يسعد اوقاتكم غوالي...
بناءا على طلب متابعين صفحتي الاعزاء بالواتباد و الي حابين يعرفوني عن قرب ...
بهالبوست انطيكم نبذة مختصرة عني ...
اسمي في مجال الكتابة ..همسات الليل..
وكنيتي (ام آيه) منسوبة لبنوتي الاموره (آيه)...
ما اكدر اكول عن نفسي كاتبة و انما هاوية ...
الكتابة شغفي و الآقي نفسي بين كلمات سطور قصصي.....
اكو طاقة بداخلي و احب اترجمها بالخط على السطور ...
اعشق كتابة الخواطر منذ ايام الصبا...
متزوجة وام لاربع بنات ... عمري على مشارف 37 ...
خريجة علوم ماليه ومصرفية كلية بغداد...
وربة منزل حاليا ...
مارست عملي بمنظمة اغاثة لفترة من مراحل حياتي بس حسيت بيتي وبناتي هم اصحاب الحق الاكبر من وقتي...
واحلم حاليا بعد ماكبروا اميراتي بفرصة تعيين على الملاك الدائم...
ربة منزل شطورة وطباخة ماهرة ..وام حنونه...
احب الناس واتعامل دائما على الثقة وافرض حسن النية بااغلب المواقف والامور ...
بس عيبي من انغدر وانجرح من شخص غالي مو بسهولة اسامحة تبقى غصة بالقلب من تصرفة...
و هذه كانت نبذة عن حياتي...
اما بخصوص كتاباتي وقصصي ...
اعشق كل كلمه اكتبها واعيش ويه كل حدث ...
مجرد ما استلم القصة من اصحابها واحس القصة تلامس قلبي ابدي اتعايش ويه شخوصها...
كلش اتأثر بالحالة النفسية للابطال ...
لان اتقمص الشخصية واعيش حالاتهم بحزنهم وفرحهم....
يمكن قصصي ملاقت صدى واسع بالانتشار وبالذات قصتي الاخيرة (حماتي المستبدة) بس اني راضية
عن كل الي قدمتة والحمد لله...
جزء من شخصيتي هو التواضع واحب اقرة لاغلب زميلاتي الكاتبات وهذا اثار جدل وفضول بعض المتابعات ودخلولي خاص ...
و كالولي انتي من قلة الكاتبات الي تشجع باقي الكاتبات وتدعم الجدد بقصصهم...
اعتبر تشجيعي للمواهب الجديده ومساندتي بالدعم للمبدعات هو نابع من ثقتي بنفسي وبلي قدمته ..
وافرح من اشوف زميلاتي يتفوقون لان نجاحهم وشهرتهم هو نجاح للمرأه العراقيه في المجتمعات العربيه الاخرى....
في الختام ...
تقبلوا مني كل الشكر والاحترام متابعين صفحتي الراقيين وشكرا على دعمكم الي بكلماتكم الرقيقه الي تنطيني حافز اقدم كل ماهو مفيد....
تحياتي⚘
همسات الليل(ام آيه)
