ترى يا قلبي احببت من

22

الفصل 22

وبعد مرور 4 شهور سامح وندي منتظرين في معمل تحاليل

سامح: حبيبتي انتي كويسة ولا لسة دايخة
ندي: لا دايخة شوية. ربنا يستر ونشوف النتيجة
سامح: ان شاء الله خير يا حبيبتي ولو طلع في حمل. مش عايزك تقلقي. فوفة مش هتتعبك ابدا وتخلي بالها منك.
ندي: انا عارفة يا حبيبي وانا والله نفسي ابقي حامل بس خايفة اتعب انت عارف لسة فاضلي سنة هعمل ايه مع الحمل والدراسة
سامح: متشليش هم انا معاكي ومش هسيبك. وطول ما انا في البيت معاكي هخلي بالي من البيبي وانتي ابقي ذاكري.
ندي: حبيبي يا سمسم. ربنا يخليك ليا. انت مفيش منك. بس يارب لو طلعت حامل يطلع ولد عسل زيك كدة
سامح: هههههه حبيبتي يا عسسسل انتي بس انا عايز بنوتة حلوة وزي القمر زيك كدة

الدكتور : خرج مبروك يا سيادة المقدم. مدام ندي حامل
سامح: ابتسم.الله يبارك فيك يا دكتور. متشكر اوي. وحضن ندي مبروك يا قلبي والله وهتبقي مامي
ندي: ههههه الله يبارك فيك يا حبيبي . انا فرحانة اوي يا سمسم انا هبقي ام
سامح: تعالي بقي لما نروح نفرح فوفة دي ممكن تقعد تزغرد لحد الصبح امي وانا عارفها
ندي : تعالي يا حبيبي وكمان نعدي علي ماما في الطريق دي هتفرح اوي
سامح: تعالي يا قلبي من عنيا

(وتاني يوم في مكتب مهاب)

مهاب: ايه حامل!!
سامح: هههههه اه ايه مالك اتفاجأت ليه.
مهاب: وانت عادي كدة. سيبتها تحمل مش خايف عليها
سامح: واخاف عليها من ايه مش فاهم
مهاب: بعصبية انت هتنقطنى. يعني مش عارف اللي بينخربوا ورانا ممكن يعملوا ايه
سامح: لا عارف بس هعمل ايه والله كل شئ بتاع ربنا انا هشغل نفسي ليه
انا المهم اتجوز وانبسط واخلف عيل حلو كدة يملي عليا حياتي. ولو بقي جرالي حاجة ولا مت يبقي علي الاقل سيبت لندي عيل مني يفكرها بيا وكمان يخلي باله منها.
مهاب: قصدك تسيب عيل لواحد غيرك يربيه ويا عالم يطلع كويس ولا لا وهيعمل ايه في ابنك من بعدك
سامح: يا ابني كفياك تشاؤم بقي انت ليه مسودها كدة. انت كمان لازم تغيرك دماغك وتخلي نغم تخلف.
مهاب: اتنهد. انا مش مسودها انا بس بفكرك لو ناسي. لاني انا مش عارف انسي اني ممكن في يوم اموت واسيب نغم لراجل تاني مش قادر اتخيل ان ممكن راجل غيري يلمسها. كمان عايزني اسيب ابني لا مستحيل
سامح: بس والله حرام عليك. نغم ذنبها ايه في دماغك دي وكمان. لسة لما تعرف ان ندي حامل اكيد هتزعل علي نفسها.
مهاب: اه يا سامح. كفاية انا اللي فيا مكفيني اسكت. وعوموما الف مبروك
سامح: لا والله انت لسة فاكر تبارك. بعد ما نكدت علي اللي خلفوني وعكننت عليا ربنا يهدك
مهاب: معلش يا سامح حقك عليا.
سامح: طب ايه مش يالا بينا نروح
مهاب: اه خلاص انا خلصت شغلي يالا بينا.

شقة نغم ومهاب

نغم: حبيبتي يا ماما نورتيني والله واحشاني جدا
سهام: انتي كمان يا حبيبتي وحشاني. بس انا زعلانة منك مش بتيجي ليه تشوفيني يا نغم
نغم: والله غصب عني انتي عارفة مهاب مش بيسبني اخرج لوحدي أبدا لازم يوصلني بنفسه واليومين دول هو مشغول جدا في المكان الجديد اللي اتنقل فيه. معلش متزعليش
سهام :لا ياحبيبتي خلاص مش زعلانة. المهم تريحي جوزك. ليكي عندي بقي خبر هيفرحك اوي
نغم: خير يا ماما قولي
سهام: ندي حامل.
نغم: حست بإحساس غريب. هي فرحانة لأختها بس كمان حزنت علي نفسها وانها مش هتقدر تكون ام علشان متزعلش مهاب.
سهام: مالك يا نغم في ايه
نغم: ايه لا ابدا مفيش. بس ليه ندي مقلتليش انا لسة مكلماها النهاردة
سهام: هي عدت عليا امبارح هي وسامح وقالتلي وانا اللي قولتلها متقولكيش وتسيبني انا اللي اقولك.
نغم : ابتسمت. الف مبروك يا ماما انا بكرة ان شاء الله هكلمها واباركلها
سهام: ماشي يا حبيبتي. ربنا يخليكوا لبعض. نغم انا عايزة اكلمك في موضوع الخلفة ده. انتي من يوم ما اتجوزتي مهاب بقالكم كدة سنتين ومحصلش حمل انتي مخبيه عليا حاجة
نغم: ايه لا وهخبي ايه مفيش حاجة
سهام: لا في يا بنتي لو عنك مشكلة نشوفلها حل ولا يكون مهاب عنده مشكلة
نغم: لا يا ماما مهاب كويس وانا كمان كويسة. وعلي فكرة انا اصلا حملت قبل كدة والبيبي نزل
سهام:!! ايه امتي وازاي مقولتليش كدة يا نغم تخبي عليا حاجة زي دي
نغم: اهدي بس يا ماما. انا هقولك فاكرة لما وقت من علي السلم انا وقتها كنت حامل واجهضت. بسبب الوقعة وانا ومهاب محبناش نقول لحد وكمان طلبت من الدكتور ادم انه ميقولكوش حاجة وقتها
سهام: طيب ليه بس وكمان لما انتي كويسة ليه محملتيش تاني
نغم : اتنهدت. انا ححكيلك.......
سهام: لا حول ولا قوة الا بالله. بس بصراحة مهاب مزودها. يا بنتي كل شئ بتاع ربنا ده ربنا مبيسألناش عن عبادة بكرة نقوم احنا نسأله عن رزق بكرة واللي هيحصل فيه
نغم: والله يا ماما قولتله كتير واتكلمت معاه بس هو دماغه ناشفة
سهام: بس ده حقك وهو كدة بيجي عليكي وبيحرمك من انك تبقي ام. طيب تحبي اكلمه انا
نغم: لا يا ماما اوعي. انا قولتلك بس علشان تبقي عارفة لكن مش عايزة مهاب يعرف اني حكتلك حاجة مش عايزاه يحس اني بشتكي حتي لو ليكي
سهام: بس انتي كدة مش لتظلمي نفسك
نغم: لا يا ماما انا مش بظلم نفسي انا بحب مهاب ومقدرش ازعله او اخسره علشان اي حاجة حتي لو كان الثمن اني مخلفش باقي عمري المهم مهاب يفضل مرتاح ومشيلوش الهم.
سهام: خلاص يا حبيبتي المهم انك مرتاحة. وفي الاول والاخر دي حياتكم وانتم حرين تعيشوها زي ما يعجبكم. طيب اقوم انا بقي
نغم: ليه بس خليكي معايا شوية
سهام: معلش يا حبيبتي اصلي لسة هعدي علي ندي وسامح علشان اودلهم هما كمان الاكل بتاعهم
نغم: والله انا مش عارفة انتي تعبتي نفسك ليه بس وعملتي كل ده
سهام: ولا تعب ولا حاجة. وبعدين سامح هو يا حبيبي اللي طلب مني طاجن ورق العنب والحمام امبارح قلت لازم زي ما هعمله اعمل لمهاب حبيبي
نغم: ههههه تسلم ايدك يا ماما. بس سامح هيفضل تاعبك كدة. ده من ايام خطوبتهم وهو هاريكي طلبات وبالذات ورق العنب ده وبعدين هو مش متجوز وكمان مامته جنبه لازم يتعبك
سهام: ولا تعب ولا حاجة وهو انا عندي مين غيركم اعمله يعني وكمان بيني وبينك بيقولي انه بيحبه ايدي
وان لا ندي ولا فريال بيعرفوا يعملوه زيي. وانتي عارفة لو فريال سمعته هتضربنا كلنا
نغم: ههههههههه. انتي هتقوليلي بس بصراحة ست طيبة وبتحب ندي
سهام: اه والله الحمد لله هي حماقية شوية بس قلبها ابيض. وحاطة ندي في عنيها وبتحبها اكنها بنتها.
نغم: ربنا يهنيها هي وسامح يستاهلوا كل خير.
سهام: طيب يا حبيبتي يالا تصبحي علي خير