#شفاه ذابلة
همس ليل
البارت الثاني
كان ياما كان...المكان هو بغداد زمان فترة الخمسينات..فترة الزهو...فترة النوادي والتطور والتقدم....
هاي الفترة اغلبنا نصور فترة تخلف ومابيها اي حضارة...بس بالعكس جانت حركة التطور ابغداد جبيرة....
جان للامرأة بالجزء المتمدن من بغداد حرية جبيرة
باللبس والدراسة والسفر....ومختلف انواع الحياة
وبالمناسبة بهاي الفترة جان امين بغداد امرأة مو رجل...
المعروف بغداد يقسمها نهر دجلة الى جزئين كرخ ورصافة...
الرصافة كانت مبنية ومن اقدم مناطق بغداد
بس الكرخ جانت عبارة عن اراضي زراعية عدا كم منطقة بناء...
والبناء بيها قليل....
ومنة تبدي قصتنا ...رجل من الجنوب هج بسبب ثأر عشائري بثلاثينات من القرن العشرين..
واجة لبغداد ولان هو مايعرف غير الزراعة...
اشتغل عد ناس من اصحاب الكيعان فلاح ...
ومرت السنوات عليه وزوج من بنات الفلاحين الي وياه...
بس ماخلف بس ولدين مهدي وعباس...
جانوا كاعدين بمنطقة اسمها القادسية وهية من المناطق الراقية ابغداد حاليا...
بس بذاك الوقت جانت اغلب البيوت من الطين
ازوجو مهدي وعباس...
مهدي خلف ثلاث اولاد...
بس عباس خلفته بس بنية الي هية جدتي زهرة..
ام زهرة جانت وحيدة بين خمس ولد...
جانوا يعبرون الطريق للمناطق الزراعية الي حولهم حتة يشتغلون فلح بيها...
ومرة ديعبرون ونضربوا بسيارة تمشي سريع..
والظاهر صاحبها جديد بالسياقة...
وبنفس اللحظة ام زهرة ماتت وابوها نقلوه للمستشفى وبعد كم يوم هم لحك مرته...
جدتي زهرة جان عمرها خمس سنوات...
من ماتوا اهلها بيبتها لامها طلبت تاخذها تربيها عدها
لان بقت من ريحة بنتها الوحيدة...
قبلوا بشرط من تكبر ترجعلهم....
وتبدي قصة جدتي من هنا....احنة ابغداد نكول بيبي مو جدة ...
_نعيما بيبي ...غسلة الهنى
_يمة فدوة ليدج حبيبة...ربي يرزقج بابن الاحلال الي يسعد بختج
طلعت بيبتي من الحمام....وديتها لكبتها نشفت شعره ومشطته وظفرته لها...
الكبة بيها صندقجة للملابس ونضدة للفرش...
وفارشي بالكاع بسط...
رغم بيبتي جبيرة وموتة امي كسرتها حيل بس شعرها بريسم ومابي شيب هواي....
_بيبي الله عليج جدي هم جان يتغزل بشعرج
_يابيبي شيتغزل وينة وين الغزل...
هوة اشفت منه شو راسا الله اخذه...
_رحمة لوالديج اشفتي منه ومخلفة ستة لعد لو تشوفين شكد تخلفين...
_كومي منة شلون جيل بكد فردة القندرة وتعرفون هالسوالف
ضربتني بالمشط واني ركضت برة الغرفة اضحك
بيتنا طين وماكو باب للكبب بس نخلي البردة مثل ستارة ..
عمري حاليا ١٤ سنة وبالنسبة لأهلي هالعمر مال زواج لان البنية بهذاك الوقت انضج بهيج عمر...
رحت للحمام طلعت الطشت ورشيت المي بالباب لان الحمام عبارة عن غرفة صغيرة نخلي بيها موقد نار ونحمي مي ونغسل ...
جنت افكر بحجاية بيبتي ربي يرزقج بابن الحلال...
شيصير لو ابن الحلال هذا ابن عمي...
اويلي علية غير اموت ...شلون عيون صفر مجرورة
والخدود جنها تفاحة ...
لو الشارب الجوزي على شكار....
يمة فديت طوله الحلو...ياربي ماتجعله من نصيبي
يتيمة وماشايفة شي بحياتي...
رجعت كنست البيت ورتبت الفرش...وسويت تمن على الجولة...
الغدة يحبونه تمن وروبة....
بس اني تعلمت من بنات وياي اطبخلهم مرك وخوالي يحبونه...
اهلي ماخذين ذبة العرب بعيشتهم مو مثل الناس الحضر الي حولنا...
دخل خالي ومرته ....
خالي جواد الوسطاني مزوج وماعنده خلفة بعد...
يطلع هو ومرته يحون (يعني يجنون ثمار الخضراوات) وية الفلح بكروة...
_الله يساعدج بوية
_ كواكم الله شلونكم
جانوا تعبانين خطية...
اصبلكم غدة بينما تغسلون....
رحت اصب وبيبتي طلعت كعدت وياهم تسولف بالدير...
جبت الصينية خليتها...
_تعاي بوية اكلي وين رايحة...
_لا خالوا تغدوا بالعافية راح املي مي قبل ماتغروب الشمس...
_يمة مو الصبح مليتي
_اي بيبي خلص..
رحت عدلت نفسي على كسرة مراية خالتها بزوية مال شباك ولبست عباتي....
واخذت دبة المي...مريت على صاحبتي البيت الي بصفنا قسمة.
_شعندج جاية بهالظهرية...
_امشي نجيب مي
_ميتة على المي لو على الي دشوفيه بدرب المي
_امشي لج لا تظلين تلغين...
ضربتها على جتفها...فضيها لبسي عباتج...
طلعنا نسولف ونضحك...
احنة ماعدنا مي حلو...يعني مي اسالة...
بس مقابيلنا صار بناء بيوت طابوك واسسوو لهم مي...
وكمنا نروح نملي منهم دبات للشرب والطبخ...
هاي جانت احلى طلعة عندي الصبح والظهر..
لان اشوف حاتم بدربي بروحته للشغل وبرجعته
_شوفي قسمة شكد حلو البنات يرحن للمدرسة..
ليش مو احنة مثلهن
_خايبة دكعدي وينة وينهن كوة مدبرين عيشتنا
_باعي الله عليج شلون مسويات شعرهن واللبس شكد حلو عليهن...
امشي واتفرج عليهن وبكلبي حسرة بس خلصت رابع خالي بطلني ...
دغتني بصفحتي قسمة واني ابوع صفح على البنات
_لج شبيج دغين بية
_خايبة ماتباعين العاشق الولهان يخزر بيج
باوعت وشفت حاتم كدامي...يمة اجيت اموت
اليوم مالابس هدوم الشغل ...
لابس افندي بنطرون وقميص...
النوب عيونه بالشمس صار يلمعن...
كمت امشي واتعثر...
وصل قريب علية...
_شبيج تمشين وتتلفتين امشي عدل...
جري عباتج على راسج شعرج كله طالع...
جريتها راسا بيدي واني جالكة حلكي بالضحكة
_لج شبيج تتمضحكين...
سدي حلكج....فضيها جيبي مي وارجعي...
مشيت على السريع...
_خايبة اوكفي شمالج ...
خليتني اركض وراج عبن حبيب الكلب كالج امشي سريع
_قسمة شنه هالحجي ...
عيب شنو حبيب الكلب
_خاب شنهي معناها اذوبين وتصيرين مي بس تلمحينه من بعيد
لو من يحجي وياج تسيحين مثل الزبدة بالشمس
_غير ابن عمي واستحي منه
_خاب ماتستحين من صالح وكريم هم ولد عمج واخوته...
لو حاتم وحد ...
_دمشي امشي تاخرنا
جريتهة من ايدها...
رجعت للبيت واني طايرة من الفرح اليوم حاجاني...
يمة النوب ظل يمشي وراي لحد ماوصلت للبيت...
ياربي كلبي احسه يدك سريع بس تجي ابالي نظرات عينه...
بقيت يوميا اشوفه الصبح من املي مي بس مايحاجيني...
اليوم جان بيت جدي اهل ابوية مكملين بيتهم ...
وذبحوا فدية للبيت وعزمونا...
اني فرحت احب جدي دائما يجيني ويتفكدني..
حتى عمي مهدي هم حنين علية...
بس مرت عمي لا احسها اضوج مني...
لبست نفنوف ماروني منقش بورد ابيض...
قصير هو موديله هجي ....
وعدلت شعري وظفرته ...طويل شعري
بيبتي ماتخليني اكصه ودائما جانت تخليلي حنة...
حتة صار لونه تمري ....
ولبست عبايتي...ورحنا وية خالي جواد ومرته وبيبتي...
من وصلت شفت اهل مرت عمي اسمها نجاو كلهم موجودين وخاصة البنات منهم...
اباوع عليهن وحدة احلى من الثانية...
اجو ولد عمي اخوان حاتم يسلمون...
اباوعلهم واباوع لعمي كلهم حلوين...
زين ليش اني سمرة وعيوني سود...
ولد عمي عيونهم صفر وشكرين....
ليش ياربي ....ظليت احوس...
هسة حاتم من يشوف بنات خالته هم يباوع علية...
وين اني من جمالهن...
اذا هو احلى مني بمية غاط ...
دمعت عيني ومرت عمي تعاملني غريبة مو عبالك هالبيت لجدي ...
جدي تعب وعاف الفلاحة وانطى فلوسه لعمي اشترى قالب وبدى ياخذ بيوت يشتغلهن وياه ابنه الجبير صالح وحاتم..
والصغير كريم لا هذا مدلل امه على اساس يدرس...
المهم عمي بمرور الوقت صار عنده فلوس وكام يبني شوية شوي ابيتهم...
وهسة خلص....
بالنسبة لي هذا قصر...اول مافتت اتلفت على الغرف
بس من شفت البنات...
طارت فرحتي...
اجت مرت صالح صاحتني ...
اسمها سمر كلش حبابة ومتدينة..
عدها ولد اثنين....
_تعاي زهرة ليش كاعدة وحدج
_لا كاعدة يم بيبتي
_هسة ماشايفة بيبتج...
دتعاي اشوفج البيت...
فررتني على الغرف الجوة ...
وصعدتني فوك غرفة لها...وغرفة لكريم...
واخر شي غرفة لحاتم...
بس غرفتها بيها اخشاب...
غرفة حاتم وكريم فارغة...
_هاي غرف الولد من يزوجون يجهزوها لهم
اني حمريت عبالك اتكلي من تزوجين انتي...
نزلت جوة وياها رادت اساعدها بالمطبخ..
دخلت كومة بنات واكفات بيهن خمسة...
وشقة وية ولد ماعرفهم بس سمر كالت ذولة بيهم اخوان عمتي نجاة وبيهم ولدهم...
وحدة حاجتني...
_انتي بنت عباس اخو عمي مهدي
_اي
_اشو ولا تشبيهيهم
جاوبتها ثانية...
_اي سمرة يجوز على خوالها
جاوبها ولد ...بس شلون سمار وية الشعر عبالك هندية
اني خجلت كلش وصرت بنص هدومي...
_ شمدريك شلون الهنود صايرين
_اكو شركة مال هنود يمنا يشتغلون كهرباء وياهم نسوانهم
جانوا يتناقشون بينهم واني خرسة ما اجاوب بس اشتغل...
فزيت على صوت صاح...زهرة..
رفعت راسي شفت حاتم اشرلي براسه...
_تعاي بيبتج اصيحج.
راح اني غسلت ايدي وطلعت بس قبل ماوصل الهول
حسيت واحد جرني من ايدي...
فزيت وية مالتفت سمعته كال
_اصعدي فوك اريد احجي وياج
عافني وراح...وظليت رجلية اطكطك...
اصعد لو لا....
خلي اصعد شكو بيها ابن عمي واكيد يخاف علية
لا شنو ابن عمي يبقى رجال ومايصير انفرد بيه
غلبت العاطفة والفضول حتى اعرف شيريد مني على العقل...
صعدت ومن وصلت لنهاية الدرج ظليت واكفة..
وين اروح ماكالي...
فزيت على صوته...خليت ايدي على صدري
_ليش واكفة هنا
_يمة جفلتني....
_وين بالج وجفلتي
جرني من ايدي لغرفته...وسد الباب
اني خفت راسا...ليش سديت الباب
_شبيج اصفرتي قابل شريد اسويلج...
اريد احجي وياج
_أمر
_ليش واكفة بنص الزلم مفرعة...
مو جيتي لابسة عباية
_مو داساعد سمر وماكدر وية العباية
_هواي اكو بنات يساعدوها...
لا ذبين عبايتج...وبعدين شنو هالثوب ماكو اكصر منه
دنكت اباوع لثوبي...
_بعد لا تلبسي كدام احد
جان يحجي بهدوء ...عبالك يحاجي طفلة
رفعت راسي اباوع عليه...
يمة نظرة عينه تموت ...
فهيت وفتحت حلكي بدون ماجاوبه...
_وج شبيج مو احجي وياج...
هزيت راسي...
_انتي ليش تظلين فاتحة حلكج وصافنة علية من احاجيج...
_مو....
واستحيت ونزلت راسي...اباوع على الارضية...
جانت صبة ما مكيشة...
سمعت صوت ضحكته...شكد حلوة...
هو واكف قريب علية...
_يلا انزلي جوة...والبسي عبايتج ولا تكومين من مكانج...
ذولة خوالي عيونه ماسخة...
عافني ونزل...واني اريد ارفع رجلي وانزل ماكدر...
رجعنا للبيت واني بيومها مانمت...
بقيت اذكر كلامه....
ثاني يوم رحت وية قسمة نجيب مي وحجيتلها...
_خاب هذا يغار عليج
_يمة يمة شفايتلي...
بس قسمة ماشفتي بنات خاله..
كلهن فلكة كمر...
شيشوف بية واني زركة
_خية الحب اعمى...ماتشوفينه شلون حلو
ويباوعلج...
ضربتها بجتفها...عود انتي صاحبتي
-صاحبتج غير اسولفلج الحق...
بس خية ترى هو رغم حلو ...بس فاهي حيل
_مو احسن من محسينج...
نار كبرى يكلك طالع من جهنم
_جا خية لوما يكون الرجال هجي شسوين بي
كون يدكني كتلة صبح ومسى ...
_غبرة شسويلج...
نحجي واحنة وعبينا نشحط بيها وشايلات دبات المي...
وما اشوف الا الكمر طلع كدامي...
_ها فهيتي لازم شفتي
_اي ولج كلبي لحكيلي...
_امشي عدل خية لا تنجبحين على وجهج...
مليت الدبة مي...ومن رجعنا تقرب مني
_جيبيها اني اشيلها لج
_خاف ثكيلة...
ضحك...ثكيلة علية وخفيفة عليج مو
اخذها وتقدم خطوتين واني امشي وراه...
_انتي هسة ١٤ سنة عمرج مو
هزيت راسي اي بعدين انتبهت هو مايشوفني لان كدامي يمشي...
_اي..ليش
_هيج...زهرة
_عيونها...
كلتها باستعجال ومادري...راسا لطمت حلكي بيدي
هو التفت علية...مبتسم
_اروح فدوة للعيون...
_اسم الله عليك ...
_مادري هيج لسانج حلو جان من زمان حاجيتج
يمة غديت بنص هدومي...
هو لساني فلاتي ادري بيه...شكد عيب هسة شيكول علية...
ماجاوبته ...بس اباوع لظهره من يمشي كدامي...
ماحسيت الا نجبحت على وجهي...
اتكومت العباية فوك راسي...
وصوت قسمة يصيح الله الله
اجت كعدتني...شفت حاتم يباوعلي وهو ضايج
_تأذيتي ...سألني
_لا مابية شي....
بس يافشلة الفشلة...شلون جبحة خرب بساعة السودة شبية ثولة هجي...
_كومي على كيفج...
دار وجهه...وقسمة دكومني وتنفض التراب عني
_خاب ثول ال يثولج شمالج ادوهنتي بحجايتين منه
_خية والله مادري شلون عثرت ..
_هذا العشك الي عثرج...امشي خايبة
مشينا براه لحد ماوصلني للبيت...
وقبلي دخلت قسمة لبيتهم...
وكف على صفحة بعد مانزل دبة المي...
جان لابس بنطرون مدهن مال القالب وقميص عليه مخطط ولاف يشماغ على راسه...
_خوما بيج شي...
_لا مابية شي
_من صاحت صاحبتج الله...والتفت وشفتج طايحة
كلبي طاح وياج
_ها...فتحت حلكي على حجايته
_ولطماه...كالها وهو يضحك...فوتي جوة لا يشوفج احد...مع السلامة
عافني ومشى واني واكفة بمكاني وعلى نفس جلكت الحلك
دخلت للبيت واني طايرة مو امشي...
كل شوي تنعاد حجايته بأذني...
طبيت سلمت على مرت خالي...اجيت قريب كبة بيبتي...سمعت اسمي انذكر...
تقربت اريد اسمع شيكولون...
_ادري يمة شسويلهم تبقى بنتهم...
_يمة نربي ونكبر ويجون على الحاضر ياخذون
_وليدي ماكدر اعوفها ...اشوف بيها امها الي ماتهنت بشبابها
_شبيدي ماسويته...هاي شوفت عينج هنا مالنا رزق خلي نمشي لديالى ...
هناك يم اخوتي على الاقل نعاونهم بكاعهم
_ ادري مرت عمها ماهاويتها...
تريد لولدها من بنات اخوته
_باجر سيري عليها وشوفيها شدكول...
وبوكتها نشوف شنسوي...
اتسحبت ورجعت للمطبخ شعلت الجولة اسوي عشى واني بالي يم حجيهم...
يعني شنو خالي يريد يروح لديالى ...
اني عندي خمس خوال تلاثة مشوا لديالى يم اهل زوجاتهم واشتروا كاع بينهم يزرعونها...
واثنين بقوا هنا....خالي الصغير بعده مامزوج بس صار فترة يقنع بيهم يرحون هناك ويتعاونون بالكاع...
يربي شلون بية ...شلون اعوف حاتم...
ظليت الليل كله اتكلب شوكت نصبح حتة تروح بيبتي لمرت عمي...
ادعي الله يهديها علية وتاخذني لحاتم والله اموت اذا ابعد عنه...
اول ما أذن كمت جبت مي لبيبتي تتوضى...
ورحت شعلت فانوس وشعلت الجولة اسوي ريوك لخالي ومرته...
_صبحج الله بالخير بنيتي..شعندج كاعدة هسة
_صباح الخير والعافية...اسويلكم ريوك
_يابة خالتج تسوي مثل كل يوم..يقصد مرته
_جبت مي وضوء لبيبتي ماخذت عيني نوم
عافني راح يصلي...
تريكوا طلعوا لشغلهم واني افتر فوك راس بيبتي
ها بيبي ماعندج طلعة اليوم
_وشعرفج عندي طلعة
_ها ...فهيت شكول..
ها...مو انتي يومية تكسريها بنومة بعد الصلاة...
ومانمتي اليوم
_اي والله يا بيبي ابالي حسبة....
جيبلي شيلتي الجديدة وثوبي خلي اكوم اذبحها على قبلة...
بس ها بنيتي لا طلعين من البيت...
بدلت وطلعت واني افتر...سويت غدة ونظفت الدير...وغسلت هدوم وهية ماكو...
اجت وية جيت خالي...
طبوا سوو...
_الله يساعدهم...
_هلا بوية ...صبينا غدة فاطسين من الجوع...
صبيتلهم وبكلبي جمرة نار...
اريد شوكت يحجون...
ظلوا يسولفون على الحوي ...
شلت الصينية ورحت حطيت القوري على الجولة ...
ورجعت شفت مرت خالي طلعت لكبتها تنام...
تسحبت على كيف ورحت لكبت بيبتي اتنصت
_هية كالت هجي
_اي يمة
_ خوش اروح لجدها اكوله حتة مايعتب علية...
ماعرفت شكالت مرت عمي لبيبتي...
ياربي شلون راح اعرف..
ظليت احوص..
....وللحكاية تكملة
