MACHANN TÈT GRIDAP

VANN SOLÈY JOUNEN

Depi tèt pa koupe li espere met chapo...!

Sou yon plim ak yon kaye, mouche Nènè ap rakonte koman yè l' te ye ak kòman demen l' ka ye. Mòso rèv li makònen nan poto mitan lespwa ki plante nan ravin san baboukèt.

Pouki reyon sole douvanjou pa janmen kale je l' nan fetay moun sa yo ?  Soti depi sou rèy Frankèl gran papa  Nènè, blikenton ak Sonson pou rive sou rèy Awouwa manman Nènè ak Sonson, men matant Blikenton.

Yo di souvan, grenn je sole leve pou li klere tout fetay san pati pri. Leve douvanjou, pou mete men nan bouch, sa se pa ti pri! Nènè deside goumen pou fote pyè jis kaske yo fè dife pou chofe l'. Sou swe kap koule nan fontenn li, l' ap chache etenn yon siga ki limen nan 2 prent.

M' tande bri l' k' ap fè laloz nan koridò mouche lespwa
Lannwit li reve, douvanjou pou l' leve al reyalize rèv li
kòmè mizè kache pou l' ap defòme machwè l' , nan ri kanson chire k' ap desann pou jete polke dèyè wòch galèt lavi.
Li son bel nèg, men zodè salte yo lage douvan pòt li enpeche menm mouch moute desann

NÈNÈ: pouki tout zwazo nan syèl ap refize branch mwen pou repoze?
Poudi m' son sounami !
Pouki mouche siksè depi l' wè m' l' ap bouche nen l'?
Poudi m' son po ze ?

Se konsa Frankèl gran papal tap tandel kap pale san li pat konnen, li mete men dwat li sou zèpol goch li epi li di l':

Pitanm, la vi se tankou malfini, lè l' vole sil pa jwenn poul se pay li pran.
Nou menm malere, nou se pay malfini pran le poul kache pou li !
Pran kouraj si nen'w ou oblije bouche pou bwè dlo santi...
M' te konn toujou tande gran paran m' yo ap di: "depi tèt pa koupe li espere mete chapo" kite vag lavi mennenw, gen yon jou se li kap rejete ou. Lè sa wa sispann bwè dlo nan nen.

*Parol la fèl reflechi, san l' pa relache yon mo e ak figi l' ki make move tan telman moun pa konn sak dol ak fas li. Nènè leve mache sou menm chimen ak moun fou, sak diferansye l' se simagri li pap ramase. Men se sou li espwa paran chita pou bon ti lespri li genyen. Se domaj, le ou malere, pafwa, bon ti lespri se kondanasyon.

Se pou m' chache mwayen pou m' se madan sara, pètèt lavi a machande m' tankou lo patat.
Konsa mwen a va sispann woule tankou zege anba sole midi
Yon jou mwen a manyè sispann vann sole Jounen m' ...

Se sa li t' ap pale nan wout pandan l' ap retounen lakay li. Manzè lapli menm vini satiyèt lespri l' ak tout kòl e nan panse l' se Granmèt la kap lave labou kawotyou lavi te voye sou li.  E li di:

Demen douvanjou mwen espere leve pou m' ale pawaze e ramase siksè kòmè m' sa (lapli a) pote pou mwen ...

Epi li rantre, fanmi an chita ap tire kont jis kaske domi pran yo.