ويجمعنا القدر مع من نحب

البارت 5

لا تثق بلاخرين كثيرا"  وتذكر ان الشيطان كان ملاكا" يوما"مااا
سقطت دمعتي ... حين سمعت خبر وفاة ابي .... وتساقطت بعدها الدموع غزيرة واختنقت تلك النبضات في قلبي ..  حتى شعرت انه سيتوقف عن الخفقان ! ومازالت الى الان تستنشق روحي تلك النبضات
الكاتبه زينب الحوراء
ويجمعنا القدر مع من نحب
ياسمين : راحت احلام وسارة يسوون العشه واخذتني رفل للغرفه
رفل : شوف سوسو هذا السرير الي وهذاك لساره وانتي تنامين بلارض عااادي
ياسمين : ايي عادي
رفل: هذا الكنتور النه وانتي راح ننطيج هذا الجرار لغراضج عااادي
ياسمين : ايي عادي بيني وبين نفسي اني الي كنتوري 4 بيبان مايكفيني هنا ينطوني بس جرار يلا عادي اهم شي مكان اكعد بي
رفل :  يلا لعد ماما تنتظرج بلمطبخ
ياسمين : رحت للمطبخ اساعدكم بنات
ساره : لا حبابه مو من اول يوم احنه نكمل
امتثال : شنو لا خل تنظف الخضره بدال هاي وكفتها
ياسمين : اييي خاله انظفها اصلا اني متعودة على الشغل ابيتنه اطبخ وانظف واغسل لان لوحدي جنت
امتثال : اي راوينه شطارتج
ياسمين : ان شاء الله
كعدنه على العشه كلنه وشعور مااعرف شنو بين المرتاحه وبين الما مرتاحه
جنت احب تصير عندي عائلة جبيرة اخوه وخوات وهذا الشي شفته ابيت عمي وخايفه شلون راح اعيش ويه ناس مااعرفهم ولا اعرف اطباعهم
كاعدين على السفره هوواي علي وزوجته وجهالهم واحمد ورفل وساره وعمي وزوجته استحيت اكل
احمد ظل يتحرش برفل وساره ويشاقون تمنيت عندي هيج اخو يشاقيني
احمد : اي انتي شنو اسمج بت عمي
ياسمين : اسمي ياسمين
احمد : هاا يا سمين حسبالي يا ضعيف
الكل : ههههههه
ياسمين : ضحكت ودنكت
احمد : تعرفيني اني منو ؟
ياسمين : اي كالتلي رفل اسمك احمد
احمد: ها زين رفيله ام لسان ماخلتنه احنه نتعرف
بويه ليش ماكايللنه عدنه بت عم هيج حلوة شوف الجمال
سالم : حميد احترم بت عمك هاي عرضك مثل خواتك
احمد : شكايل هسه اني سمعي ياضعيف اقصد ياسمين
منا ورايح انتي سويلي جاي (شاي)
ياسمين : اوك ماشي (طبعا مااعرف اسولف ويه ولد)
علي : نوريتنه بت عمي اي شي تحتاجي كولي لاحلام خاف تستحين تكليلي اخوج الجبير اني
امتثال : بينها وبين نفسها شنو هااس اللواكه والله لو تعرفون شوراها هاي البنيه جان ماخليتوها بلبيت
يلا كومن غسلن المواعين
ياسمين : فرحت حسيت اكو احد يخاف عليه وعندي اخوان احمد وعلي اولاد عمي الله يحفظهم
ساره : يلا  سوسو امشي ننام اليوم كلش تعبت
احمد : وين ماخذته خليها خل نتعرف
رفل : اي راح تبقى لازكه بيك العمر كله تعرف عليها
ياسمين : من رخصتكم
ورحت ويه ساره للغرفه شو هاي كالت نعسانه ولزمت الفون وكعدت اني شعليه خل ارتب غراضي
رفل : ياسمين انتي دارسه ؟
ياسمين : اي خلصت سادس وقدمت على هندسه بس هسه وين اداوم بعد
رفل : ليش بالله
ياسمين : يحتاج مصاريف هووواي منو يصرف عليه
رفل : اكول لحميد ايده مو اله كلش حباب
ياسمين : لا يمعودة شتكليله بس هو شنو يشتغل
رفل : طالب معهد مرحله اخيره
ياسمين : شلون يصرف عليه وهو طالب
رفل : يشتغل بلعطله حسبالج عمج ينطي هاي بطل سويرى من خلصت ثالث واني بس هلسنه اخلص ثالث واكعد
ياسمين : ليش
رفل : يكول البنات بس يتلعمون يقرون ويكتبون كاافي وماعنده يصرف علينه
ياسمين : واني اريد افاتح عمي اكمل كليه وهو بناته مايخليهن يكملن مدرسه
ساره : ها بعدكم كاعدين يلا نامو
ياسمين : نامي انتي
ساره : تعالي يمي نامي يكفي المكان
ياسمين : لا حبي انام بلارض احسن
مرت الايام واني ابيت عمي مرت عمي تنطيني شغل من جوى الارض وبعد مخلت ساره تمد ايدها على شي بلبيت وشغل البيت طايح براسنه اني واحلام واشكال الحجي تذب عليه
مره احلام زوجه علي كلش تخربطت افلاونزا
كتلها روحي ارتاحي اني اكمل شغل
احلام : رحم الله والديج
ياسمين : ويرحم والديج وانطيني بتج خليها يمي
احلام : الله يرحم روح امج وابوج الطيبين
امتثال زوجه عمي : انتي شتعرفين عنهم وتكولين طيبين
احلام : بنتهم سوسو طيبه وحبابه اكيد على اهله
امتثال : شو الابو طلع حرامي والام -------
ياسمين : انهاريت خاله شنو ابوي حررامي مو هو الحرامي صديقه باااك الفلوس وشرد
امتثال : ابوج جان وياه من باكوا الفلوس بس صديقه قشمره وشرد بيهن
ياسمين : ظليت ابجي خاله انتي ماتعرفين ابوي عدل ابوي خوش رجال صايم مصلي ويعرف الله
امتثال : تعلميني بي عشت وياه 7 سنين انطمي بس انطمي
ياسمين : وامي شبيها شو ميته صارلها 18 سنه
امتثال : ههه والله يا الله كومي كملي شغل
ياسمين : كملت شغل واني الدمعه بعيني اجه احمد
احمد : ها ياضعيف شبيج تبجين
ياسمين : لا خويه مابيه شي
احمد : عليج الله كولي منو وياج سويره لو رفيله
ياسمين : لا اصلا كلش حبابات مو همه
احمد : لعد منو بس لا امي
ياسمين : سكتت
احمد : عذريني مااكدر اوكف بوجهه
ياسمين : مشكور خويه
احمد : لا تكولين خويه ابن عمج اني
ياسمين : مشكور ابن عمي
احمد : هههه
ياسمين : ابتسمت
احمد: اي هيج ضحكي
صار الليل واني مقهورة وافكر بكلام زوجه عمي
صبينه العشه
ياسمين : عمو بعد يومين على اربعين بابا
سالم : اي ادري
ياسمين : نروح موو
سالم : لا ماعندي فلوس محد يدروح
علي : اني اريد اخذ احلام للزيارة واخذ ياسمين وياي
امتثال : شنو احلام وياسمين يرحن منو يبقى بلبيت منو يطبخ منو ينظف
احمد : عندج سويرى وانتي طبخو ولا تنظفون من يرجعن هنه ينظفن
علي : اي هيه 3 ايااام ونرجع
سالم : اخذ مرتك وروح معليك ابت عمك
علي : لا يبه خطيه لان اربعين ابوها
سالم : يلا عوود اخذها وماانطيك مصرف الها ماعندي
علي : اني متكفل بيها
احمد : اني انطيك فلوس كروتها
ساره : اييي خل تروح اني اشتغل شغلها
ياسمين : فرحت حيييل هذول اولاد عمي يحبوني ويوكفون وياي واحلام خوش بنيه حبابه هيه كالت لعلي على موضوع الزيارة علمودي
رحت لاحلام كتلها خل تسال علي يندل قبر امي
علي : بويه قبر عمي اندله يم قبر بيبتي بس قبر ام ياسمين وين
سالم : مانندله ولا تجيب سيرتها
امتثال : هذا الناقص بعد عدها قبر ويزوروها
ياسمين : شبيها هاي زوجه عمي منو يمها شعدها ويه امي نسوان حمه شكد يغارن حتى وهيه متوفيه تغار منها
بس لا الشغله مو شغلة غيرة اكو شي يمكن لان حتى عمي كال لا تجيبون سيرتها
المهم : رحنه للزيارة وزرت قبر ابووووي اااااااه ياااقبر ابوي حجيتله كل الضيم الي شفته ابيت عمي
اهانات زوجه عمي وعمي اللي مايخليني اطلع وادخل بس بناته وزوجته يرحون للسوك وبجيت وبجيت وفوكاها كدام الناس يكول بت اخوي عندي وهو مشبعني ظيم وقهر وزوجته بس ترزل بيه بس كتله على اولاد عمي حبابين وخوش ولد وبناته حبابات
اللحظه التي ادركت فيها غيابك يااابي هيه اللحظه ذاتها التي فصلتني عن الحياااة

رجعنه من الزياره وزوجه عمي طلعتها من عيني
يا ترزل يا تصيح وخلتني اعزل البيت كله وساره كاعده وساكته كللش انقهرت ليش هيج تفرق بيناتنه وبقيت سنة ابيت عمي شفت الويل من عمي وزوجته بس ساره مرات اشوفها زينه ومرات ترتاح بلكعده ولازمه الفون اربعه وعشرين سااعه  واحمد كللش حباب تخرج من المعهد وفرحتله من كل قلبي ودور شغل وظل يشتغل ورفل خلصت ثالث وكعدت بيليت واصلا لا تعرف تشتغل ولا شي واحمد جابلها تلفون وصفت ويه اختها تلفونات وكاعدات
بيوم من الايام احلام راحت لبيت اهلها تبقى عدهم شكم وعلي بلزيارة  واحمد لكالها شغل خفر بليل
يعني محد بلبيت بس عمي وزوجته واني والبنات
وصااار اللي محد يتوقعه يصير......
انتظروا البارت الجاي وشوفو شنو راح يصير
هذا البارت مابي احداث هواي بس بينت عيشه ياسمين ابيت عمها
اذا اكو تفاعل انزل البارت 6
اضغط نجمه واكتب تلعيق شنو توقعاتكم صااار