كل شيئ انتهى

الحلقة 1

احيانا في الحياة نشوف في بنات يديرن في اخطاء يمكن تخلي نظرة المجتمع ليهن قاسية بس لو نرجعو للاساس نلقو اغلب البنات فاقدات للاهتمام من الاهل ف يحاول انهن يلقن في اي شخص اخر
مع ان هدا مش مبرر مقنع في نظر المجتمع بس فترة المراهقة صعبه جدا ومن الصعب ان بنت تتجاوزها بدون اخطاء ومن الصعب اكثر ان شاب يتجاوزها بس نظرة الناس للبنت تفرق ع نظرتهم للشب وااااجد

..................................
ح نحكيلكم قصة بنت عاانت و عاااانت واجد في حياتها و معاناتها هادي مع عدم الاهتمام خلتها تجري ورا اي شخص تلقى منه عبارة شكر او محبه

______________________________

اسمي الاء م 2001عمري17 سنه طبعا نقرا سنه ثانية علمي والعام الجاي بفضل الاهل الكرام ان شاء الله اخر عام و السبب ح تتعرفو عليها بعدين
عندي 3 خوت
احمد م90 خوي الكبير متجوز و عندة بنيه اسمها شهد م 2017 مرته هدى م 98 يسكن بعيد وبروحه نشوفو فيه تقريبا مرة في العام يعني زي ما يقولو من العيد للعيد علاقته مع بابا مش كويسه واجد من زمان يابال جت مرته وزادت بعداته علينا
علي م94 هدا خوي التاني هو عصبي وديما حامق و يعارك بس حنون يبني في حوش ع قدة و يبي يخطب مش متع بنات و علاقات
ابوبكر م97 وهدا الغالي يا حنه قريب منا وااااجد وجوا حلو بس لو عصب يقعد بايخ مع ان نادر ما يعصب لان بارد
و 4 خوات
منى الكبيرة م 88 متزوجه ابراهيم م80 و عندها ولدين و بنتين محمد م 2009 مندر 2013 مها ونها توأم 2015
امينه م 95متزوجه عادل م 89 و عندها وليد زياد 2016
هناء م 99 مخطوبه و خطيبها كريم م90
اميمة 2005 تقرا اولى اعدادي افكارها اكبر من عمرها وااجد و تفهم في امور حتى الكبير ما يفهمها بس شيطانه و حركيه واااجد فايته القرايه لانها تقول تكميل مش ح نكمل ف ليش نتعب في روحي
ماما حنان م71
بابا سليمان م 65

...............................................
كانت حياتنا عادية ك حياة اي عائله ليبيه كل واحد لاهي في روحه وخواتي الواخدات يجن كل خميس و احيااانا يباتن بس الاغلب يروحن اني و خواتي علاقتنا مش قويه واجد يعني ما عندناش ع جو التعلق في بعضنا او الفضفضه وهدرزتنا كلها عاديه و ع مواضيع سطحيه جدا يعني نتخالفو اكثر ما نتفاهمو بس اكيد نحبو بعض واااجد وما نرضوش شي في بعضنا

خوي احمد زي ما قلتلكم ما يجيش بكل الا في القليل النادر يعني في المناسبات و الاعياد بس وبيني و بينكم هكي احسن متريحين من مرته و زومتها المشقلبه بس شهودة غاليه علينا و ديما خاطرنا فيها بس امها حارمتنا منها

المهم خلي نخبركم علي سبب ان بابا ما يخليش فينا نكملو قرايتنا ببساطه لان اختي العزيزة منى في زمناتها دارت العار في الكليه و طلعت مع الشباب بس ما صارش من يلي في بالكم يعني طلوع و خشوش بس لانها اعقل من انها تسلم روحها لشاب عارفه ان يضحك عليها
المهم مرة من المرات و هي خاشة للكليه نست نقالها في السيارة وخشت ولما بابا شاف النقال رد عشان يعطيهلها ول سوء حظها" او لسوء حظي اني وخواتي يلي ما ليناش دخل" بابا شافها و هي طالعة وراكبه مع ولد و ع طول قدم بالسيارة و ضربها و الولد نزل يشوفها و بابا نزل ضرب الولد بوكس ع وجها و شيع منى من شعرها و حطها في السيارة و منها حلف علينا كلنا ما نخشو كليه و ما نديروش نقال طبعا القصة هادي ما طلعتش من حوشنا حتى راجلها و عيالها ما يعلموش بيها ويلي شافها مكسرة قالوله دارت حادث اما القرايه ف ما حد علم بسبب قرار بابا المفاجئ ومنها وحني كل خواتي يقرن الثانويه و يقعمزن