4 رجعت للبيت وكلها سالتني ليش متاخره كلتلهم لان اخر يوم وبقينه سوه اني والبنات طبعا نهروان تعرف اني جنت ويا وامي هم مصدكت بالحجيته... الظهر عود خليت راسي ردت انام مكدرت اجتي نهروان يمي وسولفنه هوايه ومالكيت نفسي اله ابجي واسولفلها سوالف حارث وعن خططه يريد ننهزم.. نهروان-لج والله لو هيج الحب لو ماكو..شنو من وفاء عنده يالله.. -كوليلي شسوي ها! راح اموت والله! نهروان:ياعيني والله مادري شكلج بس اخوانج مخابيل كل شي يسوون ديري بالج منهم.. مااحس اله الباب انفتحت وزيد جان واكف وعيونه بكصته صايره اكيد تعرفون شنو يصير من اخ يلزم اخته تحجي بحبيبها وخاصه اني الي عبالهم ماعندي تواصل ويا كطعني تكطع كل ضربه منه جانت يمكن لو واكعه بحايط يجوز تفلشه.. نوب رجع ع نهروان وشبعها دك هااا تشجعيها! وتعرفين ومتكوليلي اليوم اطلكج وعلي اليوم ارجعج منين ماجيتي راح يلفظ الطلاك عليها كبل طفرت علي وسديت حلكه بيدي وبهفه وحده من ايدي شمرني متر عنه يمكن.. كبل اخذ الفون مالتي وهمزين جنت امسح اول باول مااخلي شي وحته رقمه مسجلته باسم بنيه كلب بي ملكه شي فلشه كدام عيني وتفل بوجهي وراح... بقيت ابجي ع حظي وع الصار بيه والوم بنفسي يعني تدرين اهلج مينطون ليش تورطين روحج ليش! خطيه نهروان هم انضربت بسببي واجت امي هم كملتها علينه ذاك الحجي والغلط علينا همزين زيد ماكال لاخواني وابويه واله جان فطست من الكتل... بقيت العطله الصيفيه كلها هيج كئيبه وبس ابجي وماعندي اي شي اتسله بي ومااعرف اخبار حارث.. بس طلعت مره وحده امتحنت الماده الواكعه بيها ورجعت... جنت اتمنه اشوفه واحجيله الصار بيه .. مرت الايام واني لااكل مثل البشر ولاراحه ولانوم صرت نثل المومياء نهروان طلعت حامل وزيد راضاهه ونسو الزعل الصار بسببي.. علياء اجت خالتي ام نهروان وخطبتها وهي مكيفه وبس تنجح من السادس يتزوجون.. بدت المرحله الاخيره وجان زيد يجيبني ويوديني حته الخط لغيته وطبعا كوه خلوني اكمل هل سنه .. شكد انتظرت يجي يدزلي احد يطلع بطريقي ماكو بس مره من المرات اجتي بنيه من قسم التاريخ مااعرفه حجت ويايه وصارت تسألني شلونج شلون وضعج شويه شويه افتهمت انه حارث اله علاقه بالموضوع وهي البنيه جانت طالبه عند ابن عمه وهو دازهه.. جنت انطيها اخباري بس متجرأت اسألها ع حارث لاني مثلت عود احنه صديقات ومااعرف بيها ع اساس مدسوسه... خلصت الرابع ونجحت وسنه كامله مشفته ولاعرفت عنه شي بس كلت اكيد تزوج.. ازوجت علياء وكل التشوفني تكول ياا هاي المنهيه وبارت حته ولد عمها لعبت نفسهم منها بعد من ياخذها.. صارت عينك عينك كدامي ويطعنن بشرفي.. سكتت وكلت الله ياخذ حقي منهن وبذاكرالوكت جنت حيل ضعيفه ومااكدر اواجه احد كلي خوف وقلق وحزن.. ليليه جنت اتذكر حارث وسوالفه الي متنمل وماشبعت منها .. مرت اشهر واجتي مرت خالي تريدني لابنها بس اشو جيتها من وره خشمها بعدين عرفت امي دازه عليها حته تخلص مني ومن العار الجبته الها ع حسب متكول.. ابن خالتي محسن اصغر مني بسنه وراعي مشاكل وطلايب وفوكاهه لايقره ولايكتب.. كلت لامي لو اموت مااخذ هيج واحد وانهديت عليها كتلها عفتي المثقف الدارس والفاهم ومستقر تزوجيني واحد مهتلف عاد كفختني راشدي وصار عادي عندي مهتميت عفتها ورحت لغرفتي مرت خالي كيفت من رفضت عباله ابنها فد شي ممخلوق منه بعد وميستاهلني يستاهل ياخذ اميره .. بقيت هل فتره مثل الخدامه محد معترف بيه وزيد ميحاجيني ومرات يتفل عليه ويطلع وامي كله عرك وياي بس نهروان جانت تصبرني ومن يجي زيد كبل تطفر تخاف لان مانعهه مني.. نسيت طعم الراحه وتمنيت يرجع الزمن ولاعرفت حارث ولاحبيته صار عندي هوس انظف24 ساعه ومن انظف افقد حته تتجرح اديه من السيم مواعين لو تنجلغ بالحيطان لان نثر واكمل شغلي ولااهتم وجنت ارتاح من اتجرح احس انتقم من نفسي.. حته الملابس مالت البيت كله نسيت شي اسمه غساله له فرك باديه .. ومره انكسر الكلاص بيدي ولحد هسه اثر باقي بيدي والدم ترس المطبخ وامي تخبلت عليه شفت الحنيه صدك بعينها كبل اخذوني للمستشفى وخيطوها .. حته زيد يوميه كام يسأل عني واستخطاني حيل وامي بس تبجي عليه اسمعها تحجي ويه نهروان تكول هم عنست وهم صارت بيها حاله نفسيه .. صدك جانت بيه حاله نفسيه ومن شفت اهتامهم شويه بديت اتحسن وصرت مااكبت بداخلي ابجي واعيط ... صارت شوفه حارث بس بالاحلام وجنت افرح عبالك صدك شايفته يوميه افكر شحاله ووين صفه بي الدهر...
