ترويض النمر ( الجزء الاول )

الحلقة السابعة

(الصدام الاول )

دخلت ليالى الى مكتب فارس فى الصباح بعد اتصاله بها لاستدعائها : ( صباح الخير يا بشمهندس ........ )

فارس : ( اهلا صباح الخير يا باشمهندسة اتفضلى اقعدى ............. )

فارس و هو يستدعى صديقتنا الحبيبة سالى : ( سالى بعد اذنك اطلوبيلنا القهوة ... )

فارس ينظر الى ليالى و يحدثها مبتسما : ( طبعا شكلك مشربتيش قهوتك و انا كمان ........ اصل ملقتش حد زيي مدمن قهوة غيرك .....)

ليالى و هى تبتسم ( اه و ماله ............ بس مقلتليش يا باشمهندس حضرتك كنت عايزنى فى ايه ....... معتقدش مش عشان اشرب معاك قهوة الصبح ....... )

فارس و قد نظر اليها و فتح درج مكتبه ويضع اماها ظرف و يحدثها ( لا يا ستى مش عشان القهوة ... عشان اشكرك و اديكى مرتبك .....و اقولك شكرا على مجهودك معانا و اللى ظاهر فعلا فى الموقع ........ )

تبتسم ليالى و قد اختلفت ابتسامتها هذه المرة فهى دائما تتوتر من اى شئ مجهول و هى كانت تجهل سبب استدعاء فارس لها فى الصباح فكانت تشك من وجود مشكلة ما .

تستريح فى جلستها و تضع رجل على رجل و تقول لفارس ( و الله يا باشمهندس انا اللى عايزة اقول لحضرتك انى فعلا مستمتعة بالشغل معاك و ربنا يسهل و يكون تعاونا مع بعض مثمر )

انقضت عشر دقائق فى النقاش بين فارس و ليالى و هم يشربون القهوة حتى دخل عليهم خالد و هو متجهم بعض الشئ ( صباح الخير ........ )

فارس و هو يعلم من ملامح صديقة ان هناك شئ و شئ كبير فخالد من يعرفه جيدا يعرف انه دائما بشوش الوجه و لا يحب النكد ابدا

فارس ( صباح الفل يا خلود ...... مالك يا باشا ....... )

خالد و هو يحاول الابتسام فى وجه ليالى : ( لا ابدا ..... ايه الاخبار ....... )

ليالى تتحدث الى خالد و قد ادركت انها من المفترض عليها الانصراف لتترك الصديقين يتحدثان ( الحمد لله يا باشمهندس ...... انا اسفة لازم استاذن دلوقت عشان عندى مون نازلة الموقع دلوقت لازم استلمها ........ )

فارس يخاطب ليالى : ( بصى انا جايلك كمان ساعة كدة عشان اراجع معاكى حركة المخزن فيه شوية حاجات عايز اظبطها معاكى .....

ثم همت ليالى فى الانصراف : ( اوك حستناك ...... بس اتصل بيا قبل ما تدخل الموقع عشان اكون فى استقبالك فى المكتب ...... .

فارس و هو يتابعها و هى تخرج و يحدث خالد بحماس شديد ( البنت دى فعلا مكسب ........ بس راسها انشف من حجر الصوان .......... انت عارف انها صممت تجيب ريس العمال بتاعها لا و كمان مجموعة العمل بتاعتها فى فى كل حاجة ........ يعنى من الاخر عملت لنفسها مستعمرة ...... دا انا اول مرة ادخل الموقع بعد التغير الشامل دا الغفير بيقولى حضرتك عايز مين ......... بزمتك شفت كدة ........ بس ايه يقدر حد يكسرلها كلمة و لا يتملكع فى شغل هيا قالتوا عليه ......... دا يبقا نهار الست الوالدة اسود من قرن الخروب .... بصراحة بنت بمليون راجل )