حبيبتي.... لا تنسيني

الحلقة ال13

حبيبتى .... لاتنسينى

الحلقه التالته عشر <3 <3

وهنا كانت نهاية هالمشوار لفرح ...واخر احساس ممكن لو كانت تحسه رح تحسه بين اهلها واخواتها ... وبينها وبين اختها الا امنتها على اكبر سرها ..... السر الا رح يندفن فى قلبها تحت تراب ... مع كل امنياتها اتجاه اختها .. امنيات كانت تستنى فيها باللحظه ... وتحديدا هاللحظه الا كانت تستنى فيها ملاك ماسك فى ايدها احمد وهيا تزغرط وراهم وتوصل فيهم لحوشهم ... بس للاسف هما سبقوها وبكو عليها قبل ماهىا تزغرط عليها وتفرحلهم ...
<3 بعد  مرور 7 اشهر على موت فرح ....
ملاك .. صباح الخير ماما ..
امها .. صباح الخير .. ااااه يارسى ااااه .. صداع بنموووت منه ...
ملاك ... ماما لامتى بتقعدى تبكى ؟؟ والله والله لو تصير فيك شى انى نموت ياامى .. انتى الا باقيتلى من ريحة اختى بعد صغارها ...
امها .. شن عاجبك يابنتى .. صغارها طول الليل وهما فى حضنى ويبكو .. يبو امهم ... مرو شهرين وكانا امس  ... بس الله غالب .. هدا ربى وهدا حكمته ..
ملاك .. خلاص هاتيهم منك وانتى برى ارتاحى ... وانى رح نقعد جنبهم ..
امها .. لا لا .. انتى ديرلى قهوه بس وانى توا نصحصح ... هما توا راقدين اصلا ..
ملاك .. مش عارفه لو فكر بوهم ياخدهم كيف بندير .. حاستهم صغارى خلاص ..
ام ملاك .. هههه ضحكى .. امس العزوز اتصلت وقالت اليوم جايتكم العشيه فى موضوع ..
ملاك .. شن هوا موضوع ؟؟
امها .. والله ماانى عارفه بس ربك يستر لانا صوتها مايطمن ... مهم ردى بالك من صغار كانا ناضو .. بنخش ندوش ونطلع ..
ملاك .. ماشى خلاص <3
خشت ملاك للمطبخ .. وبدت توتى فى فطور ... واول ماحطت براد الشاهى على نار .. سمعت تلفونها يرن .. فامشت لدارها وردتها وخجت تلفونها وفتحت الخط ..
ملاك .. ايو حبيبى <3 صباح الخير <3
احمد ... صباح الورد ... شن اخبارك اليوم حبيبتى ؟؟
ملاك .. اهو عادى . . زى اليوم زى امس زى بكرا .. وانت شن اخبارك ؟؟
احمد ... انى مستاحشك هلبه .. وعارف انا الا نبى نقوله مش وقته .. بس والله انى تعبت ونبى نكون وفى حوش واحد ...
ملاك .. ان شالله حبيبى <3  .. << وسكتت شوى وهوا سكت .. وهنا قالتله >> ... خيرك ساكت .. عندك شى بتقوله ؟؟
احمد ... فتحتى مع امك موضوعنا امس ؟؟
ملاك ... << مع تنهيده >> احمد افهمنى .. احنا قاعدين ماجفو دموعنا على فرح .. كيف تبينى نفتحلها موضوع ..
احمد ... انى مش طالب شى كبير ... انى طالب انا اهلك يعرفو بس ... ملاك انى حاسس رح يصير شى يبعدنا .. ولدلك خلى الكل يعرف انى نبيك ..
ملاك ... رح نكلم امى اليوم العشيه بعد مايروحو اهلك ان شالله ...
احمد ... علاش جاين هما ؟؟
ملاك ... مش عارفه بس اكيد بيطمنو على صغار وبيشوفوهم <3 مهم .. انى استاحشتك <3
احمد .. حتى انى <3 وخاطرى نشوفك ... انى ليا 7 شهور ماشفتكش ...
ملاك ... هانت حبيبى ... اول مانرجع نمشى للجامعه رح نتلاقو اكيد <3
احمد ... والله برغم المصيب هالا صارت الا انى مش قادر مانفكرش فيك ... اليوم خطمت على محل اتات .. وبصدفه لقيت دار نوم الا عجباتك قبل 7 شهور مازال فى عرض <3 فاخشيت طول بدون مانفكر وحجزتها وبيجو يركبوها العشيه ...
ملاك ... اااااى يااحمد ... انت بالك وين .. وانى وين .. والله حتى نسيتها <3
احمد ... عارف والله .. بس انى قاعد نحلم كل يوم انك تكونى ليا ... وانى وعدت فرح الله يرحمها .. ورح نكون قد الوعد لاخر لحظه .. وبعون الله رح تكونى ليا <3
ملاك ... ههههههههه ولو مش ليك ؟؟
احمد ... قسما بالله الا يفكر نقتله ونقتلك ونقتل روحى معاكم <3
ملاك ... ههههههههه مقبره جماعيه مالا ههههههههه ...
احمد .... تى قسما بالله لو تكونى لحد غيرى احتمال نهببببببل .. شن تقولى انتى يابنت راك كبيدتى <3
ملاك .... شن هالرومانسيه على صبح هيا ... شكلك امس حلمت بيا ..
احمد ... لو نقولك اى تصدقى ؟؟
ملاك ... على حسب حلمه هههههههه ... كيف طلعتلك ؟؟
احمد ... حلمت انا خوك يدرج فيك ليا ... وانى خديتك من ايدك وقعمزنا فى الكوشه ... وفجأه هبلت وقمتك فى غمرى وطلعت بيك لسياره ... وعلى الحوش طول وهنا ..<< قاعد ماكملش جملته قطعت عليه وقالتله >>
ملاك .... ااااااااااااااص خلاااااااص هدا الجزء مش ظرورى تحكيه ..
احمد ... والله نيتك خاربه انتى ههههههههه بس فهوميه <3
ملاك ... عارفاتك .. ماتصدق .. مهم ماما حسها طلعت وانى قاعده ماوتيت الفطور .. خلاص باااااى وفى الليل كلمنى توا نحكيلك شن صار معاى <3
احمد ... خلاص امتى ماتفضى وتكلمى امك ابعتيلى رساله <3
ملاك .. اوك حبيبى <3 باى
احمد .. مانسيتى شى قبل ماتسكرى ؟؟
ملاك .. اااااااااااااااااحمد .. هههههه مانسيت شى بااااااااى <3
احمد .... <3 باى ..
سكرت ملاك تلفون وخشت للمطبخ بسرعه وهنا طفت على شاهى ودارت القهوه ووتت الصفره ... وقعمزة .. واول ماخشت امها للمطبخ قالتلها ..
ملاك ... << حطت طاسة الشاهى على طاوله وقالتلها >> ... ماما .. نبيك فى موضوع بعدين <3
امها ... تكلمى ... شن فى ؟؟
ملاك ... انتى توا راسك ومش راقده كويس .. اشربى قهوتك وخشى ارتاحى ... وبعد مايروحو ناس توا نتكلمو <3
امها ... ماشى ماشى ... ااااااى معقوله ظهر توا ؟؟ مسرع الوقت يجرى ..
ملاك ... نوضنا اليوم موخر ماهو .. يالله .. انى توا نظم الحوش ونحط الغدى على نار .. وانتى خشى ارتاحى لحد مايطيب الغدى ...
امها ... باهى خلاص .. انى خاشه لدار .. وكانا جو خوتك ... قوليلهم مايخش عليا حد ..
ملاك .. ماشى خلاص ...
كملو فطورهم بصمت وبعدين ناضت امها وتكت على الفراش .. بينما ملاك ناضت وبدت تضم فى مطبخ وحطت الغدى على نار .. وبعدها طلعت تظم فى الحوش ... ومع ساعه 4 عشيه كان الغدى واتى ... فاندت على الكل باش يتغدو .. وبعدين قعمزة هيا وامها تتغدى فى نفس صفره ... ووكيف كملو غداهم وبيقيمو الغدى .. رن الحوش ..
امها .. ملاك نوضى شوفى منو ... هادى اكيد خالتك مهيبه ..
ملاك .. ندخلها للجلسه ؟؟
امها ... ايه .. وخشى لدار تلقينى مغيرتلهم توميه حوايجهم .. انتى بس بودريهم على رقبتهم واسلتيلهم شعرهم وجيبهم ...
ملاك .. ماشى خلاص << وطلعت >> ..
ملاك .. اهلين خالتى مهيبه .. شن حالك اليوم ..
خالتى مهيبه .. سلمك بنتى سلمك .. هاتيهم هاتيهم منك وتعالى جنبى ..
ام ملاك ... شن اخبارك .. شن ريح الا جباتك ؟؟ والله استاحشناك ..
خالتى مهيبه .. والله لولا مرضت الحاج ماكنت غبت عليكم .. واهو اول ماروحنا بيه من توان سجيتك طول ..
ام ملاك .. حمد لله على سلامته .. والله انى امس من لما قولتيلى نبيك فى موضوع قولت ان شالله خير ...
خالتى مهيبه ... كل خير ان شالله ... هما موضعين الحق هههههه
ام ملاك .. ههههه ان شالله خير .. تفضلى <3
وهنا شبحت خالتى مهيبه لى ملاك وابتسمت  وقالتلها ..
خالتى مهيبه .. هوا انى عارفه والله ماهو وقته .. بس الله غالب الواحد مرات ظروف تغلب عليه ... مهم انى جايتكم فى كل خير ... وكل المطلوب انى نطلب ايد بنتك لولدى <3
وهنا ملاك ضحكت من قلبها وانصدمت من الخبر لانا احمد ماقاللهاش ودار روحه مايعرفش ... ونزلت عينها وتستنى فى ردة فعل امها ..
امها ... والله هوا مرحبتين بيكم فى اى وقت .. بس ماتحسيش انا الوقت مازال على هالموضوع ؟؟
خالتى مهيبه ... عارفه ياوخيتى وعداك العيب ... بس الصغار مستاحشين بوهم ومن حقهم يكبرو قدام عيونه وفى حضنه ... ومع وحده زى امهم خير من حد برانى عليهم ..
وهنا ملاك نزلت عليها صاعقه خلتها فتحت فمها وشبحت لامها ... ولقت امها كدلك تشبحلها ومصدومه ... بس برغم هدا خالتى مهيبه كملت وقالت ...
خالتى مهيبه ... الله غالب يابنتى ... محمد قالى صغار اليوم لازم يرجعو للحوش ... وانى مانقدر نخليهمله بروحه ... ولاعندى حمل ليهم بروحى ... وفى الاخير صغار بنتك يتربو مع بنتك ملاك خير مايتربو مع بنت اختى ... لانا لو انتم رفضتو ... اكيد مش رح نخلى صغاره يتشردو ومن حقهم تكون جنبهم وحده تراعيهم وتهتم بيهم فى حوش بوهم وقدام عيون بوهم ... وهالشى رح يصير اجلا ام عاجلا ...
ام ملاك ... بس صغار انى مستعده نقيمهم ومانخليهم يحتاج وشى .. وامتى مايبى يشوفهم مرحبتين بيه ...
خالتى مهيبه ... والله ياوخيتى حاسه بيك بس اولى بيهم يتربو مع بوهم طالما هوا عايش من انا يتربو هنا ... وهما ولاد فامحتاجين يكبرو ويلقو بوهم معاهم وعينه عليهم ...فا انى قولتله يصبر باله ويعطيكم فرصه تفكرو وحتى صغار يقعدو عندكم هاليومين .. وبعدها تقررو وتردو علينا ....
ام ملاك ... << مع دمعه تعبت فى عينها وصدمه >> والله ماعندى شن نقول ياوخيتى ... ربى يسهل ان شالله ...ملاك نوضى ديرى قهوه ..
وهنا ملاك من صدمه قعدت تشوف لى لاشى ... فى عالم تانى ... لين امها عاودت اسمها مرتين ... باش فاقت ... وهنا طلعت بسرعه تجرى وخشت لدارها وسكرتها عليها وتلوحت على سرير وانهارت بالبكى ... اما خالتى مهيبه ... فابمجرد ماطلعت ملاك ... قالت لى ام ملاك وفرح ..
خالى مهيبه ... والله ماكم مدايرين حاجه ... ولد خوى يستنى فيا لوطه اهو رنلى ... ان شالله مره الجايه نقعد ونبات حتى ...
ام ملاك ... مرحبتين بيك فى اى وقت تفضلى ...
خالتى مهيبه ... خليك فى مكانك والله ماك نايضه .. نعرف الباب ... ونطلع بروحى ... هيا بسلامه .. بسلامه ..
طلعت خالى مهيبه ... وناضت ام ملاك وقعمزة على كنبت وسط الحوش وحطت ايدها على راسها وانهارت بالبكى ... والافكار تلود وتلف وتلود وتلف ... ومش لاقيتلها طريق ... وماقطعش دموعها وتفكيرها الا خشوش ولدها وليد ..
وليد ... ياما خيرك تبكى ؟؟
امه ... مصيبه ونحطت على راسى ..
وليد ... شن فى خيرك ؟؟
امه ... عزوزة اختك فرح الله يرحمها .. جايه وتساوم فيا .. بتاخد صغار عندها ... وتبى تاخد ملاك لى ولدها محمد يااما بتخطبله بنت اخته المطلقه باش تربى صغار خوتك ..
وليد ... هوا بياخدهم صغار ؟؟
امه ... اى وقبل يبيهم اليوم ... بس هيا قالتله خليهم عندهم لين يفكرو ..
وليد ... هوا فى نفس الوقت عنده حق .. مايبيش صغاره يبعدو عليه ... بس والله ماانى عارف شن بنقولك ..
امه ... كارت هانا صغار والله مانرضى هديكا الوسخه تربيهم لو كان نقتلهم ونموت معاهم ... انت ماتعرفش اختك قداش كانت تكرهها ...
وليد ... علاش ؟؟
امه ... كانت مدايره علاقه معاه وبعدين ماصار نصيب .. وكانت تكره اختك وديما متقلده عليها ... وحتى صغار كل ماتشوفهم دمها يتقادح سم سم ... بالله قولى .. كيف بنوتق فيها وحده زيها تربى صغار .. معقوله الد اعداء اختك الله يرجمها تربى صغارها ..
وليد ... معناها مافى حل الا ان ترضى بنتك وتوافق وتتزوجه .. وبصراحه الولد مافى منه ومايتعيبش ومارينا منه شى ..
وهنا طلعت ملاك وقالتله ...
ملاك ... مش رح ناخده لو كان تتقربع دنيا على لوطه ...
امها .. سكرى فمك وكلمى خوك بااحترام ...
خوها ...شفتى قلة الادب ؟؟ تقول تتكلم مع عيل .. مالا قسما بالله الا ماتاخديه لو كان تنطبق اللوطه على الارض ...
ملاك .. مانبيشى انى مش بسيف الحكايه ..
خوها ... بسيف ... لما موضوع يخش فى زوز صغار بينظلمو فى نص معناها بسيف ... ولو فى حد فى حياتك تكلمى وانطقى ..
امها ... الولد مافيش منه ولد ناس وعيله .. وكان صاين اختك ... وصغار فى رقبتنا قبل رقبته .. حرام عليك يابنتى تعدبى اختك فى قبرها ...
وهنا انهارت بالبكى وقالتلهم ...
ملاك .... << مع انهيار ودموع >> حرررررام عليكم انى مانبيشى .. علاش تتصرفو معاى هكى انى مادرتلكم شى .. وخشت وقربعت باب دار عليها ... وقعمزة على سريرها  تبكى زى عيل وتفكر فى احمد والدار تلف بيها وتدور وصوت صغار اختها واختها فرح فى ودانها وعياط خوها ونبرة التحدى الا فى عيونه .. ودموع امها الا ماكفوش حتى فى وجود صغار فرح مش يادبك لو فقدتهم ... وهنا بس حست ملاك لو انها ماتت بدل اختها كانت اكيد رح ترتاح هيا وترتاح العيله كلها ... لانا الكل حملوها فوق كتافها وكأنها السبب فى موت اختها ةلازم تدف تمن .... وبين هالافكار ودموع رن تلفونها .. فاناضت وهيا تبكى وشدت تلفون .. وبعدين حطت ايدها عل فمها وزادت انهمرت بالبكى لما شافت رقم احمد ... واول مانفك الاتصال ... فتحت رسائل وبدت تكتب فى رساله ...
يتبع ..
Kinda