ألم الماضي

😿

كعدت الصبح بعد مانمت واني ادعيلها
كمت. صبحت على ماما وبابا جان الوضع طبيعي مثل كل ايام هذا الأسبوع بس اكو شي
كلبي يوجعني واني من النوع الحدسي صحيح جنت اعرف راح يصير شي بس تجاهلت هذا الحدس عسى ايكون خطأ ماما راحت لدوامها بالصيدليه بابا راح للمستشفى دوامه هناك
اتصلت على اختها ماردت رجعت اتصلت على امها هم ماردت بقيت اروح منا واجي منا وادعي يارب سترك يارب لاتفجعني بيها يارب لاتختبر اهلها بيها جنت اعرف اليوم عمليتها وتحديدا  الساعه 2:30 باوعت للساعه 10 يعني بعد 4 ساعات
رجعت اتصلت على ماما كلتها تجي توصلني للمستشفى ماقلبت كالت عيب ومايصير وناس هواي ومن هاي السوالف ضليت الح الح بالأخير كالت حدز ابن عمج يجيبج مااكدر اجي
فرحت بدلت وحظرت روحي وكل هذا وكلبي مو طبيعي ديكولي شي حيصير واني اتجاهل واكول مامعقوله. الله يحفظها  واجذب على روحي جان اجه ابن عمي رحت وياه للمستشفى شفت امها واخواتها طبيعي الوضع سلمت وكعدت سألتهم عنها كالوا نايمه ماقبلوا ادخل منا لقبل العمليه بنص ساعه رحت سلمت عليها وهيه مبتسمه وتضحك وتسولف وعادي طبيعي طلعنا دخلوها قبل العمليه بنجوها واني عايشه بحالة قلق قبل ماتتدخل كالت كولي لكل الي يعرفوني خل يبروني الذمه ضلت احجي عليها وكلتها لتحجين هيج وطلعين بالسلامه ضلت امها تبجي ودموعي كأنها لكت فرصه وضلن يجرن عشره عشره وهيه نفس الحاله دخلوها واحنه ساعتين ونص كاعدات ندعي عمليتها بسيطه بس الخوف والقلق كتلنه وره ساعين ونص بالضبط طلع الدكتور وكال العمليه نجحت فرحت وضليت اضحك ودموعي تجري
روه نص ساعه اجو ماما وبابا طلعوها اول شي جانت تهذي بسبب البنج بعدين بدت تصحه على الألم انطوها مهدء وره ساعه اجه دكتور ظربها ابره مااعرف مال شنو بس الي اعرفها بيها بنسلين وهيه عدها حساسيه بنسلين ومامسويه تحليل  راح وره عشر دقايق بدت عيونها تصير حمرر دم ووجه ازق وماتتنفس انخبصنا وبدينا نعيط اجو الدكاتره ما لحكوا يسوون شي ماتت اي ماتت زنوبتي ورحي وحياتي واختي انصدمت ايام منزلت دمعه مني كل ساعه واكول جذب مابيها شي جذب هسه تجي بس ماكو راحت وراحت روحي وياها جان اسوء يوم بحياتي لحد هسه الله يعلم شمخبيه الأيام
27/2/2019  الله يرحمها ويجعل مثواها الجنه