موروثنا الأصيل✌💎

👵🔥😹

في عزوز خشت علي شيبانيها
 في المربوعه لقاته ايوشوش بالتلفون
 ولما خشت عليه حول التلفون من علي ودنه وسكر الخط وحط التلفون تحته.
 العزوز وقفت قدامه قالتله
 مع من اتوشوش قولي ياخاين
 وانت ابقي عندك تلات كناااين
 قولي شن صابك
 كاثر وزايد هالأيااام اخيااابك
 اتهدرز وتلوي ياعمر في شنابك
 قدرك لروحك ليش مانك صاين
 شكلك تبي تعاود ايام شبااابك
 وانت معكرش ياعليك غبااين
 تشكي وطول اليوم شاد اجنابك
 ومن طز ليبآآآري اتخاف اتعاين
 رانك اكبرت وفاشلات اركاابك
 والكبر له مده فوجهك بااآآآآين
 وفي الكبر يامعفن بلغت نصابك
 رانك امعبي ياعمر خناااين
 يامضحكه ضحكوا عليك اصحابك
 خلوك تحكي مع عقاب عفااين..
 غير قولي لبعت الكروت ايش جابك
 وانت اللي كيفك امواات دفاااين
 تو الصيااعه اتزيد فيه ثوااابك
 ياللي فعيني قبل راجل كاااين
 مراهق اتصير الحق  ماانحسااابك
 من بعد ماعمرك اوصل الفاااين
 الشيباني مسكين تخزرط معاد
 عرف شن يقول ، سكت شويه
 وقاللها
نآ كنت نحكي مع علي بن عمك
 ياللي السم اتنقطي من فمك
 رن عليا
 ينشد علي حالي وعلي امياميا
 وانتي طلقتي طول شكك فيا
 وعالفوور فرغتي علياا سمك
 اغلطتي ومهزلتي بحالي وبيا
 جيتي بعنف اتشمري في كمك
 مانريد نرفعهن عليك ايديا
 ومانريد ينزل من خشومك دمك
 بالله نااا شن درتلك من سيا
 مايووم في عمري لساني ذمك
 قسوة كلامك فشلت رجلياا
 غميه فمك كان امري ايهمك
 العزووز ماعجبهاش الكلام
  رشقت ايديها علي جنابها وقالتله
 بلا كدب يابلعوط فضحك ربي
 من امتى علي اتقوله يااحبي
 اتقوله ياسميحه
 شكلك تبي مني اتجيك طريحه
 تحسااب روحك كي امير فريحه
 وانت علي حيلك عجزت اتصبي
 وفمك امعفن لين داير ريحه
 والكبد تزهق كي عليك انكبي
 وشعرك اصلع ماتجي تسريحه
 ومرات نلقى فيه قش امعبي
 وقاعد اتوشوش ياعليك بجيحه
 واتدير في روحك مريض امهبي
 ونآ اللي قريب انديرلك درجيحه
 لكن طلعت انسااان مش متربي
 ياعمر مني خودهآااااا النصيحه
 اعقل ومنك شيئ نآآ مانبي
 وصلي صلاتك ماتدير فضيحه
 وتقعد بعدها كي الدجاجه امخبي
 الشيباني بعد عرفها سمعاته
 وماعاد عنده ما ايدرق
 قاللها
 عليا استري ياسالمه يازينه
 ياللي بعقلك كامله ورزينه
 ياسالمه ياكبيده
 نا درتها راني امريره وحيده
 ونآآ نوعدك غلطي معاد انعيده
 ولا يوم نا مني تشوفي الشينه
 ياللي هديتيني اياام سيعده
 وفي العمر كنتيلي سند وعينه
 نآ في اقليبك منحكم تأبيده
 ولا يوم صارت في غلاك غبينه
 نآ نعتذر منك بلا ترديده
 يا امهندله ياللي كما القابينه
 من يوم يومك في الكلام شديده
 وكي تولعي تبدي كما السارينه
 نآآ نووعدك ننسى سريب حميده
 لايوم ليآيرفعوا الدفينه
 العزووز فنصت فيه قالتله من حميده
 اللي تكلم فيها ياضايع الشيباني قاللها
 حميده بنت عمك ، العزوز فصلت وشافت
 التلفون يرمش وهو عالصامت
 جت قربت منه خداته فتحت الخط لقتها حميده قالت ايوه عمووري ، ردت عليها العزوز قالتلها..
 ياخآآرجه لعنة الله عليكم..
 وعاللي علي هالسرسره امربيكم
 حميده سكرت الخط
 والعزوز قشطت ارداها وفاتتلها امشلده مشتلها للحوش وشيبانيها يجري وايطيح في جرتها ولما وصلت لحوش بنت عمها خشت
 ولقت حميده ترعش قالتلها
ياضايعه فوتيه هالشيبااني
 وديري غلا حتى مع سوداني
 حميده من الخوف اغمى عليها
 طاحت هبطلها السكر
 وخواتها قعدن ايبخن في الميه
 والعزوز برمت وروحت والشيباني يجري وراها ويقوللها شينك غباااره درتيها شكلك هالبنت قتلتيها والعزوز امروحه زي كليب مابتش تلتف
 لوراها بكل.
وبالنسبة للي يبوا ينشروا القصه هادي
 في أي صفحة او اي مجموعه  ايخلي اسمي

 تحياتي #الشاعر_حسام_ابوكرش