-21215-

B.A.B.A.E.                                                                            

Babae kang nilikha mula sa tadyang ni Adan

Hinubog sa iyo'y nakahuhumaling na katawan

Nakahahalinang tinig at mapupulang pisngi,

Katangian mong hindi maitatanggi

Sa paningin ay may nakabubulag na mga ngiti

Mga pasubaling nakapanghihina ng binti

Babae kang pumapagitan dito sa kamunduhan

Lason sa mahinang mga braso ni Adan

Maria Clara nga ba kung ikaw ay ituring?

O sadyang tapunan man din init ng katawan namin?

Ang ikaw ay titigan ay tila ba kasalanan

Ngunit ang pag-angkin sa iyo'y sapat na ba ang limang daan?                                                                                                  

Babae ka mang nakapang-aakit

Sa mga kembot mong pumipilantik

Kailan ma'y 'di mo magagawa na ako'y mapa-ibig

Gumegewang 'di dahil sa kalasingan,

Kundi ang pagsayaw sa musikang nakamamatay...                                                                                                                  

Nakamamatay na kahihiyan,

Nakapandudurog ng tibay ng iyong dangal,

Dumurungis sa kalinisan ng 'yong katauhan,

Tumatapak sa pagkatao mong hinubaran ng kapalaran.                                                                                                                            

Sa entabladong sadyang nakasisilaw,

Grasya ng kasalanan ang iyong hapunan

Maya-maya pa'y kapiling mo na si Adan

Anupa't kasama ang kanyang kasabikan

At pikit mata mong ipasasaklaw

Ang 'yong hubad na katawan kung hindi...

Papaano na ang sikmurang walang laman,

Kumukulo sa gutom, umiimpis sa uhaw?                                                                                                                        

Babae kang nilikha mula sa tadyang ni Adan

Sinira na ba ng panahon ang taglay mong kagandahan?

Hinubog sa iyo'y nakahuhumaling na katawan

Tila yata hayagan mo itong ipinahihiram

Sa paningin ay may nakabubulag na mga ngiti

Ngunit bakit maging ikaw ay nabulag na rin ng salapi                                                                                                                              

May mga pasubaling nakapanghihina ng binti

Bakit ngayo'y sinasakal ka na ng pighati?

Habang binubusog ka ng karangyaan

Sa putik na iyong tinatapakan.