#منقول ...قبل عرسي باسبوع ... صار معي موقف غيرلي كل حياتي وخلاني الغي العرس واتراجع ....
يومها مرضت ستي كتير ، ورحنا على المستشفى .. أول ما وصلت لفيت جدي قاعد جنب باب غرفة العناية المشددة وعم يبكي.. قعدت جنبو ولأول مرة بحياتي بشوفو هيك ... قلتلو: عم تبكي يا جدي ! مسح دمعتو وقلي: ستك تعبانة كثير .... اتطلعت فيه وقلتلو: نشالله رح تطلع بالسلامة ادعيلا ... قلي: هي قطعة من القلب جوا .... أنا طبعا استغربت يعني جدي بالعادة شخص صارم بشكل ومن جيل أيام زمان الي كنت مفكرة انو ما عندن رومانسية وحب متلنا حبيت غير الجو وهيك وخليه يحكي
قلتلو: جدي أنت كنت تعرف بنات غير ستي ... ضحك وقلي: يووووه مليون بنت كانو بيحبوني لاني حليوة وغنيي أنا هون ضحكت وقلتلو: يعني ستي مو حلوة !
جلّس قعدتوو وقلي: ستك روحا حلوة، عيونا قصة، بتعرفي يوم كنت بدي ياها شفتا وهي رايحة من الأرض، ماسكة اخواتا بايدا وعرقها على جبينها وبتبتسم ! ابتسامتا خلتني حبا ...
قلتلو: طيب اسألك سؤال ... كم مرة اتقاتلت انت وياها ؟! وكيف لليوم هيك بتحبو بعض
قلي: يوووووه ياما تقاتلنا .... بس ولا مرة قللنا من احترامنا لبعض ....
بهالوقت اجا الدكتور .. جدي قام وقال: طمني شو صار معا؟ قلو: الحمدلله ، هلا هي منيحة _منقدر نفوت نشوفاا؟ *طبعا بس لا تتطول...
دخلت معو لعند ستي وجدي كان متل الولد الصغير الي متلهف لشوفة امو ... والأحلى من هيك كانت نظرات ستي إلو اصدق من هيك نظرة حب بحياتي ما شفت مسك ايدها وقلا: هيك يا قطعة من القلب بتتعبي وبتتركيني لاول مرة لحالي ! ضحكت ستي وقالتلو: ما أنت تركتني قبل يوم عمليتك ! قلا: يعني هيك اخذتي بتارك ... شدت عأيدو وقالتلو: لا ما رح اتركك بالمرة ....
طول هالوقت وأنا مستغربة كيف علاقة عمرا تقريبا 45 سنة ولساتا بهالقوة والحب هاد ! برغم كل الظروف الصعبة الي مرو فيها ....
بهالوقت اتصل خطيبي، كان معصب لاني ما عم رد عليه من الصبح واول ما فتحت الخط ئلي شو وينك يا حقيرة ! انا بالعادة كنت بمشيلو ياها لانو حبيبي قبل ما يكون خطيبي بس تذكرت جدي لما قلي الاحترام اهم شي ، وكيف قلي انو علاقتن استمرت بسبب هالشي ....
قلتلو لخطيبي: لا تغلط عليي ... رد علي: شو ؟؟ من ايمتى عندك كرامة!
بس حكى هالكلمة عصبت بزيادة وسكرت الخط ... طبعا خلال ١٠ دقايق كان باعت ١٠٠ رسالة وكلهم بهادل وسب وعلى شو شايفة حالك ومن هالحكي ! وبهالوقت كنت سرحانة بجدي الي ماسك ايد ستي وهي نايمة وبيلحمس ع راسا وبيبوس ايداا ... طلعت من عندن والدموع بعيوني .. بعدما احترت وبلشت فكر شو هو الحب !! هو عنجد كلمة بحبك الي بيحكيلي ياها خطيبي عالطالعة والنازلة بس تصرفاتو نهائياً ما بتدل على هالشي ولا الحب نظرة جدي لستي ! خوفو عليها حبو الها ... وكيف هالعمر قضوه مع بعض باحترام !
وصلت عالبيت ولسا خطيبي عم يبعت مسجات ويبهدل ... نمت ... وفقت الصبح وقلتلن ما بدي كمل معو ... الكل نصددم ... الكل عارضني ... بس بالنهاية أنا اخدت قراري وما رح اتراجع ! فسخت الخطبة وحسيت انه احسن قرار اخدتو بحياتي
اليوم وأنا قاعدة مع زوجي ، اجت بنتي تقلي: ماما بحبك !😍 قلتلا شو في؟ قالتلي: بابا دائما بيحكيلي انو بيحبك ولهيك انت بتحبيه !
عرفت شو يعني الحب والاحترام ... شو يعني تتزوجي الي بدك تختيري معو ... الي بدك اولادك يكون ابوهن قدوة بكل تصرفاتو ! اللي ما رح تخافي من ابوهن يجرحك او يقلل احترامك قدامهم... 💛
شو رأيكم بهالكلام؟؟
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
