اول امبارح كنت بلعب لعبة pubg وكالعادة التيم اللي انا داخل فيه كان مكون من أربعة لاعبين بس الغريبة ان كان كلهم مصريين ، دي نادرا ما بتحصل ، في الأغلب الأربعة بيكونوا من بلاد مختلفة أو ع الأقل التشابه بيكون في اتنين مش أكتر.
المهم أنا كنت رايح مشوار وكالعادة وانا راكب التاكسي كنت بسلي نفسي في اللعبة وحاطط الهاندفري في ودني علشان أسمع صوت رجلين الخصم كويس واحدد اتجاهه واقتله قبل ما يموتني ، المهم فتحت السماعات والمايك علشان أكلم التيم بتاعي وهم يكلموني في اللعبة علشان لو حد من الخصوم جاي عليا علشان يموتني وانا مش شايف هم يبلغوني بالاتجاه والعكس بردو انا ابلغهم لو شفت حد .
اللعبة فضلت 3 دقايق تحمل ، في ال 3 دقايق دول قلنا نتعرف ، قلت مادام كلنا مصريين يا جماعة تعالوا نتعرف فجأة لاقيت واحد فيهم قفل وقال انا ماشي ضروري ، معلشي يا شباب ومستناش لما يبرر سبب مغادرته ببساطة قفل ومشي ومعاها حسيت برعشة في الفون وصوت صفارة غريبة وكئيبة كدا ، النت فيه حاجة ولا دا من اللعبة ؟! ماعلينا .
المهم أنا بدأت أعرف نفسي ، قلتلهم محمود من المنصورة
رقم 1 قالي انا محمد الساعدي من شبين المنوفية 35 سنه فني أشعة ورقم 2 قال لازم يعني؟! وكنت حاسه متوتر شوية
قلتله ايه يا عم احنا هنخطفك ؟! احنا بندردش عادي على ما اللعبة تبدأ وبعدين انت الرانك بتاعك كراون 1 ( الرانك اللي هو تقييمه في اللعبة وبتبدأ من بلاتينيوم وبعدين برونز وفضي و دهبي و كراون او تاج وهكذا يعني) يعني لعيب وهضيفك عندي فهنتعرف عادي.
اتنهد كدا وبعدين قالي أمري لله انا عادل الششتاوي 38 سنة من التجمع دكتور مخ و أعصاب قلت تشرفنا محمد تشرفنا يا عادل ، حاسس اني بلعب في مستشفى ، ضحكوا ع الإفيه البايخ دا تقريبا علشان يجاملوني.
انا كنت رقم 3 في اللعبة ورقم 4 خرج قبل ما يعرفنا بنفسه بس حتى بعد ما خرج كان اسمه لسه مكتوب انه ف الجيم تقريبا في مشكلة عنده في النت وهو استأذن علشان ميخسرناش الجيم المهم الجيم بدأ .
ولسوء الحظ أول ما نزلنا من البراشوت نزلنا في ( بوشينكي) واللي بيلعب pubg عارف يعني ايه تنزل في ( بوشينكي) يدوب لسه نازلين كانوا الخصوم مستنيين بالسلاح واحنا لسه نازلين من غير سلاح نزلت انا ومحمد ف حته فاضية نسبيا وجرينا دخلنا بيت بس للأسف عادل نزل قدام تيم كامل وبالطبع قتلوه قبل حتى ما يلحق يدخل البيت .
قلتله ف المايك ايه يا عم عادل انت مت ؟! احنا لحقنا ؟! اومال بس ال رانك بتاعك كراون ع الفاضي ؟! ضحك عادل وقالي يا عم هم موتوني وانا لسه موصلتش لسلاح انا اول ما نزلت بالبراشوت ع الارض هم اصطادوني وكانوا تيم كامل ، قلتله ماشي ياعم ، قالي ركز انت بس في واد جاي من ورا البيت ارقد علشان ميشوفكش.
رقدت ع الارض فعلا وقتلت اللي كان جاي من ورا البيت قام عادل ضاحك وقالي عيب عليك ، قلتله اشطه يا رجولة ، محمد قاطعنا وقال بس بقى ياجدعان مش عارف اركز ، عاوز اسمع صوت رجلين العيال دي ، عادل قاله ماشي يا عم سكتنا اهو وانا سكت بردو وابتديت اركز ف اللعبة وقتلت اتنين تانيين.
كنت لسه راكب التاكسي بس مشغول جدا في اللعبة ومسمعتش حتى السواق وهو بينادي عليا غير من المرة الرابعة تقريبا ، شلت الهاند فري من ودني بس لسه كنت باصص ف الموبايل خايف حد يجي يموتني وانا ببصله ، المهم قالي : انت قلتلي نازل شارع المجزر ولا الترعة ؟! قلتله الترعة يسطى شارع الترعه ، وحطيت الهاند فري تاني في ودني ،السواق لمحته كدا بيبصلي باستنكار بس مش مهم هو عنده حق .
المهم ف وسط انشغالي انا ومحمد ف اللعبة وعادل ساكت خالص علشان نركز ،
فجأة سمعنا صوت دوشة كدا قلت لمحمد الدوشة دي عندك ؟! قالي لا وهو مستغرب فقمت سائل عادل قلتله عادل الدوشة دي عندك ؟! عادل مردش عليا والدوشة بتزيد سألته تاني بقلق الدوشة دي عندك يا عادل ؟!
عادل مبيردش بس الدوشة بتزيد وفي صوت تكسير وخبط كتير وبعدها سمعت صوت طلقة رصاص وبعدها صرخة وبعدين طلقتين وسكووووت تام مفيش صوت بعدها.
انا ومحمد فضلنا ثواني محدش فينا بيتكلم من الصدمة بعدين بصوت مبحوح سمعت صوت محمد بينادي يقول عادل ، يا عادل ؟!
رد عادل وقال : انا تمام يا جماعة مفيش حاجة هتلاقي النت هنج بس ، ها مين مات فيكم ؟!
محمد قاله خضيتنا يا عم انت مشغل التليفزيون ولا ايه ؟!
عادل قال اه كنت بتفرج ع فيلم و جت لقطه عجبتني فعليت صوت التليفزيون ، كل دا وانا ساكت ولسه تحت تأثير الصدمة .
أخيرا فقت علي صوت محمد وهو بيقولي محمود رحت فين مردتش عليه واخدت نفسي وقلت وانا بوجه كلامي لعادل :
انت مش عادل !
رد اللي كان بيتكلم علي انه عادل وقال بغلظة ، لو حد فيكم فتح بقه بكلمه هوصلّه وهقتله وهيحصّل صاحبه ، فاهمين ؟!
قالها واسم عادل اختفي من الجيم تقريبا فصل النت
المهم انا مش قادر افوق من الخضة ووشي كان اصفر حرفيا من الخرف و القلق مفقتش الا علي صوت محمد وهو بيبكي وبيقولي :
.
.
.
يتبع ...
لو عجبتك فدي مجرد البداية باقي الأحداث وصولا للنهاية حاجة تانية خاااااالص
للمتابعة وقراءة المزيد من القصص المثيرة يرجي متابعتي على facebook ، افتح اللينك واضغط متابعة ( follow )
لينك الأكونت :
https://www.facebook.com/mahmoud.elmadawy.1
#جريمة_في_pubg
#محمود_المعداوي
أنت تقرأ
جريمة في pubg
Mystery / Thrillerلم يكن لمحمود بطل القصة أي ذنب في تلك الجريمة التي تمت ولم يكن ينتمي لتلك الجماعة إلا أن حظه العثر قد ألقى به بمحضي الصدفة في طريق جريمة لتصفية الحسابات بين جماعة متطرفة وطبيب مصري ، كل ذنبه أنه اختار هذا الوقت ليبدأ به لعبة طالما أحبها ، pubg , ليت...
