي وتناشغ بالبجي عبالك طفلة...
تقربت اكثر عليها....احجي خوية شجابج هنا بهالليل
بقت تبجي وتخفي بوجهها...
وكلما اتقرب هية تسحب بنفسها ودحاول تلم بملابسها عبالك تريد تغطي شي...
جانت مرعوبة...
_خوية لا تخافين...من ياعرب انتي ..هلج وين
وهم ماجاني جواب غير البجي...
رجعت مسدسي بصفحتي...ونزلت ضوة الموبايل
وكمبصت مقابيلها...
جفلت ولمت نفسها وحظنت رجليها بيديها...
وضمت راسها ....
_الله يستر على اخواتك...مشية عليك الحسين
ابتعد عني...
_خوية شسالفة....مااسويلج شي...
بس اريد افتهم سالفتج
سكتت...خوية هسة قابل اعوفج هنا وحدج
تاكلج الواوية والجلاب الضالة
_خلي تاكلني احسن من البشر...حتى اخلص من هالدنيا
لهجتها مو من اهلنا...لهجتها بغدادية...
_ماتسوة خوية هيج...فهميني خلي اساعدج
اني هم عندي خوات...
رفعت راسها....صدك ...ربي يستر عليهن...ويصون عرضك ...استر علية...اني بشاربك
_لا تخافين خوية...بس فهميني خلي اكدر اساعدج
_وصلني لكراج بغداد
_ليش اهلج وين
_ابغداد
_جابج هنا
_حظي الاغبر
فجأة عدلت نفسها وتقدمت تجاهي زحف...تفاجأت جرت ايدي تريد تبوسها...راسا جريت ايدي
_ابوس ايدك ...طلعني منة وصلني للكراج
_استغفر الله...خوية شسالفة...
كومي على حيلج...
_وين توديني
_اهلي قريبين ...اوديج يم خواتي للصبح
رفعت ايديها تأشر
_لا لا ما اريد...بس وصلني للكراج...
تحجي وترجف...ظليت صافن عليها...
شسوي ...شمدريني شنو وراها...
بس خاما اعوفها هنا وحدها....
_دكومي هسة
_ما اروح لبيتكم...وصلني للكراج لو للشارع
_هذا ياشارع بهالليل...
كومي خوية خلي اجيب سيارتي واشوف شلون اوصلج للكراج
اتجت بيديها على الكاع وكامت...
جانت عبالك مهدودة حيل...
ظلمة وماأشوف من شكلها شي...
امشي وهية تجر بنفسها وراي...
وصلت قريب البيت...بدت بروجكترات البيت تضوي
ماسمعت صوت مشيها التفت عليها...
واكفة ماتقبل تتقدم..
_شو وكفتي
_كتلك ماروح وياك للبيت
_خوية امشي والله لا تخافين...أبيتنا امي واخواتي
_ماصدكت وياي...كلت راح اجيب سيارتك
تنهدت وغثتني حجايتها...
_صار...هسة اجيبها واجي بس تعاي هناك انتظريني
اشرت بيدي لمكان قريب على الشارع الخدمي...
مشت وياي لحد المكان ومن التفت عليها اريد احاجيها انصدمت وبقيت فاك حلكي
البنت صغيرة يطلع عمرها ١٦ او ١٧ سنة...وجها مخرمش
الظاهر من وكعت على الشوك...
وشفتها مجروحة...ولابسة ثوب مال مناسبة...
ومليان تراب وحشيش...
عيوني جالت عليها من فوك لجوة...
_ابقي هنا هسة اجيج...
رحت لبيتنا وابالي مية فكرة...
شجابها هنا واهلها ابغداد...وليش هيج لابسة
وشنو الي خلاها تطلع بهالليل...
الشي الوحيد الي متأكد منه هية متعرضة للاعتداء
بس شلون ...ومن منو...
طبيت للبيت...امال ...امال
اجت تركض...ها
_جيبيلي عباية وثوب منج بعلاكة
_شسوي بيها
_معليج...بسرعة
رحت اخذت السويج...قبل مايحس ابوية
واجت امال جايب العلاكة اخذتها وطلعت...
ركبت سيارتي وسقت لحد ماوصلت يمها...
فتحت الباب من جهتها..
_صعدي بسرعة
صعدت...وراسا سقت...واني افكر وين اوديها...
خلي اخذها للكراج احسلي ...
شعرفني يامصيبة وراها...
جانت اجر بشالها مرة...وبثوبها مرة ثانية...
صح اباوع كدامي...بس اراقبها بطرف عيني...
طبكت على صفحة قبل ماوصل للشارع للعام...
احنة منطقة ريفية ...بساتين ومزارع...
وابيتنا جوة...وجنت اسوق على شارع خدمي..
يعني اظلم وترابي...بس ذابيله سبيس...
وقبل ماوصل للشارع العام...ومن ابتعدت مسافة عن
مكان الي لكيتها بيه...وعن اهلي ...طبكت
شفتها جفلت واندارت علية بسرعة
_ليش وكفت هنا
باوعت عليها مرعوبة...انكسر كلبي عليها
مديت ايدي للكشن اليورة...هية راسا انسحبت
والطشت نفسها وية الباب...واباوع ايدها وراها
ادور يدة الباب...
_لا تخافين...
جريت العلاكة...انطيتها لها
_هاج هاي دشداشة وعباية لبسيها فوك ثوبج...شلون اتفوتين بالكراج هيج...
فتحت قفل الباب...انزلي يلا والبسيهن...
درت وجهي للجهة الثانية...هية نزلت ودقايق ورجعت صعدت وهية لافة نفسها بالعباية...
احنة بأطراف المحافظة...والكراج داخلها...
يعني مسافة يلا وصلنا...
_ابقي هنا انزل اشوف اكو سيارة طالعة لبغداد
نزلت دخلت للكراج صح دنيا ليل...
بس الزوار ماتنكطع...فأكو حركة دائما بالكراج...
شفت وين السيارات ...بس ناس تصيح بياع
ناس شعلة...ناس كاظمية...
زين هية وين تريد ...رحت اجيك السيارات
اغلبها شباب وزلم...لان منو تطلع بهالليل من النسوان
اكو بس قليل...
رجعت دايخ شسوي ...من صعدت وطبكت الباب...
فزت ...اثاري جانت غافية...
_وين ترحين أبغداد يامنطقة
_اي منطقة...عود مناك اخذ سيارة
_وين اكو سيارات بالليل هسة ابغداد
سكتت...
ظليت حاير...اخاف توصل وتظل هناك حايرة ...
لو يتعرضوها ولد حرام...
اخذت قراري...غيرتي ماسمحتلي...
قابل شيريد يصير...ربي يعلم بنيتي...
شغلت السويج...وتحركت
_هاي وين خوية فدوة...
مو وصلتني للكراج...
_مشيتي علية الحسين...وتردين اعوفج هنا
اوصلج لاهلج وربنا يسهل...
سكتت ماجاوبت...بس احسها مفزوعة...
وكل ماتغمض عينهة ترجع تفز..
عبالك تخاف...
_هسة سولفيلي...
_عن شنو
_شجابج لمحافظتنا...وليش طالعة بالليل...
ما أجاني جوابها
_احجي شمالج...بلكت اكدر اساعدج
_الله يستر عرضك مثل ماساعدتني وسترتني..
بس خوية فدوة رحتلك لا تسأل
سكتت...لكن بقت الحجاية ادور بعقلي...
فترة وهم رجعت سألتها
_اكو واحد راد يعتدي عليج
فزت لحجايتي...وسحبت نفسها وية الباب
_لا توكعين يمعودة...ماكتلج شي
ماكو صوت منها...التفت عليها بس دموع تجري
عرفت هذا الي صار لها...
تنهدت واني اكول بكلبي شكد جلب ابن جلب هذا
ماعدهم مخافة الله...مايفكر بأخواته...
بس رجعت فكرت هية شجابها هنا ...
التفت عليها...اضوية الشارع مال الخط السريع يضرب على وجهها بين لحظة وثانية ...
البنية رغم رعبها والجروح الي بوجهها والتراب
حلوة الله يستر عليها ...
اخر شي ما كدرت تقاوم غفت ...
وصلت للبانزيخانة...ودخلت افول بنزين...
من وكفنا كعدت...
_وين احنة
_هاية بوابة بغداد...راح افول بانزين
_انزل للحمام
_خوش اني راح اوكفلج هناك...
اشرت بيدي على مكان على صفحة توكف بيه السيارات مثل الاستراحة...
رحت ركنت بيه...وفتحت الباب ونزلت امد جسمي شوية...
من رجعت حسيت نعست جريت محفظتي من جيبي خليتها على جكمجة ....
ورجعت راسي وغمضت عيني....
كعدت على صوت واحد يدك على الجامة....
فتحت عيني ضوة الشمس قوي...فركت عيوني ونزلت الجامة...
_اخوية صارلك هواي واكف هنا...خيرك
_ماكو شي بس الظاهر غفيت من التعب
_ها...مو مشكلة
عافني وراح واني اريد استوعب مكاني....
اذكرت شجابني هنا..
التفت على مكانها واني متوقع الكاها نايمة...
بس ماكو احد ...
نزلت من السيارة التفت يمنى يسرة ماكو...
رحت بأتجاه الحمامات ...
طلعت مرية بوجهي....
_من رخصتج يوم...اكو بنية جوة
_لا يمة ماكو احد
_وبالمصلى
_هسة اشوفلك
دخلت وطلعت...هم ماكو
هاي وين راحت...رجعت للسيارة ...بعد مافريت المكان كله...
صعدت واني دايخ ...معقولة جان حلم ...
زين شجابني هنا...جريت المحفظة...كلت انزل اشرب جاي واغسل وجهي...
وكع شي...دنكت ارفعه...هاي ترجية ذهب...
وباوعت جوة المحفظة اكو تك الترجية الثاني...
اخذتهن بيدي ...صافن عليهن...شنو معناته
فتحت محفظتي لكيت مؤخوذ منها فلوس...
معقولة اخذت الفلوس وخلت بمكانه التراجي...
ضجت كلش وانقهرت...حسيت هانتني
طلعت ودخلت لبغداد ...بس ليش...
شسوي هية وضع بغداد حاليا تعبان...
وين راح الكاها...وليش ادور عليها...
لفت من الفلكة ورجعت لمحافظتي وبالي مشغول بهالبنية...
وصلت لاهلي ...لكيتهم كاعدين على نار...
وابوية ظل يحجي علية...
امال والحجية يسالون شسوي بالعباية اخذتها..
بقيت ايام واني دايخ وانتظر اسمع خبر بالعرب الي حولنا بلكت اطش حجاية عن شردت بنية
بس كلشي ماسمعت...
دخت ...الي شفته حلم لو حقيقة...
جنت اروح للبستان ولنفس مكان الي لكيتها بي
واحاجيه..الي شفته هنا جان بنية لو جنية...
لو احجيها لاهلي راح يصدكون لو يعتبروني اهذري
ارجع اطلع تراجيها ...
بس ذني يأكدن فعلا شفتها....
خاف جنية ....لا بشر متأكد....
بس من مرت السنوات...ظل هالموقف بيني وبين نفسي...
وبديت اصدك الي شفته مو واقع....
******
مر سنة على الصار وياي...كل ما اذكر يظل جسمي يرجف...
واذكر الولد الي ساعدني...شكد ادعيله بصلاتي ربي يحفظه...
مرات اكول جان المفروض اتاكد رجع لبيتهم بالسلامة...
خاف صار بي شي من وراي...
بس شلون اعرف وماعندي اي معلومة عنه....
هالهاجس جان حيل يقلقني....
اليوم استلمت نتيجتي...الحمد لله معدلي ب٨٠ وينقبل علوم....
بس اني مقررة اقدم تربية ...عمي كال احسلج
صفاء ...ابن عمي وخطيبي...ضاج....
يريدني اطلع شي اعلى..هو مهندس...
ماجان يهمني هالموضوع...المهم شهادة اكدر اتعين بيها....
بالطريق... عمي جان هو موصلني للمدرسة
ورجعنا نتمشى...
_عمو خلص بعد ماعدكم حجة...جهزي نفسج حتى نزفكم...
_براحتك عمو بس خاف صفاء عنده شي
_شعنده...اشو تعيين وتعين...
والغرفة جاهزة...وفلوس زواجكم موجودة
_بكيفك عمو الي تأمر بيه
_الله يرضى عليج بنتي...عاقلة مثل امج
بكلبي كلت شفاد العقل...
وصلنا وتلكتني مرت عمي ها بشري...
جاوبها عمي...ناجحة وان شاء الله تربية
_يا صلوات ...على خير يمة مبارك...
لك علاء تعال يمة
دخل علاء....ابن عمي الثاني اكبر مني بسنتين
_خيركم...شافني...ها هداوي بشري
هم جاوبه عمي...
علاء ...اي اليوم العزومة عليج
هدى...تدلل ابن عمي ...
ام صفاء...يمة خابر عمتك بشرها...
باوع عليها صفح ...ومن يدفع فلوس الرصيد
بوقتها جانت الموبايلات هسة نازلة وسعر المكالمة غالي
صاح بيه عمي...خابر لك على اساس انتي تعبي رصيد...
مو اني اشتريلك
علاء...على كيفك لا ادفع
ابو صفاء...لك هو اني وصلت يمك
خابروا امي وبشروها...واني ماحجيت وياهة...
بس صعدت لغرفتي بدلت ونزلت جوة اكمل غدة وية مرت عمي....
دخل صفاء...سلم وباوع علية صفح...
صفاء...علاء خابرني وكال على معدلج...هو هذا الي كدرتي عليه...
هدى...اعرف خيبت ظنك ..بس هاي امكانيتي
انداريت اكمل ثرم زلاطة والدمعة بطرف عيني
صار هدوء عرفت مرت عمي طلعت من المطبخ
من حركتها
شوية وحسيته وكف وراي...
خلى ايده على جتفي...وقرب حلكه من ذني
نفسه الدافي داعب شعري...
جمدت بمكاني...صار سنة من عقدنا سيد...
من اجيت مهزومة بليلة كشرة....
بس ابد ماحاول يتقرب مني...
جان اسلوبه رسمي وياي...
يمكن علاء اقرب لي منه...
واكو شقة وضحك بينا...
لكن صفاء لا...
لحد عطلة السادس...وبدى يقريني
تغير اسلوبه معاي...كلامه...
صار يتحيز فرص حتى يلزم ايدي
او يطبع قبلة على خدي...
من نكعد يتقرب بكعدته علية حيل
صفاء...هدى ماقصدت ..بس جنت اتمنى اطلعين معدل هندسة
هزيت راسي...اعرف...وحاولت
دارني عليه...جان كلش قريب من اي حركة اصير بحظنه
صفاء ...ليش هالخجل...وجهج احمر..
دنكت واني احس نفسي تخربط من قربه
مد يده ورفع راسي له...
جان يباوع بعيوني....وبسمة خفيفة على شفته...
صفاء ...شو ماشكرتيني...مو تعبت وياج بالقراية
هدى...اشكرك ماقصرت
صفاء...لا موهيج الشكر
دار وجه وهو ياشر على خده بأصبعه
_هنا اطبعي الشكر بشفايفج
حسيت وجهي كام يطلع نار
_يلا دانتظر...لو اني اخذ من هالشفايف الوردي شكري بطريقتي
_صفاء...
_عيونه...فديت الخجلان...
فزينا على صوت علاء
_لك يابة لحك...تعال شوف
صفاء ابتعد بلحظة وهو يخزر اخوه
_ولطم يلطمك شبيك اغبر
اني ظليت بنص هدومي
_شكد تنطيني واسكت ما احجي على شفته
_انطيك نعال على راسك...
لو تريد اكول لابوية وين تودي رصيد
ابو مكالمات تالي الليل
رفع ايديه علاء دليل الانهزام...لا عمي هو وين واحد يكدرلك...
اسف ..رجعوا للي جنتوا تسوه...
عافنا وطلع يضحك...
اني هالحجي ميتة خجل...ولا رفعت راسي
_راح ابدل وانزل نتغدة
بيومها بالليل صعدت لغرفتي واني افكر...
ياترة حظي احسن من حظهن ..
يكولون حظ البنت مثل حظ امها...
وامي ورثت لعنة من امها وجداتها...
هاي اللعنة هم تصيبني....لو مجرد خرافات ومالها صحة بالواقع...
راح اجيلكم قصة بيبتي وامي وانتوا احكموا...
وتستمر الحكاية....
