في بجنونك حدا؟

شيطانه

ينال وهو عم يضحك بصوت عالي : اخ بطني ..مو طبيعية ..
آية : كانو يسموني القطة السودة ..عشان شعري أسود وعيوني سود وهيك يعني شيطانة ..
ينال : معهم حق ولله ..
آية :قديش حابة ارجع ع هديك الأيام وجننن المدرسة كلها ..ودفش البنات وعمل العجايب ..اه سماع سماع هلأ المشارب كانت بآخرها في محبس بسكر وبشغل المي ..فكنا نوقف انا وصاحبتي هنيك ونقعد نحكي ونضحك وانا امد أيدي لأنو ايدي طويلة وأطفي المحبس ولي بشربو يحكو ييي ليش طفت بعدين بس يقربو عليها اشغلو ويرش عليهم أخ يربييي لو تشوف اشكالهم ككييف ببكونو زي القطة بس تتحمم ..واحنا منروح ييييييييي يحرااام ومنشف فيهم ..
ينال : بتقتلو القتيل وبتمشو بجنازتو ..
آية : هيك شي ..
آية : وكك شوف قديش الساعة صارت الحكي سرقنا وما نتبهنا للوقت .. "وهي عم بتأشر ع الساعة الي ع الحيط قبالها"
ينال : صارت وحدة ونص !! بسرعة مرق الوقت ..يلا روحي نامي ..
آية : تصبح ع خييير ..
ينال : وأنتِ من أهلو ..
آية نامت بسرعة من النعس انا ينال ضل عم يفكر بلورين وشو عم تكون بتعمل هلأ ..
ولما طلع الضو ..
ينال : آية آية يلا قومي هي رابع مرة بصحيكي فيها ..
آية : بس شوي خلينا نام بس شوي ..
ينال شال الحرام عنها بسرعة وقال : ولله برش عليكي مي ..لك بدنا ننزل ع الفطور مع العيلة كلها شو بدهم يحكو عنا اه؟
آية : يحكو شو ما يحكو بدي نام ..
ينال عرف انو ما رح تفيق غير بالمي ..جاب كاسة مي ورشها عليها ..
آية : لكككك شووو عمممللت ..
ينال : ما كنت تفيقي غير هيك .."
آية : اف منككك بس..
ينال وهو عم يضحك : يلا هيني بستنى هون دخلي لبسي وتعالي بسرعة
قامت آية وهي عم تفرك عيونها وتتأفف ..غيرت أواعيها وطلعت ..
ينال كان يضحك بسر ..
آية : ليش عم تضحك في شي بشكلي؟؟
ينال : ما علموكي انو العروس بس تنزل لازم تكون حاطة مكياج وأكسسوارات وهيك اشيياء؟
آية : ما بحب هاي الأشياء خلص هيك منيح ..
ينال : لك آييية لازم تحطي بتعرفي أمي هلأ بتصير تحكي ..خلص حطي بعينك الله ..
آية حطت مكياج خفيف وإكسسوارات وطلعت بتجننننن ..
آية : هيك منيح ينال بيك؟
ينال : اي اي طالعة بتجنني ..سمعي بتبوسي أيد امي وأبي بعدين بتقعدي قبالي ع الكرسي اي؟ يلا هاتي ايدك ..
نزلو ايد بأيد وبلشو أكل ..وكان ينال عم يتقن اللعبة مزبوط ..عم يطعميها بأيدو ويناديها حبيبتي وعمري ومن هالحكي ..وهي تحاول تندمج معو قدر الأمكان ..
وبس خلصو أكل ينال حمل شنتتو الشغل وآية لحقتو لتوصلو للباب الخارجي ..
ينال :ايي رح نستمر هيك كل يوم ..وانت مثلتي مزبوط ..برافوو..
آية : وانت ما شاء الله عليك ..ليش ما طلعت ممثل ؟
ينال ضحك وحكا : يلا باااي المسا بشوفك ..
آية : الله معك ..
قضت آية اليوم عم تشتغل معهم وبعدين راحت ع غرفتها تقرأ ..كانت بتعشق اشي اسمو روايات وقراءة ..ومتى ما كان الوقت يسمحلها كانت تقرأ ..
ولما حل المسا ينال دخل ع الغرفة وكانت آية عم تقرأ..
آية : اهلاا ..
ينال : شو عم تقرأي..
آية : رواية ..
ينال : ونا بحب القراءة خلص بس تخلصيها بتعطيني اقرأها ..
آية : تمام ..بس شو الي ورا ضهرك ؟
ينال مد أيدي وكان في شي كبير مشيت آية لعندو أكتر وحكت : شو هاد
ينال : فتحي بتعرفي ..
آية : لألي؟
ينال : اي ..
آية فتحتو ..وهون كانت الصدمة ..كان لوح للرسم متل الي كان عندها زمان ...قديش شتاقت لهيك اشياء ..وكان في الوان كتيرة وريش واقلام ..
آية : ما عم صدق ..ينااال ..
ينال : من يوم وطالع رح ترجعي ترسمي ..وهيك بتقضي وقت بدل الملل وهيك ..
آية : جد مو عارفة شو بدي قلك ..شكرا كتير ..
ينال : يلا حطيها بزاوية هي وبلشي رسم ..
حطتها بزاوية متل ما قلها ومسكت الريشة ..اول ما مسكتها رجعت فيها الزكرى لآخر مرة مسكت الريشة فيها ..هداك اليوم الملعون وهديك الرسمة الي ما كتملت ..وقعت الريشة من أيدها وبلشت ترجف ..قرب عليها ينال بخوف وحكا : آية انت منيحة ..؟؟
آية : خايفة ..ما بقدر ..
ينال : لا بتقدري ..هاي موهبتك ولازم تنميها ..يلا مسكيها كمان مرة ..
آية : ما رح أقدر امسكها كمان مرة ..هديك الليلة كانت آخر مرة مسكتها فيها ..بخاف ..
ينال نزل وجاب الريشة ومسك أيدها وحطها ع الكراسة أيدها وأيدو والريشة وحكا وهو عم يضحك : شو نرسم ؟
آية ضحكت وحكت : ما بعرف .
ينال : انا بعرف ارسم شخص كتير حلو هو الوحيد الي بعرف ارسمو ..
آية : جددد؟؟؟ ما كنت بعرف انك شاطر برسم .. يلا ارسم لشوف ..
ينال ضحك ورسم شخص اجريي خطين وأيدي خطين وراسو دائرة ..وحكا : هاي موهبتي شو رأيك فيها ؟؟
آية : لا مبدع الصراحة ..
ينال : فرجيني ابداعك ..
آية : روح أقعد ع الكرسي هداك رح ارسمك ..
ينال : انا ؟
آية : في حد غيرك بالغرفة ؟
ينال طلع يمين وشمال بعدين حكا : لا ..
آية : يلا عم قلك ..
ينال راح وقعد ع الكرسي ..
آية : لكك ينااال الي ساعة عم قلك اثبت بمكانك ما تتحرك ..
ينال : لك تجمدت صرت متل التمثال المحنط ..خلصي عاد ..
آية : ليكها خلصت ولله ..ضايل شوي من الدقن ..
ينال : طلعيني حلو ها ..
آية : طيب طيب سكوت ..
بعد شوي آية حكت : اوووه وأخيراا خلصت ..
ينال : آجي اشوووف؟؟
آية : يلا تعال ..
ينال شافها ونصدم ..كان متوقع تكون موهوبة بس مو هيك ..الرسمة كانت وكأنها ثلاثية الأبعاد ..مرسومة بدقة كبيرة ..حتى تجاعيد الخفيفة الي قريبة من العين مرسومة بشكل حلو ..
ينال : لا جد ..مو طبيعية ...لك شو هاد ..
آية : مااا عجبتكك؟؟؟؟
ينال : ابدا ..لك ما عجبتني ..انصدمتتت كيف فيكي ترسمي بهيك دقة ..لك هو صح انا بجننن بس الرسمة جد كتير حلوة ..
آية : تباً لتواضعك ..
مرق اسبوع ع زواجهم والتنين تأقلمو بسرعة ع الحياة بهاد الشكل ..وخصوصا انو أفكارهم متشابهة وعندهم كتير نقاط مشتركة ..
آية قاعدة بالغرفة ع الكنباي عم تستنى ينال ليرجع ..وبس دخل ينال ع الغرفة لاحظ انو آية خبت شي ورا ضهرها ومسحت دموعها بسرعة ..
آية : أجيت ..أهلا وسسهلا ..
ينال : شبك ..ليش كنت عم تبكي ؟
آية : لا ما كنت عم ببكي ولشي ..
ينال مشي وطال الصورة من ورا المخدة وقرب ع آية ..
ينال : مين هي ..كتير بتشبهك ..
آية قعدت وحكت : هي أختي نيسان ..
ينال قعد جمبها وحكا : شتقتيلها ؟ ازا بدك فضفضي عم بسمعك ..
آية رجعت لورا ورفعت نظرها لفوق وحكت والدموع مجمعة بعيونها ..: كانت متل الملاك ..كان عمرها اقل من أربع سنين بس تركتها ..اليوم عيد ميلادها طبقت التمن السنين ..كنت أقرب حد عليها ..كانت ما ترضى تشرب رضاعة الحليب الا من أيدي ..وما ترضى تنام الا جنبي ..كانت مدللتي ..كل العيلة كانو يتشكو من تدليلي لألها ..بس كانت قلبي وروحي مبقدر فرط فيها ..تخيل انو انا أول حد شافها بس وقفت ع أجريها ..وأول حد حكتلو كلمة ماما كان انا ..كنت أكتر حد يقعد معها ويلعب معها عشان ماما كانت موظفة ومشغولة كتير ..رغم الفرق الكبير بالعمر بيني وبينها الا انو كنت احسها قطعة من قلبي ..كانت تناديني ماما آية ..
وتنام ع تختي دايماً ..وبس ارجع من المدرسة الاقيها واقفة ع الباب بتستناني ..ما كانت ترضى حد يمشط شعرها غيري ..كنت كل ما انزل ع السوق اشتري اواعي والعاب لألها وانسى انو نزلت عشان اشتري اشي ضروري الي ..حوش مصروفي عشان اشتريلها لعبة بكيت عشان ماما تشتريلها ياها بس ما شترتها ..
كنت لما ازعل من بابا وماما وابكي تيجي وتبكي معي ..وبس اضحك تضحك معي بدون ما تعرف السبب ..ومتل خيالي مرافقتني بكل مكان ..وازا روحت متأخرة شي يوم ما ترضى تحكي معي ..عيونها السود وشعرها الأسود وبشرتها البيضة ..كانت نسخة تانية عني ..آية الصغيرة ..يترا لساتها بتستناني ع باب البيت ؟ يترا لسا بتيجي ع غرفتي تحكيلي آية رسميلي غيمة وشمس بزاوية الكراسة ؟ يترا لسا بتنام ع تختي وهي حاضنة لعبتي ؟ نيسان وينك ..ماما آية شتاقتلك .. بجوز لو شي يوم رجعت ما تتزكرني ..بتخيلها لما تشوفني تحكي مين انت ..بوقتها الموت احسن من هاي الكلمة .. نيسان يا روح أختك سامحيني ..سامحيني ع كل لحظة نطرتيني فيها وخذلتك وما اجيت ..انا آسفة
كانو الدموع السلاح الوحيد الي عند آية ..دموعها نزلو وكانو عم يحرقو عيونها السود ..وينال الدموع مجمعة بعيونو ..ما قدر يتحمل يشوفها مكسورة هيك قرب عليها وحضنها ..وهي بكت بحرقة ع صدرو عم تنادي عليها ..وقلبها عم تقطع ع فراقها ..كملت وحكت : ينال ..تخيل اني ما شفت صغيرتي وهي راجعة من المدرسة وحاملة شنتتها ..تخيل انو ما اجتلي تحكيلي حليلي الواجب ..او فهميني هالشي ..كانت متحمسة كتير لتدخل المدرسة ..كانت تحكيلي آية متى رح أكبر والبس متلك وأحمل شنتة كبيرة ..وأضحك وأقلها رح تندمي ع هالحكي ي نيسان ..تخيل انو هلأ هي صارت كبيرة ..يترا تغيرت ؟ يترا شعرها هلأ طويل ولا قصير؟ لساتها بتبكي بس تحضر كرتون والبطلة تبكي ؟ يترا لسا بتتناقر مع عمر وبتقلو آية احسن منك أكيد مرضت بعدد ما تركتها ..يا ريت متتت ولا طلعت من البيت بهديك اللحظة ..يريت نشليت وأجريي تكسرو ولا خطيت خطوة برا البيت .. يا ريييت ..
ينال : احكي ..ابكي بترتاحي ..
آية : شو بدي احكي لأحكي ..بدي ياها تسامحني ع كل دمعة نزلت من عيونها بسببي ..بس هيك ..
يا ريت بقدر يرجع فيي الزمن وشوفها للحظة وحدة ملي عيوني بشوفتها وبعدها شو ما يصير ما بهمني ..
ينال سندها ع كتفو وخلاها تنام وغطاها مزبوط وحط كرسي قريب منها وضل يراقبها لحتى تنام ..غفيت هيي وهو غفي ع الكرسي بدون ما يوعى ع حالو ..
وبنص الليل صحي ع صوت صراخها ..
قام من مكانو بسرعة وحكا : آييية انت منييحةة؟؟؟
آية كان وجهها كلو عرق وعم تبكي وتشهق بصوت عالي وترجف وتتنفس بسرعة .. نيسان ..نيسان ..
ينال : شبها ؟؟
آية : كانت بالحلم .. لو تشوفها ..كانت قاعدة ع تختي ..وانا دخلت ع غرفتي وهيي قامت بسرعة وحضنتني بعدين بعدت وحكتلي بكرهك كتير ..ما رح سامحك ليش تركتيني لحالي؟ عمر ما بعرف يرسم شمسس وغيوم متل ما بترسمي انت ..وماما لما بتمشطلي شعري بتوجعني كتير مو متلك انت ..كلشي صار بشع من لما رحتي ..يا ريتك ضليتي هناك ما رجعتي لاني تعودت ع غيابك بكرهك ..
كملت آية وحكت : هدول الكلمات متل السم نزلو ع قلبي ..صغيرتي هلأ بتكرهني ..ما بدها تشوفني ..تعودت ع غيابي ..
ينال شربها كاسة مي وحكا : آية اهدي ..ولما حس انو ما رح تهدى ورح ضل بهالحالة الفظيعة ..قريب عليها الموبايل وحط ع صوت القرآن لحتى هديت ونامت وهي عم تهلوس بأسم نيسان
صحيت الصبح لقيت ينال نايم ع الكرسي .
آية: ينال قوم ..يناال
ينال قام متل المصروع وحكا : فيكي شي؟ انت منيحة ؟؟اجبلك مي ؟
آية ضحكت وحكت : لا لا ..ما تخاف انا منيحة ..
ينال : لك خوفتيني عليكي مبارح ..ما كنت منيحة ابدآ..
آية : هلأ انا منيحة .انت اكيد جسمك تكسر من النومة ..
ينال حس بالوجع بجسمو ..وحكا : يعني ..مو مهم يلا قومي عشان ننزل ..
مرق كم يوم وينال دخل ع الغرفة وهو منهار وآية كانت عم تقرأ وهي قاعدة ع التخت قامت بسرعة حست انو في شي
قربت علي وحكت : ينال انت منيح ..؟؟"
ينال قعد ع التخت وحط أيدي ع وجهو : آية ..
آية : لك ما تخوفني احكي في شي ..
ينال مد أيدو وظهرت ورقة مطعجة ..وكأنها قديمة ومرقت عليها سنين ..
آية مسكت الورقة وبلشت تقرأها كان فيها هاد الحكي
" مرحبا يا ابني ويا قلبي ويا قطعة من روحي ..ازا انت عم تقرأ هاي الرسالة معناتو انا هلأ تحت التراب البارد ..صار الوقت لتعرف الحقيقة .. متل هاليوم انا متت لهيك اليوم انت ستلمت هي الرسالة .. اليوم صار لازم تعرف الحقيقة .. حقيقة انو انا وابوك ما متنا بدون فعل فاعل ..الشخص الي حاليا عم بتقلو أبي ..هو الي قتل ابوك الحقيقي ..لأنو رفض يوافق ع مشروع كان بدو يا كتير ..بتعرف انو هاد المشروع لو ابوك وافق علي كان مات كتير ناس ابرياء ..كان بدو يستهدف السوق الشعبي بالمدينة الي جمبنا ..وبس ابوك ما وافق ع هالشي قتلو اسامة بيك قتلو قدام عيوني وحكالي انت رح ضلي عايشة عشان ابنك ..وانا ضليت ساكتة بعدين قررت خلي كل الناس تعرف في وبس عرف بهالشي حاول يقتلني اكتر من مرة وفشل ..وبس حسيت انو رح يقدر يتخلص مني كتبت هالمكتوب ..ازا مفكر انو أخدك لتكون ابنو لأنو شفق عليك ولأنو كان يحب ابوك كتير بتكون غلطان ..اخدك ليريح ضميرو ..ولأنو بنفس الوقت ما عندو ولاد ..أبني انت كبرت وصار لازم تعرف الحقيقة ..بتمنى ما تكون متلهم بتقتل الناس والحقد معبي قلبك ..بتمنى تكون متلي ومتل ابوك الطيبة والحب أهم شي بحياتنا ..صار لازم تفتح عيونك وتشوف الحقيقة ..نيسرين خانم الي بتسميها امك هي الي حطت السم بالكاسة تبعتي لحتى موت ..
فتح عينيك وشوف الاعداء من الناس الي بتحبك ..
آية خلصت قراءة وطلعت ع ينال وهي مصدومة ما عم تصدق المكتوب
ينال : تخيلي ..الناس الي حبيتهم وعتبرتهم أهلي الحقيقيين همي الي قتلو امي وابي ..قتلوهم بدون ما يرفلهم جفن ..كيف قدرو كل هالسنين يطلعو بعيوني وهمي الي خلوني عيش اكبر وجع بكل هالدنيا وهو اليتم ..كيف قلبهم طاوعهم ..كييففف..
آية : الناس الي ما عندها قلب مليانين بهالبلد ..
ينال : يا الله شو كرهتهم بهالحظة ..نفسي اهرب واترك كلشي وراي ..
آية : متل ما حكت امك ..صار لازم تعرف الحقيقة وليكك عرفتها شو رح تعمل؟
ينال : ما بعرف ..ما بعرف شي ..