حبيت هاي القصة كونهة قصة توعية
والاسلوب يشد بشكل
ياريت امهاتنة يقروهة وينتبهون لأدق التفاصيل الي بيهة
متابعة شيقة وقرائة ممتعة
القصة بعنوان "طفولة مشوه.. زهرة"
للكاتبة المتلألِئة سوزان المندلاوي
_____________~~~~~~~_____________
#طفولة_مشوهة
#زهرة
سوزان المندلاوي
ج 1
باجر عيد ..حضنت فستاني اللازرق وبي ورد ابيض،وخليت حذائي والجواريب فوك راسي ..
اعاين امي تصيح ..وتفرش بلفرش بلغرفه
يلا ابو جاسب .تعال فرشت الك ..
اني حضنت هدومي حييل ..
ودرت ظهري ..ماكو شي ابالي بس البس هدومي ..
لو امي تقبل هسة البسن .
بس شافتني البسهن وضربتني ..
طلعت امي ..واسمعها تحجي وي خواني وخواتي ..
درت راسي وباوعت ع السكف ..
اني ..زهرة ماعرف شكد عمري ماعرف بس بعدني ممسجله مدرسه ..
بس من اليوم انولدت الي الذاكرة ...
بس عمري ماعرفه ..
قبل كم يوم جوي يمنا عالم جنت العب بلدرب ..
وسالو ع عمري ..بقيت صافنه بوجهم ماعرف اشرت ع بابنه كتلهن اسالو امي ..
المنطقه اطراف بغداد .بيوت زراعيه ..
بيوتنا درابين ...
كلي وينه ..
ركضت كدامه وفتحت البردة الي ع الباب
وصحت يمه يمه جونه خطار..
جانت امي بلمطبخ تركب
ولج منهو يمعزايه ..
ماعرفهم رحت يمها
هيج يمه وادم لابسه بناطير ودشداديش بيض .دفعتني واخذت الفوطه من ورة الباب وطلعت ..
صاحتنا واحد واحد احنه 4بنات و3ولد
اني و سهاد وحيدر
صغار والباقي اكبار ..
وكفت بسد امي ونفشت روحي وعدلت كصايبي
واعدل بشعري،..
اجر بيها مجبنه من لعب الدرب ..
كالها الرجال ..
عدهم جناسي ..
كالت لا والله ابو جاسب ديشتغل خارج الديرة بلولايه
وانه وليداتي صغار وماكدر اعوف فروخي واحير بمعامله
هااا ودي وجيب والدائرة غاد عنه يمة ..
كلها حجيه ..
كم جاهل عندج ..
كالت يمه 7وثلاث راحوا فدوة الك
حجيه دخيل ربج 7ماعدهم جناسي
كالت لا يمه فد هلصغار الثلاث
وضل يحجي ..وياها
وكال مدارس لازم يسجلون ..
اني مسحت خشمي بهدومي وعدلت روحي
يييييي يمه اسجل فدوة يمه اسجل اسجل
عمي احلفك بالله اسجل
ماحس الا نسحلت ورجعتني وراها
اندارات عليه وعضت الاصبع ..اليه .
يمه ..عرفت راح..انخبز ..
عفتهم وطبيت جوة ..
كعدت جوة الدرج ..وبقيت ابجي ..
واولول هسه انه شريد بس اروح مدرسه ياربي
واللعب وي الجهال
من جنت اللعب بترعه مال مي ..
اصفن اشوف الجهال تروح ..ولابسه الصداري ..والقميص الابيض ..والشريط الاحمر ..
ماجان يقهرني شي غير الفيونكات الي بشعر والضفيرة ..
جنت ارجع للبيت ركض ..ادور بهدوم امي ..
اخذ ..جواريب مسلوت ..واشكه واسوي وي ظفيرتي ..
واضل اعاين ع روحي ..
واسمع امي تصرخ عليه ..
وافز من احلام مو حلم ..
امي اذا تضرب مارترحم احد ابد ..
عكرفت روحي وبقيت ابجي ..
ماحس الا يصحون زهرة زهرة
نمت ع روحي ومادري .من الخوف
طلعت الهم ..
جوة الدرج خالين غراض ورادميها ابردة ..
شافتني ..
امي جرتني من اذاني ..
جرة لحد ماوصلت للمطبخ ..نزعت نعالها كالت هاي اول واخر مرة اسمعج تحجين ..
يمه اريد اروح للمدرسه ..فدوة
اسكتي ..
لوت اذني حييل
كمت اشوغ واكمز جوة اديها ..
هدت اذني ..
احس روحي صعدت بيها وبقيت لازمتها ..بيها نار ودموعي تجري...
عافتني وراحت تسب بيه وبخواني .. ولا حجيت ..
بقيت احلم بلمدرسه ..
وشكل الرجال جان شكثر نظيف ومهندم جنه من هذولي مال افلام ..
التهيت اللعب وي الجهال ..
بلبيت احنه ..3عوائل ..وجدي وجديتي ..
وعمي الصغير وعمي الثاني مزوج وكاعد هم
..بيتنا جان كلش جبير ..
نلتم بلحوش ونلعب والعصر انام ..
ونرد نكوم نلعب ..كلنا
فد بنت عمي جانت دائما ..
تكولي تعالي نلعب عروس وعريس ..
بس مالعب اضوج لان تنزعني هدومي ورة البيت
وضل مدري شتسوي بيه ..
فاتاذة واضوج واعوفها وماللعب وياها
بس احنا ماعرف شكثرنه ..هواي
الكل تلعب وياهم هي وابن عمنا الجبير
جبار ..يضلون هجي يلعبونا ..
فد انهزم منهم ..
مرت الايام ..
وجنه رمضان وراه عيد اخر يوم
انا من الصبح محضرة هدوماتي مخيطتنهن الي مرت عمي .ناجي ..
بيومها ..جان مطر هواي ..وبيوتنا كشف
فجدي وجديتي ..جمي نامو يمنا ..
وعمي هم ..فرشت الهم امي ..
وكترتنه احنه ..
انه حضنت هدومي ونمت ..
احس بليل اختي جنان تون وتبجي بصفي ..
اندار عليها اشوف جدي نايم يمها ..وخال ايدة ع حلكها
وهجي مجلب بيها ..
ومصعد رجله فوكاها وهي تون ..
خفت احجي لان جدي يضرب بلعصا غطيت راسي ..
وطلعت راسي شويه ..واعاين عليه ..
ماذكر الحجي شنو بس اختي تنحب بسكوت..
الا ان سكتت ودنت الي ..ترجف ..
مجنت افهم شي ...
تقربت منها ..
سالتها شبيج ..
خلت اديها اسكتي ..
جنان اكبر مني ..بهوايه ..يعني بطولي مرتين ..
بس هم مسجلت مدرسه ..
ماعرف ليش ميسجلونه ..
ابويه يشتغل برة الولايه ..
حارس.
كل اسبوع اكثر ينزل النه ..من ينزل امي تكترنه بغرفه بظهر غرفتها ماتقبل نتدنى الهم ابد..
البيت جبير..حييل ..ابوي اخذ الترك الورة البيت وبنه بي النا بيت ..
وبيت جدي ..بوجهنا ..
وياهم عمي فوك ..
جنان جانو بيت جدي يحبوها وادئما يمهم
مرات اشوفها تبجي ماترضى تروح
فد امي ماتقبل الها ..
وتجبرها تروح اداريهم ..
حتى بيت عمي يدزون عليها ..ومرات تنزل تبجي ..
فد انه مالهم دخل بيه ابد ..لان صغيرة
وجنه اكبر مني وتعرف اداري بيهم ..
نمت بخوف ..من صوت اختي وشكل جدي الي ماشفت منه شي ..
ما اعرف شلون غمضت عيوني قوي وسديت اذني ونمت وخليت ابالي العيد والمرجوحة مال عمو غالب الي صايرة كبال ساحة المدرسة ودولاب الهوة الي من انزل بي احس كلبي ينزل وياه..
كعدت ثاني يوم وهمدومي يمي شلتهن وطلعت اركض على امي
بالمطبخ صوتها
يممممة راح البسهن ..
جانت تحضر بلريوك ..
اندارت عليه ..
ولج زهرة ..مو هسة ..
فدوة يمه البسهن ..
حبوبه ..وكمت ابوس بيها ..ماوصخهن ابد
اشرت روحي ..
انه اعرف شوكت اطلب منها من هوسه يمها تكول روحي
هي حايرة بريوك العيد
طلعت من المطبخ اكمز ..
انتبهت على جنان كاعدة
بالكاع وصافنة على نملات يمشن
تكربت منها ..
كعدت بصفها
جنة شبيج بليل تبجين جدو جان يضربج
باوعت عليه بعصبية
انتي شعليج ولي منا لا يسمعج جدو ويكتلنا بالعصا ويحركنا ..
جنه منهو وياج اكول لامي عليه ..
جرتني من شعري ..
اخ وخري ايدج ..
جرت هدومها كالت شوفي ..
فتحت عيوني بكبرهن ..
شنو هاي يمه ..جان بزرها حرك ..يابس بس حافر جلدها كله ..
كالت فد تحجين يسون بيج هيجي ..
منو يسوي ..
كالت كلهم ..
مجاي افتهم جنه ..
دفعتني وكامت تبجي وتحرك باديها بلكاع ..
كومي زهرة ..رووحي
كمت من يمها واحس كلبي راح من الرجف. .
عفتها وطبيت جوة...
بغرفه امي ..
كمت ابجي ..ع خوفها وخوفتتي حييل ..
ابدل وابجي ..
من لبست ثوبي الجديد نسيت كل شي ..
لبسته وكمت افتر بي بلغرفه افتر افتر ..
شكد جنت فرحانة لان ثوبي احلى من ثوب بت عمي
وكفت فتحت الكنتور ..
جريت المشط ..
وفتحت ضفايري وكعدت امشط بيهة ..
واعاين ع عيوني الملونه وسماري ..
وشعري الملولو ..
وامشط حيل بي بلكي الله ..يصير سرح ..
طلعت مديت راسي ..
شفت اختي سهاد ..
رحت يمها ..
هي مبدله قبلي ومحضرة روحها ..
سهادة سوي شعري ..فدوة حبابه سوي سرح ..
كعدت ع الدرج وكعدتني بين رجلها وتمشط بي
وانا اتمرمر بس المهم يصير سرح وافر بي ..
ماهمي غير شي ..
كملت امد ايدي اشوفه ضفيرة وحدة ابطن الثانيه ..
كمت اكمز وابجي ..
سمعت صوت ابوي سكتت..
ورجعت ضميت المشط لان اذا ماتلكاه امي تموتنه ..
