الحلقه الثالثه
نوفيلا همس الذكريات
بقلم سحر فرج ❤💚❤
الحلقه على الوتباد
https://my.w.tt/lClpIpovQU
قفلت ريهام مع هدير وراحت بسرعه علشان تبلغ جاسر وحازم بالكلام اللى هدير قالته ليها عن موضوع ماكس ده واللى حصل منه فى شرم الشيخ .
وفعلا راحت ريهام وبلغتهم بالكلام ده والكل اتصدم من كلامها لكن كان فى واحد سرحان و بدأ يسترجع كل اللى حصل من ماكس ده وهما فى شرم وافتكر نظراته ليهم وهو خارج من الفندق واشارته ليهم بأيده أنه مش هايعدى الموضوع ده على خير .
جاسر ... ايه يا حازم الكلام ده فعلا حصل وانتم فى رحله شرم وايه حكايه ماكس ده بالضبط فهمنى وعمل معاكم ايه .
حازم .. انا هاقولكم على كل حاجه وكويس أن حضره الضابط لسه موجود .
وفعلا بدأ حازم يحكى ليهم كل حاجه حصلت معاهم فى شرم من ساعه لما شافوا ماكس ده فى رحله السفارى ونظراته لمنه .. لحد ما حاول أنه يقرب من منه ويتصور معاها بالعافيه ومنه ضربته بحجر على الأرض .. ونظرات الانتقام ليهم وهو مسافر على بلده وهو خارج من الفندق .
الضابط ... هو فعلا حكايته غريبه وجايز يكون هو اللى خطف منه .. احنا لازم ندور عليه ونرجع الفندق اللى انتم كنتم نازلين فيه ونشوف اسمه وبلده ونشوف برضه بعدها كشوف الرحلات بتاعه المطار والرحلات الاخيره .. ممكن نوصل لحاجه .
جاسر .. يعنى حضرتك شايف كده ولا ممكن يكون كل ده كلام فارغ وهايبعدنا عن اللى احنا عاوزين نوصله اصلا .
الضابط ... والله جايز يكون صح وجايز لا ومش هاقدر اقول اى حاجه غير لما نرجع للفندق ورحلات المطار الاول .
حازم .. انا عندى احساس كبير أنه هو اللى خطف منه .. منه ملهاش أعداء والكل بيحبها.. ولا انا كمان ليا اعداء .. ومحدش يقدر يعمل كده فيها .
ريهام .. انا لازم اتصل بعمر اخو صلاح اكيد هايسعدنا . وكويس أنه اتنقل قريب هنا فى مديريه امن القاهره .
جاسر .. فعلا عندك حق يا حبيبتى .. وانا برضه هاحاول اكلم ناس اصدقائى فى الداخليه ممكن يوصلونا لاى حاجه .
فى مديريه امن القاهره.. وبالتحديد فى مكتب عمر اللى كان مشغول جدا فى موضوع الأمريكى ده اللى طلبه منه اللواء محمود عمار .
موبيله رن وكانت ريهام اللى بتتصل بيه .. وده اللى خلاه يستغرب من المكالمه دى لأنه عارف ان ريهام وجاسر لسه بيقضوا شهر العسل .
عمر ... اهلا ريهام .
ريهام ... اهلا يا عمر ازيك .
عمر .. الحمد لله بخير .. انتم رجعتم امتى من شهر العسل ؟؟ .. سحر ما بلغتنيش يعنى بوصولكم .
