اضغاث احلام

الثالث

#اضغاث_احلام
بقلمي : فردوس عبد اللطيف
البارت الثالث (حقيقية )
أنا هي من سقيتها من كأس حبك حتى ادمنت هواك واصبحت اطالبك بالمزيد والمزيد دعني أحبك دعني احبك حتى يحترق الحب دعني اتنفس عشقك دعني احبك اكثر فأكثر دعني اغرق في بحورك واتلطم بين امواجك ولاتنقذني دعني اشتاق إليك حتى تحرقني اشواقي دع حبك يزلزلني ويفجر داخلي بركاني
~~~~~~
مرام : طلعنا من البصره اني واختي وزوجها وابنها وصلنا بعد ٣ ساعات هو الطريق ساعتين بس تأخرنا لان صار عنده بنجر وعلما غيره
واول ماوصلنا تلكونا اهلي والتهيت ماكدرت اتصل بحبيبي
بعد ما خلصت السوالف كتلهم حاروح انام
رحت لغرفتي اتصل بحدو مايجاوب ارجع اتصل مايرد
بقيت بقلق لان كلما اتصل مايرد
شسوي رحت يم اهلي امي واختي يسولفون واني صافنه مابين القلق ومابين العشق والهيام كلما اتذكر كلام حدو ابتسم
بعدين اخاف ينتبهون علي شراح يكولون ؟
~~~~~
حيدر : اخذوني لمستشفى البصره الجمهري قسم الحروق
بوقتها كنت فاقد الوعي
اسمع صوت الاطباء يحجون بيناتهم والمضمد كال دكتور هذا المريض تحرك
الدكتور : اشلونك حيدر شخبارك ؟
حيدر : اخ دكتور وجهي وايدي الم فضيع نار مشتعل وجهي وايدي عيوني اخاف افتحهم دكتور كوله يوجعني
الدكتور : تحمل لازم تتحمل
حيدر : اخ يابه وينك ولج يمه لحكيني راح اموت دكتور كولي اني اموت ؟
الدكتور : اضربي ابره مهدئة خلي ينام يرتاح
حيدر : ضربوني ابره ودخل ابوي
ابو حيدر : بوي حيدوري اشلونك
حيدر : بويه تعبان اخاف تالي ما اشوف عيوني توجعني
ابو حيدر : اسم الله عليك وليدي الدكتور طمني بس لازم نطلعك من المستشفى
حيدر : ليش بوي وين توديني ؟
ابو حيدر : ناخذك للبيت لان اكو جرثومه بالمستشفى واخاف تاخذ منهه لان كم مريض اخذوا الجرثومه وبعيد عنك راحو
واني ما اريد اخسرك شعندي بالدنيا غيركم بوي انتو دنيتي الحلوه
حيدر : بويه بس اريد اشوف بعيوني ما اريد اصير اعمى
ابو حيدر : يم الله ابني حسن لملم اغراض اخوك وروح جيب كرسي ناخذه نطلعه للبيت
حيدر : اي البيت احسن اريد يمكم امي وهيفاء
رجعت للبيت واني مشدد ايدي ووجهي كلشي مايبين من عندي مخليلي دوا حروق
رجعت للبيت الابره مخدرتني بس اريد انام
وين تلفوني خلوا يمي
هيفاء وامي يبجون
خويه هذا تلفونك
خلته يمي بس ما اكدر اباوع عالمكالمات لان مغمض ومشدده عيوني
و من تأثير الابره نمت نومه عميقة
~~~~~~~
ام حيدر : يمه كوم اكعد سويتلك شوربه
حيدر : كعدت يمه شنو شوربه انتو شنو غداكم ؟
ام حيدر :
هيفاء : اخوي حيدر انطاني تلفونه القديم قبل فتره وصرت اكدر اتصل بصديقاتي وهما يتصلون بي
اتصلت بي مرام
مرام : بعد ما آيست من حيدر اتصلت بي عشر مكالمات وميجاوب اكيد اكو سبب
اتصلت بهيفاء خلي اطمن عليه اخاف صاير بي شي
حيدر :كنت اتغدى وسمعت هيفاء دكول هلو مرام اشلونج
غصيت باللكمه
ام حيدر : يمه اسم الله اشرب ماي
مرام : اشبيج  هيفاء
هيفاء : لا مابي شي
مرام : الله عليج كولي بيكم شي ليش صوتج مخنوك ؟
هيفاء : مابينا شي انت مرام اشبيج تبجين ؟
مرام : احجي ولج راح اموت حيدر بي شي ؟ ولج هيفاء كلبي كارصني ولج راح اموت من البجي
هيفاء : حيدر احترك بالنار بالمعمل وهسه طلع من المستشفى
مرام : عطت حيدر وهسه وينه ؟
ام مرام : منو حيدر واشبي ؟
مرام : لا هيج حيدر ابن صديقتي يبجي علي
ورحت لغرفة الخطار هي تحجيلي واني ابجي والطم سوده علي حيدر شحالك هسه
انهارت اعصابي فقدت بجي ولطم واخوي جان يسمع كلامي
ودخل علي بالغرفة
زهير اخو مرام : ولج منو هذا حيدر
مرام : كنت بحاله هستيريه وفوكها اخوي يضربني ماخلى مكان بجسمي يعتب واخذ مني التلفون وجرني من شعري لان وكعت من الضرب بالارض قرفصت نفسي حتى لاتجي الضربات ع وجهي ودخلني بالغرفة وطلع وقفل الباب من بره علي
زهير : حقيره رايحه تتمعشكين الا احبسج بهالغرفة لحد ما نطلعج جنازه للكبر ياعار جبتيلنا العار
مرام : من كثر الالم الي بي ما همني اي الم بجسمي لكن الي اذاني كلبي وقهري على حبيبي حيدر هذا الي اذاني معقوله حيدر احترك وما اكدر اروح اشوفه اشلون حاله
نمت بدون ما احس مدري غمى علي بس الي حسيته اني عالارض مقرفصة وسمعت صوت امي تغطيني
ودكول سوده علي بنيتي ولك زهير شسويت بيها
انام واصحى وما اعرف الوقت نهار لو ليل ومفتاح الغرفة بيد زهير منعني اطلع حتى يمهم بالهول بس يسمحلي اروح للحمام ولازم ارجع للغرفة منعوا عني التلفون والخروج من الغرفة المسجونه بيها
قلقي على حيدر هو همي شراح يكول علي هسه يتصور اني عفته لان احترك اشلون اوصله خبر
~~~~~~~
حيدر : من سمعت مرام بي احتركت انغلق تلفونها بعد مافتحته كلما اتصل مغلق
اختي هيفاء من يومها عرفت بعلاقتنا
هيفاء : حيدوري انتوا تحبون بعض واني اخر من يعلم ليش خوي جان كتلي اني اختك راح افرحلك
حيدر : لا تفهميني غلط ماردت تعرفين اني استغليت ثقتج بي
من اول يوم شفت بي مرام حبيتها حب من اول نظره
تعلقت بيها وصارحتها وهي هم حبتني
هيفاء : بس الي اعرفه ابن عمها ناهي عليها واهلها من النوع الي مينطون غريب الا كرايب
حيدر : هذا نصيبي وقسمتي هو كلبي مارف الا الهه مو بايدي
~~~~~~~
حيدر : بعد مرور اسبوع من حادثة الحرق كل هالفتره مغمض عيوني اخاف افتحهن وانصدم بالعمى
كعدت الصبح وكلت خلي افتح عيوني وشيصير خلي يصير
فتحت عيوني وزادت نبضات كلبي
بالبدايه النظر كان مغوش لحد ما ظليت اغمض وافتح اغمض وافتح شويه شويه بدت الصوره واضحه كدامي
يمه ..يمه وينج
ام حيدر :اسم الله عليك وليدي اشبيك ؟
صلاوات ع محمد وال محمد يمه فتح عيونه وليدي ابو حيدر
تعال صلاوات على محمد وال محمد وينك ابو حيدر
ابو حيدر : الحمد لله والشكر بويه اشلون نظرك صار ؟
حيدر : الحمد لله بويه زين جاي اشوفكم
دنك علي ابوي وحضني وظلينا نبجي
اول مره احس بنعمه النظر اول مره احس بقيمة العيون واهميتهه
نملك نعم ربنا انطانياها لكن محاسين بيها اليوم عرفت اهميه نعمه البصر
امي بس تبجي دنكت علي وبوستني
ام حيدر : فدوه اروحلك يمه بي ولا بيك
~~~~~~~~
حيدر : خلصت عطله نص السنه واختي داومت واني بالبيت اتعالج من الحرق واراجع الاطباء بس ما اكدر اطلع للشغل انتضر اختي هيفاء  ترجع وتجيبلي خبر عن مرام
هيفاء : هلو حيدر اشلونك اليوم ؟
حيدر : طمنيني داومت ؟
هيفاء : محد يعرف عنها اي خبر الكل يسالون عليها بس محد يعرف
حيدر : اكولج هي عرفت بوجهي وايدي تشوهو ؟
هيفاء : لا متعرف بس كتلهه احترك وطلع من المستشفى
حيدر : شي مومعقول
بعد مرور شهرين ومرام ماكو منهه خبر
ابو حيدر : بويه حيدر صديقي كال على مستشفى بأيران نوديك تسوي عمليه تجميل علمود وجهك
حيدر : وشيكول ناجحه عملياتهم ؟
ابو حيدر : بطهران  اخذت منه رقم ولد مترجم هناك ياخذك هم يسكنك قريب المستشفى وهم يترجملك ويعرضك على اطباء اخصائيين وراح اكلف ابن عمك حمد يروح وياك
ودي اخذك بأيدي بس تعرف اذا اعوف الشغل كولشي يخرب
حيدر : ميحتاج يابه حمد كافي ولو يحجي هواي بس اتحمله شسوي
ابو حيدر : هههههه يسولف السالفة خمس مرات وكل مره يحجيهه شكل
حيدر : همزين جوازي استلمته قبل ما احترك
ابو حيدر : باجر اخذ جوازاتكم واوديهن للمكتب اقدملكم ع فيزه ونحجزلكم ونخابر المترجم وهو يستقبلكم بالمطار
~~~~~~
حيدر : سافرنا اني وحمد الى ايران اول مرحله عبادان بالسيارات ومن مطار عبادان الى طهران
وحمد دوخني مايتعب من السوالف طول الطريق بس يحجي
بس كلبه طيب وحنين
استقبلنا المترجم بالمطار ونزلنا بالشقة قرب المستشفى
اليوم الثاني عرضني عالطبيب وحددلي موعد عمليتي في اليوم الثاني ومن يومها بديت رحله العلاج والعمليات
بقيت بطهران شهر لحد ما تغير شكلي والتشوه الي بوجهي كدر الطبيب يخفي بس ايدي بقى بيهن اثر شي بسيط
كل هالفتره واني اتصل بمرام وتلفونها مغلق
مرض وغربه وقهر وفراك وقلق كل هذه المشاعر اجتمعت بداخلي كنت اتصل بهيفاء كل يوم واسألهه ماكو خبر عن مرام لكن هي مثلي ماعدهه اي خبر
حيدر : ها حمد اشو جنك مكنك ويه الممرضه من تدخل تتخربط احوالك ؟
حمد : لكفتني حويدر ولك تستحي منك ماتريدك تعرف
حيدر : ومن راح نرجع للبصره اشلون بيك اشلون تحجي وياها ؟
حمد : هم بالاشاره نفتح كام وناشر
حيدر : وبعدين وين توصلون بحبكم هذا ؟
حمد : عمي ياحب هذني كل واحد يجي ينسقن وياه يردن واحد يجيبلهن هدايا ويصرف عليهن وابن عمك شاب ويريد يتونس خليني اكضي وكت وياهن
حيدر : المترجم كال نكدر نسافر وكلفته  يحجزلنه باسرع وقت
حمد : مو خوش خبر يعني حانرجع ولك جان نسقتلك ويه صديقاتها وطلعنا فد طلعه حلوه هي كالت نروح لشمال ايران
نغير جو ونتونس وتجيب وياها صديقاتها
حيدر : ولك يابنات ياشمال اني مشتاق لاهلي اريد ارجع
حمد : انت اشبيك هالوجوه الحلوه والطبيعه الخلابه واشتاقيت 
للبصره
حيدر : البصره مابدلها بكل ايران وغير ايران
حمد : اكولك حيويدر جنك عاشق وحده بالبصره بس ما اشوفك تحجي وياها
حيدر : اسكت حمد ولاتفتح جروحي
~~~~~~
حيدر : اليوم الثاني رجعنا حجزنا كان لعبادان ومنها بالسياره نصف ساعه نوصل للبصره واستقبلوني ابوي وعمي 
وصلت لبيتنا والكل ملتمين وذبحوا الذبايح على سلامتي واستقبلتني الوالده بدموع الفرح
هيفاء : تدري حيدوري اشو صاير حلو بعد العمليه هسه البنات يوكعن
حيدر : هيفاء الله عليج ماكو خبر من مرام
هيفاء : ماكو سكته الظاهر بطلوهه من المدرسه وهاي هي
حيدر : اخاف تزوجت ؟
هيفاء : الله واعلم
~~~~~
حيدر : رجعت لشغلي وابوي يخاف علي ميخليني اروح للمعمل عبالك طفل
مرت الاشهر كأنها سنين وماكو خبر من مرام واني كل يوم وكل شهر يمر علي  بسنه
بعد مرور سنه من الحادثه
ايست مرام عافتني يمكن توقعتني محترك وتشوهت وتريد تقطع علاقتها بي
لكن الشي الغريب اني اشوفها بالاحلام وبعيده عني وتريد توصل يمي واكو حاجز مثل السجن يمنعها تقترب علي
الساعه الواحده ليلا
كنت سهران بالليل اكلب بالفيس رن تلفوني رقم غريب (اثير)
ترددت اجاوب لو لا
حيدر : الوووووو
مرام : حدو بتنهيده
حيدر : مراوي اخ اخ انهد حيلي وين جنتي سنه غايبه عني
     ليش هيج تسوين بي ليش ياعمري سنه كامله ما اعرف عنج شي ؟
مرام : حدو حبيبي من يوم الي سمعت بيك احتركت وكنت الطم وابجي واخوي سمع وعرف بي ضربني وعذبني وحبسني بالغرفة ممنوع علي التلفون
بعد سنه توسلت بامي وابوي وحجوا وياه و سمحلي ارجع للبصرة اكمل دراستي ونطوني التلفون العصر وهسه خابرتك هذا الي صار وياي ها حبيبي شلون اعوفك وانت فديت روحك الي اموت وماعوفك
حيدر : حبيبتي شكد اتحبيني ؟
مرام : الجنون الي عشته بلغرفه كله تفكيري بيك
حيدر : رجع املي بالحياة رجعتلي روحي من سمعت صوتها
للحكاية بقية
~~~~~~بقلمي فردوس عبد اللطيف ~~~~~~