درب العشك ❤

❤❤❤❤

تكمله البارت الرابع عشر
درب العشك 🔥
للكاتبة:ملاك حسن

رفيف .. ههههههه والي شفته البارحة شنو .
اسمع صگر ..
لو حتى اذا مابينكم شي وبس ع الورق هم ماارجعلك .
عندي كرامتي اهم من كلشي بينا ..

صگر .. يعني هيج صار الحجي .. اني اروح احسن
لأن اذا بقيت راح تتمادين بالحجي . ومااريد اجرحج ..

رفيف .. ماتروح قبل متوديني الاهلي گتلك ماابقى هنا ..
صگر .. هذا اخر حجي . وبعد ماابرر .. لأن ماعندي شي احجيه . وطلعة من البيت ماكو .. انسسسي .

وتركني وصعد ..
طلعوا اهله ع الصوت والبنات هم ..
الشيخ مبدل ويريد يطلع ..
شكو شبيكم ..
ام اسد .. بأسم الله بعدكم ماصارلكم كم شهر وبدت رحمة الله ..

گلتلها .. بسببكم خدعتوني وماگلتوا على كلشي من البدايه ..
باوعت للشيخ وگتله ..
سيد عندكم هيج بقوانين العشاير .تاخذون المرة وبعدين تصدموها وتخلوها امام الامر الواقع . ولازم تسكت وتتحمل ..

تقبلون احد يضحك عليكم وياخذ بناتكم ويطلع متزوج او يتزوج عليهن ..

الشيخ .. كلشي ينحل بنتي .. روحي اصعدي الغرفتج ولاتكبريها ..
عدنا شغل نكمله ونجي ونسولف ..

رفيف .. عمو ليش هي صغيرة واكبرها ..
طلعت زينب من غرفتها ..
گلتلها وانتي..  من قبل كم يوم تردين تموتين ع اسد شنو الي تغيير ..
هي گامت تبجي ودخلت ..
نزل صگر مبدل .. حجي زايد ناقص مااريد .
وأنتي اصعدي الغرفتج . نامي وارتاحي ومن تهدين نتفاهم. موزين عليج ..
طلعة ماكو . احنه رايحين بشغله خارج المحافظة .
من نرجع يصير خير ..

اني بس صافنه ومذهوله على بروده ..
گاله هاحجي كملت نطلع ..
طلع هو وابوه .
واني بقيت واگفة بالصاله مثل التايهه .
بسيطه ياصگر ..
الا اخليك تتسول وماارجعلك .

ام اسد .. يله يمه اصعدي وتعوذي من الشيطان .
شغله ماتسوه لاتكبريها ..
رفيف .. هههههه بسيطه تزوجوه وبسيطه .
ام اسد .. يمه احنه ردنا نگلج بس صگر ماقبل وگال لاتجيبولها طاري .
وبعدين الشرع حلل اربعه .. ليش توگفين بوجه هاي الايتام وتأشر على غرفة اسد ..
وهو يحبج ومامقصر عنج ليش تخسريه برعونيتج ..

اباوعلها واضحك ..
رفيف .. اي طبعا لان غبيه وبسرعه صدگت حبه ووثقت بي ..

انتو شنو متگلولي ..
اني شسويتلج حتى تعامليني هيج ..
تقبلين منى او اي وحدة من بناتج يصير هيج بيها ..
احجي حجايه الحق .
مو ذاك اليوم وصلتي الموت ..
اني هم يتيمه وخافوا الله بيه ..

ام اسد .. تعيرين بيه وتتشمتين . ااااه ياصگر موگتلك يمه هاي مو من ثوبنا مااقتنعت ..

رفيف .. خلص راح اريحكم. مني وارتاح ..
فقدت وگمت افرفح وابجي . الى ان حسيت عيوني غوشن ووگعت ..
بقلم_الكاتبة_شمس
……………………………………………
صحيت ومااگدر افتح عيوني . وهيلين تذب مي عليه وتصحي بيه .
وشيرين تفرك بإيدي ..
اسمع عمتهم تحجي . طبعا هذي مقيمه عندهم ..
تگول ..
دادة خليها تروح .. اذا هو الشرع محلل اربعه قابل هي بكيفها .. واذا ع الطفل . عنده بنات اخوه اثنين ..
وشوية شوية يتعود على زينب ويخلفون دسته .
وبنتي ماقاصرة واحلى منها ..

اني اسمع وعيوني تجري دموع .. طبعا هيج تحجي فگور وجانت مستفاده من خير اخوها .
ومن مات اسد حست روحها خسرت .
وهسا تريد تستفاد براس صگر ..

مااتحملت الاهانة والحجي ..
گلتلها هيلين انطيني الموبايل بالجنطة .
اخذت الموبايل منها .
فتحته وماأشوف بعيوني من الدموع ..
اتصلت ع رامي ..
بس گال ياهلا بوردتي ..

مااتحملت .. گمت اشهگ . گتله رامي ذبلوها وردتك الحگني ..

رامي .. رفيف شبيج . منو وياج .. جاي جاي . ابقى وياي ع الخط ..
گال شكو ..
گتله قشمروني . يردون يزوجون صگر المرت اخوه مدري متزوجها ..
رامي .. كافي يبعد اخوج . اني جاي اليوم اگلبها عليهم شنو ماعندج اهل عبالهم تايهه ..
ورجلج الشفيه وين ..
رفيف .. ماهو طلع ومايقبل يخليني اجيكم ..
رامي .. حظري روحج اني شويه واوصل ..

سديته وبعدني ابجي ..
عمتهم .. شني خابرتي أخوج تخوفينا لو تهددينا . عشيرتج كلها ماتوصل ربع عشيرتنا ..
بس همزين راح نفتك منج ومن اصلج ..

ام اسد .. ام زينب مو هيج الحجي . وانتي اصعدي صگر مايقبل ..

باوعتلهن بأستهزاء ..
مع الاسف انتن محسوبات ع السادة ..
شوهتن صورتهم ..
السادة مو هيج .. اني بنت عمي ماخذة سيد .
واهله يخافون الله ومعتبريها مثل بنتهم .
ومايفرقوها عنهن ..

بس انتن لاتعرفن الله ولامخافته ..
وفاهمات الدين خطأ ..
الشرع حلل اربعه .. اذا الزوجه عقيم واذا الزوجه ممراعيه الزوج بحقوقه ..

كلشي وگلتوا الشرع حلل اربعه ..
تردين تزيحيني وتاخذين صگر البنتج ..
عمود بناتها ..
بس مافكرتي الي ببطني شلون راح يربى بلا اب .
بس اني رايحة ومخليه عيني بعين الله ..
هو الي ياخذلي حقي ..

سحبت جنطي للباب المطبخ الخارجي وطلعتهن .
والبنات يتوسلن بيه .. مااروح
ويگولن اذا اجه صگر ومالگاج يتخبل علينا ..

رفيف .. عود گلله اجه اخوها واخذها وماگدرنا نحجي ..
ولايتعب روحة مااارجع .
بعد الي صار .
والي سمعته هسا من امهاته .
مستحيل ارجع ..

بقيت منتظرة رامي بباب المطبخ..
ودموعي ماتقبل توگف ..

شفت سيارة رامي من بعيد ..
گمت اسحب بالجنط وامشي اله ..
اريد اوصله ..
گمت ابجي واشهگ اكثر واگله ..

ااااه ياخويه ..
تعال وشوف اختك حالهه اشلون      
الك ازرع محبه بصفنة الشوگ
تعال وخل اصير بحضرتك طير         
ومن شجرة محبتك اخذ اعلوگ
چثيره احلوگ كالت چنه خلاچ           
تعال ارجوك سكت هاي الحلوگ
بقلم_الكاتبة_شمس
يتبع…… .