السماح_والشيخ

1

السماح_والشيخ

البارت الاول....

شما دار الزمن وبعد خل يندار
يظل مرسى السفينه عند اهل الانبار
مضايفهم زهيه وعامره الدلات
وعزيمتهم ذهب مايعرف الزنجار
اهل نخوه اعربيه والكرم والجود
لان كلهم شهامه ازغار ويه كبار
ليوث وبالمواقف الهم الف حساب
واذا عايل سحگها الگاع تجدح نار
منبعهم اصيل ويشهد التاريخ
سيوف مجربه برگاب كل غدار
"""""""""
والله والنعم من اهلنا بكل محافظات العراق ماعليهم زود
&&&&&&&&&&&&&&&&&&&&&

مهما تكلم الرجل فلايستطيع شرح الحب عكس المرأه يكفي ان تنطق المرأه بكلمه لتقلب كيان ذاك الذي تاب قلبه عن الحب
وتذيبهٌ بنار عشقها لتجعل من ذلك العشق سراجا ينير حياة معشوقها

وكيف لاتنير حياته وهو اقرب الناس الي قلبها وشريكها بدمها قبل ان يشاركها بحياتها

؟؟: يله بسمه سولفيلنه
بسمه :ههههههه
؟؟: احـجي كافي ضحك
بسمه : يول يابه استحي
؟؟: يبعد عيوني ونظرها سولفي واخذينه وياج لاحلى لهجه
بسمه : عجل يابه تامرون امر يبعد بسمه واهلها

اسمي بسمة مواليد ١٩٦٨ من محافظه الانبار تحديدا الرمادي عندي خوات ثنين نهلة ولميعة واربع اخوان كريم وشهاب ومحمد ومحمود اختي لميعة جبيرتنه والجبير الله واني زغيرتهم
احنة بطبعنه ناس تاخذ من ناس ما عدنة زواج غصب بَـس بنفس الوكت ما عدنه بنية تطلع للغريب خواتي واخواني كلهم متزوجين الي ماخذ بنت عمة والي ماخذ بنت عمتة والي ماخذ من خوالة المهم ماكو غريب بلموضوع
ابن عمي يريدني واني هم اريدو وجثيراحبو بعدو يدرس وانتظرو لما يخلص ونتزوج
اختي لميعة مزوجة ابن خالتي خوش رجال وجبير اهلو واختي نهلة ماخذة ابن عمي الي ابو هو شيخ عشيرتنة
خطية نهلة صـح ابن عمي يحبها جثير بس حياتها حيل صعبة لانو هي جنة ابيت الشيخ ودائما خطار وهي عدها خير من الله جهال فمتبهذله اما اخوتي كريم وشهاب ماخذين بنات عمي الشيخ الي هنة خوات زوج نهلة ومحمد ومحمود هم ماخذين خوات بَـس بنات عمتي وكل واحد منهم عندو فريق جهال

ورة مدة خلص ابن عمي دراستو وخطبني بس گال مـا نضل هينه (هنا)بالرمادي لازم نعيش ابغداد لانو طلع تعيينو هناك بلبداية كلهم عارضو
ومالاگلهم (عجبهم)الوضع بَـس بعدين اقتنعو
ورى مدى تزوجنه وعگب اربع اشهر تحولنا لبغداد وكل خميس انحدر لرمادي انبات ونرجع ثاني يوم بداية الامر اختنگت من مكانة مـاحبيتو ابد لانو متعودة على ديرتنة وعربنة وجونة وخضارنة الي يشرح الصدر شگد مااحجي على جمالها مـا اوفيها حقها
مشت حياتي وشوية شوية تعودت واحلى عيشة عايشة وية ابن عمي واني اسعد وحدة وصار عندي صديقات وجوارين حتى كمت اسولف مثلهن مر على زواجنة سنتين وكل هالوكت و ماعندي ضنى بَـس حسن ابد ما حجة وياي وفتح موضوع الخلفة بَـس آٌنـّي القهر كتلني وبس افكر ليش ماصار عندي جاهل وانوب كلهة تسأل مصار عندج شي عاد بديت اراجع الاطباء 😔
ما خليت طبيب مارحتلو كلهم كالو ما بيج شي مرة من المرات حسن گال آٌنـي راح افحص بلچي العلة بية
بسمة : شسالفة حسن أنــتوا ما عدكم واحد ما يخلف شو اهلك الي ميريد ايخلف عندو ست جهال
حسن : وانتو هم يبسمة كلهم مخلفين بَـس لازم نشوف الوجع وينو حتى نداوي
بسمة : عجل توكل
حسن : ول يابة اذا صار عندج جاهل تعزي اكثر مني
بسمة : يبعد بسمة وعشيرتها والله ماياخذ معزتك غير الخلقك
حسن : ول يابة هونج علية ماتحمل هسوالف آٌنـي
بسمة : ههههههههه
وراح حسن وفحص والي ما توقعتو صار طلعت نسبة الخلفة صفر
ومستحيل يصير عندو ضنى
حسن : ول يابة تعاي جاي احاجيج
بسمة : گول يبعد بسمة واهلهة
حسن : بسمة آٌنـي رجال عقيم وانتي بعدج بعز شبابج يولي لا اضيعين عمرج وياي
بسمة : ول يابة شلي بلخلفة اذا مو منك
دحگ علي عليش مدنج راسك (منزل)حاجيني 😭
حسن : شجرالج يبسمة فكري زين الندم ماينفعج بعدين😔
بسمة : گمت لحيلي (وگفت ) وتگلطت علي (اتقربت يمة ) حسن دحگ علية لاني اول ولاني اخر مرة مايصير عدها ضنى (طفل) وما تعرف شمكتوبلنة بلجي ربك يرزقنة العمر جدامنة وجثير ناس عگب سنين صار عدهم فمو بعيدة على الله
حسن : بسمة جدامي تحجي وتبجي واني مبحلگ عيوني ادحگ عليها (اباوع ) يولي اگلج النسبة صفر
بسمة : ريتك يبعد بسمة واهلها سد هلموضوع ولا تطريه بعد اذا تودني وتغليني وكمت ابجي 😭😭
حسن : هدي هدي يبعد حسن انتي يولي والله لجل عيونج كلشي اسوي بَـس لا تبجين يول يابة دموعج عزيزات
بسمة : حضنتو ومن لحضتها انسد الموضوع الخلفه بس بقينة كل منحدر (نروح) لديرة يسألونه بَـس شنسوي هَََـٰذا امر الله بعد والكل عرفو الصوج مني وحسن ما قبل راد يگللهم الصوج بي بس اني ما رضيت ومشت ايامنة يوم احلى من يوم ما اخفي انو بقيت بحسرة الضنى بَس ماباليد حيله اتماشيت وية الوضع ومشت الايام وصارنة خمس اسنين من تزوجنة
يوم من الايام حدرنة لديرة وگلعادة سيرنة لبيت ابو الحارث رجل اختي نهلة طبعا نهلة صار عدها اربع بنوات الي هنة علياء وسحر وشذى ونورس وست ولد حارث وفهد وحسام

وعبيدة وعبدالله وعبد الرحمن وماشاءالله كلهم كبار
نهلة : هلا بيج يخية شلونكم
بسمة : المهلي ما يولي يخية بنص الخير احنة
شبيج يخية شو مصوفره
نهلة : ولج لان حامل
بسمة : ول يابة ولدج كبار شسوين بي
نهلة : صار بعد واليجي من الله ياحياه الله
بسمة : الله يسهلج ويگومج بسلامة
گاعدين على الغدة جان نهله تگول
نهلة : يول بسمه ماراجعتي بعد
بسمة : ول يخية هاي السالفة سديناها لانو ماريد حسن يتكدر خاطرو وهو كل هلسنين ساكت وصابر لخاطري
نهلة :بسمة احجيلي الصراحة تتمنين يصير عندج ضنى
بسمة : ول يابة هَََـذا يوم المنى
نهلة : عجل يخية الي بطني الج
بسمة : من گالت نهلة الي بطني الج اهجس رويحتي طارت من الفرحة
بَـس ينهلة بلچي ابو الحارث مايرضى
نهلة : آٌنـّي اخذت شورة گبل لا ابشرج
بسمة : شحلاتو هالخبر عجل اگوم ابشر حسن
وفعلا بدينة انتحضر آٌنـي وحسن لجية الطفل ما مصدكين راح نصير اب وام حسن يمكن جان فرحان اكثر مني مرت الايام وصار موعد الولادة
طبعا اختي من قربت ولادتها حدرت لبغداد علمود من تجيب الطفل يتسجل بسمنة
اخذناها للمستشفى والحمدلله الله سهللها وجابت بنية حسن شالها واذن بأذنها وسماها سماح وسجلاناها بسمنا آٌنـي صرت امها وحسن ابوها
طبعا جانت فرحتنا ماتنوصف
جثير اشياء مرت بحياتي حلوة بس ولادة سماح جانت احلاهن
آٌني محضرتلها حليب وممة ورضعتها جنت مامصدگه صار بحضني طفل ورة يومين نهلة گالت رجعوني لديرة حاولنا وياها بَـس مـا قبلت ووصتنه منطلع البنية الة تطلع الاربعين وفعلا مـا طلعناها
آٌنـّي وحسن شايليها بكفوف الراحة وهي حلوة تخبل
عيونها عسلي فاتح وشعرها اشگر وبيضة وخدودها حمر اتخبل طبعا انخاف عليها من كلشي
ومن صار عمرها شهرين زرفت اذانها ولبستها تراجي وهي شعرها اشگر اجنن طلعت

مرت الايام والسنين وسماح كبرت وزاد جمالها بَـس هي محد يگدر للسانها وعنادها
مدلليها دلال وماكو شي تريدو وماجبنالهيا وفرناله كلشي
وحتى ديرتنا الي ماعدنه اعز منها قللنا روحاتنة كمنة مانحدر لانو جانت متحبهم ومن نروح تخلق المشاكل فقللنا روحاتنة

...........لازال للقصه بقيه ولازلت اكتـ✍ـب