لم تكن خطيئتنا

27

#لم_تكن_خطيئتنا
بارت 27
نورا ناصر

صفا .. بلعت ريگي .. وبخوف گتله اي شنو شروطك

فراس .. ماكو دوام بعد الزواج ولا برامج تواصل اجتماعي بالتليفون ..

: لاعفية فراس لاتلزمني من ايدي الي توجعني
هذا مستقبلي وهاي السنه خلصت باقيلي بس سنتين.

: اذا افسخ الخطوبه وسألوني اهلج ليش شنو تردين اجاوبهم لو انت تردين تفسخين من يمج.

.. فكرت اذا افسخ خاف انجبر على اسلام كل شي يصير مااعرف احس نفسي بدوامة ومن جهة متمسكة بفراس وماادري شجاني.
يمكن كله مقدر ومكتوب مااعرف ليش اكو اصرار بداخلي اريد فراس وبقوة
يمكن بعد الزواج اكدر اقنعه يخليني اكمل احسه متمسك بيه
گتله موافقه بس لاتظلمني فراس عفية الي صار كله ماضي.

: اوك امتحني حتى نتزوج بعد الامتحانات مباشرة
واطمئني راح اعتبر الي شفته كله ماضي ومايهمني.

ختمتها ويا بس خايفة من المستقبل ومن المضموم الي .. 

-----
سمية ... 
خلص عرس ابوي ورجعنا للبيت جنت مزعوجه بيومها مامتقبلة الفكرة ابد ..
خابرني امان
جاوبته گال عجبتيني اليوم مارديتي على امي ولا طولتي لسانج معناها الكلام بالكافتريا جاب نتيجة.

ظليت صافنة وبس اكله اي
بس انه لو راده عليها بذيج اللحظة
جان خليت الكل يلتمون علينه
بس جنت مثل المبنجة .. ولساني بالعته وساكته.

گال شعندج واكفة تلغين وي رضوان ..

: يمته لغيت ويا هو سلم عليه ورديت عليه سويتها لغوه بعد شنو

: لعد شبي يضحكلج .. ؟

: جاي يضحك باستهزاء لان ماسئلت عنه من صار الحادث الهسه.

:ومال شنو تسألين عنه ..

: يمكن قصده لان انا افتعلت الحادث .. 

امان "بعصبية" : وماسألتي عليه وانت افتعلتي الحادث وشيريد هسه؟

: شمدريني شنو يريد  هو انت انطيته مجال يحجي انخبص بالهورن مالتك.

: وترديني انطي مجال مووو؟

: اووو شبيك معصب عليه اليوم ..  ذاك اخوك وروح سأله ..

:شهالاستفزاز هذا سمية  يعني تسوين نفسج ماتعرفين هاا
اخر مره تعيدين هاي الكلمة افتهمتي.

: انه اذا ابقى وياك ع الخط هسه اخرب كل شي الاحسن اروح احط راسي وانام بلا مانتعارك بنص الليل ومن صدك مااريد اتعارك انه واليوم بالذات ووياك بالخصوص.

: لا ليش نتعارك على فكرة طالعه حلوه اليوم ..

: صدوووك على گولتك .. خجلتني.
بقى يتغزل بيه لساعة متأخرة من الليل ..
‏ويا احس انا غير .. الدنيا كلها غير
مااعرف شون يكدر يغير مزاجي بجملة وحدة
شلون ويا انسى نفسي ..
خاصة بالايام الاخيرة زاد تعلقي بي حبيته من اعماااق قلبي ..
حتى  ايقنت بانه
لا ملجأ منه الا اله ..