✿ الحياة أقدار❇✿ باللهجة الجزائرية ❇

😍وهران😍

.هوارية:نوضي يا البقرة خرجي الزبل قاع النهار و نتي راقدة

. ياسمين: اااي مااا حمبووك خليني نرقد راني عيانة قولي لزينو يخرجه

هوارية: قتلك نوضي زينو صغير يخونوه ولا بعيد الشر على ولدي.

ياسمين: بففف تحسب غي نتي لي عندك ولد..

هوارية: بلعي فمك خيرما نقولها لبوك ميخلصلكش لاكونيكسيون.

ياسمين: صايي نضت غي بلعيه...(تحت نيفها)..

هوارية: شاوالا ؟؟

ياسمين: والوو والوو..

المهم نضت على سواد سعدي نخرج الزبل و أنا هاودة يخرجلي حشيشة جارنا من حيث لا أدري...بييي لسقة هاد البنادم.

حشيشة :وييي ياسمينتي صافا.  

ياسمين: اللولة قتلك داك العام متزيدش تقولي ياسمينتي الزاوجة راني خير منك الثالثة نتا وين نروح تخرجلي كي الشاديي...

حشيشة: اااي ياسمينتي مسقاش تنشعيني أنا جاي عندك نسقسي عليك و نتي ديريلي كيماهاك دوك نزعف..

ياسمين: ااي حشيشة حمبوك روح خطيني مانيش في عقلي دوك نقولك كلمة قد راسك..

حشيشة: صاييي راني رايح بلعمي مشي مليح قاع فيكم الخير..

ياسمين: خلي خيرك عندك..

قست الزبل وجيت موليا نكمل رقادي..دخلت لدار رحت لشومبرتي و بلعت الباب بالمفتاح و أخييرا ماكانش ازعااج ...غير حطيت راسي و يصوني التلفون الكلب ..بففف درك منرقدش أنا ولا كيفاه..ريبونديت.

ياسمين:درك أنا منرقدش معاكم ليوم ولا كيفاه.!!

اَسيا:الناس يقولو السلام نقعد غي نربي فيك نتي.

ياسمين:صحا سمحيلي ماما ...شاخصك.

اَسيا:قوليلي يادرا شادرتي فيها..؟؟

ياسمين:كيفاه شادرت فيهاا.؟؟

اَسيا:بففف نتي باغيا تهبليني ...هدرتي معا والديك علا القرايا في اَلجيي؟؟

ياسمين:ويااا حوجييانا قاع نسيت.

اَسيا:نوضي درك قوليلهم باسكو بويا قالي متروحيش كون متروحش معاك ياسمين.

ياسمين: صحا صحا راني نايضة .

اَسيا:خفي روحك و كي تكملي عيطيلي .