نهوة عشاير
مرحبا.. اسمي صفاء راح احجيلكم عن قصتي الي لهسه اعيش كل تفاصيلها يوميه ...
اسولفلكم عن عائلتي الي همه(امي ربة بيت ،ابويه اعمال حره(دلاليه بيوت وعقارات) اخواني زيد موظف ومكرم همين موظف وامين طالب كليه سنه اخيره واني وورايه اختي علياء..
احنه من عشيره معروفه بأنه نسوانهم متروح للغريب اله ع قطع الرقاب.. وهل شي انغرس بداخلي من الصغر لازم مااخلي فكره زواج الغريب ابالي ابد ولابشكل من الاشكال...
كملت الاعداديه واني محافظه ع نفسي وسمعه اهلي من اقل دنس .. عندي صديقات اثنين واهلي يعرفون اهلهن .. من الدوام للبيت ماعندي اي اختلاط بشباب لا من قريب ولا من بعيد ..لبسي كله جبه لو تنوره وفميص عريضات كلش
هوايه سموني معقده نفسيه كئيبه بس هو هذا طبعي جان.. تقريبا عائلتي من كد النصائح محت شخصيتي وصرت خجوله كلش بحيث حته اخواني من احجي وياهم كله برسميات وماعدنه سالفه الدلال والغنج والتملعب الزايد..
يعني عائلتي هادئه وبسيطه لا مشاكل ولادلال طافح عن حده..
نادرا مانطلع للسوك اني واختي وامي .. اكثر الي نحتاجه الولد او بابا يجيبه..
زيد مزوج وزوجته ويانه كاعدين.. وهي همين من اقاربنه تصير بنت خالتي..nada hs
كل شي جان روتيني بحياتي وماعندي هم غير الدراسه والاكل والنوم.. دخلت كليه تربيه قسم انكليزي وجنت كلش احب هل قسم ومن صغري ادردم بكلام ممفهوم عود داحجي انكلش..
جنت اني اول واخويه امين رابع اداره فجنه نروح سوه ومرات نوصل اختي علياء ويانه للمدرسه..
مرت اول سنه بخير ونجحت دور اول.. ماكول من الاوائل لا لان جنت اقره ع كد نجاح بس..
بالسنه الثانيه خلولي اهلي خط رجال جبير بالعمر من المنطقه ويايه 3بنيه من قسمي...
يوميه اتريك والبس اطلع الكه عمو ابو خلدون منتظرني بالباب جان يجيني اول وحده وبعدين نروح للبنات.. صح هنه ويايه بالخط بس ابد مطوخت علاقتي بيهن ع كد السلام ونتفق ع جيه الخط او الرجعه...
الى ان بيوم اندعمنا بسياره والله ستر مارحنه بيها .. متت من خوفي بوقتها نزل عمو ابو خلدون ويصيح ع ابو السياره الثانيه الي جان كل الصوج منه طلع من الشارع فجأة بدون ليشغل اشاره ولا شي... بقيت اني بالسياره واسمع صياح عمو نزل ابو السياره الثانيه وجان عمره قدرته حوالي30 سنه اشو هذا نزل ويصيح ع عمو وهو رجال جبير وشيبه تارس راسه ولااحترم عمره عاد اني متحملت كبل نزلت وصحت رجال بكد ابوك هيج تعامله مع الاسف والله عاد هو رفع حاجبه معاجبه وروحه بخشمه.. ورحت ع عمو اكوله نصعد ونكمل طريقنه صح السياره متأذت بس الخوفه الي اكلناهه كافي..
كوه قنعت عمو يهده والناس التمت علينا عاد عمو استحه عليه وكبل كال يله متسوه اخلي بنتي عرضه للرايح والجاي...
بقه عمو بس يحجي ع هذا الولد واني هم بكلبي حجي علي بس مااحجي بس ساكته بالخط .. رحنه ع البنات وجنه حيل متأخرين وترزلنا بأول محاضره كله بسبب واحد طايش...
مرت الايام وماكو احداث تذكر . نفس الروتين دوام لل2 ارجع اتغده اصلي وانام اكعد اسولف شويه ويه ماما ومرت زيد واصبر عليها لان صارلهم 3 سنوات متزوجين وميصير عدها طفل وراجعو كومه بس مبيهم صوج... بالليل ادرس شويه بعدين انظف البيت وارتبه حته الصبح يبقه نظيف ..
وبيوم شفت ذاك الوجه مو غريب عليه وكأني اعرفه لمحته وبقيت افكر وين وين وين بعدين اتذكرت هذا هو الدعمنا وصيح ع عمو زين شعنده بكليتنا ؟ جان واكف ويا استاذ شايفته يدرس بس غير قسم ..بس اشو هذا ماخذ راحته ويا ع الاخر يلزم ايده وويضحك وساعه يخلي ايده ع ظهر الاستاذ وساعه يميل علي
وهو هذا الاستاذ بالذات كلش انفه ومتكبر الى درجة حته ويه الاساتذه البقيه وكلها تعرفه بسبب هل ميزه البي..
جان قسمنا طابق ثاني وجنت بهل لحظات مراقبتهم وفجأة هذا رفع راسه واجت عينه بعيني رأسا درت وجهي وبعد ماالتفتت ابد دخلت للقاعه ومطلعت بعد لنهايه الدوام..
من طلعت هم شفته ويه الاستاذ طالعين سويه وصعد بسيارته والاستاذ هم راح لسيارته واحد دك للثاني هورن وطلعو..
(اوووي هسه اني شاغله نفسي بيهم شعليه) هاي الجمله الحجيتها ابالي بذاك الوقت... وصدك شكد حاولت ماافكر واعرف شجابه وشيصير منه وووو ذبحني الفضول بوقتها ومو طبعي الفضول لهدرجة .. صح مرات احب اعرف شغلات بس مااصر اله اعرفها ولاانطي ذيج الاهميه..
وهم مرت ايام واسابيع وشفت هذا المجهول ويه الاستاذ واول ماشلت راسي اجت عيني بعينه .. نظرته جانت مال واحد عبالك يعرفني من زمان وهوفعلا مجان ناسي شكلي وحتعرفون شلون
