مــن نــظــرة

الجزء الأول

#من نظرة،،،
الجزء الاول...

مالت وخلهة تميل چا شلي بيهة،،،
دنياي غبرة تصير مالت عليهة،،،،
ريم:كافي لخاطر الله ارحمني تعبت منك ومن سوالفك،متمل انت?????
يومية نفس المواضيع ترى عيب انت مو جاهل ويومية نحجي بهذا الموضوع....
احمد:اهوووووو انتي متملين من هاي المواضيع
كافي ترى اني مليت منج شكد نكدية صايرة
روحي شوفي نفسج شلون صايرة????
والله يا الله هم حاسب نفسي مزوج مرة...
ريم:صدك انت ميملي عينك غير التراب..
_________________________
كل هاي الذكريات مرت علية مثل شريط فلم كدامي ينعرض،اني استاهل كله من ايدي اني الي صدكت بيه ونطيته اهمية اكثر من اللازم،ظليت صافنة اذكر شكد طلاب وياية تمنوا اشارة مني وشكد طلاب وياية نفس الجامعة بس من غير قسم فاتحوني بموضوع الزواج بس اني طنشت الكل واقتنعت بأحمد الي هو طليقي جنت معمية بية وانغشيت بكلامه المعسول....
اكيد تحبون تتعرفون علية وع قصتي..
اني ريم حاليا عمري 22سنة مطلقة صارلي سنتين ماعندي اطفال،،،
عايشة وية اهلي ابوية وامي عايشين الله يحفظهم الي...
حاليا ابوية متقاعد جان عميد بالجيش امي ربة بيت
عندي خوات ثنين كبار مريم وميسلون مزوجات ومرتاحات الحمدلله اكيد بعد صراع معروف وية العيال وعندي 3اخوة خالد وسعد ومحمد مزوجين...
خالد الجبير عده 4ولد ومرته حامل ههههه كلش يحب الاطفال..
هو الوحيد الي طالع من البيت مأجر بيت بغير منطقة وعنده كاع بالفرع الي ورانة ديبنيهة حالته زينة ما شاءالله ضابط بالاستخبارات...
زوجته حنين حبابة مثله و وردة مال الله تحبنة وتمرلي دائما طلعني وتحاول تخليني اطلع من القوقعة الي اني بيهة....
اما سعد زوجته اسمهة سما كلش وكحة وحقودة تغار مني ومن حنين زوجة خالد وشالعة كلب سعد عدهة بنات3واقل مشكلة وتكول تكرهوني لان خلفتي بس بنات ابوية ضاج من المشاكل وشاف امي تعبت فحجة وية اخوية وكله يعزل حلا للنزاع وحتى نخلص من المشاكل طبعا هذا الحجي ورة مطلكت لان هي تخبلت لان امي دارتني ومخلتني امد ايدي بالبيت يعني علمود نفسيتي تعبانة وهيج شي...
واصغر اخوتي محمد عايش وية اهلي زوجتة هم خوش بنية اسمهة سوسن مالهة دخل بشي وممقصرة وية اهلي والبيت وامي هم تعينهة لان هي اصلا متحب تكعد واهلي كلش يحبوهة ابوية ساعد محمد بشغله ،
جانت اكو قطعة ارض يمنة بالمنطقة معروضة للبيع ابوية اشتره نصهة وبناها سوبر ماركت لمحمد وسجلهة بأسمه ...عده ولد2وبنات2...
وبعد متقاعد ابوية كام يساعده بالماركت يوكف وياه وهيج شي لان حبيبي الله يحفظه الي
ميحب كعدة البيت تعرفون بعد رجل عسكري...
______________________________
اما عن قصتي...اقصد معاناتي بدت من جنت طالبة جامعية مرحلة اولى تقدملي ولد يصير اخو طالبة وياية بالقسم بس مو صديقتي بينه سلام وبس
اخوهة الي هو طليقي احمد تعرف علية من جان يوصل اخته ويرجعهة للدوام وبعد محاولات وحجي
اقتنعت بيه...
بس اهلي مجانوا مقتنعين بيه بس ابوية وخالد اقتنعوا لقناعتي...
المهم صارت القسمة بالبداية جانت حياتي وعلاقتي وية احمد زينة بس حسيت من اول يوم اهله مراح اتوالم وياهم بس قنعت نفسي ان هم ذولة العيال والحياة متخلى من المشاكل...
بس الي صدمني احمد بعد مرور3اشهر ع زواجنة
اكتشفته يحاجي بنات ويطب ويطلع ويصرف عليهن
وكام يقطع عني المصرف واحتياجاتي وغراضي وملابسي كلهة صارت ع اهلي وابوية الله يحفظة الي ابد مقطع عني شهريتي حتى من ازوجت كل راس شهر يدز علية وينطيني شهريتي،،،
طبعا يسألوني عن احمد وشلونه وياج بس شريد احجي وهمة خطية كلمن لاهي بحياته وهمومه
وبعدين شلون اتجرأ اشكي واني الي جبتهة لنفسي
ومرت الايام والاشهر وصار سنتين ع زواجنة
وكثرت المشاكل ومصار عندي طفل
وكاموا يعيروني بالطالعة والنازلة ع فوك ممتحملج
وانتي عاقر وميعترفون ان ابنهم غلط..
ومرة جنت رايحة لاهلي وطلعنة اني وابوية وامي ومحمد وعائلته بسيارة ابوية وخالد وعائلتة بسيارته رحنة لمطعم تعشينة وبعدين نزلنة يم المرطبات ناكل موطا جنت كاعدة داضحك واسولف
بس انتبهت ع سيارة واكفة نفس سيارة احمد
ركزت اكثر شفت احمد و وياه وحدة شعر اشقر ومكياج والضحك وهو حاضنهة من جتفهة
ويوكلهة موطا غصيت بالحجي لابية احجي ولابية اسكت،،
صح بينة مشاكل وممنسجمين وادري بيه عده بنات
ويطب ويطلع بس من شفته بعيني شي يختلف
وشعور يختلف حركة دم وقهر مو طبيعي
حسيت نفسي بذيج اللحظة شكد وحدة مذلولة
وما اسوة فلس،،لا اراديا نزلت الدموع بدون صوت
خطية اهلي تخبلوا وظلوا يسألون شبيج يمعودة
يريدون احجي بس اني وين المنظر الي كدامي كافي.....
محسيت غير واني بالبيت مددة واهلي خطية فوك راسي والخوف ماكلهم اكل...
كمت لحيلي:لاتخافون مابيه شي والله بس...
خالد:لاتعبين نفسج حبيبتي وديرين بال ميسوة قندرتج...
ريم:عرفت ان اهلي دروا اني شفت احمد واكيد همة هم شافوه.....
كمت لحيلي كعدت امي خطية كاعدة ومبين عليهة باجية...
ومرت محمد وسن شايلة كلاص عصير:هاج حبيبتي
شربي حتى ترتاحين لاتشيلين هم خليهة يم ربج...
ريم:اخذت كلاص العصير منهة،تسلمين اشكرج
شفت ابوية سودة علية كاعد ع القنفة ومقهور
كمت لحيلي شبيك حبيبي ابوية ليش هيج مقهور???
كامل(ابوية):كام لحيله وحظني لج يابوية امحي من ع الوجود الي يفكر يغثج والله لخليه يندم ع كل لحظة فكر يأذيج بيهة انتي بس ارتاحي ولتشيلين هم شي ولاتفكرين اصلا بالموضوع...
ريم:الله كريم بابا..وراها صعدت لغرفتي القديمة جانت ع حطتهة امي تنظف بين فترة وفترة خلتها النة عود من نجيهة خطار نحط غراضنة وهاي السوالف....
امي صعدت وراية خطية لايبة روحهة ،،،
دعاء(امي):هاحبيبتي شلونج هسة???
ريم:كعدت ع الجرباية وهي يمي دمعت عيني
وامي رأسا جرتني لحظنهة وتمسد ع راسي...
امي:لج يمة لاتكطعين كلبي عليج خل يولي والله
ميستاهلج وربج فضحه كدامنة كلنة حتى يخلصج منه
ريم:ماما ما اكدر ارجعله بعد ولا اكدر اشوفه بلغي بابا بهذا الشي....
امي:اهدئي يا عيوني انتي واطمني ابوج واخوتج
ناويله نية كشرة بس يلزموه...
هسة انسي كلشي وارتاحي وذبي حملج ع رب العباد سبحانه كفيل يزيل كل همومج واحنة اهلج
ان شاءالله كلنة وياج شحده الي يدنالج ويأذيج..
ريم:حضنتهة حيل ماما اني والله احبكم الله يخليكم
الي....
امي:بدموع لج يمة والله نحبكم ونظل شايلين همكم للموت ولد ولا بنية...
ظليت نايمة بحضن وما ادري شوكت غفيت محسيت
غير الصبح الشمس طالعة خطية امي منيمتني بمكاني عدل جريت التليفون باوعت الساعة
حيل هاي شكد نايمة ساعة12:40الظهر والنوب
كل هذا النوم وبعدني مكسرة اريد ارجع انام
وشفت احمد حارك التليفون مكالمات ورسايل:
وحدة منهن يهددني اذا ما اجاوبه يجي ياخذني غصب...
اللخ يهددني يطلكني ،،وغيرهة يجيب مفرزة من الشرطة علية عود اهلي حابسيني ميخلوني ارجعله،،،وووووووو كومة حجي فاضي كلت لازم انطي خبر لابوية اخاف كلشي يسوي....
نزلت وبيدي التليفون صار بوجهي ابوية طالع من الهول...
ابوية:بضحك هلة يابة شنو هالنومة غطيتي ويكرص بخدي???
ريم:ذبيت روحي بصدره والله بابا محسيت غير انتو تكعدوني....
ابوية:رفع راسي وضحك وحجة تعالي ام خالد تعاي شوفي بتج....
امي:جيتك ليش كعدت الخاتونة وجتي تضحك صباح الخير يمة شلونج شلون صبحتي فدوة لكلبهة لازمة راسي وتدور بعيوني ع الجواب....
ريم:الحمدلله يوم احسن...
ابوية:بتج تكول ليش مكعدتوني...
امي:يااااا صدك عود متذكرين من حجيتي ويانة???
ولج مرة اني جيتج وابوج هم مرة والنوب خلينة وسن 3مرات صعدتلج وانتي ع نفس الجواب...
روحوا نعسانة ما اريد اكعد عاد ابوج كال مدام مبيه شي خل تكعد براحته....
ريم:ضحكت ع روحي،،،وسألني ابوية دك احد عليج،،،تفضل التليفون شوف سجل المكالمات وطب ع الماسنجر والفايبر وشوف البلبل وتغريداته....
ضحك ابوية:جيبي وروحي اكلي شي خفيف حتى لاتنحرمين من الغدة...
غسلت وكعدت بالمطبخ سوسن فدوة لعينهة محضرتلي جاي ولفة جبن...
ريم:تسلمين سوسة تعبتج...
سوسن:بلة اكلي وبلا لغوة يلة ولج شلون دولمة سويت من هاي التعجبج....
ريم:عاشت ايدج مقدما اعرف اكلج طيب،،،اكلج
محمد شلونه خما ظل معصب ع الصار???
سوسن:والله ياريمة عمي لزمه من الصبح كله هدي وحتى لو شفته لو اجاك اضبط نفسك حتى لايضيع حق اختك وحقنة وخالتي حجتله ع كلشي جنتي
تعيشي وياه النوب تخبل بالزايد منه،،،
ريم:زين هو شنو الصار البارحة???
النوب الفطيرة ظلت تضحك علية...
سوسن:بربج ريمة محسيتي ع شي???
ريم:لا والله من شفته يم المرطبات محسيت غير
اني بالبيت وانتو فوك راسي....
سوسن:ياااااااا ولج اخذناج للسيارة وذبينة عليج مي
وكعدتي حجيتي ويانة ونمتي،،،
عمي كال عوفوهة هاي اثر صدمة خل يتوازن دماغهة ومن كيفهة هسة تصحى وصدك ربع ساعة شوية ازيد تفرمتي وكعدتي،،،،
بس شنو عد عيناج محمد وخالد بسطوه كدام
صاحبته وشكو هدومه علية وشمروه بالشارع
والحرس رادوا يدخلون وخالد طلع الباج وهمة اصلا
طلعوا مداومين يم عمي قبل رادوا همة هم يسحلوا
بس عمي كلهم عوفوا ميسوة.....
ريم:ظليت صافنة وضحكت تدرين سوسن فرحت بحجيج....
سوسن:ادري ياريمة والله الصراحة اني وخالتي
جنة حاسين بيج من جنتي تجينة شلون تنطلقين
مال وحدة محبوسة ونطوهة افراج....
اني ضحكت وشربت الجاي..
سوسن:بس ريمة ترى انتي عايشة شغلات وية
احمد ازيد من الي حجيتيه....
ريم:يعني شنو مفهمت شتقصدين???
سوسن:قصدي الي حجته خالتي مو كل الواقع
لا هذا جزء بسيط بينما الي مأذيج وماس نفسيتج
وكرامتج اكبر،،،،،،
ريمة لاتسكتين احجي كلشي لخاطر نفسج، كرامتج، اهلج ،،،،،،
ترى اذا بس ع الي حجيتيهن ترى هاي تعتبر بسيطة
وتدخل بيهة خواطر وشيوخ ويرجعج بس اذا حجيتي
الي دتعيشيه بحذافيره لا كلشي يختلف....
ريم:ظليت اضحك حتى اضيع الموضوع بس......
سوسن:ترى لا عبالج من جنتي تجين متأذية براسج
لو الزراكات عبالج عبرت علية لا وداعتج جنت شبه متأكدة وجنتي متنطين مجال،،،،
والبارحة كدرت اعرف شنو سببهن وحتى اثبتلج ،،،،،،
جان بضربج ويأذيج حتى حاجته ياخذهة غصب وبضرب هم....
ريم:تخبلت كمت لحيلي وبصياح شمدريج شلون
عرفتي كل هذا???
سوسن:ع كيفج ريمة وداعت جهالي مالي اي قصد او غرض وياج بس البارحة جان تليفونج بالهول
وانت ومحمد تشابه تليفوناتكم ظلت تجي رسايل ع
الماسنجر جريته عبالي تليفون محمد والله وداعت جهالي وبوقتهة راسا جتي عيني ع محادثات مال بنات وسألي محمد ردت اتعارك وياه خصوصا من قريت المذكرات المحتفضة بيهن..
كتله منو هاي وشنو عاد ضحك علية وكلي لج هذا
تليفون ريمة وقارنت مذكراتج بالي جنت اشوفه
بيج....
فلاتزعلين مني والله صار بين ايدي بالغلط
وشمدريج يمكن اشارة من رب العالمين حتى متسكتين بعد....
في بعض الاحيان نلتجأ للسكوت كأضعف حل ،،،
في تناسي الواقع والذهاب بالخيال،،،
بعيدا كي ننساه ما عشناه،،،،يتبع