اضغاث احلام

#اضغاث_احلام
بقلمي : فردوس عبد اللطيف
البارت الاول
صامت أنا أخفى الهم بداخلى
حائرٌ ما بين البقاء والرحيل .
تراءت لى الحياة خواءاً وخلاء وصمت وسكون
أحسست نفسى طائر غريب بين أهلى .
أصبحت مستضعفا فى عالم ليس بعالمى
هربت من الكل حتى هربت من نفسي .
وسأظل صامتاً سجين لكل ذكرى لكِ معى
وسأظل على أمل وأقول للذكرى إرجعى .
ياليت الهوى يجمع أهل القلوب اللى تعى .
آسف نسيت إن من الفراق الصدر ضاق
وإمتلأت الكاس من مدامعى .
مرحبا اني حيدر مواليد ١٩٨٩ اسكن البصره
اعيش مع عائلتي والدي كاظم  ووالدتي زهره واختي هيفاء
اخوي حسن 
حالتنا المادي جيده جدا نملك معمل وافران معجنات
الحمد لله الناس تشهدلنا بالمنطقة والي يعرفونا بالاخلاق والتربيه الصالحه حتى الجوارين من فتحت عيني واطلع العب بالمنطقة يمدحون باهلي ويوصون اولادهم يلعبون ويانه اني واخوي
حبيت الرياضه بالبدايه هوايتي كانت كرة القدم بعدين اشتركت بنادي رياضي وشجعني المدرب عاللعب ساحه وميدان وحصلت المركز الاول عالبصره مرتين في سنه (٢٠٠٦ ) تشجعت وجسمي صار رياضي وحبيت الرياضة
ابو حيدر : ابني بعد انت لازم تترك النادي والمدرسه لاني محتاجك بالمعمل ميصير العمال وحدهم لازم واحد من عدنا واكف على راسهم واني تعبت اريدك تساعدني انت ابني الجبير وهسه كبرت  وجاي اتعب مابين متابعه المعرض والبيع ومابين المعمل ونوعيه الانتاج ولازم انت تساعدني
الاستيراد انفتح والشركات ماعليها رقابه ولا اكو حمايه للمنتوج الوطني ... بقى جهودنا لان الكعك والبتي فور والمعجنات والكيك العراقي محد يلحكه
احنا لازم نحسن انتاجنا لان منكدر نغير شغلنا هذه شغلتنا ورثناها من اجدادنا بس الزمن تطور وانتو الشباب لازم تتطورون ويه الانتاج وسر المهنه لازم انطيكيا حتى تلزم مكاني من بعدي
حيدر : يابه انت خيمتنا وعسى عمرك طويل واني راح اترك الدراسه واوكف وياك لان هالسنه ثالث بكلوريا واني مالي خلك الدراسه لازم اخلي مدرسين خصوصي لان المدرسين بالمدرسه ميتعبون نفسهم ويانا واسئلة البكلوريا فوق مستوى تدريس المدرس احنا وكعنا بيها مابين جشع المدرسين ومابين وزارة التربيه الي ماعدهم غير يتحيلون بالاسئلة عالطلاب
ابو حيدر : ولك بويه هما خريجين كليات جاي يشتغلون حماميل لو عماله هو وين اكو تقدير للشهاده بهالبلد
انت اشتغل هالسنين وتجمعلك كومه فلوس وتاخذ خبره بالعمل افضل من كلياتهم الفاشله
حيدر : هم صدك يابه بس والرياضة احبها واني متفوق بيها
ابو حيدر : ابني يارياضة هو شغلنا رياضه اشو نشتغل من الصبح لليل نصرف الطاقة الي بجسمنا
ابني اريدك تفكر تطور مشروعنا وتنجحه هو هذا مستقبلك
ومستقبل اولادك رياضة شنو مدارس فاشله شنو عوفهن وتعال ساعدني واطلع للشغل من باجر
حيدر : حاضر يابه
سمعت كلام والدي وتركت دراستي والنادي وداومت ويه والدي بشغلنا وفعلا من اول يوم كعدت من الصبح لان شغلنا يتطلب نشاط الصبح رحت للمعمل وتابعت شغل العمال لاحظت بعض السلبيات
المكان محد يهتم بتنظيفة وخطيه والدي يجيهم بالعشره يحجي وياهم بس شيريد يتابع
من اول يوم اثبتت وجودي غيرت بامكان العجانات والشوايات وغسلنا المعمل ورتبناه وكملنا الانتاج صح تاخرنا للظهر بس لحكنا الحمد لله ومن يومها رتبت وانشأت نظام يمشون عليه العمال عدنا عمال بنكالين اثنين واحد بالمعمل واحد بالمعرض
والباقي عراقيين ناس فقراء جايه على عيشتها
من نكمل وجبه الصبح يبقى عدنا العصر نشتغل الكيك والمعجنات وهذا يتطلب ذوق خصوصا تزيين الكيك يحتاج الى فني بديت اتعلم الصنعه من الوالد والعمال الي والدي كان مايبخل عليهم بسر المهنه يكول خلي يتعلمون ويستفادون
ابو حيدر : انت حاليا بديت تتعلم شغلنا واني راضي عنك اريد اخذ امك ونروح سفره لايران نغير جو تكدر تدبرهه انت واخوك حسن لو اأجل سفرتي
حيدر : لا يابه روحوا غيرو جو انت كظيت عمرك مابين المحل والمعمل اخذ اجازه احنا كبرنا ونكدر نعتمد على نفسنا
ابو حيدر بارك الله بيك وليدي اريد اروح للرضا الناس تجي مناك مرتاحه ومتونسه وعاجبنا نروح
حيدر : توكلوا بالله وروحو غيرو جو وهيفاء تاخذوها وياكم ؟
ابو حيدر : اي خطيه هاي اختك محبوسه بالبيت خلي ناخذهه ويانا تتونس وبيت عمك حامد حايجون وبناتهم على واهس هيفاء
حيدر : ترحون وترجعون بالسلامه يابه
ابو حيدر : ابني ما اوصيك ترى هذا المعرض والمعمل باب رزقنا ديرو بالكم وليدي
حيدر : صار يابه ان شاء الله من تجي تلكي كلشي متحسن
من سافروا اهلي بقينا وحدنا اني وحسن هو اصغر مني بسنه
اني اتابع المعمل وبعدين اروح للمعرض المسافة قريبه بيناتهم ومكظيها اروح وارجع حسب متطلبات الشغل
~~~~~~
بعد سفر والدي ووالدتي بثلاثة ايام رحت كالمعتاد الصبح للمعمل كملت ورحت للمعرض
جتنا طلبيه تجهيز كيك لاحد الاعراس اضطريت اروح للمعمل
دخلت للمعمل واشوف العامل البنكالي مشغول ويباوع علي
حيدر : وين ابو صادق ؟
بقى البنكالي محتار شيجاوب
بهالاثناء سمعت صوت امرأة بالمخزن
دفعت الباب وشفت منظر مريب
ابو صادق ومعاه احدى النساء بمنظر غير اخلاقي
هذه اول مره بحياتي اشوف هيج وضع
اهلي ربوني عالحلال والحرام وتصرف ابو صادق زنا وهذا الشي حرام
شكد كنت احترمه واعتبره رجال جبير بس نزل من عيني
وراحت هيبته كدامي
ابو صادق : هلا بيك عمو حيدوري اسف
تعال ابني بره عندي حجايه وياك علما تلبس ملابسها وتطلع
حيدر : لا ابو صادق انت وياها تطلعون
ابو صادق : ابني انت شاب وتعرف احتياجات الرجل اني زوجتي مريضة ومحتاج امرأة
تريد اجيبلك وحده هن يفترن بالسوك هن يعرضن نفسهن
حيدر : ابو صادق كتلك اطلع بره انت وياها هذا باب رزق وانت تريد تنگسه
ابو صادق : ابني لا تصير عصبي راح اطلع هسه وبعدين اجيلك من تهدأ
حيدر : اخذ الزباله وياك مو عفتها هنا
طلعوا اثنينهم بس بوقتها لو متواجه كدامي يمكن اقتله واقتلهه
وين اهلهه ما يسألوهه وين طالعه لوحدج واذا للسوك
بقيت كاعد عالكراتين شفت كلاص ماي كدامي بيد العامل البنكالي شربته يمكن لو منطيني جك كامل كان شربته لان اشعر بحراره بجسمي ونار اريد اطفيها
زين هذا اشلون يرجع لبيتهم شيكول لزوجته واولاده شيكول لربه
بعدين تذكرت الكيك كنت تعبان منهك كلفت العمال يحضروها واني ارتب الزينه
رجعت للمعرض وجهي اصفر وتعبان
الله يساعدك يابه اشلون جنت متحمل المشاكل والمسؤليه صح شفتها صعبه بس الحمد لله كدرت اتغلب عليها وماكدر يغويني
شكد يجون بنات ونساء للمعرض ويحاولون يسولفون وياي لكن كنت اجامل على كد الشغل واحاول اخلي علاقتي بيهم علاقة رسميه
حسن : اشبيك حيدر اشو وجهك اصفر اخاف مريض
حيدر : لا مابي شي
اليوم الثاني
ابو صادق : عمو حيدوري اني غلطت واريدك تسامحني والموضوع مايتكرر واريدك تستر علي وما دكول لابوك
حيدر : اشلون ما اكول لابوي لازم اكوله وخلي يعرف شيصير من وراه
بوس راسي وظل يتوسل ونزلت دمعته
تذكرت اطفاله
ابو صادق : عمي توبه يجوز ربك خلى توبتي على ايدك
حيدر : والله لوما اطفالك وكفوا بعيني مجان رجعتك وهالمره ا ذا تكررت حايكون تصرفي غير انت صارلك سنين ويانا
وابوي يحبك ومعتمد عليك بالشغل
ابو صادق : رحم الله والديك وعمري مراح انسى موقفك حيدوري ويمسح بدموعه
حيدر : خليت ايدي ع كتفة روح عمي لشغلك اليوم عدنا تجهيز ماريد تأخيرواريدك تفكر بعقوبة ربك ترى هذا دين
ابو صادق : ورده حيدوري ربي يجازيك بالخير
ابو حيدر : الو حيدوري اشلونك بويه الشغل اشلونه
حيدر : الحمد لله يابه بخير انتو اشلونكم امي اشلونهه ؟
ابو حيدر : ولك احنا متونسين ان شاء الله بس ارجع انتو روحو تونسوا تعال شوف الحياة هنا والطبيعه الحلوه
احنا باجر طيارتنا نرجع اشتاقينالكم شتردون نجيبلكم ويانا ؟
حيدر : ترجعون بالسلامه يابه
رجعوا اهلي من سفرتهم ونفسيتهم مرتاحه وابوي تجدد نشاطه للشغل والحمد لله كان الاختبار صعب بس كدرت اجتازه وابوي سألني اكثر من مره عالشغل واذا واجهتني مشكله بس سترت ع ابو صادق لان احتمال ابوي يبطله من الشغل وهو صاحب عائلة بس بقيت اراقبه ماعفته مثل قبل
مرت الاشهر والسنين واختي هيفاء كبرت ودخلت متوسطه
هيفاء : بابا اريد موبايل صديقاتي كلهم عدهم
حيدر : حبيبتي هيفاء احنا عائله محافظه ماعدنا بنت بايدهه موبايل وتلفونات
ابو حيدر : بنتي هذا الموضوع مابي نقاش جاي نسمع سوالف اشكال والوان من وره الموبايلات ومشاكلهه
هيفاء : بابا اريد اخذ الجدول والواجبات من صديقاتي
ومرات هن يردن مني الواجب يكلولي انت وين عايشه معقوله ماعندج تلفون ليش تخلوني احس اني غير شكل عنهم
      وانتو ماعدكم ثقه بي
حيدر : حبيبتي هيفاء ثقتنا بيج عاليه جدا وانت اجمل واحلى اخت عندي جم هيفاء عندي
بابا اني راح احل المشكله
تعالي هيفاء اخذي رقم تلفوني وانطي لصديقاتج وخلي يتصلون بيج بالوقت الي اكون بي بالبيت من ال ٦ العصر لغايه ال ٩ ليلا لان اني اطلع وره التسعه وما ارجع للبيت الا متاخر وكوليلهم اخوي ميعرف اسمائكم راح اسجلهم بالارقام
ومعلي بيهم هن يتصلن ويغلقن التلفون وانت بعدين اتصلي بيهن لان ماريد احرجهن وارد عليهن والرصيد على حسابي ورده
هيفاء : دائما تقنعني حيدوري بحلولك الغير طبيعيه
حيدر : حبيبتي ماعدنا نسوان يلزمن موبايل
هيفاء : ماشي فهمت وماعندي حل ثاني ابو الحيادر
حيدر : سجلت اختي ارقام صديقاتها كانن اربعه بس ماحبيت اسألهه عنهن وحتى اسمائهن ماعرفتهه
هيفاء : حيدو اليوم وزعت رقمك على كل المدرسه وحتى للمدرسات
حيدر : مو صوجج صوجي اني اريد اساعدج
هيفاء : لا حبيبي حيدوري هن اربعه انطيني تلفونك خلي انزل ارقامهن
حيدر : باعي لاتكتبين اسمهن كتبي رقم واحد وعندج كتبي الاسم وفلانه رقم ٢ ونفس الشي
نزلت هيفاء اربع ارقام لصديقاتهه وكلما يتصلون ارفض المكالمه وانطي التلفون لاختي هي تتصل بيهن
هيفاء : تدري حيدر هذه صديقتي رقم ٢ تحب واحد ويوميه يوكفلهه باب المدرسه وصارت كسلانه من وره التلفون ويسولفون يسهرون بالليل وتجي نعسانه ومطفيه
حيدر : اختي غيري الموضوع اني لا اقتنع بالحب ولا بالعلاقات العاطفيه الي ماوراها غير المشاكل
هيفاء : يعني انت ابد ماحبيت ؟
حيدر : بصراحه لا ما رف كلبي على بنيه شكد اصدقائي يسولفولي عن حبيباتهم والمشاكل الي جاي يتعرضولها واكو لا تزوج حبيبته وبده معاناة جديده مراجعه الطبيبه وحبلت وسونار وطفل ودوخه
معوده خليني هيج مرتاح
بدء الموسم الدراسي الجديد وداومت هيفاء وصديقاتها يتصلون مثل كل مره انهي الاتصال وانطيها التلفون
هيفاء : حيدوري هذا رقم تلفون صديقتي الجديده رقم (٥)
حيدر : اكول هيفاء شنو قصة صديقتج رقم ٥ ؟
هيفاء : شعجب تسأل مو من عوايدك تسال ع صديقاتي
حيدر : ما اعرف اشو صار عندي فضول
هيفاء : هذه مرام جانوا ساكنين بالبصره وبسبب ظروف الي حصلت ابوهه اخذهم يم عمامهم هناك عشيرتهم وعمامهم
بس صعبه تداوم بالعماره جتي هنا بيت خالتها وانتقلت بمدرستنا
حيدر : صح الموضوع مايخصني بس اشو هالرقم لفت نظري
طلعت ويه اصدقائي مثل كل مره نروح للكافتريا نلعب بليارد ومرات نتمشى عالكورنيش نشتم هوا الحلو لشط العرب
بيومها تعبت من المشي رجعت للبيت كبل عالفراش نمت
الحلم
(شفت حمامه بيضاء مجروحه بجناحها وجتي وكفت على ايدي مسحت الدم الي بجناحها وجبت قطعه قماش وردي ولفيت الجرح بالقطعه الورديه ...بعدين تحركت الحمامه وكعت القماش والجرح ماكو طارت الحمامه ردت اخذها للبيت وياي راحت مني وطارت )
فزيت من الحلم مقهور عالحمامه ليش عفتها طارت باوعت شفت نفسي بالسرير نايم ولا اكو حمامه ولا قماش عرفت هذا حلم رجعت كملت نومتي
كعدت الصبح ورحت لشغلي واختي هم راحت للمدرسه بس الحلم باقي في بالي
كملت شغلي ورجعت للبيت شفت باب غرفة الخطار مفتوحه
باوعت شفت بنت ماشاء الله تبارك الله
هي نظره وحده شكولكم خطفت كل احلامي وصبري طول هالسنين كلبي كام يوجعني بقيت افرك بكلبي واحرك بي
ارتبكت حتى سلام ماكدرت اسلم البنيه دنكت راسهه واني كلت العفو
البنت بيضاء عيونها سوداء عدها غمازات شعرها اسود وزنها تقريبا ٦٠ شكلهه ملفت وجميله جدا
رجعت لغرفتي واني متكهرب من النظره الاولى قبل جانوا يحجولي عن الحب من اول نظره كنت اضحك عليهم
لكن اليوم شفته وحسيته
هالبنت خربطت كياني
هيفاء : حيدوري هذه صديقتي مرام رقم (٥) اهلها دزولهه تلفون دفتري صيني ومتعرف تعربه ويحتاج تنزل برامج كتلهه اخوي يسوي الج
حيدر : اني صافن بوجه اختي حتى الكلام راح من عندي
فكرت بخطه اعترفلها والا اتخبل اذا تطلع وما احجي وياها
حيدر : اكولج التلفون لازم يبقى عندي منا لباجر ومن ترحين الصبح للدوام اخذي الهه وانطيها تلفوني القديم خلي تستعمله وباجر يكمل جهازهه
للحكايه بقيه : ترقبوا البارت القادم خلي نشوف حيدر شحايسوي ويه مرام الي سلبت كلبه
~~~~~بقلم فردوس عبد اللطيف ~~~~~