♚▪▫لعبة الشطرنج▫▪♚

البارت 1

بقلم  : ♠ كاپيطوسة المغربية ⁦♠
الفصل الأول : 🎭 عشق السفاحين 🎭

▪هو  : كش ملك
▫ هي : كش ملكة
▪هو : ماكايناش الملكة فلعبة الشطرنج
▫هي : حيت بكل بساطة الملكة ماشي لعبة
▪هو : اذا علاش باقا شادة فجملة كش ملكة
▫هي : الملكة ماشي فاللعبة ... بلاصتها كاينا فوق اللعبة .. كاتحرك جميع البيادق و اللاعبين كالكراكيز ديالها
▪هو : العالم كايعرف كاين ملك واحد فاللعبة
▫هي : و انا كانعرف بلي الملكة هي لي كاتحرك الملك و فأي لحظة تقدر تقوليه " كش ملكة ".

" الحياة عبارة عن لعبة شطرنج كايجي واحد الوقت لي كايقولك فيه القدر كش ملك ولكن اش غايوقع ايلا جا شخص .. انسان بحالك بحالو هو لي كايدير حد لحياتك و يساليها بكش ملك؟ ممكن تكون هادي نهاية فيلم حياتك و ممكن تكون بداية فيلم جديد نتا او نتي هما الابطال ديالو "

🕛 تِك تٓك تِك تٓك 🕛

صوت عقارب الساعة كايتسمعو فالمكان ... فالبيت هدوووء تام و الظلام مالي ركانيه .. من غير شوية ديال ضوء القمر لي شاق طريقو من شقاق شرجم ... فووق ناموسية كان ناعس سارح عجووول الأخرة و مستحلي هدووء الليل و رطوبية الناموسية  حتى كايحس بقطرات باردة كاتنقط ليه فوق وجهو بدا .. كايمسح وجهو بيديه وكايخصر  سيفتو و كل مرة كايتقلب لجهة باش يتهنا من دوك القطرات .. فجأة ناض مخلوع إثر صوت تهراس ديال الشرجم ناض قافز من بلاصتو و بدا كايضور عينيه فالغرفة كيبان ليه خيال كايتمشى في البيت و كايهرس اي ديكور قدامو .. وقف الخيال و بقى عاطيه بالضهر كأنو لقا شي حاجة
........ : ج ج ج جيكساو ... كان واقف كايشوف في واحد ديكور على شكل قلب فالذهبي و فيه وجه مرا مغطية وجهها حتى قاطعو صوت داك الشخص لي عيط ليه بسميتو ... هز داك ديكور و ضار لعندو و بقا كيلعب بيه في ايديه و كايقرب منو خطوة بخطوة .. صوت خطواتو كسرو هدوء البيت و ركبو فيه رعب خلاه كامل كايترعد كيف لا و هو عارف شكون هو جيكساو و سامع بيه لكن عمرو توقع بلي غايكون من زوار جيكساو
......... : ( كايبلع ريقو ) اش ش ش بغيتي مني
جيكساو : ( قرب ليه حدة وجهو و هضر بصوت رقيق كفحيح الأفعى ) روحك ... كانت هادي اخر كلمة غايسمعها ديك الليلة
#صباح_اليوم_التالي
رجال الأمن مطوقين المكان و الصحافة كايتسناو شي فرصة تجيهم باش يلتاقطو شي خبر جديد على هاد السفاح المجهول
صحفي : حنا دابا كانتواجدو قدام منزل وزير المالية للنمسا لي كان البارح ضحية من ضحايا القاتل المتسلسل جيكساو
صحفية : الضحية 40 في لائحة السفاح الملقب بجيكساو لهاد شهر يا ترى واش غايكون هو اخر ضحية ولا مزال غايكونو جرائم اخرى
صحفي : و يبقى السؤال المطروح شكون هاد القاتل المتسلسل المجهول و شنو هدفو من قتل هاد الأشخاص و علاش لي مزال ماتشد باش تتحقق العدالة
صحفي 4 : علاش لي مزال هاد المجرم حر طليق و علاش لي مزال ما تشد واش غايبقا هاد الكابوس تابع سكان النمسا مدى الحياة
صحفي 2 : واش ممكن تكون مسألة تصفية حسابات او هاد القاتل عندو مرض نفسي
صحفي :  ... التسؤلات كترو و الرعب دخل لنفوس لي متتبعين اخبار هاد السفاح او بالأحرى نقولو هاد الجلاد الذكي لي كايقتل ضحاياه بأبشع الطرق لي تقدر طيح لكم على البال ... فالداخل كاينين افراد الشرطة العلمية كايبحثو فمسرح الجريمة و ياخذو صور و يحاولو يلقاو اي حاجة تنفعهم ... بصمات .. شعرات .. حمض نووي .. قطرات دم اي حاجة تقدر توصلهم لهاد القاتل المتسلسل لي كايستهدف فقط صحاب الطبقة الغنية هادي سيمانة قتل سفير فرنسا و البارح قتل وزير المالية للنمسا .. نفس القاتل .. نفس بشاعة القتل ... نفس وقت القتل لي هو 00:00 ... ولكن ادوات القتل و اسلوب القتل مختالف .. قاتل جلاد مطلوب دوليا حيا او ميتا لغز لي مزال مدوخ كلشي
الش.ع : هاد الموضوع طول بزاف لقيتي شي اثر للقاتل؟؟
الش.ع 2 : مزال مالقينا والو باقيين كانقلبو اكيد غايكون مخلي شي اثر موراه
الش.ع 3 : هاد الشخص 100% مريض نفسي شفت جميع جرائمو و طرق القتل ديالو هادشي كايدل بلي القاتل عندو عقدة نفسية
الش.ع 1 : كانظن المسألة مسألة تصفية حسابات راجعت سجل الجرائم ديالو لقيت اغلبية كايستهدف الطبقة المخملية
الش.ع 2 : الظن و الاحتمالات ماغاديش يفيدونا إلا ايلا كانو دلائل كايثبتو الإحتمالات
الش.ع 1 : الجثة سيفطناها لمختبر التشريح كانتسناو غير النتيجة ... يتبع